Read mumuye Luka 8 Bible Online

Luka 8 - mumuye bible

Luka 8

¹Knti bee kpang, Yeesɔ naa seepaa nɛɛ nɔng kaɓa, daarɛ ka rɛɛ gari bang bang nɛɛ ɓɔɔ tɔkɔlɔng, tɔkɔlɔng. Rang zang yee tɔ̃ɔ Laa. Kɔɔ zang ruu tɔ̃ɔ ka yuu Kpanti ɓɔɔ Laa naa roo ɓɛɛ. Daarɛ nɛɛ zang kopi tu ziti ɓɔɔ ri mantɛ vuu ka bii ɓiɓɛ ning.

²A ɓɔɔ zang soro ɓɔɔ wu nwangsɛ suru shi kpang ka bii ɓarɛ, nɛɛ zang soro ɓɔɔ wu màsɛ̀ ri kɔnang ɓɔɔ yiki ri ɓɛɛ. Zang soro kaɓa ɓi rɛɛ Marayamu ɓɔɔ Zang ɓaa nɛɛ Magadaliya, ɓɔɔ Yeesɔ nwangsɛ suru shi kpang manziti nɛɛ bii ɓiɓɛ ɓɛɛ.

³Nɛɛ Yuwana soro Kuza ɓɔɔ palɛ shonang ka dabang Kpanti Hiridu ɓɛɛ, nɛɛ Susana, a ɓɔɔ zang soro ɓɔɔgn gaagaa, ɓɔɔ ri see vuu naa ɓarɛ, ri kãa Yeesɔ nɛɛ zang ɓɔɔ ri mantɛ vuu ka bii ɓiɓɛ vuu shaanang nɛɛ mani ɓɛɛ.

⁴Zang kpalɛ tɔ ka bii Yeesɔ gaagaa, a zang ɓɔɔ ti alɛ doo naa nɛɛ gari ɓarɛ. A Yeesɔ rang ri yee nɛɛ nyaa vuu jeenang.

⁵Yeesɔ kɔɔ ri tɔɔ, “Zang ɓɔɔgn nwangnɛ nɛɛ wu daa vang jĩng vuu ka jaa ɓiɓɛ. Vang jĩng vuu kana, a jĩng vuu ɓɔɔ shili ka gbalang, a zang naalɛ kaa nɛɛ doo. Jaaning ri ti naa arɛ ri yakɛ.

⁶Jĩng vuu ɓɔɔ ri shili ka yuu tipi pɛngkɛ, a ri takɛ. Ri bangkɛ kana, a ri naa tɔɔrɔ, ri waatɛ. Ka ruu ɓɔɔ tipi yà kpang ɓɛɛ.

⁷Jĩng vuu ɓɔɔ ri ti shili ka nɔng ɓɔɔ kɔkɔ kagn gaagaa ɓɛɛ, a ri takɛ. Ri bangkɛ kana nɛɛ kɔkɔ ning, a kɔkɔ naa bangkɛ mulu ri.

⁸Jĩng vuu ɓɔɔ ri shili ka tipi tɔ̃ɔ. Ri bangkɛ ri tasɛ yuu. Ri shing jĩng gaagaa, ɓa ɓɔɔ tĩng shɔɔnang katɔ dakn laa maani.” Ɓɔɔ wu kɔɔ tɔ naa weɓe, a naa kɔɔ ri nabm tɔɔ, “Zang ɓɔɔ shoo ɓiɓɛ nɛɛ kagn wu tãayi.”

⁹A zang ɓɔɔ ri mantɛ vuu ka bii ɓiɓɛ, naa hɛ̃ɛ wu dĩiri yee ɓɔɔ wu rang nɛɛ nyaa vuu jeenang ɓɛɛ kati.

¹⁰A Yeesɔ kɔɔ ri tɔɔ, “Ruu ɓɔɔ zang waasɛ katɔ ka yuu Kpanti ɓɔɔ Laa rooyi, Laa a nɔkɔ naa zinang. A ɓɔɔ zang ɓɔɔgn, n rang ri yee ɓi nɛɛ nyaa vuu jeenang, ka ruu ɓɔɔ ri shu jĩng nɛɛ ri pɛ̃ɛrɛ vuu, ri zi kpang ɓɛɛ. Ri ɓaa shoo nɛɛ ri tãayi, ri ti zi vuu ɓɔɔ kagn kpang ɓɛɛ.”

¹¹Yeesɔ kɔɔyi tɔɔ, “Dĩiri nyaa vuu jeenang keɓe. Jĩng vuu keɓe, ɓi ruu Kpanti Laa.

¹²Jĩng vuu ɓɔɔ shili ka gbalang nwang ɓi kaa naa zang ɓɔɔ ri tãa ruu Kpanti Laa a Sheetang kpanti suru shi kpang, arɛ naa zɔ̃ng Ruu Laa ɓɔɔ ri tãa ɓɛɛ, nɛɛ ka ruu ɓɔɔ ri nɛɛ shing danggn ka bii Laa, ri walɛ suru bii ɓɔɔ waa nyaa kpang ɓɛɛ.

¹³Jĩng vuu ɓɔɔ shili ka yuu tipi pɛngkɛ, nwang naa zang ɓɔɔ ri tãa Ruu Laa, a ri ta nɛɛ yeti gbete ɓɛɛ. A ri nwang ɓarɛ naa jĩng vuu ɓɔɔ ɓaa dĩiri tɔ̃ɔ tɔ̃ɔ kpang ɓɛɛ. Ri shing danggn ɓarɛ ka naa lapa kɔ shɛ̃ɛning. Ri yaa gbalang Laa ka diki ɓɔɔ zang gãsɛ danggn ɓarɛ ɓɔɔ ri shing ka bii Laa ɓɛɛ.

¹⁴Jĩng vuu ɓɔɔ ri shili ka teteng kɔkɔ, ri nwang naa zang ɓɔɔ ri tãa Ruu Laa ɓɛɛ. Ri dũng kana, a rɛ̃rɛnang ka yuu vuu ɓɔɔ ka koo keɓe, nɛɛ vuu naa kasɛnang naa mulu Ruu Laa ɓɔɔ ri tãayi. A Ruu Laa ɓɔɔ ri tãayi nwang ri vuu ɓɔɔ kaa takpang.

¹⁵Jĩng vuu ɓɔɔ ri shili ka tipi tɔ̃ɔ, nwang kaa naa zang ɓɔɔ tãa Ruu Laa ɓɛɛ. Ri tarɛ, ri shing ka yeti ɓarɛ, ri mã danggn, a ri naa nwang kaa naa jĩng vuu ɓɔɔ bangnɛ ra jaa gaagaa ɓɛɛ.

¹⁶“Zang mang waa zàáng sɔɔ ɓi jong, zang zuu nɛɛ gãntang kpang. Zang ti shing ka dii latãng kpang. Zang nɛɛ mang waa zàáng sɔɔ tɔ, zang shing ɓi ka yuu vuu lapa kɔ jong, tɔ̀ɔ, wu yakɛ zang ɓɔɔ kasɛ nɛɛ wu tu ka yeti gãa nɔng kati.

¹⁷“Vuu ɓɔɔ zang waasɛ katɔ ɓɔɔ Laa naa nwangsɛ kpang, ɓi kagn kpang. Vuu ɓɔɔ zang ti zi kpang, Laa naa nwangsɛ ditɔ, zang zirɛ.

¹⁸“Ka ruu nɔngkɔ, nɔɔ gãng jĩng ka naa ɓɔɔ nɔɔ tãa yee Laa ɓɛɛ ning. Nɔɔ gãng jĩng kagn, ka ruu ɓɔɔ zang ɓɔɔ vuu ɓiɓɛ kagn, zang naa gisi wu ɓɔɔgn ditɔ. A zang ɓɔɔ vuu ɓiɓɛ tɔkɔlɔng, zang naa ta ɓɔɔ tɔkɔlɔng ɓɔɔ wu shing danggn kagn, ka naa ɓiɓɛ ditɔ.”

¹⁹A nàá Yeesɔ nɛɛ rɛɛ jaa niiɓɛ naa a ka bii ɓiɓɛ, a ri walɛ gbalang daanang bii ɓiɓɛ naabm kaa takpang, ka ruu zang ɓɔɔ ri kpalɛ zɔɔ ka bii ɓiɓɛ gaagaa ɓɛɛ.

²⁰A zang ɓɔɔgn kɔɔ wu tɔɔ, “Naaɓɛ nɛɛ rɛɛ jaa naaɓɛ ri shi ka biling, ri kasɛ nɛɛ ri rang yee nɛɛ mɔɔ.”

²¹A kasɛ ri nyaa tɔɔ, “Nàá mɛɛ nɛɛ rɛɛ jaa nàá mɛɛ ɓi zang ɓɔɔ ri tãa Ruu Laa, a ri ti palɛ vuu ɓɔɔ Ruu Laa kɔɔ ɓɛɛ.”

²²Diki ɓɔɔgn, Yeesɔ vang tonsi nɛɛ zang ɓɔɔ ri mantɛ vuu ka bii ɓiɓɛ, a kɔɔ ri tɔɔ, “Ruu ta nɔɔ rang ta, ruu daa nɔɔ nyaa rang ɓɔɔ dang.” A ri seepaa daanang kati.

²³Ri daa kana yeti tonsi, a hingro yi Yeesɔ kati. A jasung bang naa seepaa rannang ka yuu waapo. Mii a kana yeti tonsi, tonsi nɛɛ wu ɔ̃ɔ kaa tɔ,

²⁴a zang ɓɔɔ ri mantɛ vuu ka bii Yeesɔ, ri daa hingsi wu. Ri tɔɔ, “Dabang Dabang, ruu ɔ̃ɔ kana.” A Yeesɔ seepaa mangkɛ jasung nɛɛ mii ɓɔɔ ri gɔnsɔ zɔɔ ɓɛɛ. A mii kàa kati, jasung ti voo nyaa kaa jong.

²⁵Yeesɔ hɛ̃ɛ zang ɓɔɔ ri mantɛ vuu ka bii ɓiɓɛ tɔɔ, “Danggn ɓɔɔ nɔɔ shing ka bii mɛɛ kaa kiya?” Ri kaa vɔrɔ, ri ti mã naa ka danggn. Ri hɛ̃ɛlɛ zɔɔ ka naa ɓarɛ tɔɔ, “Wee ɓi lɛ̀ɛ́ zang viya? Jasung nɛɛ mii, ri ɓaa shoo ka nyaa ɓiɓɛ wiya?”

²⁶Ri ta rang tɔ, a ri naa a ka tipi Ganasara ɓɔɔ ka paa ɓɔɔ laa nwangnɛ mani, raa zɔɔ jĩng nɛɛ Galili ɓɛɛ.

²⁷Ɓɔɔ Yeesɔ nwang nɛɛ yeti tonsi hn, a zang gbete ɓɔɔ suru shi kpang ka bii ɓiɓɛ, nwang nɛɛ gari kaɓa, arɛ naa ɓee wu yuu kati. Diki ɓɔɔ yɔɔ kaɓa hãa fɔ̃ɔrɔ ka bii kpang bee tɔ. Ti roo gãa kpang. Roo ɓi ka nɔng yuu sàa.

²⁸Ɓɔɔ wu zi Yeesɔ hn, mɛɛ nyaa ka lapa, a tang ka tĩng ɓiɓɛ. Mɛɛrɛ nyaa kana nabm, nɛɛ “Mɔɔ kãa vi ka bìí mɛɛ viya? Yeesɔ Jaa Kpanti Laa. N zɔ̃ɔrɔ mɔɔ katɔ, mɔɔ dang m jĩng kpang.”

²⁹Ka ruu ɓɔɔ, Yeesɔ kɔɔ suru shi kpang tɔɔ, nɛɛ wu nwáng ta, wu yaa yɔɔ bii ɓɛɛ. Suru shi kpang keɓe yuku wu paa ka bii dɔɔli. Zang mã wu nɛɛ soo saka nɛɛ lengtaa, nɛɛ tɔɔ zang gãng jĩng ka wu ɓɛɛ. A dɔlɔ saka nɛɛ lengtaa kaɓa katɔ, wu ti daarɛ ka jĩngti naa ɓɔɔ suru shi kpang tasɛ wu naa ɓɛɛ.

³⁰A Yeesɔ hɛ̃ɛ wu tɔɔ, “Zang ɓaa nung ɓaaɓɛ nɛɛ viya?” A kasɛ nyaa tɔɔ, “Zang ɓaa m nɛɛ ‘Dɔɔli.’ ” Kɔɔ nɔngkɔ ka ruu ɓɔɔ suru shi kpang kagn bii ɓiɓɛ dɔɔli ɓɛɛ.

³¹A suru shi kpang kaɓa, ri gaa Yeesɔ nɛɛ wu dɔ̃ɔ ri ka nɔng ɓɔɔ Laa palɛ ka ruu zang shi kpang, kpang.

³²Ka laa kaɓa, gãnya ɓɔɔ ri shaa kagn doo kɔpɔ ka nɔngkɔ. A suru shi kpang ri gàa Yeesɔ nɛɛ wu yaa ri, ri tu ka bii gãnya. A Yeesɔ yáa ri kati.

³³A suru shi kpang kaɓa ri nwangkɛ nɛɛ bii yɔɔ, ri daa hãlɛ nyaa ka bii gãnya. A gãnya kɔ gaagaa ɓa, yuku ri sɔɔ gbalang nyaa rang ɓɔɔ hɛ̃ɛrɛ ɓɛɛ. Ri daa ɔ̃ɔrɔ ka yeti mii nandon, a ri vɔlɔ.

³⁴Ɓɔɔ zang ɓɔɔ ri gã gãnya zi vuu ɓɔɔ palɛ naa weɓe, ri yuku, ri daa kɔɔrɔ zang ruu keɓe ka gari kaɓa, nɛɛ gari tɔkɔlɔng ɓɔɔ ka tipi kaɓa ɓɛɛ.

³⁵A zang nwangkɛ, nɛɛ ri daa zi vuu ɓɔɔ palɛ ɓɛɛ. Ri a tɔ, ka bii Yeesɔ, ri zi yɔɔ ɓɔɔ suru shi kpang nwangnɛ bii ɓiɓɛ, nwang tɔ ka tĩng Yeesɔ. Hãa fɔ̃ɔrɔ tɔ̃ɔ ka bii, suru bii ɓiɓɛ ti sɔɔ tɔ ka bii ɓiɓɛ tɔkn. A zang ɓɔɔ ri kpalɛ zɔɔ ka bii Yeesɔ ri kaa vɔrɔ kati.

³⁶Zang piti ɓɔɔ ri zi jĩng bii, ri kɔɔ zang naa ɓɔɔ Yeesɔ masɛ yɔɔ ɓɔɔ bɛ̀ɛ́ suru shi kpang ka bii ɓiɓɛ ɓɛɛ kati.

³⁷A zang tipi Ganasara nandon ri bakɛ Yeesɔ nɛɛ wu dita, ka ruu ɓɔɔ ri kaa vɔrɔ dɔɔli ɓɛɛ. A Yeesɔ vang tonsi gbãayu kati.

³⁸A yɔɔ ɓɔɔ suru shi kpang nwangnɛ bii ɓiɓɛ, gàa Yeesɔ tɔɔ, wu daa nɛɛ wu ning. Yeesɔ kasɛ kpang, a kɔɔ wu tɔɔ,

³⁹“Gbãayu ta gari ɓaaɓɛ, mɔɔ daa kɔɔrɔ zang vuu ɓɔɔ Laa pàlɛ̀ mɔɔ ɓɛɛ.” A yɔɔ daayi, daa kɔɔrɔ zang vuu ɓɔɔ Yeesɔ pàlɛ̀ wu ɓɛɛ, kaa nɛɛ nɔng piti, piti ka gari.

⁴⁰Yeesɔ naa gbãayu tɔ ka nyaa rang dang tɔkn, zang ɓɔɔ ri kpalɛ zɔɔ gaagaa ri tãa tĩnang dɔɔli, a ri ta wu kati. Ka ruu ɓɔɔ, bɛ̀ɛ́ ri gã wu katɔ nandon ɓɛɛ.

⁴¹A zang ɓɔɔ zang ɓaa wu nɛɛ Yayiru, arɛ naa tang ka tĩng ɓiɓɛ, bakɛ wu nɛɛ wu daa ka yeti gãa ɓiɓɛ. Yayiru kaɓa ɓi zang bang ka gãa zɔɔ kpalɛnang.

⁴²Yayiru bakɛ Yeesɔ, ka ruu jaa gbete ɓiɓɛ ɓɔɔ zang soro, ɓɔɔ saa ɓiɓɛ kopi tu ziti vɔ kana. Yeesɔ daa kana gbalang, a zang ɓɔɔ ri kpalɛ zɔɔ ri màasɛ́ wu kati.

⁴³A jaa soro ɓɔɔ zĩi kpaa wu daa saa kopi tu ziti, zang ɓɔɔ zunung wu masɛnang kagn kpang

⁴⁴á nɛɛ knti, naa lee naa ka nyaa fɔ̃ɔrɔ Yeesɔ. A zĩi ɓɔɔ kpaa wu dɔng kaa tantɛnang.

⁴⁵A Yeesɔ hɛ̃ɛyi tɔɔ, “Ɓu wi lee m naa ka bii wiya?” Ɓɔɔ zang piti ri laa nyaa tɔ, nɛɛ ri zi kpang, Bituru naa kɔɔ Yeesɔ kati tɔɔ “Dabang, mɔɔ hɛ̃ɛ nɔngkɔ, ka ruu viya? Mɔɔ zi kpang nɛɛ zang kɔ ri kiiri mɔɔ nyaa ka teteng rikɔ màasɛ́ mɔɔ kpang ya?”

⁴⁶Yeesɔ ti kɔɔ tɔkn tɔɔ, “Zang ɓɔɔ lee m naa kagn bii, ka ruu ɓɔɔ, n zi naa zang masɛnang ɓɔɔ Laa a m nwang tɔ nɛɛ bii mɛɛ ɓɛɛ.”

⁴⁷A jaa soro ɓɔɔ lee Yeesɔ naa ka bii, zi tɔ nɛɛ zang zi vuu ɓɔɔ wu palɛ tɔ, a arɛ, bii zaa wu kana, a naa tang ka tĩng Yeesɔ. A kɔɔ vuu ɓɔɔ palɛ, wu lee Yeesɔ naa ka bii ɓɛɛ, ka shoo zang nandon nɛɛ naa ɓɔɔ zĩi dɔng kaa tantɛnang ɓɛɛ.

⁴⁸A Yeesɔ kɔɔ jaa soro kaɓa tɔɔ, “Man jaa, danggn ɓɔɔ mɔɔ shing ka bii mɛɛ masɛ mɔɔ tɔ, daa waasɛ̃.”

⁴⁹Ɓɔɔ Yeesɔ rang yee doo naa ka nyaa, zang gbete a nɛɛ gãa yɔɔ zang bang gãa zɔɔ kpalɛnang kaɓa, naa kɔɔ wu tɔɔ, “Jaa ɓaaɓɛ vɔ tɔ, mɔɔ gboro maalang takpang.”

⁵⁰Yeesɔ tãa kati, a kɔɔ Yayiru tɔɔ, “Mɔɔ kaa vɔrɔ kpang, shing ɓaa danggn kɔ shɛ̃ɛning ka bii mɛɛ, suru jaa a ɓi ditɔ ka bii ɓiɓɛ tɔkn.”

⁵¹Yeesɔ naa shɛ̃ɛ gãa Yayiru tɔ, kasɛ nɛɛ zang ɓɔɔ wu daa nɛɛ wu ka yeti gãa kpang, daa nɛɛ rɛɛ Bituru nɛɛ Yɔhana nɛɛ Yakub, nɛɛ daa jaa, nɛɛ nàá jaa kɔ shɛ̃ɛning.

⁵²Zang ɓɔɔ ri ka nɔng nandon ri kaa ɓarɛ kana, zang ɓɔɔ ri ti ku naa yuu ka ruu jaa ɓɔɔ vɔ ɓɛɛ. A Yeesɔ kɔɔ ri tɔɔ, “Nɔ́ɔ kaa kpang, vɔ ɓi ka takpang, roo ɓi katɔ waati.”

⁵³A ri laarɛ wu, ka ruu ɓɔɔ, ri zi tɔ nɛɛ jaa vɔ ɓi tɔ ɓɛɛ.

⁵⁴A Yeesɔ yi jaa ka naa, a ɓaa jaa nyaa, a kɔɔ wu tɔɔ, “Jaa seepaa ta.”

⁵⁵A suru bii jaa gbãayu ka bii ɓiɓɛ ka nɔng tɔkn. A jaa seepaa kaa tantɛnang. A Yeesɔ kɔɔ ri kati tɔɔ, “Nɔɔ a wu vuu ta wu shaayi.”

⁵⁶Daa jaa nɛɛ nàá jaa ri mã naa ka danggn. Yeesɔ kɔɔ ri tɔɔ, ri kɔɔ zang ɓɔɔ vuu kɔ wu palɛ ɓɛɛ kpang.