Read mumuye Luka 2 Bible Online

Luka 2 - mumuye bible

Luka 2

¹Ka diki kaɓa Kayisa Agɔsitu kpanti zang tipi Rooma, shong nyaa nɛɛ zang gã zang ɓɔɔ ka tipi ɓiɓɛ nandon.

²Zang gã̀ zang gngn ka tipi Rooma kpang. Zang gãnang keɓe wukɔ ɓɔɔ tĩng shɔɔnang bɛ̀ɛ́ Kiriniyu nwang gɔmna ka tipi Siriya.

³Zang ɓu daarɛ ka gari ɓarɛ nɛɛ tɔ̀ɔ, zang daa gã ri kati.

⁴Ka ruu nɔngkɔ, Yusufu seepaa nɛɛ gari Nazara ɓɔɔ ka tipi Galili ɓɛɛ, a daa ka gari ɓɔɔ zang yi Dawuda kagn, ɓɔɔ zang ɓaa nɛɛ Bɛtalami ka tipi Yahudi ɓɛɛ. Ka ruu ɓɔɔ, wu ɓi zɔ̃ng Dawuda ɓɛɛ.

⁵Yusufu daa nɛɛ ɓeeso Marayamu ɓɔɔ jaa ka yeti ɓɛɛ, nɛɛ tɔ̀ɔ, zang daa gã ri kati.

⁶Ɓɔɔ ri doo ka Bɛtalami, diki ɓɔɔ Marayamu yi jaa kagn naa arɛ,

⁷a yi jamari ɓiɓɛ kaa zang varɛ, leng wu nɛɛ sɛ̃ɛ fɔ̃ɔrɔ ɓɔɔ zang leng jaa rɛ̃ɛting nɛɛ mani ɓɛɛ. A wɔɔ wu ka yeti vuu ɓɔɔ zang tɛ̃ɛ vuu vaa vuu shaanang kagn ɓɛɛ. Ka ruu ɓɔɔ, ri walɛ gãa ɓɔɔ ri roo kagn ka nɔng ɓɔɔ zang shing zang zanti kpang ɓɛɛ.

⁸Ka tipi kaɓa naabm, zang jagãng ri kagn nɔngkɔ. Ri roo ka dalɛ, ri gãng jĩng ka vuu vaa ɓarɛ nɛɛ zĩi.

⁹A zang nyaa shonang Laa ɓɔɔ ka lapa, naa nwang nyaa ka bii ɓarɛ, a nɔng yakɛnang Kpanti Laa naa yakɛ nɔng ɓɔɔ ri kagn, a ri kaa vɔrɔ.

¹⁰Zang nyaa shonang Laa ɓɔɔ ka lapa, kɔɔ ri tɔɔ, “Nɔɔ kaa vɔrɔ kpang, n atɛ nɔɔ ruu tɔ̃ɔ, ɓɔɔ a nɔɔ tĩnang tãanang dɔɔli, ɓɔɔ zang piti naa tãa tĩnang ɓiɓɛ ɓɛɛ.

¹¹Zang yi nɔɔ zang ɓɔɔ naa ta yuu manɛ tɔ lɛɛkɔ ka gari ɓɔɔ zang yi Dawuda kagn ɓɛɛ. Wukɔ Kpanti Kirisi.

¹²Wee naa ɓɔɔ nɔɔ daa zi kagn ɓɛɛ. Nɔɔ daa zi jaa rɛ̃ɛting, zang leng ka sɛ̃ɛ fɔ̃ɔrɔ, zang wɔɔ ka yeti vuu ɓɔɔ zang tɛ̃̀ɛ́ vuu vaa vuu shaanang kagn ɓɛɛ.”

¹³A ri tantɛ zang nyaa shonang Laa ɓɔɔ ka lapa keɓe zinang, nɛɛ zang nyaa shonang Laa ɓɔɔ ka lapa ɓɔɔgn gaagaa, ri dɔɔ Laa kana. Ri kɔ̀ɔ́yi nɛɛ,

¹⁴“Zang wu dɔɔ Kpanti Laa ɓɔɔ ka lapa kpala kpala ta. Zang ɓɔɔ Laa tãa tĩnang ɓarɛ katɔ ka tipi keɓe, ri ti tãa tĩnang nwannang ta.”

¹⁵Ɓɔɔ zang nyaa shonang Laa ɓɔɔ ka lapa ri gbãayu tɔ ka lapa, zang jagãng naa kɔɔ zɔɔ tɔɔ, “Ruu daa nɔɔ ta ka Bɛtalami, ruu daa zi vuu kɔ palɛ, a Kpanti Laa kɔɔ ruu ɓɛɛ.”

¹⁶Ka ruu nɔngkɔ, ri làabìi, ri daayi, ri daa ĩi rɛɛ Yusufu nɛɛ Marayamu nɛɛ jaa rɛ̃ɛting ɓɔɔ ri wɔɔ ka yeti vuu ɓɔɔ zang tɛ̃̀ɛ́ vuu vaa vuu shaanang kagn ɓɛɛ.

¹⁷Ɓɔɔ ri zi wu tɔ, ri kɔɔrɔ zang vuu ɓɔɔ zang nyaa shonang Laa ɓɔɔ ka lapa kɔɔ ri ka yuu jaa keɓe kati.

¹⁸Zang ɓɔɔ ri tãa vuu ɓɔɔ zang jagãng kaɓa ri kɔɔyi, ri mã naa ka danggn.

¹⁹A Marayamu shing ruu keɓe piti ka yeti ɓiɓɛ. A ti rɛ̃rɛ ka yuu vuu keɓe ka yeti ɓiɓɛ.

²⁰Ɓɔɔ zang jagãng nɛɛ ri gbãa kaa yuu, ri a Laa bannang, ri dɔɔ wu, ka ruu vuu piti ɓɔɔ ri zirɛ a ri ti tãayi ɓɛɛ. Naa ɓɔɔ zang nyaa shonang Laa ɓɔɔ ka lapa kɔɔ ri ɓɛɛ.

²¹Zang yi Yeesɔ tɔ diki daa tɔ mantaati, a zang arɛ nɛɛ zang naa yèé Yeesɔ kaa shaa ka naa ɓɔɔ ri palɛ ɓɛɛ. Zang yee wu shaa tɔ, a zang ɓaa wu nung kaa nɛɛ Yeesɔ. Nung ɓɔɔ zang nyaa shonang Laa ɓɔɔ ka lapa a wu, bɛ̀ɛ́ niiɓɛ tuu wu gn ka yeti kpang ɓɛɛ.

²²Diki ɓɔɔ rɛɛ Yusufu nɛɛ Marayamu ri daa dɔɔ Laa vuu naa ɓɔɔ Musa beeyi, nɛɛ tɔɔ ri sɔɔ bii ɓarɛ naa arɛ. A ri daa kaa nɛɛ wu ka Urushalima nɛɛ ri daa a wu Laa.

²³Zang bee ka yeti labeenang Laa tɔɔ, “Jamari ɓɔɔ varɛ ɓɔ̀ɔ́ shɔnzang nɛɛ ɓɔɔ vuu vaa yirɛ piti, zang wu a Laa katɔ.”

²⁴Rɛɛ Yusufu ri daa Urushalima, ka ruu ɓɔɔ, tɔ̀ɔ, ri daa dɔɔ Laa ning koro kɔ koro ziti naa ɓɔɔ Laa dang nyaa ɓɛɛ.

²⁵Ka diki kaɓa, yɔɔ ɓɔɔ kagn Urushalima, zang ɓaa wu nɛɛ Simiyon. Simiyon zang ɓɔɔ kasɛ Ruu Laa katɔ, a ti ɓaa shoo ka nyaa ɓɔɔ Laa dang ɓɛɛ tɔ̃ɔ tɔ̃ɔ. Bɛɛ Simiyon kaɓa gã ɓi diki ɓɔɔ Laa naa ta yuu zang Isirela ɓɛɛ. Suru Laa ɓi kagn bii ɓiɓɛ.

²⁶Suru Laa ti kɔɔ wu nɛɛ wu zi Kirisi zang ɓɔɔ Laa tɔɔ arɛ naa ta yuu zang ka gbongkarɛ tɔɔ wu vɔrɛ.

²⁷Suru Laa dɔ̃ɔ Simiyon ka laa kaɓa daa ka yeti Gãa Laa. Rɛɛ Yusufu ri a kaa nɛɛ Yeesɔ ka Gãa Laa, nɛɛ tɔɔ ri palɛ wu vuu ɓɔɔ labeenang Laa kɔɔ ɓɛɛ kati.

²⁸A Simiyon ta jaa kaa naa ɓiɓɛ, a zãa Laa kati tɔɔ,

²⁹“Kpanti Laa, mɔɔ palɛ vuu ɓɔɔ mɔɔ tɔɔ mɔɔ palɛ tɔ. Yeti jaafoo ɓaaɓɛ katɔ, yaa wu ta wu vɔrɛ.

³⁰Ka ruu ɓɔɔ, jĩng mɛɛ zi zang ɓɔɔ naa ta yuu zang ɓaaɓɛ tɔ ɓɛɛ

³¹Zang ɓɔɔ mɔɔ shingnɛ, nɛɛ zang koolaa piti ri zi wu ɓɛɛ.

³²Wukɔ naa nwang nɔng yakɛnang ɓɔɔ tusu zang ɓɔɔ ri zi kpang, vuu ɓɔɔ mɔɔ kasɛ ɓɛɛ. Wu ti naa shing zang, zang a zang ɓaaɓɛ Isirela bannang.”

³³A diiɓɛ nɛɛ niiɓɛ ri mã naa ka danggn, ka ruu vuu ɓɔɔ Simiyon kɔɔ ka yuu ɓiɓɛ ɓɛɛ.

³⁴Simiyon shìng ri naa ka yuu ɓarɛ, a gaa ri Laa kati. Kɔɔ Marayamu nàá Yeesɔ tɔɔ, “Laa zɔ̃ng jaa keɓe nɛɛ wu naa nwáng zang ɓɔɔ zang Isirela dɔɔli naa shaarɛ ka ruu ɓiɓɛ. Zang dɔɔli ti naa ta yuu ɓarɛ, ka ruu ɓiɓɛ. Wu ti naa nwáng zang ɓɔɔ zang rang wu katɔ ɓɛɛ.

³⁵Tɔ̀ɔ, wu naa shing rɛ̃rɛnang ɓɔɔ ka yeti zang wu nwangsɛ bii kati. Yeti naa lasɛ mɔɔ, kɔng mɔɔ ka yeti naa ɓɔɔ zang ɓaa mɔɔ nɛɛ yere bang ɓɛɛ.”

³⁶Zang nyaa shonang Laa ɓɔɔ kagn zang soro, zang ɓaa wu nɛɛ Ana. Ana jaa Fanuwel ɓɔɔ ka zɔ̃ng Ashaa ɓɛɛ. Saa ɓiɓɛ ti daa laa dɛ̃ɛti tu dɛ̃ɛti. Nwáng nɛɛ ɓeevɛ saa manziti kɔ nwani, a nwang suvɔ kati. Daarɛ Gãa Laa nɛɛ laagɛ̃ nɛɛ zĩi diki diki, wu dɔɔ Laa. Wu ti gaa Laa, wu seng nyaalaa.

³⁷

³⁸Ka laa kaɓa, Anas arɛ naa zãa Laa, a rang zang ɓɔɔ ri gã naa ɓɔɔ Laa naa ta yuu zang Urushalima, ruu ka yuu jaa keɓe.

³⁹Yusufu nɛɛ Marayamu ri hangsɛ vuu ɓɔɔ labeenang Laa ɓɔɔ Musa beeyi kɔɔ ɓɛɛ palɛnang tɔ nandon, ri gbãayu ka gari ɓarɛ Nazara ɓɔɔ ka tipi Galili ɓɛɛ.

⁴⁰A jaa naa bangnɛ, zũng danggn kati. Zũnang ka yeti ɓiɓɛ gaagaa. Laa tãa tĩnang vuu ɓɔɔ wu palɛ ɓɛɛ dɔɔli.

⁴¹Sáa nɛɛ mɔɔ tɔ, daa Yeesɔ nɛɛ niiɓɛ ri daarɛ ka Urushalima, ka ruu nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ.

⁴²Ɓɔɔ saa Yeesɔ daa tɔ kopi tu ziti, ri daa Urushalima kaa nɛɛ Yeesɔ naa ɓɔɔ ri dàarɛ́ ɓɛɛ.

⁴³Nyaalaa waa nyaa tɔ, ri gbãayu kana gãa, a Yeesɔ nwáng ɓi kaa Urushalima ka nɔngkɔ. Diiɓɛ nɛɛ niiɓɛ ri zi kpang.

⁴⁴Ri kɔɔ ɓarɛ nɛɛ naa Yeesɔ kagn teteng zang ɓarɛ. A ri naa gaa tɔɔsung Yeesɔ kãanang kaa nɛɛ laarang ka teteng rɛɛ ɓeezung nɛɛ rɛɛ ɓeesang.

⁴⁵Ri ĩi wu kpang, ka ruu nɔngkɔ, ri gbãayu ka Urushalima tɔkn, ka nɔng ɓɔɔ ri kãa wu ɓɛɛ.

⁴⁶Ri kãa wu diki taati, a ri naa ĩi wu ka Gãa Laa. Nwang tɔ ka teteng zang Yahudi ɓɔɔ ri tusu zang vuu ɓɛɛ. Ɓaa shoo ka yee ɓɔɔ ri rangkɛ, wu ti hɛ̃ɛlɛ ri ruu.

⁴⁷Zang piti ɓɔɔ ri tãa vuu ɓɔɔ wu kɔɔyi, ri mã naa ka danggn, ka ruu zũnang ɓiɓɛ, nɛɛ nyaa ɓɔɔ wu kasɛ ɓɛɛ.

⁴⁸Ɓɔɔ, diiɓɛ nɛɛ niiɓɛ ri zi wu naa weɓe, ri mã naa ka danggn, niiɓɛ hɛ̃ɛ tɔɔ, “Jaa, mɔɔ pálɛ̀ ruu nɔngkɔ ka ruu viya? Ruu kãa mɔɔ tɔ nɛɛ daaɓɛ, gbãng gbãng.”

⁴⁹A Yeesɔ kasɛ ri nyaa tɔɔ, “Nɔɔ kãa m ka ruu viya? Nɔɔ zi kpang nɛɛ n naa nwáng ka gãa Daa mɛɛ kpang ya?”

⁵⁰Ri zi dĩiri nyaa ɓɔɔ wu kasɛ ri kpang.

⁵¹A seepaa daa kaa nɛɛ ri ka Nazara. Ɓaa shoo ka nyaa ɓarɛ ning. A niiɓɛ shing ruu keɓe ka yeti ɓiɓɛ nandon.

⁵²A Yeesɔ bang bii kati zũnang ɓiɓɛ ti daa kana nɛɛ tĩng. Laa ti tãa tĩnang vuu ɓɔɔ wu palɛ ɓɛɛ dɔɔli, a zang piti ri tãa tĩnang ɓiɓɛ doo nɔngkɔ.