Read mumuye Luka 18 Bible Online

Luka 18 - mumuye bible

Luka 18

¹A Yeesɔ rang zang ɓɔɔ ri mantɛ vuu ka bii ɓiɓɛ, nyaa vuu jeenang keɓe, nɛɛ tɔ̀ɔ wu tusu ri kati nɛɛ ri gaa Laa diki diki, ri yaa gn naa kpang.

²Kɔɔ ri tɔɔ, “Zang ɓɔɔ jɛ̃ɛ zang ruu ɓɔɔ kagn gari ɓɔɔ. Kaa vɔrɔ Laa kpang, ti a zang bannang ɓi jong kpang.

³A Suvɔ ɓɔɔ ti doo kagn gari kaɓa kɔ. Alɛ ka bii ɓiɓɛ diki diki, gaa wu nɛɛ, ‘Ta m jong nɛɛ naa zang ɓɔɔ shing jĩng nɛɛ n kpang ɓɛɛ.’

⁴Yɔɔ ɓɔɔ jɛ̃ɛ zang ruu kaɓa, ti yee laa ɓi ka wu kpang. A yɔɔ bìí naa rɛ̃rɛ nɛɛ knti tɔɔ, ‘N zi tɔ, n kaa vɔrɔ Laa kpang, n ti a shɔnzang bannang m kpang.

⁵Jaa soro keɓe gboro m tɔ nɛɛ alɛnang ɓiɓɛ. Naa n jɛ̃ɛ wu ruu kpang, naa atɛ m leenang ka bii nɛɛ alɛnang ɓiɓɛ.’ ”

⁶A Kpanti Yeesɔ kɔɔyi tɔɔ, “Nɔɔ tãa vuu ɓɔɔ zang ruu jɛ̃ɛnang shi kpang kaɓa kɔɔ ɓɛɛ.

⁷A Laa naa jɛ̃ɛ zang ɓiɓɛ ɓɔɔ wu shɛ̃ɛrɛ katɔ, ɓɔɔ ri shàlɛ́ nyaa ka bii ɓiɓɛ, nɛɛ laagɛ̃ nɛɛ zĩi, ruu ɓɔɔ niizang ɓi kpang ya? Yi ri naa ka bii tantɛnang kpang ya?

⁸N kɔ̀ɔ́ nɔɔ, tantɛ ri naa yinang ka bii katɔ. Naa ɓɔɔ n Jaa Shɔnzang n naa arɛ, n naa ĩi zang ɓɔɔ ri shing danggn ka bii Laa kagn ka koo keɓe ya?”

⁹A ti kɔɔ zang ɓɔɔ ri shing gn tɔ́ɔ, ri ɓarɛ zang tɔ̃ɔ, ri kasɛ ruu zang ɓɔɔgn ɓarɛ kpang, ruu keɓe kaa nɛɛ nyaa vuu jeenang.

¹⁰Kɔɔ ri tɔɔ, “Zang ziti ɓɔɔgn, ri daa Laa gaanang ka Gãa Laa. Zang gbete ɓi zang Farisi, a zang gbete ɓi zang ɓɔɔ ta saka tipi ɓɛɛ.

¹¹Yɔɔ Farisi seepaa gaa Laa, a kɔɔ ruu bang bang ka yuu ɓiɓɛ tɔɔ, ‘Laa n zãa mɔɔ tɔ, ka ruu ɓɔɔ, n nwang m naa zang ɓɔɔ nimbang ɓɔɔ ri ta zang vuu nɛɛ ɓangge, nɛɛ zang ɓɔɔ ri palɛ vuu shi kpang, nɛɛ zang dũndũng kpang. N m ti naa zang ɓɔɔ ta saka tipi kaɓa kpang ɓɛɛ.

¹²N seng nyaalaa diki ziti ka teteng diki manziti. Ka yeti vuu ɓɔɔ n walɛ nandon diki diki, n basɛ tìng kopi, ń a mɔɔ tìng gbete.’

¹³“A zang ɓɔɔ ta saka tipi shii ɓi nɛɛ nɔng beebang, kasɛ nɛɛ wu wisi jĩng paa kpang tingkiring. A nyɔ naa ka danggn, nwang kaa naa ɓɔɔ zi vuu shi kpang ɓɔɔ wu palɛ tɔ ɓɛɛ. A gàa Laa tɔɔ, ‘Gn mɛɛ wu kɔng mɔɔ jong Laa, n m zang ɓɔɔ palɛ vuu shi kpang ɓɛɛ.’

¹⁴N kɔ̀ɔ́ nɔɔ, yɔɔ ɓɔɔ ta saka tipi keɓe gbãayu daa gãa ɓiɓɛ, Laa yaa wu gbalang vuu shi kpang ɓiɓɛ tɔ, wu náa yɔɔ Farisi kaɓa kpang. Ka ruu nɔngkɔ, zang piti ɓɔɔ nɛɛ tusu nɛɛ wu ɓa zang piti, zang naa sɔɔrɔ wukɔ yuu jong ka dii. Zang ɓɔɔ sɔɔrɔ yuu ka dii, zang naa a wukɔ bannang jong.”

¹⁵Zang atɛ Yeesɔ wujɛ seseere kana, nɛɛ wu shing ri naa ka yuu, wu gaa ri Laa. A zang ɓɔɔ ri mantɛ vuu ka bii ɓiɓɛ, ri mangkɛ zang ɓɔɔ ri atɛ wujɛ ɓɛɛ.

¹⁶A Yeesɔ ɓaa ri nyaa, kɔɔ ri tɔɔ, “Nɔɔ yaa wujɛ ka nɔngkɔ, ri a ka bii mɛɛ. Nɔɔ hing ri kpang. Kpanti roonang Laa ɓi ɓɔɔ zang ɓɔɔ naa weɓe kɔ.

¹⁷N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ nɛɛ ta Laa nɛɛ wukɔ Kpanti ɓiɓɛ naa jaa tɔkɔlɔng kpang, nwang zang Laa kpang.”

¹⁸A yɔɔ ɓɔɔ wukɔ zang bang zang Yahudi hɛ̃ɛ Yeesɔ tɔɔ, “Maalang ɓɔɔ tɔ̃ɔ ɓɛɛ, naa n palɛ bɛ̀ɛ́, ń walɛ suru ɓɔɔ waa nyaa kpang viya?”

¹⁹A Yeesɔ kasɛ wu nyaa tɔɔ, “Mɔɔ ɓáa m ka ruu vi nɛɛ maalang ɓɔɔ tɔ̃ɔ viya? Zang tɔ̃ɔ ɓi kagn gbete kpang, ɓi Laa kɔ tɔ̃ɔ gbete.

²⁰Mɔɔ zi nyaa ɓɔɔ Laa dangnɛ tɔ, Laa dang nyaa tɔɔ, ‘Mɔɔ palɛ dũndũng kpang, mɔɔ nyɔ zang vɔrɔ kpang, mɔɔ ɓɔɔ zang vuu kpang, mɔɔ ta zang nyaa nɛɛ sèé kpang, a rɛɛ daaɓɛ nɛɛ naaɓɛ bannang katɔ.’ ”

²¹A yɔɔ kasɛ nyaa tɔɔ, “N gaayu nyaa dannang keɓe dũnnang bɛ̀ɛ́ n doo jasang.”

²²Ɓɔɔ Yeesɔ tãa naa weɓe, a kɔɔ wu tɔɔ, “Yàa mɔɔ kaa vuu gbete. Mãlɛ́ vuu ɓaaɓɛ nandon, mɔɔ basɛ zang ɓɔɔ vuu ka naa kpang ɓɛɛ saka. Tɔ̀ɔ, mɔɔ arɛ mɔɔ dũng knti mɛɛ. Mɔɔ naa walɛ vuu naa ditɔ ka lapa.”

²³Ɓɔɔ yɔɔ ɓɔɔ zang ying tãa naa weɓe, bii tantɛ wu vɔnang, ka ruu ɓɔɔ, vuu naa ɓiɓɛ dɔɔli ɓɛɛ.

²⁴Ɓɔɔ Yeesɔ zi naa ɓɔɔ bii vɔ wu naa weɓe, a kɔɔyi tɔɔ, “Laa tanang wu nwang kpanti zang, kpãa zang ying dɔɔli.

²⁵Laa tanang wu nwang kpanti zang kpãa zang ying, ɓa ɓɔɔ vuu vaa ɓɔɔ zang ɓaa nɛɛ hòlòng ɓu nɛɛ yeng shɔng fɔ̃ɔrɔ katɔ.”

²⁶Zang ɓɔɔ ri tãa vuu ɓɔɔ Yeesɔ kɔɔyi, ri kɔɔyi nɛɛ, “A zang ɓɔɔ walɛ suru bii ɓɔɔ waa nyaa kpang wi gbete wiya?”

²⁷A Yeesɔ kasɛ ri nyaa tɔɔ, “Vuu ɓɔɔ kpãa shɔnzang katɔ, kpãa Laa palɛnang ɓi kpang.”

²⁸A Bituru kɔɔyi tɔɔ, “A wee ruu yaa vuu ɓuru nandon, ruu dũng mɔɔ ɓee?”

²⁹A kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, zang ɓɔɔ yaa gãa ɓiɓɛ, nɛɛ soro ɓiɓɛ, nɛɛ rɛɛ jaa niiɓɛ ɓɔɔ zang varɛ, nɛɛ rɛɛ ɓeedaa nɛɛ ɓeenaa, a ɓɔɔ wujɛ ɓiɓɛ, ka ruu Kpanti roonang Laa,

³⁰naa walɛ vuu keɓe ditɔ nɛɛ zang ɓɔɔ wu yaa ɓɛɛ gaagaa ka koo keɓe. Wu ti naa nwang nɛɛ Laa dòndòng ka koo ɓɔɔ naa a ɓɛɛ.”

³¹Yeesɔ gɔ̃ zang ɓɔɔ ri mantɛ vuu ka bii ɓiɓɛ kopi tu ziti dang gbete, a kɔɔ ri tɔɔ, “Nɔɔ zirɛ, ruu daa kana Urushalima, vuu piti ɓɔɔ zang nyaa shonang Laa ri bee ka yuu mɛɛ ɓɔɔ n Jaa Shɔnzang, daa nwang kaa naa ɓɔɔ ri bee ɓɛɛ.

³²Zang daa tuu m kaa tɔ, zang a zang ɓɔɔ ri dũng Laa kpang ɓɛɛ, tɔ̀ɔ, ri kpaa m, ri palɛ m vuu yusɛ̃ɛ. Ri ti tùlù m sisãa ka bii.

³³Ri ti nyɔ m nɛɛ gbãa, tɔ̀ɔ, ri nyɔ m vɔrɔ kati. N naa seepaa nɛɛ sàa, ka lee ɓɔɔ diki daa taati ɓɛɛ.”

³⁴A zang ɓɔɔ ri mantɛ vuu ka bii ɓiɓɛ, ri zi dĩiri vuu ɓɔɔ wu kɔɔ ɓɛɛ gbete kpang. Hã̀a ri kɔɔnang katɔ, ka ruu nɔngkɔ, ri zi vuu ɓɔɔ wu kɔɔ ɓɛɛ, kpang.

³⁵Ri a tɔ ka Jeriko naabm, a zang ɓɔɔ jĩng ringtang ɓɔɔ gaa vuu, nwang ka nyaa gbalang.

³⁶Tãa nyaa ɓɔɔ zang dɔɔli ri haayi, a hɛ̃ɛ zang ruu ɓɔɔ zang haa nyaa ɓɛɛ kati.

³⁷Zang kɔɔ wu tɔɔ, “Yeesɔ yɔɔ Nazara tɛɛyi.”

³⁸Ɓu doo ɓɔɔ tãa naa weɓe, sãa nyaa ka lapa nabm tɔɔ, “Yeesɔ Jaa zɔ̃ng Dawuda, gn mɛɛ wu kɔng mɔɔ jong.”

³⁹A zang ɓɔɔ ri ka tĩng, mangkɛ wu. Ri tɔɔ wu vɔ nyaa ta. Ti sãa nyaa ɓi kaa nabm kɔ jong nɛɛ, “Jaa zɔ̃ng Dawuda gn mɛɛ wu kɔng mɔɔ jong.”

⁴⁰A Yeesɔ shiiyi, kɔɔ zang nɛɛ zang wu atɛ wu yɔɔ jĩng ringtang bìí ta. Zang jĩng ringtang a tɔ naabm, a Yeesɔ hɛ̃ɛ wu tɔɔ,

⁴¹“Mɔɔ kasɛ nɛɛ n pàlɛ̀ mɔɔ viya?” Kɔɔ Yeesɔ tɔɔ, “Dabang puu m jĩng jong, n zi nɔng.”

⁴²A Yeesɔ kɔɔ wu tɔɔ, “Jĩng ɓaaɓɛ wu puu ta. Danggn ɓɔɔ mɔɔ shing ka bii mɛɛ, masɛ mɔɔ tɔ.”

⁴³A jĩng ɓiɓɛ tantɛ puunang, a dṹng Yeesɔ ka knti, dɔ̀ɔ́ Laa kana. Ɓɔɔ zang ɓɔɔ ri ka nɔng, ri zi veɓe, ri dɔɔ Laa kaa jong.