Read mumuye Luka 16 Bible Online

Luka 16 - mumuye bible

Luka 16

¹Yeesɔ kɔɔ zang ɓɔɔ ri mantɛ vuu ka bìí ɓiɓɛ tɔɔ, “Yɔɔ ɓɔɔ kagn zang ying. Shing zang shonang ɓɔɔ nɛɛ wu gãng wu jĩng ka vuu naa ɓiɓɛ. A zang naa kɔɔ yɔɔ ying tɔɔ, zang shonang kaɓa lasɛ mɔɔ vuu kana.

²A yɔɔ ying ɓaa nyaa ka zang shonang hɛ̃ɛ wu tɔɔ, ‘N tãa ɓu nyaa vi ka yuu ɓaaɓɛ viya? Bee m naa ɓɔɔ mɔɔ palɛ shonang nɛɛ vuu naa mɛɛ ɓɛɛ ta, ka ruu ɓɔɔ, mɔɔ nwàng zang shonang mɛɛ takpang ɓɛɛ.’

³A zang shonang hɛ̃ɛ yuu ɓiɓɛ tɔɔ, ‘Wee yɔɔ gãa mɛɛ ta shonang ɓɔɔ ka naa mɛɛ tɔ, n palɛ ɓu kaa biya? Kaka mɛɛ ti daa ɓɔ̀ɔ́ jaa lannang takpang. Yusɛ̃ɛ ti tuu m vuu gaanang katɔ.

⁴Yɔɔ gãa mɛɛ nɛɛ hing m tɔ, n zi vuu ɓɔɔ n palɛ, tɔ̀ɔ, zang ri ta m ka gãa ɓarɛ tɔ.’

⁵“Ka ruu nɔngkɔ, ɓaa nyaa ka zang ɓɔɔ ri talɛ nyaa kɔ́pɔ́ ka naa yɔɔ gãa ɓiɓɛ gbete gbete. A hɛ̃ɛ zang tĩng shɔɔnang tɔɔ, ‘Mɔɔ ta nyaa kɔ́pɔ́ vi ka naa yɔɔ gãa mɛɛ viya?’

⁶A zang keɓe kɔɔ wu tɔɔ, ‘N ta nung zàáng laa maani.’ A kɔɔ wu tɔɔ, ‘Labeenang ɓaaɓɛ keɓe, nwang ta tipi pati pati, mɔɔ bee laa ziti tu kopi.’

⁷A ti hɛ̃ɛ zang ɓɔɔ doo knti tɔɔ, ‘mɔɔ ta ɓaa viya?’ Zang doo knti kɔɔ wu tɔɔ, ‘N ta zee poo laa maani.’ A kɔɔ wu tɔɔ, ‘Labeenang ɓaaɓɛ keɓe, bee ta laa dɛ̃ɛti.’

⁸“A yɔɔ gãa dɔɔ zang shonang ɓiɓɛ ɓɔɔ palɛ vuu tɔ̃ɔ kpang keɓe, ka ruu zũnang ɓiɓɛ. Zũnang zang ɓɔɔ ri shing danggn ka vuu koo keɓe, ɓa ɓɔ̀ɔ́ zang ɓɔɔ ri shing danggn ka vuu Laa katɔ. Ka ruu ɓɔɔ, ri zunung naa ɓɔɔ ri sɔɔ nɛɛ zang ɓɔɔ doo naa rikɔ katɔ ɓɛɛ.”

⁹A Yeesɔ kɔɔ ri nɛɛ “N kɔ̀ɔ́ nɔɔ, nɔɔ yiki wusang nɛɛ zɔɔ nɛɛ vuu naa manɛ, ka ruu ɓɔɔ, nɛɛ naa waa nyaa tɔ, zang naa ta nɔɔ ka nɔng ɓɔɔ nɔɔ naa nwang dòndòng ɓɛɛ.

¹⁰Zang ɓɔɔ shing jĩng ka vuu ɓɔɔ tɔkɔlɔng tɔ̃ɔ tɔ̃ɔ, shíng jĩng ɓi doo nɔngkɔ ka ɓɔɔ gaagaa ɓɛɛ. Zang ɓɔɔ palɛ shi kpang nɛɛ vuu ɓɔɔ tɔkɔlɔng, ti palɛ doo nɔngkɔ nɛɛ ɓɔɔ gaagaa ɓɛɛ.

¹¹Naa nɔɔ shing jĩng ka vuu naa ɓɔɔ koo keɓe tɔ̃ɔ tɔ̃ɔ kpang, ɓu wi yàá nɔɔ vuu naa ɓɔ̀ɔ́ Suru Laa ka naa wiya?

¹²Naa nɔɔ ti yee laa ka vuu zang kpang, ɓu wi a nɔɔ ɓɔɔ manɛ wiya?

¹³“Zang shonang ɓɔɔgn shǒng zang gãa ziti kpang. Kàsɛ́ ruu zang gbete, wu yaa ɓɔɔ gbete. Wu ti shing jĩng ka ɓɔɔ gbete, wu yaa ɓɔɔ gbete. Zang ɓakɛ Laa dũnnang ɓi nɛɛ vuu koo keɓe kãanang kpang.”

¹⁴Zang Farisi ɓɔɔ ri tãa vuu ɓɔɔ Yeesɔ kɔɔrɔ nandon naa weɓe, ri ɓàa wu zaa ka bii, ka ruu ɓɔɔ, ri kasɛ saka dɔɔli ɓɛɛ.

¹⁵Yeesɔ kɔɔ ri tɔɔ, “Nɔɔ túsù yuu manɛ waati ka nɔng zang nɛɛ nɔɔ zang tɔ̃ɔ, Laa zi yeti manɛ ɓi tɔ. Vuu ɓɔɔ shɔnzang zirɛ, nɛɛ ɓi vuu tɔ̃ɔ, ɓɔɔ ka jĩng Laa ɓi vuu baabii.

¹⁶“Labeenang Laa ɓɔɔ Musa beeyi nɛɛ ɓɔɔ zang nyaa shonang Laa piti, zang palɛ shonang nɛɛ wukɔ, a nɛɛ mani ka yuu Yɔhana ɓɔɔ pàlɛ́ zang batizima ɓɛɛ. Zang gaayu Ruu Tɔ̃ɔ Kpanti roonang Laa kɔɔnang doo nɛɛ diki Yɔhana kɔ. Zang ɓu ti ĩi ɓi yuu, tɔ̀ɔ, wu shɛ̃ɛyi.

¹⁷Lapa nɛɛ tipi ri naa waa nyaa ditɔ nandon tantɛnang, a vuu tɔkɔlɔng gbete ɓɔɔ naa shàarɛ́ waati ka teteng nyaa dannang Laa ɓɔɔ Musa beeyi ɓi kpang.

¹⁸“Zang ɓɔɔ nɛɛ hing soro ɓiɓɛ, a gee ɓɔɔgn, palɛ ɓi dũndũng. Zang ɓɔɔ nɛɛ ti gee zang soro ɓɔɔ seepaa nɛɛ gãa varɛ ɓiɓɛ, ti palɛ ɓi doo dũndũng kɔ.

¹⁹“Zang ying ɓɔɔ kagn, hãlɛ fɔ̃ɔrɔ ɓɔɔ shaa nyaa dɔɔli ta bii nwɛ̃ɛri pursung, a ti tãa ɓi tĩnang diki diki.

²⁰A zang ɓɔɔgn, ɓi zang ɓɔɔ gaarɛ vuu ɓɛɛ, zang ɓaa wu nɛɛ Liyazaru, bii ɓiɓɛ nɔɔrɔ kɔ shɛ̃ɛning. Zang átɛ̀ wu diki diki ka nyaa gãa zang ying kaɓa,

²¹nɛɛ tɔ̀ɔ, wu walɛ vuu shaanang ɓɔɔ yɔɔ yaarɛ knti ɓɛɛ wu shaayi. Zaa ti arɛ ri lɛɛtɛ nyaa nɔɔrɔ ɓiɓɛ.

²²“Zang ɓɔɔ ɓi zang ying kpang kaɓa naa vɔrɛ, zang nyaa shonang Laa ɓɔɔ ka lapa ri naa tuu suru bii ɓiɓɛ ri daa shing wu ka kagn Ibirayi. A yɔɔ ɓɔɔ ɓi zang ying ti naa vɔrɛ, zang gbãa wu.

²³A suru ɓiɓɛ daa ka yeti waa ɓɔɔ ning ɓi jɔng kpang. Dang jĩng kana, a tuu jĩng ka lapa zi Liyazaru nwang tɔ ka kagn Ibirayi nɛɛ nɔng beebang.

²⁴A ɓaa nyaa tɔɔ, ‘Dada Ibirayi, gn mɛɛ wu kɔng mɔɔ jong. Shong Liyazaru wu hãa yuu paa saa naa ka mii wu sɔ̃sɔ m ka nyaa, ka ruu ɓɔɔ, waa tɔ̃̀ɔrɔ m shoo kana ɓɛɛ.’

²⁵“A Ibirayi kasɛ wu nyaa tɔɔ, ‘Man jaa, ɓɔɔ bɛ̀ɛ́ mɔɔ doo ka koo mɔɔ walɛ vuu tɔ̃ɔ, Liyazaru walɛ vuu tɔ̃ɔ ɓi kpang. Kãntang keɓe Liyazaru tãa ɓi kaa tĩnang ka nihn, mɔɔ ti dang ɓaa kaa jĩng.

²⁶Naa doo nɔngkɔ kpang, rang bang kagn teteng ɓuru, ka ruu ɓɔɔ, zang ɓɔɔ nɛ̀ɛ́ seepaa nɛɛ nihn, nɛ̀ɛ́ daa ka dang manɛ. A zang ɓɔɔ nɛ̀ɛ́ ti seepaa nɛɛ dang manɛ, a ka bii ɓuru ɓɛɛ.’

²⁷A yɔɔ kasɛ Ibirayi nyaa tɔɔ, ‘Dada, n zɔ̃ɔrɔ mɔɔ katɔ, shong Liyazaru jong ka gãa daa mɛɛ.

²⁸Jaa nàá mɛɛ zang varɛ kagn maani, wu daa shaarɛ ri nyaa, ka ruu ɓɔɔ, ri nɛ̀ɛ́ a jong ka nɔng jĩng dannang keɓe ɓɛɛ.’

²⁹“Ibirayi kasɛ wu nyaa tɔɔ, ‘Labeenang ɓɔɔ Musa beeyi nɛɛ ɓɔɔ zang nyaa shonang Laa ri beeyi kagn. Ri ti ɓaa shoo ka labeenang ɓarɛ.’

³⁰Yɔɔ ti kɔɔ tɔkn tɔɔ, ‘Kpang, dada Ibirayi, naa zang ɓɔɔ vɔ katɔ, yupaa nɛɛ sàa, daa ka bii ɓarɛ, ri yaa vuu shi kpang palɛnang katɔ, ri kɔ̃sɔ yeti ɓarɛ.’

³¹A Ibirayi kɔɔ wu tɔɔ, ‘Naa ri ɓaa shoo ka labeenang rɛɛ Musa nɛɛ zang nyaa shonang Laa kpang, naa zang ɓɔɔ vɔ tɔ seepaa doori, ri ɓaa shoo doo ka nyaa ɓiɓɛ kpang kɔ.’ ”