Read mumuye Luka 15 Bible Online

Luka 15 - mumuye bible

Luka 15

¹Diki ɓɔɔgn, zang ɓɔɔ ri ta saka tipi nɛɛ zang ɓɔɔ ri palɛ vuu shi kpang kɔ doori, ri kpalɛ zɔɔ ka bii Yeesɔ, nɛɛ ri tãa yee ɓɔɔ wu rang ɓɛɛ.

²A ɓɔɔ zang Farisi nɛɛ zang ɓɔɔ ri tusu zang labeenang Kpanti Laa, zi rɛɛ zang keɓe, ka bii Yeesɔ hn ɓɛɛ, ri gaa tɔɔsung yee gɔ̃ɔrɔnang ka naa ɓarɛ, ri kɔɔrɔ nɛɛ, “Yɔɔ keɓe ta zang ɓɔɔ ri palɛ vuu shi kpang ti shaa vuu nɛɛ ri.”

³A Yeesɔ rang ri yee keɓe kaa nɛɛ nyaa vuu jeenang tɔɔ,

⁴“Naa zang gbete ka teteng manɛ mã mɛ̀ɛrɛ́ laa maani, a ɓɔɔ gbete ningnɛ palɛ biya? Yaa ɓɔɔ laa dɛ̃ɛti tu kopi tu mandɛ̃ɛti kaɓa ka nɔngkɔ ka gbongkarɛ, wu daa kãa ɓɔɔ ning kaɓa, wu ĩiyi.

⁵Nɛɛ ĩi tɔ, tãa tĩnang dɔɔli. Tuuyi wu lu ka zã̀ngzã̀ng wu a gãa kaa nɛɛ mani.

⁶Nɛɛ shɛ̃ɛ gãa tɔ, wu ɓaarɛ nyaa ka rɛɛ ɓeesang nɛɛ zang ɓɔɔ ri roo nyaa gãa gbete ɓɛɛ, nɛɛ ri naa shaa vuu shaanang, ri tãa tĩnang nɛɛ wu, ka ruu ɓɔɔ, wu ĩi mɛ̀ɛrɛ́ ɓiɓɛ ɓɔɔ ning ɓɛɛ.

⁷A Yeesɔ hangsɛ nyaa tɔɔ, ‘Zang Laa ɓɔɔ ka lapa tã̀á tĩnang doo nɔngkɔ, ka ruu zang gbete ɓɔɔ palɛ vuu shi kpang ɓɔɔ yaa vuu shi kpang ɓiɓɛ, a kɔ̃sɔ yeti ɓiɓɛ ɓɛɛ. Tĩnang tãanang kaɓa, ɓa ɓɔɔ zang tãa ka ruu zang laa dɛ̃ɛti tu kopi tu mandɛ̃ɛti ɓɔɔ ri tɔɔ ri palɛ vuu shi kpang ɓarɛ kpang ɓɛɛ katɔ.’

⁸“Yeesɔ kɔɔ ruu ɓɔɔ tɔkn nɛɛ nyaa vuu jeenang tɔɔ, naa zang soro ɓɔɔgn saka ɓiɓɛ kopi, a ɓɔɔ gbete shishi, palɛ biya? Mang waa zàáng sɔɔ, wu ya salang, wu kooro nɔng ɓɔɔ saka ɓiɓɛ shishi kagn tɔ̃ɔ tɔ̃ɔ, wu kãa waasɛ̃, wu ĩiyi.

⁹Nɛɛ ĩi tɔ wu daa ɓaarɛ nyaa, ka rɛɛ ɓeesang nɛɛ zang ɓɔɔ ri roo nyaa gãa gbete, nɛɛ ri naa shaa vuu shaanang, ri tãa tĩnang nɛɛ wu, ka ruu ɓɔɔ, wu ĩi saka ɓiɓɛ tɔ ɓɛɛ.

¹⁰A Yeesɔ naa hangsɛ nyaa kaa tɔɔ, ‘Zang nyaa shonang Laa ɓɔɔ ri ka lapa, ri tãa tĩnang doo nɔngkɔ, ka ruu zang gbete ɓɔɔ palɛ vuu shi kpang, ɓɔɔ yaa vuu shi kpang ɓiɓɛ a kɔ̃sɔ yeti ɓiɓɛ ɓɛɛ.’ ”

¹¹A Yeesɔ rang ri yee tɔkn tɔɔ, “Yɔɔ ɓɔ̀ɔ́gn wujɛ ɓiɓɛ ziti zang varɛ.

¹²Diki ɓɔɔgn ɓɔɔ wujaa naa a ka bii daa ɓiɓɛ tɔɔ, ‘Dada, a m vuu ɓɔɔ naa mɔɔ vɔrɛ zang naa a m ɓɛɛ ta.’ A daa ɓarɛ tuu vuu naa ɓiɓɛ nandon, a basɛ ri.

¹³Diki nɛɛ tɔɔ wu bee tɔkɔlɔng, ɓɔɔ wujaa naa kpalɛ vuu ɓiɓɛ nandon, a daa zanti nɛɛ mani ka koolaa ɓɔɔgn kpala kpala. Daa shɛ̃ɛ nɔng tɔ, a ningsi vuu ɓiɓɛ ka nɔng dũndũng palɛnang.

¹⁴Ka knti ɓɔɔ vuu ɓiɓɛ waa nyaa tɔ, nyɔkɔ bang naa shɛ̃ɛ ka koolaa ɓɔɔ wu daa zanti kagn ɓɛɛ. Walɛ vuu ɓɔɔ wu shaa takpang, a gaa tɔɔsung jĩng dannang kati.

¹⁵A seepaa daa nwang nɛɛ zang koolaa kaɓa ɓɔɔ mã gãnya kagn ɓɛɛ. A yɔɔ shong wu nɛɛ wu daa gãng wu jĩng ka gãnya.

¹⁶Nyɔkɔ dang wu jĩng kana, kasɛ nɛɛ wu shaa vuu ɓɔɔ gãnya ri shaa ɓɛɛ jong. A walɛ gbalang kaa takpang.

¹⁷Diki bee tɔ tɔkɔlɔng, a shoo naa lu wu. A hɛ̃ɛ yuu ɓiɓɛ tɔɔ, ‘Zang shonang daa mɛɛ kagn gaagaa, ri shaa vuu shaanang ri yaa katɔ kɔ jong, n nwang ka nihn, nyɔkɔ yee m kana waati ka ruu viya?

¹⁸N seepaa ditɔ, n daa ka bii daa mɛɛ n daa kɔɔ wu nɛɛ, Dada, n pàlɛ̀ Laa vuu shi kpang tɔ, n ti pàlɛ̀ mɔɔ tɔ jong.

¹⁹N daa naa ɓɔɔ mɔɔ ɓaa m nɛɛ jaa ɓaaɓɛ tɔkn takpang. Yiti m naa ɓɔɔ mɔɔ yiti zang shonang ɓaaɓɛ ɓɛɛ’.

²⁰Hangsɛ nyaa rɛ̃rɛnang kaɓa tɔ, a seepaa yi gbalang yuu gbãanang gãa diiɓɛ. “Bɛɛ yaa gãa doo beebang, diiɓɛ zi wu tɔ doo tɛ̃ɛ tɛ̃ɛ, kɔng wu gn, a seepaa yurɛ daa kɔ̃ng wu ka gbalang kpenkpereng.

²¹Jaa ɓiɓɛ kɔɔ wu tɔɔ, ‘Dada, n pàlɛ̀ Laa vuu shi kpang tɔ, n pàlɛ̀ mɔɔ tɔ jong. N daa naa ɓɔɔ mɔɔ ɓaa m nɛɛ jaa ɓaaɓɛ tɔkn takpang’.

²²Daa ɓiɓɛ yee laa ɓi ka ruu ɓɔɔ jaa ɓiɓɛ kɔɔ ɓɛɛ kpang. Ɓaa nyaa ɓi ka jaafoo ɓiɓɛ, kɔɔ ri nɛɛ, ‘Nɔɔ atɛ fɔ̃ɔrɔ ɓɔɔ wukɔ shi dɔɔli pati, pati nɔɔ hãa wu, nɔ́ɔ ti atɛ jaa saa naa nɔɔ hãa wu, nɔɔ hãa koodoo ka doo ɓiɓɛ.

²³Nɔ́ɔ ti daa yi guu napo mɛɛ ɓɔɔ n sang katɔ, nɔɔ yeeyi, ruu shaayi, tɔ̀ɔ, ruu tãa tĩnang kati.

²⁴Ka ruu ɓɔɔ, jaa mɛɛ keɓe nwang naa ɓɔɔ vɔ katɔ, a naa hingsi jĩng tɔkn ɓɛɛ. Ning katɔ, a n naa ĩi wu tɔkn ɓɛɛ’. A ri gaayu dãng sɔnang kati.

²⁵“Bɛɛ jaa zang varɛ ɓiɓɛ ɓɔɔ bang daa ka jaa. Gbãayu kana nɛɛ jaa yaa gãa kaa naabm, a tãa soo ɓɔɔ zang gaarɛ nɛɛ dãng sɔnang ɓɔɔ shii vaa ɓɛɛ.

²⁶A ɓaa zang shonang gbete nyaa, hɛ̃ɛ wu tɔɔ, ‘Zang palɛ ɓu viya?’

²⁷A zang shonang kɔɔ wu tɔɔ, ‘Jaa naaɓɛ arɛ, a daaɓɛ yee guu napo ɓɔɔ wu sang katɔ ka ruu ɓɔɔ gbãayu tɔ gãa waasɛ̃ ɓɛɛ’.

²⁸Ɓɔɔ jaa ɓiɓɛ ɓɔɔ bang tãa naa weɓe, yeti ɓiɓɛ lasɛ dɔɔli, bɛ̃ɛ yeti gãa daanang. Ka ruu nɔngkɔ, daa ɓiɓɛ nwangnɛ naa bakɛ wu nɛɛ wu daa yeti gãa.

²⁹A kasɛ diiɓɛ nyaa tɔɔ, ‘Zirɛ, saa kɔ tɛɛrɛ ɓɛɛ nandon, n palɛ mɔɔ shonang naa jaafoo. N ɓa nyaa ɓaaɓɛ gngn kpang. A mɔɔ a m shi jaa gngn gbete nɛɛ n yeeyi ruu tãa tĩnang nɛɛ rɛɛ masang kpang.

³⁰Jaa ɓaaɓɛ keɓe ɓɔɔ lasɛ vuu naa ɓaaɓɛ ka nɔng dũndũng arɛ, mɔɔ yee wu guu napo ɓɔɔ mɔɔ sang ɓɛɛ.’

³¹A daa ɓiɓɛ kɔɔ wu tɔɔ, ‘Man jaa, mɔɔ nwang ɓaa nɛɛ n ka tipi, vuu mɛɛ keɓe piti ɓi ɓɔɔ ɓaaɓɛ kɔ.

³²Daa ɓɔɔ ruu shaa vuu shaanang ruu tãa tĩnang tɔ, ka ruu ɓɔɔ, jaa naaɓɛ keɓe nwang naa ɓɔɔ vɔ katɔ a hingsi jĩng tɔkn. Ning katɔ, a n ĩi wu tɔkn ɓɛɛ.’ ”