Read mumuye Luka 9 Bible Online

Luka 9 - mumuye bible

Luka 9

¹Yeesɔ ɓaa nyaa ka zang ɓɔɔ ri mantɛ vuu ka bìí ɓiɓɛ kopi tuu ziti ka nɔng gbete, a á ri naa suru shi kpang nandon nwangsɛnang nɛɛ zang kɔnang masɛnang.

²A shong ri nɛɛ ri dita ri daa rang zang yee Kpanti roonang Laa nɛɛ ri ti masɛ zang kɔnang.

³A kɔɔ ri tɔɔ, “Nɔ́ɔ tuu vuu zanti daanang ka naa kpang. Nɔ́ɔ tuu labalang nɛɛ duku nɛɛ vuu shaanang nɛɛ saka ka naa kpang. Nɔ́ɔ ti hãa fɔ̃ɔrɔ ziti ka bii kpang.

⁴Gãa ɓɔɔ nɔɔ hãa nyaa kagn, nɔɔ nwang ka nɔngkɔ, diki ɓɔɔ nɔɔ dɔ̃sɔ ka nɔng ɓɔɔgn wu a nɔng.

⁵Nɔng ɓɔɔ zang nɛɛ ta nɔɔ kpang, nɔɔ nɛɛ daa kaa tɔ, nɔ́ɔ waa zũng tapuru ɓɔɔ ka doo manɛ katɔ. Tɔ̀ɔ, wu nwang vuu ɓɔɔ zang zi kagn nɛɛ ruu manɛ hãa ɓi tɔɔgn nɛɛ ri kpang ɓɛɛ. Nɛɛ Laa naa jee ri ruu ditɔ.”

⁶A ri seepaa, ri daarɛ ka rɛɛ gari tɔkɔlɔng, tɔkɔlɔng nandon. Ri rangkɛ zang yee Laa, a ri ti masɛ zang kɔnang ka nɔng ɓɔɔ ri daarɛ ɓɛɛ nandon.

⁷Ɓɔɔ Hiridu kpanti Galili tãa nyaa vuu ɓɔɔ zang palɛ, kpãa wu ka yeti dɔɔli. Ka ruu ɓɔɔ, zang ɓɔɔ ri kɔɔyi nɛɛ Laa wisi Yɔhana ɓɔɔ palɛ zang batizima paa tɔ tɔkn nɛɛ sàa.

⁸A zang ɓɔɔ ri ti kɔɔyi nɛɛ Iliya nwang nyaa tɔ tɔkn. Zang ɓɔɔ ri kɔɔyi nɛɛ Laa wisi zang nyaa shonang ɓiɓɛ ɓɔɔ gbete ɓɔɔ ka tĩng tɛ̃ɛ tɛ̃ɛ paa tɔ nɛɛ sàa tɔkn.

⁹Hiridu tɔɔ, “N dɔng yuu Yɔhana tɔ, ɓi kaa wi palɛ vuu kɔ n tãa nyaa ɓɛɛ wiya?” A kãa gbalang ɓɔɔ ri ĩi zɔɔ nɛɛ Yeesɔ kati.

¹⁰Zang ɓɔɔ ri mantɛ vuu ka bii Yeesɔ kopi tu ziti naa gbãayu kɔɔ wu vuu piti ɓɔɔ ri palɛ ɓɛɛ. A Yeesɔ see rikɔ shɛ̃ɛning daa nɛɛ ri ka gbalang gari ɓɔɔ zang ɓaa nɛɛ Bɛsɛda ɓɛɛ.

¹¹Ɓɔɔ zang ɓɔɔ ri kpalɛ zɔɔ gaagaa ri tãa nyaa nɔng ɓɔɔ Yeesɔ daayi, ri dũuru knti ɓiɓɛ kati. Ri naa shɛ̃ɛ nɔng ɓɔɔ Yeesɔ kagn ɓɛɛ tɔ, a Yeesɔ jee ri nyaa, a rang ri yee Kpanti roonang Laa kati. A ti masɛ zang ɓɔɔ kɔnang yiki ri katɔ ɓɛɛ.

¹²Ka diki kaɓa nɛɛ laarang, zang ɓɔɔ ri mantɛ vuu ka bii ɓiɓɛ kopi tu ziti, ri naa arɛ, ri kɔɔ wu tɔɔ, “Yaa zang naa ta, zang wu daarɛ ka gari ɓɔɔ bang nɛɛ ɓɔɔ tɔkɔlɔng ɓɔɔ ka nihn naabm, zang ɓu wu daa kãa vuu shaanang ɓiɓɛ nɛɛ nɔng roonang, ka ruu ɓɔɔ gãa ka nihn kpang ɓɛɛ.”

¹³A kasɛ ri nyaa tɔɔ, “Nɔkɔ nɔ́ɔ a ri vuu shaanang.” Ri kasɛ wu nyaa tɔɔ, “Borodi ɓuru yaa kaa maani nɛɛ jaazĩi ziti kɔ nwani. Mɔɔ kasɛ nɛɛ ruu daa hoo zang kɔ kpalɛ zɔɔ gaagaa ɓee vuu shaanang ya?”

¹⁴(Zang varɛ ɓɔɔ ka nɔng kaɓa daa labang maani katɔ.) A Yeesɔ kɔɔ zang ɓɔɔ ri mantɛ vuu kaa bii ɓiɓɛ tɔɔ, “Nɔɔ kusu zang ta laa ziti tu kopi, laa ziti tu kopi, ri nwalɛ ka tipi.”

¹⁵A zang ɓɔɔ ri mantɛ vuu ka bii Yeesɔ, ri kusu zang kaa naa ɓɔɔ Yeesɔ kɔɔ ri ɓɛɛ. A ri kɔɔ zang, zang ri nwalɛ ka tipi.

¹⁶A tuu borodi maani kɔ nɛɛ jaazĩi ɓa, tuu jĩng ka lapa, a zãa Laa, shalɛ, a basɛ zang ɓɔɔ ri mantɛ vuu ka bii ɓiɓɛ ɓɛɛ, nɛɛ ri alɛ zang ta.

¹⁷Zang shaayi, buru ɓarɛ yirɛ, a zang ɓɔɔ ri mantɛ vuu ka bii ɓiɓɛ ri kpalɛ ɓɔɔ zang yaarɛ knti sàáng kopi tu ziti.

¹⁸Diki ɓɔɔ kagn Yeesɔ gaa Laa kana, a zang ɓɔɔ ri mantɛ vuu ka bii ɓiɓɛ ri kagn nɔngkɔ. Hangsɛ nyaalaa gaanang tɔ, a hɛ̃ɛ ri tɔɔ, “Zang ri kɔɔ ɓu nɛɛ nkɔ wiya?”

¹⁹Ri kasɛ wu nyaa tɔɔ, “Zang ɓɔɔ ri kɔɔ ɓarɛ nɛɛ mɔkɔ Yɔhana ɓɔɔ palɛ zang batizima ɓɛɛ. Zang ɓɔɔ ri ti kɔɔyi nɛɛ mɔkɔ Iliya. Zang ɓɔɔ ri kɔɔyi nɛɛ, mɔɔ zang nyaa shonang Laa ɓɔɔ gbete ɓɔɔ ka tĩng tɛ̃ɛ tɛ̃ɛ ɓɛɛ. Laa wisi wukɔ paa nɛɛ saa.”

²⁰A hɛ̃ɛ ri tɔɔ, “A nɔɔ kɔɔ manɛ nɛɛ nkɔ wiya?” A Bituru kasɛ nyaa tɔɔ, “Mɔkɔ Kirisi. Zang ɓɔɔ Laa tɔ naa a ɓɛɛ.”

²¹A Yeesɔ shaarɛ ri nyaa tɔɔ, ri kɔɔ zang ɓɔɔ kpang.

²²A ti kɔɔ ri tɔɔ, “Jaa shɔnzang naa dang jĩng ditɔ dɔɔli. Zang bang, bang zang Yahudi, nɛɛ zang bang bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, ri ti bɛ̃ɛ wu, ri nyɔ wu vɔrɔ. Laa naa wisi wu paa ka lee ɓɔɔ diki daa taati ɓɛɛ.”

²³A kɔɔ zang tɔɔ, “Zang ɓɔɔ nɛɛ tɔɔ wu dũng m, wu yaa yuu ɓiɓɛ kasɛnang ta, wu ta jĩng dannang ɓɔɔ a ka ruu nung mɛɛ diki, diki wu dũng m.

²⁴Ka ruu ɓɔɔ, zang ɓɔɔ kasɛ nɛɛ wu ta yuu ɓiɓɛ loo ɓi katɔ kɔ jong ɓɛɛ. A zang ɓɔɔ loo yuu ɓiɓɛ ka ruu mɛɛ naa walɛ ɓi katɔ kɔ jong ɓɛɛ.

²⁵Naa shɔnzang wàlɛ̀ vuu ɓɔɔ ka koo keɓe nandon a loo suru bii ɓiɓɛ, vuu keɓe nwǎng wu ɓu viya?

²⁶Zang ɓɔɔ tuuru yusɛ̃ɛ mɛɛ, nɛɛ ɓɔɔ yee mɛɛ, Jaa Shɔnzang naa tuuru yusɛ̃ɛ ɓiɓɛ ɓi doo nɔngkɔ, ka diki ɓɔɔ wu a ka naa bannang ɓiɓɛ, nɛɛ ɓɔ̀ɔ́ Daa ɓiɓɛ, nɛɛ ɓɔ̀ɔ́ zang nyaa shonang Laa ɓɔɔ ka lapa ɓɛɛ.

²⁷N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ ri kagn teteng zang kɔ ka nihn ɓee ri vɔ kpang. Ri zi kpanti ɓɔɔ Laa roo ɓɛɛ gbongkarɛ.”

²⁸Diki mantaati ɓa tɔ, a Yeesɔ naa vang kɔpɔ daa gaa Laa. Daa nɛɛ rɛɛ Bituru nɛɛ Yɔhana nɛɛ Yakub kɔ shɛ̃ɛning.

²⁹Gaa Laa doo naa, a waa nyaating ɓiɓɛ risi kaa naa ɓɔɔgn. Fɔ̃ɔrɔ ɓiɓɛ nwang kaa puru shãa shãa.

³⁰A zang ziti, Musa nɛɛ Iliya ri nwang nyaa, ri rang yee kana nɛɛ wu.

³¹Ri nwang nyaa bii ɓarɛ kɔlɔ katɔ, a ri rang yee nɛɛ wu ka naa ɓɔɔ wu naa vɔ ka Urushalima ɓɛɛ.

³²A Bituru nɛɛ zang ɓɔɔ ri nɛɛ wu hingro kpiti ri jĩng tɔ, ɓɔɔ ri hingsi jĩng ri zi Yeesɔ ka bannang ɓiɓɛ, nɛɛ zang ɓɔɔ ri shiiri nɛɛ wu ɓɛɛ.

³³Ɓɔɔ zang ziti kaɓa seepaa daanang tɔ, Bituru kɔɔ Yeesɔ tɔɔ, “Dabang, wee ruu ka nihn, wukɔ tɔ̃ɔ. Rúu kaaɓi ruu waa kúutu taati, ɓɔɔ ɓaaɓɛ gbete, ɓɔɔ Musa gbete, a ɓɔɔ Iliya ti gbete.” (A Bituru zi vuu ɓɔɔ wu kɔɔ keɓe ɓi kpang.)

³⁴Bituru kɔɔ ruu kaɓa doo naa nyaa, sãmbong arɛ naa zuu ri, a ri kaa vɔrɔ, ka ruu ɓɔɔ sãmbong zuu ri kana ɓɛɛ.

³⁵Ri tãa yee nɛɛ yeti sãmbong tɔɔ, “Wee Jaa Mɛɛ ɓɔɔ N zɔ̃ng ɓɛɛ kɔ, nɔɔ ɓaa shoo ka nyaa ɓiɓɛ ning.”

³⁶Ri tãa yee tɔ naa weɓe, a ri naa zi Yeesɔ kaa bm. Zang ɓɔɔ ri mantɛ vuu ka bii Yeesɔ taati kaɓa, ri shing ruu keɓe ka yeti ɓarɛ. Ka diki kaɓa ri kɔɔ zang gbete vuu ɓɔɔ ri zi ɓɛɛ kpang.

³⁷Yeesɔ nɛɛ zang ɓɔɔ ri mantɛ vuu ka bii ɓiɓɛ ɓɔɔ taati ri shooro tɔ nɛɛ kɔpɔ nɛɛ gãndi, a zang ɓɔɔ ri kpalɛ zɔɔ gaagaa naa ɓee wu yuu kati.

³⁸Zang ɓɔɔ kagn teteng zang ɓɔɔ ri kpalɛ zɔɔ mɛ́ɛ nyaa kana nɛɛ, “Maalang, n gaa mɔɔ katɔ, gn jaa gbete mɛɛ wu kɔng mɔɔ jong.

³⁹Suru shi kpang keɓe nɛɛ mã wu tɔ, mɛɛrɛ nyaa tantɛnang. Wu ti mãrɛ, puru wu puu nɛɛ nyaa dung dung. Dang wu jĩng sasak, yaa wu naa pati kpang.

⁴⁰N gàa zang ɓɔɔ ri mantɛ vuu ka bii ɓaaɓɛ n tɔɔ ri nwangsɛ suru shi kpang keɓe ri zunung kpang.”

⁴¹Yeesɔ kɔɔyi tɔɔ, “zang koo jaa knti keɓe, nɔɔ shi kpang. Nɔɔ shing danggn ka bii Laa rɛ̃rɛkɛ. Nɔɔ nɛɛ n nwang nɛɛ nɔɔ saa nɛya? Nɔɔ nɛɛ n mã danggn nɛɛ nɔɔ saa nɛya? Atɛ m jaa ɓaaɓɛ ta.”

⁴²Ɓɔɔ jaa a kana, suru shi kpang tuu wu loo ka tipi, a mã kati. Yeesɔ mangkɛ suru shi kpang, a suru shi kpang nwangnɛ, a sɔɔrɔ daa jaa, jaa ɓiɓɛ kati.

⁴³Zang ɓɔɔ ri ka nɔngkɔ piti, ri mã naa ka danggn ka ruu vuu piti ɓɔɔ Laa palɛ ɓɛɛ. Ɓɔɔ zang ri mã naa doo ka danggn, ka ruu vuu ɓɔɔ, wu palɛ ɓɛɛ. Yeesɔ kɔɔ zang ɓɔɔ ri mantɛ vuu ka bìí ɓiɓɛ tɔɔ,

⁴⁴“Nɔɔ ɓaa shoo ta nɔɔ tãa vuu ɓɔɔ n kɔɔ nɔɔ ɓɛɛ, tɔɔ danggn wu ning nɔɔ kaa takpang. Ka ruu ɓɔɔ zang ɓɔɔ naa tuu Jaa Shɔnzang ditɔ, a zang ɓɔɔgn ri nyɔ wu vɔrɔ ɓɛɛ.”

⁴⁵Ri zi dĩiri ruu kɔ wu kɔɔ ri ɓee kpang, ka ruu ɓɔɔ Laa waasɛ ri katɔ ɓɛɛ, kasɛ nɛɛ ri zi kpang. Ri tɔɔ ri hɛ̃ɛ wu dĩiri ruu keɓe, a ri kaa vɔrɔ.

⁴⁶A zang ɓɔɔ ri mantɛ vuu ka bii ɓiɓɛ ri gaa tɔɔsung nyaa laanang ka yuu zang ɓɔɔ naa nwáng zang bang ka teteng ɓarɛ ɓɛɛ.

⁴⁷Yeesɔ zi vuu ɓɔɔ ri rɛ̃rɛ ka yeti ɓarɛ ɓi tɔ. Ka ruu nɔngkɔ, tuu jaa tɔkɔlɔng shii wu nɛɛ doo ka tĩng ɓiɓɛ.

⁴⁸A kɔɔ ri tɔɔ, “Zang piti ɓɔɔ ta jaa keɓe, ka ruu mɛɛ ta ɓi nkɔ. Zang ɓɔɔ nɛɛ ta m, ta zang ɓɔɔ shong m ɓɛɛ. Ka ruu ɓɔɔ zang ɓɔɔ shing gn nɛɛ wu ɓi zang bang kpang ka teteng manɛ, wukɔ zang bang manɛ.”

⁴⁹Yɔhana kɔɔ wu tɔɔ, “Dabang, ruu zi zang ɓɔɔ kagn nwangsɛ suru shi kpang nɛɛ nung ɓaaɓɛ, a ruu zãa wu. Ka ruu ɓɔɔ, dũng knti ɓaaɓɛ ɓi nɛɛ ruu kpang ɓɛɛ.”

⁵⁰A Yeesɔ kɔɔ wu tɔɔ, “Nɔ́ɔ zãa wu kpang, ka ruu ɓɔɔ, zang ɓɔɔ bɛ̃ɛ ruu ɓuru kpang, ɓi doo zang ɓuru kɔ ɓɛɛ.”

⁵¹Ɓɔɔ diki ɓɔɔ Yeesɔ gbãayu daa lapa yaa kaa tɔkɔlɔng, Yeesɔ shing jĩng daanang kaa Urushalima.

⁵²A shong zang ɓɔɔ ɓɛɛ ka tĩng. A zang shonang kaɓa ri daa hãa nyaa ka gari zang Samariya ɓɔɔ gbete. Ri nɛɛ ri shĩili wu nɔng roonang.

⁵³A zang gari kaɓa ri kasɛ nɛɛ Yeesɔ wu a ka yeti gari ɓarɛ kpang. Ka ruu ɓɔɔ, ri zi tɔ nɛɛ Yeesɔ shing jĩng ɓi kaa Urushalima daanang ɓɛɛ.

⁵⁴Ɓɔɔ Yakub nɛɛ Yɔhana ɓɔɔ ri mantɛ vuu ka bii Yeesɔ ri zi naa weɓe, ri hɛ̃ɛ Yeesɔ tɔɔ, “Dabang mɔɔ kasɛ tɔ ruu gaa Laa, wu shong waa nɛɛ lapa, wu shaa ri ya?”

⁵⁵A Yeesɔ raa jĩng mangkɛ ri.

⁵⁶A sha kaa nɛɛ zang ɓɔɔ ri mantɛ vuu ka bii ɓiɓɛ, ri daa ka gari ɓɔɔgn.

⁵⁷Ri daa kana gbalang, a zang ɓɔɔgn gbete kɔɔ wu tɔɔ, “N dũng knti ɓaaɓɛ n daa nɛɛ mɔɔ ka nɔng ɓɔɔ mɔɔ daa ɓɛɛ piti.”

⁵⁸A Yeesɔ kɔɔ wu tɔɔ, “Yeng rɛɛ yaka jĩngti kagn, a saara jaaning ti kagn, a gãa ɓɔɔ Jaa shɔnzang roo ɓi kagn kpang.”

⁵⁹A kɔɔ zang ɓɔɔ ɓɛɛ tɔɔ, “Dũng m ta.” A zang kaɓa kasɛ wu nyaa tɔɔ, “Dabang, ya m ta, n gbãa daa mɛɛ ka gbongkarɛ, tɔɔ, n naa dũng mɔɔ.”

⁶⁰A Yeesɔ kɔɔ wu tɔɔ, “Dũng m ɓaaɓɛ. Yaa zang ɓɔɔ ri walɛ suru bii ɓɔɔ waa nyaa kpang gn kpang ri gbãa zɔɔ ka naa ɓarɛ. Daa ɓaari mɔɔ daa kɔɔrɔ zang Ruu Tɔ̃̀ɔ́ Kpanti roonang Laa.”

⁶¹Zang ɓɔɔgn ti kɔɔ wu tɔɔ, “N dũng mɔɔ katɔ Dabang, yaa m ka gbongkarɛ n daa jee zang ɓɔɔ ri ka gãa mɛɛ nyaa.”

⁶²Yeesɔ kɔɔ wu tɔɔ, “Shɔnzang ɓɔɔ gaayu shonang Laa palɛnang a nwãa jĩng ka knti, daa naa ɓɔɔ wu daa ka nɔng ɓɔɔ Laa roo Kpanti kpang.”