Read mumuye Luka 17 Bible Online

Luka 17 - mumuye bible

Luka 17

¹Yeesɔ kɔɔ zang ɓɔɔ ri mantɛ vuu ka bii ɓiɓɛ tɔɔ, “Vuu ɓɔɔ nwãarɛ zang, zang palɛ vuu shi kpang a ɓi ditɔ kɔ nwani. Jĩng dannang kagn yuu zang ɓɔɔ vuu keɓe a nɛɛ bii ɓiɓɛ ɓɛɛ.

²Daa ɓɔɔ zang mã wu ree bang ka turu, zang tasɛ wu ka yeti mii waapo tɔ, ka ɓɔɔ wu nɛɛ shing jaa gbete ka teteng wujɛ seseere keɓe, wu palɛ shi kpang ɓɛɛ.

³Nɔɔ gãng jĩng kagn. “Ɓaazung nɛɛ palɛ vuu shi kpang, mangkɛ wu katɔ. Nɛɛ yaa vuu shi kpang palɛnang tɔ, nɛɛ kɔ̃sɔ yeti tɔ, mɔɔ ti yaa wu gbalang vuu shi kpang ɓɔɔ wu palɛ mɔɔ ɓɛɛ.

⁴Nɛɛ palɛ mɔɔ vuu shi kpang dakn manziti ka diki gbete, a naa kɔɔyi tɔɔ, ‘Yaa m gbalang vuu shi kpang ɓɔɔ n pàlɛ̀ mɔɔ katɔ. N kɔ̃sɔ yeti tɔ, mɔɔ yaa wu gbalang katɔ.’ ”

⁵Zang ɓɔɔ Yeesɔ shɛ̃ɛrɛ katɔ, ri kɔɔ wu tɔɔ, “Yi ruu naa jong bii, rúu shing danggn ka bìí Laa gbãng gbãng.”

⁶A Yeesɔ kasɛ ri nyaa tɔɔ, “Naa danggn ɓɔɔ nɔɔ shing ka bii Laa, nɛɛ nwang naa jĩng masita, nɔɔ nɛ̀ɛ́ kɔɔ laa zulung bang keɓe katɔ nɛɛ, ‘Ru ta nɛɛ yuu ɓaaɓɛ, mɔɔ daa shɔ bii ɓaaɓɛ ka yeti mii waapo.’ Ti palɛ katɔ naa ɓɔɔ nɔɔ kɔɔ ɓɛɛ.

⁷“Naa zang gbete ka teteng manɛ, zang shonang ɓiɓɛ ɓɔɔ lang jaa, kɔ gã mɛ̀ɛrɛ́, a nɛɛ jĩngti, kɔɔ wu katɔ nɛɛ wu tantɛ daanang, wu daa nwang ka nɔng vuu shaanang, wu shaa vuu shaanang ɓiɓɛ ya?

⁸Kɔɔ wu kpang. Kɔɔ wu nɛɛ, ‘Nwaa m vuu shaanang ta, mɔɔ ti kpalɛ bii tɔ̃ɔ, mɔɔ shĩili m vuu shaanang ka yuu teeburu mɔɔ gã m, n shaa ka gbongkarɛ, mɔɔ see gbanti, tɔ̀ɔ, mɔɔ naa shaa ɓɔɔ ɓaaɓɛ kati.’

⁹Zãa zang shonang ɓiɓɛ katɔ, ka ruu ɓɔɔ, palɛ vuu ɓɔɔ wu kɔɔ ɓɛɛ ya?

¹⁰Nɔɔ manɛ doo nɔngkɔ. Nɔɔ nɛɛ palɛ vuu ɓɔɔ zang kɔɔ nɔɔ tɔ nandon, nɔɔ kɔɔ nɛɛ, ‘Rùu ɓuru zang shonang waati. Ruu daa naa ɓɔɔ zang zãa ruu kpang. Ruu palɛ ɓuru shonang ɓɔɔ bɛ̀ɛ́ ɓi ɓɔɔ ɓuru kɔ nwani ɓɛɛ.’ ”

¹¹Yeesɔ daa kana Urushalima, a sɔɔ kaa nɛɛ nyaa ɓalɛ ɓɔɔ basɛ tipi Samariya nɛɛ tipi Galili ɓɛɛ.

¹²Tɔ́ɔ, wu hãa nyaa kaa jaa gari, zang kopi ɓɔɔ vuu bii shaa ri katɔ, ri ɓee wu yuu kati. Ri shiiri nɛɛ nɔng beebang,

¹³ri ɓaa wu nyaa nabm nɛɛ, “Kpanti Yeesɔ, gn ɓuru wu kɔng mɔɔ jong.”

¹⁴Yeesɔ zi ri, a kɔɔ ri tɔɔ, “Nɔɔ dita, nɔɔ daa tùsù zang ɓɔɔ ri dɔɔ vuu ka Gãa Laa, bii manɛ.” Vuu bii ɓɔɔ shaa ri, yàa ri bii kaa gbalang ɓɔɔ ri daa ɓɛɛ.

¹⁵Ɓɔɔ zang gbete ka teteng ɓarɛ, zi naa ɓɔɔ Yeesɔ masɛ wu, gbãayu dɔɔ Laa kana nabm.

¹⁶A naa tang ka tĩng Yeesɔ, a zãa wu. Yɔɔ keɓe ɓi zang tipi Samariya.

¹⁷Yeesɔ hɛ̃ɛyi tɔ́ɔ, “N masɛ wu shɔnzang kopi kpang ya? Zang mandɛ̃ɛti ɓarɛ kaa kiya?

¹⁸Ka ruu vi, ɓi mɔkɔ zang zanti keɓe, mɔɔ gbãayu shɛ̃ɛning mɔɔ naa zãa Laa viya?”

¹⁹A Yeesɔ kɔɔ yɔɔ tɔɔ, “Seepaa ta mɔɔ daayi. Danggn ɓɔɔ mɔɔ shing ka bii Laa masɛ mɔɔ tɔ.”

²⁰Diki ɓɔɔgn zang Farisi ɓɔɔ ri hɛ̃ɛ Yeesɔ ruu anang diki ɓɔɔ Laa naa roo kpanti ɓɛɛ. A Yeesɔ kasɛ ri nyaa tɔɔ, “Kpanti roonang Laa, a ɓi naa ɓɔɔ zang zi nɛɛ jĩng ɓɛɛ kpang.

²¹Zang kɔɔ ɓi kpang nɛɛ, ‘Diki bii keɓe nɛɛ diki kaɓa kpang. Ka ruu ɓɔɔ, Laa roo Kpanti ɓi kana ka teteng manɛ ɓɛɛ.’ ”

²²A kɔɔ zang ɓɔɔ ri mantɛ vuu ka bii ɓiɓɛ tɔɔ, “Diki a doo naa, ɓɔɔ nɔɔ naa kasɛ kagn nɛɛ, nɔɔ zi diki gbete ka teteng diki ɓɔɔ n Jaa Shɔnzang n naa roo kpanti kagn ɓɛɛ. Nɔɔ naa zi kpang.

²³Zang ti naa nwãarɛ nɔɔ ditɔ nɛɛ, ‘Jaa Shɔnzang ka kaaɓa a ɓɔɔ nɛɛ Jaa Shɔnzang keɓe.’ Nɔɔ daa kpang. Nɔɔ dũng knti ɓarɛ kpang.

²⁴Ka ruu ɓɔɔ, anang Jaa Shɔnzang naa nwang naa shala ɓɔɔ nwangnɛ, tɛɛ ka lapa, yakɛ dĩiri gbayi gbayi ɓɛɛ.

²⁵“Jaa Shɔnzang naa dang jĩng ditɔ dɔɔli ka gbongkarɛ. Zang koo jaa knti keɓe ri bɛ̃ɛ wu, tɔ̀ɔ, vuu keɓe ri naa palɛ kati.

²⁶Diki Jaa Shɔnzang naa nwang doo naa diki Nuhu kɔ.

²⁷Zang shaa vuu, zang ti ɓooro vuu, zang varɛ nɛɛ zang soro ri geere zɔɔ sasak diki ɓɔɔ Nuhu naa shɛ̃ɛ ka yeti Laana, a nɛɛ mani. A mii bang naa arɛ, ningsi ri nandon.

²⁸Zang palɛ doo nɔngkɔ, ka diki Lootu. Zang shaa vuu, zang ɓoo vuu, zang hooro vuu, zang ti mãlɛ́ vuu. Zang ɓàarɛ́ vuu, zang ti mãarɛ gãa.

²⁹Diki ɓɔɔ Lootu naa nwangnɛ, yaa gari Sɔɔdom a nɛɛ mani. A tari ɓɔɔ waa kɔlɔ ka bìí ɓarɛ ɓɛɛ, a nɛɛ lapa, ningsi ri nandon.

³⁰Naa nwáng doo nɔngkɔ, ka diki ɓɔɔ Jaa Shɔnzang nwang nyaa ɓɛɛ.

³¹“Ka diki kaɓa, zang ɓɔɔ ka yuu sãa lapa, ɓɔɔ vuu ɓiɓɛ ka yeti gãa, wu shooro kpang nɛɛ wu daa tuu vuu ɓiɓɛ kpang. Zang ɓɔɔ ka dalɛ, wu ti gbãayu gãa takpang.

³²Nɔɔ kpaa danggn soro Lootu karɛ.

³³Zang ɓɔɔ kasɛ yuu ɓiɓɛ, wukɔ lòó yuu ɓiɓɛ jong. Zang ɓɔɔ nɛɛ loo yuu ɓiɓɛ, wukɔ ta yuu ɓiɓɛ ɓi jong.

³⁴N kɔ̀ɔ́ nɔɔ, ka diki kaɓa nɛɛ zĩi, zang ziti ri roo ka latãng gbete. Laa naa tuu zang gbete, wu yaa gbete.

³⁵Zang soro ziti ri nang vuu ka ree nɛɛ zɔɔ, Laa naa tuu gbete, wu yaa gbete.” [

³⁶Zang varɛ ziti ri ka dalɛ, Laa naa tuu gbete, wu yaa gbete.]

³⁷A ri hɛ̃ɛ wu tɔɔ, “Ka niya Kpanti?” Kɔɔ ri tɔɔ, “Nɔng ɓɔɔ vuu vɔ kagn, jãa kpalɛ zɔɔ ka nɔngkɔ.”