Read mumuye Luka 1 Bible Online

Luka 1 - mumuye bible

Luka 1

¹N jee mɔɔ nyaa Dabang Tiyofilu. Mɔɔ zi tɔ nɛɛ zang dɔɔli ri bee vuu ɓɔɔ zang palɛ ka teteng ɓuru tɔ,

²naa ɓɔɔ ruu tãa ka nyaa zang ɓɔɔ ri rang yee Laa ɓɔɔ ri zi naa ɓɔɔ vuu keɓe gaayu nɛɛ jĩng ɓarɛ ɓɛɛ.

³Ka ruu nɔngkɔ, n pɛ̃ɛrɛ, n tɔɔ naa n bèé mɔɔ vuu keɓe, gbete, gbete, tɔ̃ɔ tɔ̃ɔ, wukɔ tɔ̃ɔ, ka ruu ɓɔɔ, n tãa tɔ, n ti kãa dĩiri ruu keɓe tɔ tɔ̃ɔ tɔ̃ɔ ɓɛɛ.

⁴Tɔ̀ɔ, mɔ́ɔ zi ruu ɓɔɔ niizang ka yuu vuu ɓɔɔ zang kɔɔ mɔɔ tɔ ɓɛɛ kati.

⁵Ka diki ɓɔɔ Hiridu ro kpanti ka tipi Yahudi, zang ɓɔɔ dɔɔ vuu ka Gãa Laa ɓɔɔ kagn, zang ɓaa nung ɓiɓɛ nɛɛ Zakariya. Zakariya ɓi ka teteng zang vàá Abiya, ɓɔɔ ri dɔɔ vuu ka Gãa Laa, ɓɔɔ zang ɓaa ri nɛɛ nung Abiya ɓɛɛ. Yɔɔ keɓe gee jaa soro ka zɔ̃ng Haruna ɓɔɔ bɛ̀ɛ́ wukɔ zang bang zang ɓɔɔ ri dɔɔ vuu ka Gãa Laa ɓɛɛ. Zang ɓaa jaa soro bìí nɛɛ Alisabatu.

⁶Zakariya nɛɛ Alisabatu ri zang tɔ̃ɔ kɔ nandon, ka ruu ɓɔɔ, ri ɓaa shoo ka nyaa ɓɔɔ Laa dang ɓɛɛ nandon.

⁷A ri yi jaa kagn kpang, ka ruu ɓɔɔ, Alisabatu bɛ̀ɛ́ shìi tɔɔri ɓɛɛ. Sáa ɓarɛ bang tɔ kɔ nandon.

⁸Diki ɓɔɔ kagn Zakariya palɛ shonang ɓiɓɛ kana Gãa Laa, ka ruu ɓɔɔ, ɓi lɛ̀ɛ́ diki shonang palɛnang zang vàá Abiya kɔ ɓɛɛ.

⁹Zang Abiya ri zɔ̃́ng Zakariya, nɛɛ wu daa dɔ̀ɔ Laa vuu ɓɔɔ á sɛ̃ɛ tɔ̃ɔ tɔ̃ɔ ɓɛɛ ka Gãa Laa. Ka ruu ɓɔɔ, ɓɔɔ ri shaa laa naa ɓasidi, laa yi wukɔ ɓɛɛ.

¹⁰Zakariya daa tɔ ka yeti Gãa Laa ka laa ɓɔɔ zang dɔ̀ɔ́ Laa vuu ɓɔɔ á sɛ̃ɛ tɔ̃ɔ tɔ̃ɔ ɓɛɛ. Zang dɔɔli ɓɔɔ ri kpalɛ zɔɔ ka biling ri gaa Laa kana.

¹¹A zang nyaa shonang Laa ɓɔɔ ka lapa naa nwáng nyaa ka bii Zakariya, a shii ka nakn ka nɔng ɓɔɔ zang dɔɔ Laa vuu ɓɔɔ á sɛ̃ɛ tɔ̃ɔ tɔ̃ɔ kagn ɓɛɛ.

¹²Ɓɔɔ Zakariya zi wu, bii soo wu, a kaa vɔrɔ.

¹³A zang nyaa shonang Laa kɔɔ wu tɔɔ, “Mɔ́ɔ kaa vɔrɔ kpang Zakariya, Laa tãa vuu ɓɔɔ mɔɔ gaa ɓɛɛ tɔ. Soro ɓaaɓɛ Alisabatu yi mɔɔ jaa ditɔ zang varɛ, mɔ́ɔ ɓaa nung ɓiɓɛ nɛɛ Yɔhana.

¹⁴Mɔɔ naa tãa tĩnang ditɔ ka yeti ɓaaɓɛ dɔɔli. Zang dɔɔli ri ti naa tãa tĩnang ditɔ jong dɔɔli, ka ruu ɓɔɔ zang yi wu ɓɛɛ.

¹⁵Náa nwang zang bang ka tĩng Kpanti Laa. Naa ɓoo sàa ɓi kpang. Ti naa ɓoo vuu ɓɔɔ zã katɔ ɓɔɔ palɛ zang ɓi kpang. Suru Laa naa gaayu nwannang ka bii ɓiɓɛ bɛ̀ɛ́ wu doo ka yeti niiɓɛ.

¹⁶Wukɔ naa sɔɔrɔ zang Isirela dɔɔli ri naa dũng Kpanti Laa ɓarɛ.

¹⁷Wukɔ naa sɔ̀ɔ́ Yeesɔ tĩng, ka ruu ɓɔɔ, Laa naa a wu naa bannang, nɛɛ suru ɓiɓɛ, naa ɓɔ̀ɔ́ Iliya ɓɛɛ. Wu ti shing daa wujɛ, ri kasɛ ruu wujɛ ɓarɛ. Wu ti shing zang ɓɔɔ ri ɓaa shoo ka nyaa Laa kpang, ri ɓaa shoo ka nyaa Laa. Wu ti shing zang, zang nwang zang ɓɔɔ ri kpalɛ bii tɔ nɛɛ ri dũng kaa Laa ɓɛɛ.”

¹⁸A Zakariya hɛ̃ɛ zang nyaa shonang Laa tɔɔ, “N zi bɛ̀ɛ́ nɛɛ vuu keɓe niizang viya? N kaa dabang, soro mɛɛ ti kpɛ̃ɛ tɔ.”

¹⁹A zang nyaa shonang Laa ɓɔɔ ka lapa kasɛ wu nyaa tɔɔ, “Nkɔ Jibirilu ɓɔɔ shíi ka tĩng Laa ɓɛɛ. Laa shong m nɛɛ n naa rang yee nɛɛ mɔɔ, nɛɛ n kɔɔ mɔɔ ruu tɔ̃ɔ keɓe.

²⁰Ɓaa shoo ta mɔɔ tãayi, mɔɔ nwang kaa zang ɓɔɔ nyaa nɔɔ katɔ ɓɛɛ. Mɔɔ rang yee takpang diki ɓɔɔ vuu keɓe naa palɛ a nɛɛ mani, ka ruu ɓɔɔ, mɔɔ tà yee ɓɔɔ n kɔɔyi ɓɔɔ nwáng ditɔ ka diki ɓɔɔ Laa kasɛ ɓɛɛ kpang ɓɛɛ.”

²¹Zang ɓɔɔ ri ka biling, ri ti gã Zakariya ɓi kana. Ri ti rɛ̃rɛ kana, ka ruu ɓɔɔ, knti Zakariya bee tɔ ka yeti Gãa Laa ɓɛɛ.

²²Ɓɔɔ nwang tɔ ka biling, kasɛ nɛɛ wu rang yee nɛɛ zang, zunung yee rannang takpang. A zang yisi ka yeti ɓarɛ nɛɛ Zakariya zi vuu ɓɔɔ tɔ ka yeti Gãa Laa. A rang zang yee kaa nɛɛ naa. A nwang zang ɓɔɔ nyaa ɓiɓɛ nɔɔ katɔ ɓɛɛ kati.

²³A diki ɓɔɔ Zakariya palɛ shonang ka Gãa Laa naa waa nyaa, a naa gbãayu ka gãa ɓiɓɛ.

²⁴Diki kaɓa naa ɓa tɔ, Alisabatu, Zakariya ɓeeso naa tuu jaa kati. Alisabatu waasɛ yuu ɓiɓɛ shala maani. Ka ruu ɓɔɔ, kɔɔyi tɔɔ,

²⁵“Kpanti Laa kɔ palɛ m vuu keɓe, kɔsɔ m vuu ɓɔɔ tuu m yusɛ̃ɛ ka teteng zang tɔ kati.”

²⁶Shala ɓɔɔ Alisabatu tuu jaa, daa tɔ mangbete, Laa naa shong zang nyaa shonang ɓiɓɛ ɓɔɔ ka lapa ɓɔɔ zang ɓaa wu nɛɛ Jibirilu ɓɛɛ, ka gari ɓɔɔ zang ɓaa nɛɛ Nazara ka tipi Galili.

²⁷Laa shong wu ka bii ja soo ɓɔɔ roo varɛ gn gn kpang, ɓɔɔ Yusufu zɔ̃ng Dawuda gee tɔ ɓɛɛ. Zang ɓaa nung ja soo kaɓa nɛɛ Marayamu.

²⁸Zang nyaa shonang Laa ɓɔɔ ka Lapa arɛ naa kɔɔ wu tɔɔ, “N jee mɔɔ nyaa, zang ɓɔɔ Laa zɔ̃ng ka teteng zang soro ɓɛɛ. Laa ɓi nɛɛ mɔɔ ning.”

²⁹Ɓɔɔ Marayamu tãa naa weɓe, ruu kaɓa kpãa wu ka yeti dɔɔli. Marayamu gaa tɔɔsung rɛ̃rɛnang ka yeti ɓiɓɛ tɔɔ, ɓi lɛ̀ɛ́ nyaa jeenang vi nɔngkɔ viya?

³⁰A zang nyaa shonang Kpanti Laa kɔɔ wu tɔɔ, “Mɔɔ kaa vɔrɔ kpang Marayamu, Laa tãa tĩnang ɓaaɓɛ dɔɔli.

³¹Mɔɔ naa tuu jaa ditɔ, mɔɔ yi zang varɛ. Mɔɔ naa ɓaa nung ɓiɓɛ nɛɛ Yeesɔ.

³²Naa nwáng zang bang. Zang naa ɓaa wu nɛɛ Jaa Kpanti Laa. Kpanti Laa naa shing wu Kpanti ditɔ naa dabang ɓiɓɛ Dawuda.

³³Naa roo Kpanti ka yuu zang Yahudi dòndòng. Kpanti ɓɔɔ wu naa rooyi, naa waa nyaa ɓi kpang.”

³⁴A Marayamu hɛ̃ɛ zang nyaa shonang Laa tɔɔ, “Wee n roo varɛ gn gn kpang ɓee, vuu keɓe naa nwáng biya?”

³⁵A zang nyaa shonang Laa kɔɔ wu tɔɔ, “Suru Laa naa a ditɔ ka bii ɓaaɓɛ. Náa bannang Laa naa zuu mɔɔ ditɔ. Ka ruu nɔngkɔ, jaa ɓɔɔ vuu shi kpang ɓi ka yeti ɓiɓɛ kpang kɔ mɔɔ naa yi ɓee, zang naa ɓaa wu nɛɛ Jaa Laa.

³⁶Zirɛ ɓaazung Alisabatu ɓɔɔ kpɛ̃ɛ tɔ, tuu jaa tɔ, ka wee wu kpɛ̃ɛ tɔ ɓee. Alisabatu ɓɔɔ zang tɔɔ shii katɔ, tuu jaa tɔ shala daa lɛ̀ɛ́ mangbete.

³⁷Vuu ɓɔɔ kpãa Laa palɛnang ɓi kagn kpang.”

³⁸A Marayamu kasɛ nyaa tɔɔ, “Laa kɔ mãa m, vuu keɓe wu nwáng ta ka yuu mɛɛ naa ɓɔɔ mɔɔ kɔɔ ɓɛɛ.” A zang nyaa shonang Laa daayi, yaa wu kati.

³⁹Ka diki kaɓa, Marayamu kpalɛ bii, a seepaa, làabìi daanang ka gari ɓɔɔ ka tipi Yahudi ka nɔng ɓɔɔ kɔpɔ kagn gaagaa ɓɛɛ.

⁴⁰Marayamu naa shɛ̃ɛ gari kaɓa tɔ, a naa daa ka gãa Zakariya, daa jee Alisabatu nyaa kati.

⁴¹Ɓɔɔ Alisabatu tãa nyaa ɓɔɔ Marayamu jee wu hn, jaa ɓɔɔ wu tuu ka yeti ruutu bii. A Suru Laa naa arɛ nwang ka yeti Alisabatu,

⁴²a Alisabatu mɛɛ nyaa ka lapa nabm tɔɔ, “Ka teteng zang soro ɓɔɔ ka koolaa keɓe nandon, zang ɓɔɔ Laa a wu tĩnang tãanang ɓa ɓɔɔ wu a mɔɔ ɓɛɛ kagn kpang. A Laa ti á jaa ɓɔɔ mɔɔ naa yirɛ tĩnang tãanang tɔ.

⁴³A ka ruu vi Laa yaa mɔɔ nàá Kpanti mɛɛ, nɛɛ mɔkɔ mɔɔ a ka bii mɛɛ jong viya?

⁴⁴Ɓɔɔ n tãa nyaa ɓɔɔ mɔɔ jee m hn, jaa ɓɔɔ ka yeti mɛɛ tantɛ bii ruutunang. Ka ruu tĩnang ɓɔɔ wu tãa ɓɛɛ.

⁴⁵Tĩnang tãanang ɓi ɓɔɔ ɓaaɓɛ ɓɔɔ mɔɔ shing danggn nɛɛ vuu ɓɔɔ Kpanti Laa kɔɔyi naa nwang ditɔ naa ɓɔɔ Laa kɔɔ ɓɛɛ.”

⁴⁶A Marayamu kɔɔyi tɔɔ, “N dɔɔ Kpanti Laa kana yeti mɛɛ.

⁴⁷Suru bii mɛɛ tã̀á tĩnang ka ruu Laa ɓɔɔ ta yuu mɛɛ ɓɛɛ.

⁴⁸Ka ruu ɓɔɔ, gn mɛɛ kɔng wu ɓɔɔ n jaafoo ɓiɓɛ ɓɛɛ. Vuu ɓɔɔ gaayu lɛɛkɔ keɓe, zang koolaa keɓe nandon nɛɛ zang koo jaa knti ri kɔɔ ditɔ nɛɛ Laa a m tĩnang tãanang m tɔ.

⁴⁹Ka ruu vuu bang, bang ɓɔɔ Laa ɓɔɔ wukɔ bang pàlɛ̀ m ɓɛɛ Wukɔ Laa, shi kpang ɓi kagn bii ɓiɓɛ kpang.

⁵⁰Gn zang ɓɔɔ ri a wu bannang, ɓɔɔ ri alɛ ka koo keɓe nandon kɔng wu katɔ.

⁵¹Pálɛ́ vuu bang bang tɔ, nɛɛ naa bannang ɓiɓɛ. Tántɛ́ vuu ɓɔɔ zang ɓɔɔ ri tuu yuu ɓarɛ dɔɔli ri rɛ̃rɛ ka yeti ɓarɛ ɓɛɛ tɔ.

⁵²Sɔ́ɔrɔ̀ rɛɛ kpanti bang, bang yuu ka dii. Ti shing zang ɓɔɔ ri sòo yuu ka dii ri nwang zang bang.

⁵³Á zang ɓɔɔ vuu ka naa ɓarɛ kpang, vuu tɔ̃ɔ tɔ̃ɔ tɔ gaagaa. A sɔ́ɔrɔ̀ zang ying naa waati.

⁵⁴A ti kpaa danggn nɛɛ wu naa yǐ jaafoo ɓiɓɛ zang Isirela naa ka bii,

⁵⁵naa ɓɔɔ wu a rɛɛ daa ɓuru nyaa ka tĩng ɓɛɛ. Nɛɛ gn dabang ɓuru Ibirayi nɛɛ zɔ̃ng ɓiɓɛ, naa kɔng wu sasak koo naa waa nyaa nɛɛ mani.”

⁵⁶Marayamu nwang nɛɛ Alisabatu shala taati, a naa gbãayu daa gari ɓiɓɛ.

⁵⁷Diki ɓɔɔ Alisabatu yí jaa kagn naa arɛ, a yi jaa kaa zang varɛ.

⁵⁸A zang nyaa gãa ɓiɓɛ nɛɛ rɛɛ ɓeezung ri tãa nyaa tɔɔ Kpanti Laa pàlɛ̀ Alisabatu tɔ̃ɔ tɔ, a ri dɔɔ bii kaa jong.

⁵⁹Alisabatu yi jaa tɔ diki daa mantaati, a zang arɛ nɛɛ zang naa yèé jaa kaa shaa. A zang nɛɛ zang ɓaa jaa nung kaa nɛɛ Zakariya ka nung diiɓɛ.

⁶⁰A nàá jaa kasɛ kpang. Nàá jaa tɔɔ zang ɓaa nung jaa nɛɛ Yɔhana.

⁶¹Ri kɔɔ Alisabatu tɔɔ, “Zang ɓaaɓɛ ɓɔɔ zang ɓaa nung ɓiɓɛ nɛɛ Yɔhana kagn kpang.”

⁶²A zang rang daa jaa yee kaa nɛɛ naa, nɛɛ wu kɔɔ zang nung ɓɔɔ zang ɓaa jaa nɛɛ mani ɓɛɛ.

⁶³Zakariya kɔɔ zang nɛɛ naa tɔɔ, zang a wu vuu ɓɔɔ zang bee vuu kagn ɓɛɛ. A bee kati nɛɛ, “Nung ɓiɓɛ ɓi Yɔhana.” Ɓɔɔ zang zi naa weɓe zang piti ri mã naa ka danggn.

⁶⁴A nyaa Zakariya puu kati, gaa tɔɔsung yee rannang, a dɔɔ Laa.

⁶⁵Ɓɔɔ zang nyaa gãa ɓarɛ ri zi naa weɓe, bii kaa ri vɔrɔ nandon. A zang ri rang ruu keɓe ka tipi Yahudi ɓɔɔ kɔpɔ kagn dɔɔli ɓɛɛ nandon.

⁶⁶Zang piti ri tãa ruu keɓe, ri rɛ̃rɛ ka yuu ɓiɓɛ. Ri tɔɔ jaa keɓe naa nwang ɓi lɛ̀ɛ́ zang kiya? Ka ɓɔɔ ri zi tɔ nɛɛ Laa ɓi nɛɛ wu ning ɓɛɛ.

⁶⁷A Suru Laa a ka bii Zakariya daa Yɔhana, a Zakariya kɔɔ zang yee Laa kati tɔɔ,

⁶⁸“Ruu dɔ̀ɔ Kpanti Laa ɓɔɔ wukɔ Làá zang Isirela ta, ka ruu ɓɔɔ arɛ yi zang ɓiɓɛ naa ka bii, a ti ta yuu ɓarɛ tɔ ɓɛɛ.

⁶⁹Ti a ruu zang ɓɔɔ lakɛ dɔɔli tɔ, zɔ̃̌ng zang shonang ɓiɓɛ kpanti Dawuda. Zang keɓe kɔ naa ta yuu ɓuru

⁷⁰Laa palɛ tɔ naa ɓɔɔ wu kɔɔ nɛɛ nyaa zang nyaa shonang ɓiɓɛ ka tĩng tɛ̃ɛ tɛ̃ɛ ɓɛɛ.

⁷¹Laa kɔɔyi tɔɔ, wu naa ta ruu ditɔ nɛɛ naa zang ɓɔɔ ri shing jĩng nɛɛ ruu kpang, nɛɛ naa zang ɓɔɔ ri kasɛ ruu kpang ɓɛɛ.

⁷²Ti kɔɔyi nɛɛ gn daa ɓuru naa kɔng wu katɔ, nɛɛ wu ti naa palɛ vuu ɓɔɔ wu kɔɔ daa ɓuru nɛɛ wu pàlɛ́ ri ɓɛɛ.

⁷³Vuu ɓɔɔ wu tũng daa ɓuru Ibirayi ɓɛɛ,

⁷⁴nɛɛ wu naa ta ruu ditɔ, nɛɛ naa zang ɓɔɔ ri shing jĩng nɛɛ ruu kpang ɓɛɛ. Tɔ̀ɔ, ruu walɛ gbalang ɓɔɔ ruu pàlɛ́ wu shonang, ruu kaa vɔrɔ kpang ɓɛɛ kati.

⁷⁵Ruu nwáng zang ɓɔɔ shi kpang kagn yeti ɓuru kpang, ruu ti palɛ vuu kaa naa ɓɔɔ Laa kasɛ ɓɛɛ ka diki ɓɔɔ ruu doo ningkãari ka koo keɓe nandon.”

⁷⁶A raa jĩng ka bii jaa rɛ̃ɛting a kɔɔ jaa tɔɔ, “Jaa mɛɛ, zang naa ɓaa mɔɔ nɛɛ zang nyaa shonang Laa, ka ruu ɓɔɔ, mɔɔ naa sɔ̀ɔ́ Kpanti ɓɔɔ naa a ɓɛɛ tĩng, mɔɔ pàlɛ́ wu gbalang ɓɛɛ.

⁷⁷Mɔkɔ naa tusu zang Laa, nɛɛ Laa naa yàá ri gbalang vuu shi kpang ɓarɛ ditɔ, tɔ̀ɔ, wu ta yuu ɓarɛ kati.

⁷⁸Ka ruu ɓɔɔ, gn zang kɔng Laa ɓuru dɔɔli ɓɛɛ. Naa shong nyaa nɛɛ zang ɓɔɔ naa ta yuu ɓuru ɓɔɔ naa nwáng naa làa ɓɔɔ nwáng ɓɛɛ.

⁷⁹Wu yakɛ nɔng kati. Tɔ̀ɔ, zang ɓɔɔ ri nwang ka nɔng ɓɔɔ tɔ̀ɔ katɔ, nɛɛ zang ɓɔɔ ri nwang ka nɔng vɔrɔ ɓɔɔ tɔ̀ɔ katɔ, ri zi nɔng kati. Wukɔ naa tusu ruu gbalang ɓɔɔ ruu nwang nɛɛ Laa waasɛ̃ ɓɛɛ.”

⁸⁰A jaa naa bangnɛ, a zũng danggn. Nwang ka jĩngti sasak diki ɓɔɔ wu naa nwang nyaa ka zang Isirela nandon a nɔng.