Read mumuye Luka 7 Bible Online

Luka 7 - mumuye bible

Luka 7

¹Yeesɔ hangsɛ zang nyaa vuu keɓe kɔɔnang tɔ ka shoo zang nandon, a naa seepaa daa ka Kafanahu.

²Yɔɔ zang bang sɔɔja Rooma ɓɔɔ kagn nɔngkɔ. Kɔnang yi zang shonang ɓiɓɛ ɓɔɔ wu kasɛ wu dɔɔli ɓɛɛ. Kɔnang ɓiɓɛ bang dɔɔli, nɛɛ wu vɔrɛ yaa kaa tɔkɔlɔng.

³A yɔɔ zang bang sɔɔja kaɓa naa tãa nyaa Yeesɔ, a shong zang bang bang zang Yahudi, nɛɛ ri daa gaa Yeesɔ nɛɛ wu naa màsɛ̀ wu zang shonang ɓiɓɛ.

⁴A zang bang bang zang Yahudi naa a ka bii Yeesɔ. A ri bakɛ wu gbãng gbãng, ri kɔɔ wu tɔɔ, “Yɔɔ keɓe daa naa ɓɔɔ mɔɔ pàlɛ́ wu vuu keɓe tɔ.

⁵Ka ruu ɓɔɔ, kasɛ ruu zang ɓuru dɔɔli ɓɛɛ. Wukɔ ti mãa ruu gãa zɔɔ kpalɛnang ɓuru.”

⁶A Yeesɔ dàa kaa nɛɛ ri. Ɓɔɔ yɔɔ sɔɔja zirɛ Yeesɔ a kana naabm, a shong rɛɛ ɓeesang nɛɛ ri daa kɔɔ wu nɛɛ, “Dabang, mɔɔ kpãa yuu ɓaaɓɛ kpang. Ka ruu ɓɔɔ, n daa naa ɓɔɔ mɔɔ a ka gãa mɛɛ kpang ɓɛɛ.

⁷N ti daa naa ɓɔɔ n a ka bii ɓaaɓɛ kpang. Rang yee kɔ shɛ̃ɛning, kɔnang wu yaa zang shonang mɛɛ bii.

⁸Ka ruu ɓɔɔ, n m doo ka naa zang kɔ ɓɛɛ. Zang sɔɔja ɓɔɔ ri ti kagn naa mɛɛ. Naa n kɔɔ ɓɔɔ gbete nɛɛ ‘Dita,’ daa katɔ. Naa n ti kɔɔ ɓɔɔ gbete nɛɛ ‘Arɛ,’ ti a katɔ. Naa n ti kɔɔ zang shonang mɛɛ nɛɛ ‘palɛ vuu keɓe,’ ti palɛ katɔ.”

⁹Ɓɔɔ Yeesɔ tãa yee kaɓa naa weɓe, mã naa ka danggn. A raa jĩng kɔɔ zang ɓɔɔ ri dũuru wu gaagaa tɔɔ, “N kɔɔ nɔɔ, n zi zang Isirela ɓɔɔ shing danggn ka bìí mɛɛ gngn naa zang keɓe kpang.”

¹⁰Ɓɔɔ zang ɓɔɔ yɔɔ sɔɔja shong ri ka bìí Yeesɔ naa gbãayu ka gãa, ri zirɛ vuu yaa zang shonang yɔɔ sɔɔja nɔng tɔ.

¹¹Ka knti vuu keɓe, Yeesɔ naa tantɛ kaa daanang ka gari ɓɔɔ zang ɓaa nɛɛ Naying ɓɛɛ. Zang ɓɔɔ mantɛ vuu ka bii ɓiɓɛ nɛɛ zang ɓɔɔ ri kpalɛ zɔɔ gaagaa ri daa nɛɛ wu ning.

¹²Yeesɔ a tɔ ka nyaa gãa gari naabm, a ɓee zang yuu ri túu vɔrɔ jaa suvɔ ɓɔɔ kagn gari ka kaɓa. Suvɔ kaɓa ti dũuru ri kana knti, nɛɛ zang gari ɓɔɔ ri kpalɛ zɔɔ gaagaa ka bii ɓiɓɛ ɓɛɛ. Yɔɔ ɓɔɔ vɔ kaɓa wukɔ jaa suvɔ kaɓa gbete.

¹³Ɓɔɔ Yeesɔ zi suvɔ ɓɔɔ jaa ɓiɓɛ vɔrɛ, gn ɓiɓɛ kɔng wu, a kɔɔ wu tɔɔ, “Mɔɔ kaa kpang.”

¹⁴A Yeesɔ arɛ naa lee naa ka laa ɓɔɔ zang tuu vɔrɔ kagn ɓɛɛ. Zang ɓɔɔ ri tuu vɔrɔ ri shii kaa kikiri. A kɔɔ vɔrɔ tɔɔ, “Jasang, n kɔ̀ɔ́ mɔɔ seepaa ta.”

¹⁵A yɔɔ ɓɔɔ vɔ tɔ seepaa, a gaa tɔɔsung yee rannang kati. A Yeesɔ yi wu a niiɓɛ kati.

¹⁶Zang ɓɔɔ ri kpalɛ zɔɔ gaagaa ɓɛɛ, ri kaa vɔrɔ kaa nandon. A ri dɔɔ Laa ri tɔɔ, “Zang nyaa shonang Laa ɓɔɔ bang nwang nyaa lɛ̀ɛ́ tɔ ka teteng ɓuru. Laa a lɛ̀ɛ́ tɔ, nɛɛ wu ta yuu zang ɓiɓɛ.”

¹⁷Nyaa Yeesɔ sãlɛ nɔng, ka ruu vuu kɔ wu palɛ ɓee ka tipi Yahudi nandon nɛɛ tipi ɓɔɔ naabm nɛɛ Yahudi ɓɛɛ nandon.

¹⁸Zang ɓɔɔ ri mantɛ vuu ka bii Yɔhana ri kɔɔ wu ruu ka yuu vuu keɓe nandon.

¹⁹A Yɔhana ɓaa nyaa ka zang ɓɔɔ ri mantɛ vuu ka bii ɓiɓɛ ziti, a shong ri ka bii Yeesɔ. Yɔhana tɔɔ, ri daa hɛ̃ɛ Yeesɔ nɛɛ, “Wukɔ zang ɓɔɔ zang tɔɔ naa a ɓɛɛ ya? Kɔ, ruu gãng jĩng ka zang ɓɔɔgn?”

²⁰A zang ɓɔɔ Yɔhana shongnɛ naa a ka bii Yeesɔ. Ri kɔɔ wu tɔɔ, “Yɔhana ɓɔɔ palɛ zang batizima shong ruu ka bii ɓaaɓɛ, tɔ́ɔ ruu hɛ̃ɛ mɔɔ nɛɛ, ‘Mɔkɔ zang ɓɔɔ zang tɔɔ naa a ɓɛɛ ya kɔ ruu gãng jĩng ka zang ɓɔɔgn?’ ”

²¹Ka laa kaɓa, Yeesɔ masɛ zang ɓɔɔ kɔnang ɓarɛ ka zɔ̃ng zɔ̃ng ɓɛɛ dɔɔli. A ti nwangsɛ suru shi kpang nɛɛ bii zang dɔɔli. A ti masɛ zang jĩng ringtang, ri zi nɔng kati.

²²Yeesɔ kasɛ ri nyaa tɔɔ, “Nɔɔ dita nɔɔ daa kɔɔ Yɔhana vuu ɓɔɔ nɔɔ zi ɓɛɛ, nɛɛ vuu ɓɔɔ nɔɔ tãa ɓɛɛ. Zang jĩng ringtang ri zi nɔng kana. Zang ɓɔɔ ri kàa katɔ ri ti ra kana. Kɔnang zang vuu bii ti yaa ri nɔng tɔ. Zang shoo gbooto ri ti tãa nɔng kana. N ti wisi zang ɓɔɔ ri vɔ katɔ paa, a zang ti rǎng zang ɓɔɔ vuu ka naa kpang ruu tɔ̃ɔ Laa kana.

²³Tĩnang tãanang ɓi ɓɔɔ zang ɓɔɔ ri yaa danggn naa ka ruu vuu ɓɔɔ n palɛ kpang ɓɛɛ.”

²⁴Zang ɓɔɔ Yɔhana shongnɛ ri daa tɔ, Yeesɔ naa gaa tɔɔsung ɓɔɔ wu kɔɔ zang ɓɔɔ ri kpalɛ zɔɔ ka bii ɓiɓɛ ruu Yɔhana kati tɔɔ. “Nɔɔ daa ɓu vi zinang ka waala viya? Lagaa ɓɔɔ jasung zĩiti ɓɛɛ ya?

²⁵Nɛɛ nɔngkɔ kpang, nɔɔ daa ɓu vi zinang viya? Nɔɔ daa ka ruu zang ɓɔɔ hãa fɔ̃ɔrɔ tɔ̃ɔ, tɔ̃ɔ ɓɛɛ ya? Zang ɓɔɔ ri hã̀alɛ́ fɔ̃ɔrɔ tɔ̃ɔ tɔ̃ɔ, ri ti tãa tĩnang vuu naa ɓarɛ ɓɔɔ gaagaa, ri nwalɛ ɓarɛ ka dàbang kpanti.

²⁶A nɔɔ daa ɓu vi zinang viya? Zang nyaa shonang Laa ya? Nɔngkɔ, n kɔ̀ɔ́ nɔɔ, zang nyaa shonang Laa kɔ a ɓa zang nyaa shonang Laa ɓi kaa tɔ.

²⁷Wee zang nyaa shonang Laa ɓɔɔ zang bee ruu ɓiɓɛ ka labeenang Laa kɔ. ‘Laa kɔɔyi tɔɔ, N shong zang nyaa shonang mɛɛ ditɔ ka tĩng ɓaaɓɛ, wu naa palɛ mɔɔ gbalang.’

²⁸N kɔɔ nɔɔ ka teteng zang piti ɓɔɔ zang soro yiki ka koo keɓe zang ɓɔɔ ɓa Yɔhana ɓɔɔ palɛ zang batizima kagn gbete kpang. A zang ɓɔɔ wukɔ tɔkɔlɔng ka teteng zang ɓɔɔ ri ka nɔng ɓɔɔ Laa roo Kpanti ɓa wu bannang katɔ.”

²⁹Zang ɓɔɔ ri kpalɛ zɔɔ piti, nɛɛ ɓɔɔ ri ta saka tipi, ri tãa ruu keɓe. Ri dɔɔ Laa ka ruu ɓɔɔ Yɔhana palɛ ri batizima ɓɛɛ.

³⁰A zang Farisi nɛɛ zang ɓɔɔ ri zi labeenang Laa dɔɔli, ri bɛ̃ɛ vuu ɓɔɔ Laa kasɛ nɛɛ ri palɛ ɓɛɛ tɔ nɛɛ Yɔhana wu pàlɛ̀ ri batizima kpang.

³¹Yeesɔ ti kɔɔ ri tɔkn tɔɔ, “N gãsɛ zang koo jaa knti keɓe ɓu nɛɛ viya?

³²Ri nwang naa wujɛ ɓɔɔ ri nwalɛ ka lumang, ri ɓaarɛ nyaa ka zɔɔ ɓɛɛ. Ri kɔɔyi nɛɛ, ‘Ruu jee nɔɔ leere, nɔɔ sɔ dãng kpang. Ruu ti ɓaa nyaavaa, nɔɔ kaa nyavɔ kpang.’

³³Yɔhana ɓɔɔ palɛ zang batizima arɛ, shaa vuu shaanang kpang, ti ɓoo sàa kpang. Nɔɔ tɔɔ, ‘Suru shi kpang kagn bii ɓiɓɛ’.

³⁴A Jaa Shɔnzang arɛ, shaa vuu shaanang katɔ, ti ɓoo katɔ. Nɔɔ ti kɔɔyi nɛɛ, ‘Nɔɔ zi zang nyɔkɔ keɓe, ɓi ti zang ɓɔɔ ɓoo saa dɔɔli ɓɛɛ. Yi wusang ɓi nɛɛ zang ɓɔɔ ri ta saka tipi nɛɛ zang ɓɔɔ ri doo zang ɓɔɔ ri palɛ vuu shi kpang kɔ ɓɛɛ.’

³⁵Zũnang ɓɔɔ Laa a zang, tusu bii ka vuu tɔ̃ɔ ɓɔɔ zang palɛ ɓɛɛ.”

³⁶Yɔɔ Farisi ɓɔɔ kagn ɓaa Yeesɔ nyaa nɛɛ wu daa shaa vuu shaanang nɛɛ wu ka gãa ɓiɓɛ. A Yeesɔ daa gãa yɔɔ Farisi kaɓa kati, daa nwang ka nɔng ɓɔɔ zang shaa vuu shaanang ɓɛɛ.

³⁷Jaa soro ɓɔɔ palɛ vuu shi kpang kagn gari kaɓa. Ɓɔɔ tãa nyaa nɛɛ Yeesɔ shaa vuu shaanang ka gãa zang Farisi kaɓa, seepaa, tuu nung ɓɔɔ á sɛ̃ɛ tɔ̃ɔ tɔ̃ɔ ɓɛɛ. Zang sú nung bìí ka zàáng ɓɔɔ zang palɛ nɛɛ tari ɓɔɔ kɔlɔ katɔ ɓɛɛ. A nɛɛ mani ka bii Yeesɔ.

³⁸A naa shii ka knti Yeesɔ ka doo ɓiɓɛ naabm, kaa kana, miiri ɓiɓɛ ti shili kana doo Yeesɔ. A ti alɛ miiri ɓɔɔ shili ka doo Yeesɔ kaa nɛɛ suuyuu ɓiɓɛ. Tɔ̃kɔ doo Yeesɔ, a tungku nung ɓɔɔ wu a nɛɛ mani kagn.

³⁹Ɓu doo ɓɔɔ zang Farisi ɓɔɔ ɓaa Yeesɔ nyaa zi naa weɓe, kɔɔ ka yeti ɓiɓɛ tɔɔ, “Naa yɔɔ keɓe nɛɛ zang nyaa shonang Laa, nɛɛ zi jaa soro kɔ lee wu naa ka bii ɓɛɛ tɔ. Nɛɛ ti zi naa nwannang jaa soro keɓe tɔ, ka ruu ɓɔɔ, jaa soro keɓe ɓi zang ɓɔɔ palɛ vuu shi kpang ɓɛɛ.”

⁴⁰A Yeesɔ kɔɔ wu tɔɔ, “Siman vuu ɓɔɔ, n tɔɔ n kɔɔ mɔɔ kagn.” A Siman kasɛ wu nyaa tɔɔ, “Ɓu viya, maalang?”

⁴¹Yeesɔ tɔɔ, “Yɔɔ ɓɔɔ kagn a zang ziti saka nyaa kɔ́pɔ́. Zang gbete ta saka dinari laa maani, dakn maani. Ɓɔɔ gbete ta laa ziti tu kopi.

⁴²Zang kɔ ri ta saka ka naa yɔɔ ɓa, ri walɛ saka ɓɔɔ ri sɔɔrɔ yɔɔ takpang, a yɔɔ yàa ri saka ɓɔɔ ri talɛ ɓɛɛ nandon. Ka teteng zang ziti kaɓa, zang ɓɔɔ naa kasɛ yɔɔ keɓe dɔɔli ɓu wiya?”

⁴³Siman kasɛ wu nyaa tɔɔ, “Zang ɓɔɔ yɔɔ yaa wu saka dɔɔli ɓɛɛ.” Yeesɔ kɔɔ wu tɔɔ, “Mɔɔ kasɛ nyaa tɔ tɔ̃ɔ.”

⁴⁴A Yeesɔ raa jĩng pɛ̃ɛrɛ jaa soro, a kɔɔ Siman tɔɔ, “Mɔɔ zi jaa soro keɓe tɔ waa? N a ka gãa ɓaaɓɛ, mɔɔ a m mii ɓɔɔ n sɔɔ doo nɛɛ mani ɓɛɛ kpang. Jaa soro keɓe kɔ sɔɔ m doo nɛɛ miiri ɓiɓɛ, a ti alɛ nɛɛ suuyuu ɓiɓɛ.

⁴⁵Mɔɔ ti tɔ̃kɔ kashĩi nyaa mɛɛ kpang, a ɓu doo ɓɔɔ n a ka gãa ɓaaɓɛ jaa soro keɓe yaa doo mɛɛ tɔ̃kɔnang gn kpang.

⁴⁶Mɔɔ ti tũuru nung ka yuu mɛɛ kpang, jaa soro keɓe tũuru m nung ka doo mɛɛ.

⁴⁷Ka ruu nɔngkɔ, n kɔɔ mɔɔ, zang yaa wu gbalang vuu shi kpang ɓiɓɛ ɓɔɔ dɔɔli tɔ, ka ruu ɓɔɔ tusu nɛɛ wu kasɛ m dɔɔli ɓɛɛ. Zang ɓɔɔ zang yaa wu gbalang tɔkɔlɔng, kasɛ ruu zang ɓi tɔkɔlɔng.”

⁴⁸A kɔɔ jaa soro tɔɔ, “N yaa mɔɔ gbalang vuu shi kpang ɓaaɓɛ tɔ.”

⁴⁹A zang ɓɔɔ ri nwáng nɛɛ wu ka nɔng vuu shaanang, ri gaa tɔɔsung yee rangkɛnang ka naa ɓarɛ tɔɔ, “Wee ɓu yɔɔ ki, kɔɔyi nɛɛ wu yaa zang gbalang vuu shi kpang ɓarɛ tɔ wiya?”

⁵⁰A Yeesɔ kɔɔ jaa soro kaɓa tɔɔ, “Danggn ɓɔɔ mɔɔ shing ka bii mɛɛ, a mɔɔ suru bii ɓɔɔ waa nyaa kpang tɔ. Dita waasɛ̃.”