Read mumuye Luka 23 Bible Online

Luka 23 - mumuye bible

Luka 23

¹Zang ɓɔɔ ri kpalɛ yuu, ri yupaa nandon, ri atɛ Yeesɔ ka bii Gɔmna Bilatu.

²Ri kãa gbalang ɓɔɔ ri kɔɔrɔ wu ruu ka yuu ɓiɓɛ nɛɛ, “Ruu ĩi zang keɓe nwãarɛ zang ɓuru, nɛɛ zang wu shù Kayisa kpanti tipi Rooma saka tipi kpang. Nɛɛ wukɔ ti Kirisi, nɛɛ wu doo kpanti kɔ.”

³A Bilatu hɛ̃ɛ wu nɛɛ, “Mɔkɔ kpanti zang Yahudi ya?” A Yeesɔ kasɛ wu nyaa tɔɔ, “Nn, naa ɓɔɔ mɔɔ kɔɔ ɓɛɛ.”

⁴A Bilatu kɔɔ zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang dɔɔli ɓɔɔ ri dũng ri ɓɛɛ, tɔɔ, “N zi vuu shi kpang ɓɔɔ yɔɔ keɓe palɛ ɓɛɛ kpang.”

⁵A ri yì wu tĩng ka bii nɛɛ, “Yɔɔ keɓe palɛ zang nɛɛ zang ri haa nyaa nɛɛ vuu ɓɔɔ wu tusu zang ɓɛɛ ka tipi Yahudi. Gaayu ka tipi Galili sasak, a nɔng ka nihn.”

⁶Ɓɔɔ Bilatu tãa naa weɓe, hɛ̃ɛ zang nɛɛ Yeesɔ zang tipi Galili ya?

⁷A ɓɔɔ wu tãayi nɛɛ, Yeesɔ zang tipi Galili ɓɔɔ Hiridu roo kpanti kagn ɓɛɛ, a dɔ̃ wu ka bìí kpanti Hiridu ɓɔɔ bɛ̀ɛ́ ka Urushalima ka diki kaɓa ɓɛɛ.

⁸Ɓɔɔ Hiridu zi Yeesɔ hn, tãa tĩnang dɔɔli, ka ruu ɓɔɔ, tãa nyaa ɓiɓɛ tɔ. A kasɛ ka yeti ɓiɓɛ nɛɛ wu zi Yeesɔ katɔ, nɛɛ tɔ̀ɔ, wu zi vuu ɓɔɔ zang zirɛ zang mã naa ka danggn ɓɔɔ Yeesɔ palɛ ɓɛɛ.

⁹Ka ruu nɔngkɔ, hɛ̃ɛlɛ wu ruu sasak, a Yeesɔ kasɛ wu nyaa kpang.

¹⁰Rɛɛ zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ ri tusu zang labeenang Laa, ri shi paa ri kɔɔrɔ vuu shi kpang ɓɔɔ ri tɔɔ Yeesɔ palɛ kaa gbãng gbãng.

¹¹A kpanti Hiridu nɛɛ zang sɔɔja ɓiɓɛ, ri palɛ wu vuu yusɛ̃ɛ, a ri kpaa wu. A ri hãa wu fɔ̃ɔrɔ ɓɔɔ kpanti ri hãlɛ ɓɛɛ ka bii. A kpanti Hiridu sɔɔrɔ wu ka bii kpanti Bilatu.

¹²Hiridu nɛɛ Bilatu ri gaayu wusang yinang ka diki keɓe. Bɛɛ ri shing jĩng nɛɛ zɔɔ kpang.

¹³Bilatu ɓaa nyaa tɔkn ka zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ ri doo zang bang zang kɔ, nɛɛ rɛɛ zang ɓɔɔ kpalɛ zɔɔ ka nɔng ɓɛɛ.

¹⁴A kɔɔ ri nɛɛ, “Nɔɔ atɛ m yɔɔ keɓe, nɔɔ tɔɔ palɛ zang, nɛɛ zang haa nyaa. Ɓɔɔ n hɛ̃ɛlɛ wu ka tĩng manɛ, n ĩi wu nɛɛ vuu shi kpang ɓɔɔ nɔɔ kɔɔrɔ ka yuu ɓiɓɛ gbete kpang.

¹⁵Kpanti Hiridu ti ĩi wu nɛɛ mani kpang jong. Ka ruu nɔngkɔ, gbãa ruu yuu nɛɛ wu tɔkn. Vuu ɓɔɔ wu palɛ ɓɔɔ daa naa ɓɔɔ zang nyɔ wu vɔrɔ kagn kpang.

¹⁶Ka ruu nɔngkɔ, n nyɔ wu nɛɛ gbãa kɔ shɛ̃ɛning, n yaa wu naa.”

¹⁷[Diki nyaalaa Pasika nɛɛ a tɔ, Bilatu yàarɛ́ zang Yahudi zang gbete naa ka teteng zang ɓɔɔ zang mã ka sãa ɓɛɛ.]

¹⁸Ri goo nyaa ka lapa dɔ̃ɔ, gbete nɛɛ, “Nyɔ yɔɔ keɓe vɔrɔ, mɔɔ yàa ruu Baraba naa.”

¹⁹(Zang loo Baraba ka sãa, ka ruu ɓɔɔ, ka teteng zang ɓɔɔ haa nyaa ka gari, a zang nyɔ zang vɔrɔ ɓɛɛ.)

²⁰Bilatu kasɛ nɛɛ wu yaa Yeesɔ naa katɔ, ka ruu nɔngkɔ, rang yee tɔkn nɛɛ zang, a gaa ri.

²¹A ri goo nyaa tɔkn nabm nɛɛ, “Ɓaa wu naa ka laa, ɓaa wu naa ka laa.”

²²Bilatu hɛ̃ɛ ri tɔkn, daa kaa nyaa taati nɛɛ, “Vuu shi kpang ɓɔɔ wu palɛ viya? N ĩi vuu shi kpang ɓɔɔ wu palɛ ɓɔɔ daa naa ɓɔɔ zang nyɔ wu vɔrɔ kpang. N nyɔ wu nɛɛ gbãa kɔ shɛ̃ɛning, n yaa wu naa.”

²³A ri yi tĩng kana, ri haa nyaa nabm nɛɛ, zang ɓaa wu naa ka laa. Nyaa ɓɔɔ ri hàa ɓɛɛ naa sha tĩng.

²⁴A Bilatu kɔɔ zang nɛɛ zang pàlɛ̀ ri vuu ɓɔɔ ri kasɛ ɓɛɛ ta.

²⁵A yaa ri zang ɓɔɔ zang loo ka sãa ɓɔɔ shing zang, zang haa nyaa ka gari, a zang nyɔ zang vɔrɔ ɓɛɛ, naa. A á ri Yeesɔ nɛɛ ri palɛ wu vuu ɓɔɔ ri kasɛ ɓɛɛ.

²⁶Ka ɓɔɔ ri daa kaa nɛɛ Yeesɔ, ka nɔng ɓɔɔ ri daa nyɔ wu vɔrɔ ɓɛɛ, ri kpisi yuu nɛɛ yɔɔ ɓɔɔ zang ɓaa wu nɛɛ Siman, yɔɔ gari Kiranɛ, nɛɛ wu daa kaa gari. Ri yi wu, ri shing wu, nɛɛ wu tuu laa ɓɔɔ zang daa ɓaa Yeesɔ naa kagn ɓɛɛ, wu dũng Yeesɔ ka knti.

²⁷Ka teteng zang dɔɔli ɓɔɔ ri dũng Yeesɔ ka knti, zang soro kagn ɓɔɔ ri kaa nyavɔ ri ti ɓaarɛ nyaavaa.

²⁸A Yeesɔ raa jĩng kɔɔ ri nɛɛ, “Zang soro gari Urushalima, nɔ́ɔ kaa nyavɔ, ka ruu mɛɛ kpang, nɔɔ kaa ka ruu yuu manɛ, nɛɛ wujɛ manɛ.

²⁹Ka ruu ɓɔɔ, diki a kana ɓɔɔ zang naa kɔɔyi nɛɛ tĩnang tãanang ɓi ɓɔɔ zang soro ɓɔɔ ri shii katɔ, nɛɛ ɓɔɔ ri tuu jaa gngn kpang, nɛɛ ɓɔɔ jaa mãa míi ɓarɛ kpang ɓɛɛ.

³⁰Wee diki ɓɔɔ zang naa kɔ̀ɔ́ kɔpɔ kagn nɛɛ, ‘Ji jong ka yuu ɓuru.’ Zang ti kɔ̀ɔ́ jaa kɔpɔ nɛɛ ‘Waasɛ ruu jong’ ɓɛɛ.

³¹Zang nɛɛ palɛ m vuu keɓe ɓɔɔ n nwang naa laa bɛbɛtɛ, zang naa palɛ nɔɔ ɓi kaa biya, ɓɔɔ nɔɔ nwang naa laa waatɛnang ɓɛɛ?”

³²Zang kagn ziti, ɓɔɔ ri palɛ vuu shi kpang ɓɛɛ, zang yi ri jong nɛɛ zang daa nyɔ ri vɔrɔ nɛɛ Yeesɔ.

³³A ɓɔɔ ri a ka nɔng ɓɔɔ zang ɓaa nɛɛ zɔ̃pi ɓɛɛ, ri ɓaa wu naa ka laa, ka nɔngkɔ, nɛɛ rɛɛ zang ziti ɓɔɔ ri palɛ vuu shi kpang keɓe. Ɓɔɔ gbete ka nakn, a ɓɔɔ gbete ka nagang ɓiɓɛ.

³⁴A Yeesɔ kɔɔyi nɛɛ, “Daa mɛɛ, yaa ri gbalang vuu keɓe katɔ, ka ruu ɓɔɔ, ri zi vuu ɓɔɔ ri palɛ kpang ɓee.” Ri sháa laa ka naa ɓɔɔ ri basɛ rɛɛ fɔ̃ɔrɔ ɓiɓɛ ɓɛɛ.

³⁵Zang ri shii nɛɛ dalɛ, ri pɛ̃ɛrɛ, a rɛɛ zang bang bang zang Yahudi ri kpaa wu tɔɔ, “Ta yuu zang, wu ta yuu ɓiɓɛ lɛ̀ɛ́ ta jong, wukɔ nɛɛ Kirisi, Jaa Laa ɓɔɔ Laa zɔ̃ng wu katɔ ɓɛɛ.”

³⁶Zang sɔɔja ri kpaa wu, ri arɛ ri a wu mii inabi ɓɔɔ gbang katɔ ɓɛɛ.

³⁷Ri tɔɔ wu nɛɛ, “Ta yuu ɓaaɓɛ ta mɔkɔ nɛɛ Kpanti zang Yahudi ɓɛɛ.”

³⁸Zang bee vuu, zang ɓaa ka yuu laa ɓɔɔ zang ɓaa wu naa kagn, ka yupaa ɓiɓɛ nɛɛ, “Wee kɔ Kpanti zang Yahudi.”

³⁹Zang ɓɔɔ ri palɛ vuu shi kpang ziti ɓɔɔ zang ɓaa ri naa nɛɛ wu ɓɛɛ, ɓɔɔ gbete rang wu yee shi kpang tɔɔ, “Wu mɔkɔ Kirisi kpang ya? Ta yuu ɓaaɓɛ ta mɔɔ ta ruu jong.”

⁴⁰Ɓɔɔ gbete mangkɛ ɓeesang tɔɔ, “Mɔɔ kaa vɔrɔ Laa kpang ya? Mɔɔ zi kpang mɔɔ vɔ vɔrɔ gbete nɛɛ wu kpang ya?

⁴¹Vɔrɔ ɓuru ɓi ti waasɛ̃, ka ruu ɓɔɔ, ruu vɔ ɓuru ka ruu vuu shi kpang ɓɔɔ ruu palɛ ɓɛɛ. Yɔɔ keɓe palɛ vuu shi kpang ɓɔɔ kagn kpang.”

⁴²A raa nyaa kɔɔ Yeesɔ nɛɛ, “Mɔɔ nɛɛ a tɔ ka ɓɔɔ mɔɔ naa roo Kpanti, danggn mɛɛ wu ning mɔɔ kpang.”

⁴³Yeesɔ kasɛ wu nyaa tɔɔ, “Niizang n kɔɔ mɔɔ, lɛɛkɔ mɔɔ nwang nɛɛ n ka Paradayisi, nɔng ɓɔɔ tĩnang waa nyaa kpang ɓɛɛ.”

⁴⁴Ɓɔɔ laa kaa dalɛ yuu, nɔng tɔɔ ka tipi kaɓa nandon sasak, saka taati ɓɔɔ laarang palɛ nɛɛ mani.

⁴⁵A fɔ̃ɔrɔ nyaa Gãa Laa basɛ ziti, gaayu nɛɛ paa daa lɔɔsɔ dii.

⁴⁶Yeesɔ kaa nyaa ka lapa nɛɛ, “Daa mɛɛ, n a mɔɔ Suru bii mɛɛ tɔ ka naa ɓaaɓɛ.” Kɔɔ naa weɓe, a vɔrɛ.

⁴⁷Ɓɔɔ zang bang sɔɔja ɓɔɔ daa nɛɛ Yeesɔ zi naa weɓe, dɔɔ Laa tɔɔ, “Niizang yɔɔ keɓe, palɛ vuu shi kpang, kagn kpang.”

⁴⁸Zang ɓɔɔ ri kpalɛ yuu ka nɔng, nɛɛ ri zi vuu ɓɔɔ zang palɛ, ka ɓɔɔ ri zi vuu pálɛ́ hn, ri gbãayu ka gãa ɓarɛ nɛɛ yeti lasɛnang. Ri waa naa ka danggn.

⁴⁹Zang ɓɔɔ ri zi Yeesɔ nung tɔ, nɛɛ rɛɛ zang soro ɓɔɔ ri zi Yeesɔ nung tɔ kɔ doori, ɓɔɔ ri dũng wu nɛɛ Galili ɓɛɛ, ri shii nɛɛ dalɛ, ri pɛ̃ɛrɛ vuu ɓɔɔ zang palɛ ɓɛɛ.

⁵⁰Zang ɓɔɔgn zang ɓaa wu nɛɛ Yusufu, yɔɔ gari zang Yahudi ɓɔɔ zang ɓaa nɛɛ Arimataya ɓɛɛ. Kagn teteng zang bang ɓɔɔ ri kpalɛ zɔɔ nɛɛ ri jɛ̃ɛ Yeesɔ ruu ɓɛɛ. A ɓi kaa zang ɓɔɔ zang a wu bannang dɔɔli ɓɛɛ.

⁵¹Kasɛ nyaa ɓi kagn ka vuu ɓɔɔ ri mã zɔɔ nyaa, ri kasɛ nɛɛ ri palɛ ɓɛɛ kpang. Gã ɓi diki ɓɔɔ Laa naa roo Kpanti ɓɛɛ.

⁵²Daa ka bii Bilatu, a gaa wu nɛɛ, wu a wu vɔrɔ Yeesɔ.

⁵³A witi vɔrɔ Yeesɔ nɛɛ lapa, leng wu nɛɛ fɔ̃ɔrɔ ɓɔɔ zang leng vɔrɔ nɛɛ mani ɓɛɛ. Daa wɔɔ wu ka sàa ɓɔɔ zang ɓee ka yeti tari, ɓɔɔ zang gbãa vɔrɔ gngn doo gbete kpang ɓɛɛ.

⁵⁴Bɛ̀ɛ́ kaa diki ɓɔɔ zang kpalɛ bii ka ruu Diki Ɔ̃sɔnang ɓɛɛ.

⁵⁵Zang soro ɓɔɔ ri dũng Yeesɔ nɛɛ tipi Galili ri daa nɛɛ Yusufu, ri daa zi saa bìí kati nɛɛ naa ɓɔɔ zang wɔɔ vɔrɔ Yeesɔ kagn ɓɛɛ.

⁵⁶Ri gbãayu ka gãa, ri daa palɛ nung, ɓɔɔ a sɛ̃ɛ tɔ̃ɔ nɛɛ nung ɓɔɔ zang tũuru vɔrɔ ka bii ɓɛɛ. Ri ɔ̃sɔ ka Diki Ɔ̃sɔnang naa ɓɔɔ nyaa dannang Laa kɔɔ ɓɛɛ.