Read mumuye Luka 11 Bible Online

Luka 11 - mumuye bible

Luka 11

¹Diki ɓɔɔ kagn Yeesɔ gaa Laa ka nɔng ɓɔɔ ɓɛɛ. Hangsɛ nyaa tɔ, a zang gbete ka teteng zang ɓɔɔ ri mantɛ vuu ka bii ɓiɓɛ arɛ naa kɔɔ wu tɔɔ, “Dabang, kpɛ̃ɛrɛ ruu naa ɓɔɔ ruu gaa Laa jong, naa ɓɔɔ Yɔhana kpɛ̃ɛrɛ zang ɓɔɔ ri mantɛ vuu ka bii ɓiɓɛ ɓɛɛ.”

²A Yeesɔ kɔɔ ri tɔɔ, “Nɔɔ nɛɛ gaa Laa, nɔɔ kɔɔ nɛɛ, ‘Daa ɓuru Laa, zang wu dɔɔ nung tɔ̃ɔ ɓaaɓɛ ta. Zang zirɛ nɛɛ mɔkɔ Kpanti.

³A ruu vuu shaanang ɓɔɔ ruu shaa ɓɛɛ jɔng diki diki.

⁴Yaa ruu gbalang vuu shi kpang ɓuru katɔ, naa ɓɔɔ ruu yàá zang ɓɔɔ ri palɛ ruu vuu shi kpang ɓɛɛ. Mɔɔ yaa Sheetang wu gãsɛ ruu nɛɛ vuu ɓɔɔ ɓa kaka ɓuru katɔ ɓɛɛ kpang.’ ”

⁵A kɔɔ ri tɔɔ, “Naa zang gbete ka teteng manɛ, daa ka bii ɓeesang nɛɛ gãmbang zĩi, nɛɛ wu a wu borodi jong taati,

⁶ka ruu ɓɔɔ, ɓeesang ɓɔɔ a zanti shɛ̃ɛ gãa nɛɛ zĩi, vuu ɓɔɔ wu a wu kpang.

⁷Ɓeesang ɓɔɔ ka yeti jaka kasɛ wu nyaa nɛɛ, ‘Mɔ́ɔ kpãa m kpang, kãntang keɓe, n ku nyaa gãa tɔ. Wujɛ mɛɛ ti rooro tɔ, n zunung ɓɔɔ n seepaa n a mɔɔ vuu ɓɔɔ takpang.’

⁸N kɔ̀ɔ́ nɔɔ ruu ɓɔɔ niizang kɔ nwani, naa seepaa a wu borodi doo ka ruu ɓɔɔ wu ɓeesang kpang, sèépaa ditɔ, á wu gaagaa naa ɓɔɔ wu kasɛ ɓɛɛ, ka ruu tĩng ɓɔɔ yɔɔ yi ɓɛɛ.

⁹“Ka ruu nɔngkɔ, n kɔ̀ɔ́ nɔɔ, nɔɔ gaa ta, Laa a nɔɔ katɔ. Nɔɔ kãa ta, nɔɔ ĩi katɔ. Nɔɔ ti ɓaa nyaa ta, Laa kasɛ nɔɔ nyaa katɔ.

¹⁰Ka ruu ɓɔɔ, zang ɓɔɔ gaayi, Laa a wu katɔ. Zang ɓɔɔ kãayi, ti ĩi katɔ. A zang ɓɔɔ nɛɛ ɓaa nyaa, Laa kasɛ wu nyaa katɔ ɓɛɛ.

¹¹Ɓi dáa kiya ka teteng manɛ, naa jaa ɓiɓɛ ɓɔɔ varɛ gaa jaazĩi ka naa ɓiɓɛ, tuu sɔkɔ kɔ jong a wu ka nung jaazĩi wiya?

¹²Kɔ naa jaa gaa angkn, wu a jaa gbuuri wiya?

¹³Ɓɔɔ nɔɔ shi kpang, nɔɔ zunung ɓɔɔ nɔɔ a wujɛ manɛ vuu tɔ̃ɔ katɔ ka tansi Daa manɛ Laa ɓɔɔ ka lapa ɓɛɛ ya? Zunung ɓɔɔ wu a zang ɓɔɔ ri gaa wu suru tɔ̃ɔ kpang ya?”

¹⁴Yeesɔ nwangsɛ suru shi kpang nɛɛ bii zang ɓɔɔ nyaa nɔɔ katɔ, a suru shi kpang naa nwangnɛ. Zang ɓɔɔ nyaa nɔɔ katɔ naa rang yee kati. Zang ɓɔɔ ri kpalɛ zɔɔ nandon ri mã naa ka danggn.

¹⁵A zang ɓɔɔ ri kɔɔ ɓarɛ tɔɔ, nwangsɛ suru shi kpang nɛɛ naa ɓɔɔ Bahazabu, kpanti suru shi kpang a wu ɓɛɛ.

¹⁶Zang ɓɔɔ ri gãsɛ wu. Ri hɛ̃ɛ wu tɔɔ, “Tusu ruu vuu ɓɔɔ ruu zi kagn nɛɛ mɔɔ ɓaa zang ɓɔɔ Laa shong ɓɛɛ.”

¹⁷Yeesɔ ti zi vuu ɓɔɔ ri rɛ̃rɛ ka yeti ɓarɛ ɓi tɔ, a kɔɔ ri tɔɔ, “Zang ɓɔɔ kpanti ɓarɛ gbete ri nɛɛ basɛ yuu ɓarɛ, ri nɛɛ gaa nyaa nɛɛ zɔɔ, ri shaarɛ ɓarɛ kaa tɔ. Zang ɓɔɔ ka yeti gãa gbete ri nɛɛ ti basɛ yuu ɓarɛ, ri shaarɛ kaa tɔ.

¹⁸Naa sheetang basɛ yuu ɓiɓɛ, kpanti roonang ɓiɓɛ nwang biya? N kɔ̀ɔ́ ruu keɓe, ka ruu ɓɔɔ, nɔɔ kɔɔyi nɛɛ n nwangsɛ suru shi kpang nɛɛ naa ɓɔɔ Bahazabu a m ɓɛɛ, ɓɛɛ.

¹⁹Naa n nwangsɛ suru shi kpang nɛɛ naa ɓɔɔ Bahazabu a m, zang ɓɔɔ ri dũng nɔɔ, ri nwangsɛ ɓarɛ kaa nɛɛ viya? Ka ruu nɔngkɔ, rikɔ naa nwang zang ɓɔɔ naa jɛ̃ɛ nɔɔ ruu ɓɛɛ.

²⁰N nɛɛ nwangsɛ suru shi kpang nɛɛ naa Laa, Kpanti ɓɔɔ Laa rooyi, a tɔ ka teteng manɛ.

²¹“Zang ɓɔɔ lakɛ dɔɔli nɛɛ see vuu waa ɓiɓɛ tɔ, nɛɛ wu gã gãa ɓiɓɛ, zang ɓɔɔ yi naa ɓi tɔ̀ɔ́ ka vuu ɓiɓɛ kpang.

²²Zang ɓɔɔ ɓa wu kaka katɔ nɛɛ gàa nyaa nɛɛ wu, a nɛɛ ti ɓa wu kaka, sèé vuu waa ɓɔɔ zang keɓe shing danggn kagn ɓɛɛ nandon, tɔ̀ɔ, wu basɛ vuu ɓɔɔ yɔɔ kpalɛ ɓɛɛ kaa nandon.

²³“Shɔnzang ɓɔɔ ɓang ɓi nɛɛ n kpang, wukɔ zang ɓɔɔ kasɛ ruu mɛɛ kpang ɓɛɛ. Zang ɓɔɔ nɛɛ ti kpalɛ zang nɛɛ n kpang, tantɛ ɓi katɔ kɔ jong.

²⁴“Suru shi kpang nɛɛ nwang tɔ nɛɛ bii zang. Daayi, kãarɛ nɔng Ɔ̃sɔnang ka nɔng ɓɔɔ mii kagn kpang ɓɛɛ. Nɛɛ ĩi kpang, wu kɔɔ kati nɛɛ, ‘N gbãayu kaa gãa gbaala mɛɛ tɔkn.’

²⁵Nɛɛ arɛ, nɛɛ naa ĩi gãa, zang kooro katɔ, a zang ti shĩili vuu katɔ nyaa kiiri.

²⁶Gbãayu daa atɛ suru shi kpang ɓɔɔgn, manziti, ɓɔɔ ɓa wu shi kpang palɛnang katɔ ɓɛɛ, tɔ̀ɔ, ri naa nwang kaa gãa kaɓa. Nwannang zang kaɓa naa lasɛ ɓa ɓɔɔ tĩng shɔɔnang ɓi kaa tɔ.”

²⁷Ɓɔɔ Yeesɔ kɔ̀ɔ́ ruu doo naa, jaa soro gbete ka teteng zang dɔɔli ɓɔɔ ri kpalɛ zɔɔ, mɛɛ nyaa ka lapa, kɔɔ wu tɔɔ, “Tĩnang tãanang ɓi ɓɔɔ jaa soro ɓɔɔ yi mɔɔ, a ti a mɔɔ mii danggn ɓiɓɛ ɓɛɛ.”

²⁸Yeesɔ kasɛ wu nyaa tɔɔ, “Tĩnang tãanang ɓi ɓɔɔ zang ɓɔɔ ri tãa Ruu Laa, ri shing ka yeti ɓarɛ ɓɛɛ kɔ jong.”

²⁹Zang dɔɔli ri álɛ̀ kana gń tɔkn, a Yeesɔ kɔɔ ri tɔɔ, “Zang koo jaa knti keɓe, ri ɓarɛ zang ɓɔɔ shi kpang ɓɛɛ. Ri kasɛ vuu ɓɔɔ zang zirɛ zang mã naa ka danggn ɓɛɛ. Zang ti pàlɛ̀ ri kpang. Zang tusu ri ɓɔ̀ɔ́ Yunana kɔ shɛ̃ɛning.

³⁰Jaa Shɔnzang naa nwǎng zang koo jaa knti keɓe vuu ɓɔɔ zang zirɛ zang mã naa ka danggn ɓi doo naa ɓɔɔ Yunana nwàng zang gari Ninivi ɓɛɛ kɔ.

³¹Zang soro ɓɔɔ roo kpanti ka Sheeba naa seepaa ditɔ, wu dɔng zang koo jaa knti keɓe ruu, ka diki ɓɔɔ Laa naa jɛ̃ɛ zang ruu ɓɛɛ. Ka ruu ɓɔɔ, a nɛɛ koolaa ɓɔɔgn kpala kpala nɛɛ wu naa tãa zũnang kpanti Sulemanu ɓɛɛ. N kɔɔ nɔɔ, zang ɓɔɔ ɓa kpanti Sulemanu katɔ kagn nihn.

³²Zang gari Ninivi naa seepaa ditɔ, ri dɔng zang koo jaa knti keɓe ruu, ka diki ɓɔɔ Laa naa jɛ̃ɛ zang ruu ɓɛɛ. Ka ruu ɓɔɔ, ri yaa vuu shi kpang ɓarɛ, ri kɔ̃sɔ yeti, ka diki ɓɔɔ Yunana rang ri Ruu Laa ɓɛɛ. N kɔ̀ɔ́ nɔɔ, zang ɓɔɔ ɓa Yunana bannang katɔ kagn nihn.

³³“Zang ɓɔɔ kagn mang waa zàáng sɔ̀ɔ, wu zuu nɛɛ gãntang kpang. Shing ɓi yuu vuu lapa kɔ jong, tɔ̀ɔ, zang ɓɔɔ ri tu ka yeti gãa, ri zi nɔng kati.

³⁴Jĩng ɓaaɓɛ kɔ waa zàáng sɔɔ bii ɓaaɓɛ. Jĩng ɓaaɓɛ nɛɛ tɔ̃ɔ, bii ɓaaɓɛ yakɛ katɔ nandon. Jĩng ɓaaɓɛ nɛɛ tɔ̃ɔ kpang, bii ɓaaɓɛ tɔ̀ɔ ɓi katɔ nandon.

³⁵Ka ruu nɔngkɔ, pálɛ́ tɔ̃ɔ, ka ruu ɓɔɔ, nɔng yakɛnang ɓɔ̀ɔ́ bii ɓaaɓɛ nɛ̀ɛ́ tɔɔyi ɓɛɛ.

³⁶Bii ɓaaɓɛ nɛɛ yakɛ katɔ kɔ shɛ̃ɛning, naa yakɛ bii ɓaaɓɛ katɔ nandon, naa ɓɔɔ waa zàáng sɔɔ yakɛ mɔɔ nɔng ɓɛɛ.”

³⁷Yeesɔ hangsɛ nyaa yee rannang tɔ, a yɔɔ Farisi ɓaa wu nyaa kati nɛɛ wu daa shaa vuu shaanang ka gãa ɓiɓɛ. A daayi, daa nwang ka nɔng vuu shaanang ka gãa yɔɔ.

³⁸Yɔɔ Farisi mã naa ka danggn, ka ɓɔɔ wu zirɛ nɛɛ Yeesɔ sɔɔ naa ka gbongkarɛ, shaa vuu shaanang kpang ɓɛɛ.

³⁹A Kpanti Yeesɔ kɔɔ wu tɔɔ, “Ɓɔɔ nɔɔ Farisi, nɔɔ sɔ̀ɔ́ dakn waka nɛɛ dakn gbanti kɔ shɛ̃ɛning, a yeti manɛ ɓi zang mulunang kɔ nɛɛ yeti lanang shɛ̃ɛning.

⁴⁰Ɓɔɔ nɔɔ shoko ɓɛɛ, nɔɔ zi kpang nɛɛ Laa ɓɔɔ palɛ biling, wukɔ palɛ yeti doori kpang ya?

⁴¹Nɔɔ a zang ɓɔɔ vuu ka naa ɓarɛ kpang ɓɛɛ, vuu ɓɔɔ ka yeti waka manɛ ɓɛɛ. Vuu manɛ piti nwang ditɔ tɔ̃ɔ tɔ̃ɔ.

⁴²“Jĩng dannang kagn yuu manɛ Farisi, ka ruu ɓɔɔ, nɔɔ zɔ̃ng Laa vuu gbete ka teteng vuu kopi ɓɔɔ nɔɔ walɛ naa rɛɛ zitaa nɛɛ siteng nɛɛ vuu ɓɔɔ zang tɛ̃́ɛ ka yɔkɔ naa weɓe piti. A nɔɔ yaa ruu vuu tɔ̃ɔ ɓɔɔ nɔɔ palɛ zang ɓɛɛ, nɛɛ ruu naa ɓɔɔ rúu kasɛ Laa ɓɛɛ. Nɔɔ nɛ̀ɛ́ palɛ vuu keɓe nandon, nɔɔ yaa ɓɔɔ kpang.

⁴³“Jĩng dannang kagn yuu manɛ Farisi. Ka ruu ɓɔɔ, nɔɔ kasɛ nɔng nwannang ɓɔɔ tɔ̃ɔ tɔ̃ɔ ka gãa zɔɔ kpalɛnang, nɛɛ nɔɔ ti kasɛ nɛɛ zang jee nɔɔ nyaa, zang a nɔɔ bannang kagn ka lumang ɓɛɛ.

⁴⁴Jĩng dannang kagn yuu manɛ, ka ruu ɓɔɔ, nɔɔ nwang naa yuu saa, ɓɔɔ zang zi kpang, zang ra ka yuu ɓiɓɛ ɓɛɛ.”

⁴⁵Zang ɓɔɔ tusu zang Labeenang Laa kɔɔ wu tɔɔ, “Maalang, mɔɔ lasɛ ruu yeti katɔ kɔ doori nɛɛ vuu kɔ mɔɔ kɔɔ ɓɛɛ.”

⁴⁶A Yeesɔ kasɛ wu nyaa tɔɔ, “Jĩng dannang kagn yuu manɛ, ɓɔɔ nɔɔ tusu zang Labeenang Laa ɓɛɛ, ka ruu ɓɔɔ, nɔɔ ĩi zang vuu ɓɔɔ kpãa nyaa tuunang katɔ, nɔɔ lee naa manɛ ɓi kagn naa ɓɔɔ nɔɔ yi zang naa tuunang kpang ɓɛɛ.

⁴⁷Jĩng dannang kagn yuu manɛ, ka ruu ɓɔɔ, nɔɔ mãarɛ yuu sàá zang nyaa shonang Laa ɓɔɔ daa manɛ ri nyɔkɔ ɓɛɛ.

⁴⁸Nɔɔ kasɛ vuu ɓɔɔ dabang manɛ ri palɛ ɓɛɛ tɔ, ka ruu ɓɔɔ, ri nyɔkɔ zang nyaa shonang Laa, a nɔɔ mãarɛ manɛ kaa yuu sàa ɓarɛ.

⁴⁹Laa rang yee ka yeti zũnang ɓiɓɛ tɔɔ, ‘N shong ri zang nyaa shonang nɛɛ zang ɓɔɔ n shɛ̃ɛrɛ ri katɔ ɓɛɛ ditɔ. Ri naa nyɔkɔ ɓɔɔ vɔrɔ, ri ti dang ɓɔɔ jĩng.’

⁵⁰Ka ruu nɔngkɔ, zang naa dǎng zang koo jaa knti keɓe kɔ jĩng, ka ruu zang nyaa shonang Laa ɓɔɔ zang nyɔ ri vɔrɔ ɓɛɛ, doo nɛɛ diki ɓɔɔ Laa gaayu koo keɓe mãanang, ɓɛɛ.

⁵¹Zang nyaa shonang Laa ɓɔɔ gaayu ka bii Habila a nɛɛ mani ka bii Zakariya ɓɔɔ zang nyɔ ka teteng nɔng ɓɔɔ zang dɔɔ Laa vuu kagn nɛɛ Gãa Laa ɓɛɛ. N kɔ̀ɔ́ nɔɔ zang naa dang zang koo jaa knti keɓe kɔ jĩng.

⁵²“Jĩng dannang kagn yuu manɛ, zang ɓɔɔ tusu zang labeenang Laa ɓɛɛ. Ka ruu ɓɔɔ, nɔɔ ta zang gbalang Ruu Laa zinang, a nɔɔ ti dũ̀ng gbalang kaɓa kpang ɓɛɛ. Nɔɔ yaa zang ɓɔɔ ri kasɛ daanang katɔ gbalang kpang.”

⁵³Yeesɔ yaa nɔng kaɓa, a Farisi nɛɛ zang ɓɔɔ ri tusu zang labeenang Laa ri gaa tɔɔsung yee rannang kaa nɛɛ wu nɛɛ tɔɔ gnvɔ nɛɛ shaa wu tɔ wu rang yee kaa yuu vuu dɔɔli. Ri hɛ̃ɛlɛ wu vuu ka yuu vuu gaagaa.

⁵⁴Ri kasɛ nɛɛ tɔɔ ri yi wu kaa yee ɓɔɔ wu rang ɓɛɛ.