Read mumuye Luka 3 Bible Online

Luka 3 - mumuye bible

Luka 3

¹Laa rang yee nɛɛ Yɔhana jaa Zakariya ka jĩngti, ka diki ɓɔɔ bɛ̀ɛ́ Pontu Bilatu kɔ gɔmna tipi Yahudi ɓɛɛ. Hiridu ɓi kaa gɔmna tipi Galili, a jaa daa ɓiɓɛ Filibu ɓi gɔmna tipi Ituriya nɛɛ tipi Tirakoniti. Lisaniya ɓi gɔmna tipi Abileni. Ka diki kaɓa, rɛɛ Anas nɛɛ Kayifa rikɔ kpanti zang ɓɔɔ ri dɔɔ vuu ka Gãa Laa ɓɛɛ. Ka diki kaɓa, Kayisa Taberiyu wukɔ zang bang rɛɛ tipi keɓe nɛɛ tipi Rooma nandon, daa saa kopi tu maani.

³Yɔhana daarɛ ka tipi ɓɔɔ ka nyaa rang Urudung nandon, kɔɔrɔ zang nɛɛ, “Nɔɔ yaa vuu shi kpang manɛ ta, nɔɔ kɔ̃sɔ yeti manɛ. N palɛ nɔɔ batizima, tɔ̀ɔ, Laa wu yàa nɔɔ gbalang vuu shi kpang manɛ kati.”

⁴Naa ɓɔɔ Ishaya zang nyaa shonang Laa bee ka yeti labeenang ɓiɓɛ ɓɛɛ. Ishaya beeyi tɔɔ, “Zang tãa zang ɓɔɔ kagn, rang yee Laa ka yeti waala tɔɔ, ‘Nɔɔ pàlɛ́ Kpanti Laa gbalang ta, nɔɔ shiiri katɔ ɓororo, tɔ̀ɔ, wu ra kaa gn, wu a ka bii zang ɓiɓɛ.

⁵Zang wu zũuru guurang nandon, zang ti jili kɔpɔ nɛɛ jaa gboonang ka tipi nandon. Zang ti shiiri gbalang ɓɔɔ lengke bii katɔ ɓororo. Gbalang ɓɔɔ gɔgɔlɔ, zang ti palɛ tɔ̃ɔ tɔ̃ɔ.

⁶Shɔnzang piti ri naa zi naa ɓɔɔ Laa naa ta yuu zang ditɔ.’ ”

⁷A Yɔhana kɔɔ zang dɔɔli ɓɔɔ ri álɛ̀ nɛɛ wu palɛ ri batizima tɔɔ, “Sɔkɔ pudi kiɓi, ɓu wi kɔɔ nɔɔ nɛɛ nɔɔ yuu jĩng dannang ɓɔɔ Laa atɛ ɓɛɛ wiya?

⁸Nɔɔ palɛ vuu ɓɔɔ tusu zang nɛɛ nɔɔ kɔ̃sɔ yeti manɛ tɔ, nɔɔ yaa vuu shi kpang tɔ ɓɛɛ. Nɔ́ɔ kɔ̀ɔrɔ̀ manɛ nɛɛ, ‘Rùu ɓuru wujɛ Ibirayi kpang.’ N kɔɔ nɔɔ, Laa zunung ɓɔɔ wu pàlɛ́ Ibirayi zɔ̃ng nɛɛ tari kɔ ka tipi ɓee katɔ.

⁹Kãntang keɓe zang ɓaa nyaa kãasãng tɔ ka dimbang laa nandon. Laa ɓɔɔ nɛɛ ra jaa ɓɔɔ shi kpang, Zang dɔngnɛ, zang tasɛ ka yeti waa.”

¹⁰A zang dɔɔli ɓɔɔ ri kpalɛ zɔɔ, ri hɛ̃ɛ Yɔhana tɔɔ, “A ruu pàlɛ ɓu kaa biya.”

¹¹A kasɛ ri nyaa tɔɔ, “Zang ɓɔɔ fɔ̃ɔrɔ ɓiɓɛ ziti, wu a zang ɓɔɔ fɔ̃ɔrɔ ɓiɓɛ kagn kpang, gbete. Zang ɓɔɔ vuu shaanang ɓiɓɛ kagn wu basɛ doo nɔngkɔ nɛɛ zang ɓɔɔ vuu shaanang ɓiɓɛ kagn kpang ɓɛɛ.”

¹²Zang ɓɔɔ ri ta saka tipi ri ti arɛ nɛɛ Yɔhana wu palɛ ri batizima. Ri hɛ̃ɛ Yɔhana tɔɔ, “Maalang rúu palɛ ɓu kaa viya?”

¹³A kɔɔ ri tɔɔ, “Nɔ́ɔ ta saka tipi wu ɓa naa ɓɔɔ zang kɔɔ nɔɔ ɓɛɛ kpang.”

¹⁴Sɔɔja ɓɔɔ ri ti hɛ̃ɛ wu nɛɛ, “A rúu palɛ ɓuru kaa viya?” Yɔhana ti kɔɔ ri tɔɔ, “Nɔɔ ta zang vuu nɛɛ ɓangge kpang. Nɔɔ suu sèé nɛɛ zang ri palɛ vuu shi kpang, kpang. Saka ɓɔɔ zang shu nɔɔ ɓɛɛ, wu daa nɔɔ katɔ.”

¹⁵Bii shaa zang kana dɔɔli. Zang dɔɔli ri gaa tɔɔsung rɛ̃rɛnang ka yeti ɓarɛ nɛɛ, naa ɓu bɛ̀ɛ́ Yɔhana kɔ zang ɓɔɔ Laa naa shong ɓɛɛ ya?

¹⁶A Yɔhana kasɛ ri nyaa nandon tɔɔ, “N pàlɛ́ nɔɔ batizima m nɛɛ mii, zang ɓɔɔ naa a ka knti mɛɛ, ɓa m bannang katɔ. N daa naa ɓɔɔ n kãlɛ soo koodoo ɓiɓɛ kpang. Wukɔ naa pàlɛ́ nɔɔ batizima nɛɛ Suru Laa nɛɛ waa.

¹⁷Vuu ɓɔɔ wu naa hãlɛ̀ vuu nɛɛ mani kagn naa ɓiɓɛ. Naa kooro dadong ɓiɓɛ ditɔ, tɔ̀ɔ, wu kpalɛ jĩng vuu ɓiɓɛ ka bɔ̃nɔ. Wu yaa gãrɛ ɓiɓɛ, wu doo kaa nɛɛ waa ɓɔɔ ning ɓi kpang ɓɛɛ.”

¹⁸Yɔhana tùsù zang vuu ɓɔɔ naa weɓe dɔɔli. A ti rang ri yee tɔ̃ɔ Laa.

¹⁹Kpanti Hiridu ɓɔɔ Yɔhana mangkɛ wu ka ruu Hirodiya soro jaa diiɓɛ, nɛɛ vuu shi kpang ɓɔɔ Hiridu palɛ dɔɔli ɓɛɛ. Ti naa palɛ vuu shi kpang ɓɔɔgn, kɔɔ zang nɛɛ zang daa loo Yɔhana ka sãa.

²¹Yɔhana palɛ zang piti batizima tɔ, a naa pàlɛ̀ Yeesɔ kati. Ɓɔɔ Yeesɔ gàá Laa doo naa, lapa puu kati,

²²a Suru Laa shooro kaa naa koro ka yuu ɓiɓɛ. A ri tãa yee nɛɛ lapa nɛɛ, “Mɔkɔ Jaa mɛɛ ɓɔɔ yeti mɛɛ kasɛ gbãng gbãng ɓɛɛ.”

²³Ɓɔɔ Yeesɔ gaa tɔɔsung shonang ɓiɓɛ palɛnang, bɛ̀ɛ́ saa ɓiɓɛ daa bmati tu kopi. Zang kɔ̀ɔ́ ɓi nɛɛ Yeesɔ jaa Yusufu ɓɔɔ daa ɓiɓɛ Heli ɓɛɛ.

²⁴Heli ɓi kaa jaa Matata, Matata ɓi jaa Leevi, Leevi ɓi kaa jaa Meliki. Meliki ɓi jaa Janayi a Janayi ɓi kaa jaa Yusufu.

²⁵Yusufu ɓi ti jaa Matatiya, Matatiya ɓi jaa Emo. A Emo ɓi kaa jaa Nahum. Nahum ɓi ti jaa Azaliya. Azaliya ɓi jaa Najaya.

²⁶A Najaya ɓi jaa Mahata, Mahata ɓi jaa Matatiya. Matatiya ɓi jaa Shimeya. Shimeya ɓi jaa Yosek, Yosek ɓi ti jaa Joda.

²⁷A Joda ɓi jaa Yuwana, Yuwana ɓi jaa Resa. Resa ɓi ti jaa Zerubabe, a Zerubabe ɓi jaa Shalitiyel, Shalitiyel ɓi jaa Neri,

²⁸a Neri ɓi jaa Meliki, Meliki ɓi jaa Adi. Adi ɓi ti jaa Kosam, a Kosam ɓi jaa Elimadam. Elimadam ɓi jaa Eri,

²⁹Eri ɓi jaa Jashuwa, a Jashuwa ɓi jaa Eliyiza, Eliyiza ɓi ti jaa Jorim, Jorim ɓi ti jaa Matata, Matata ɓi ti jaa Leevi,

³⁰a Leevi ɓi jaa Simiyon. Simiyon ɓi jaa Yahuda, a Yahuda ɓi ti jaa Yusufu. Yusufu ɓi jaa Jonam, a Jonam ɓi jaa Eliyakim, Eliyakim ɓi jaa Maliya.

³¹Maliya ɓi ti jaa Mena. Mena ɓi jaa Matata, Matata ɓi jaa Natang. Natang ɓi jaa Dawuda,

³²a Dawuda ɓi jaa Jeesi. Jeesi ɓi ti jaa Obida. Obida ɓi jaa Buwaza, Buwaza ɓi jaa Salamuna. Salamuna ɓi jaa Naashong,

³³a Naashong ɓi jaa Aminada, Aminada ɓi ti jaa Adi, Adi ɓi ti jaa Arama. Arama ɓi jaa Heziron, ɓi jaa Periza, a Periza ɓi jaa Yahuda.

³⁴Yahuda ɓi jaa Yakubu, Yakubu ɓi jaa Ishaaku, Ishaaku jaa Ibirayi, a Ibirayi ɓi jaa Tera. Tera ɓi jaa Naaho,

³⁵a Naaho ɓi jaa Saruja. Saruja ɓi jaa Riyu, a Riyu ɓi jaa Pelek. Pelek ɓi ti jaa Eba. Eba ɓi jaa Sheela,

³⁶a Sheela ɓi jaa Kaana. Kaana ɓi ti jaa Arafasa. Arafasa ɓi jaa Sheem, a Sheem ɓi jaa Nuhu. Nuhu ɓi jaa Lamek,

³⁷Lamek ɓi jaa Mɛtusela, Mɛtusela ɓi kaa jaa Ɛnɔk. Ɛnɔk jaa Jared, Jared ɓi jaa Mahalale, a Mahalale ɓi ti jaa Kaana.

³⁸Kaana ɓi jaa Enosh. Enosh ɓi jaa Shiitu, a Shiitu ɓi ti jaa Adamu. Adamu ɓi kaa ɓɔ̀ɔ́ Laa.