Read mumuye Yɔhana 13 Bible Online

Yɔhana 13 - mumuye bible

Yɔhana 13

¹Bɛɛ diki nyaalaa pasika ɓɔɔ zang kpaa danggn diki ɓɔɔ Laa tɛɛ ɓɛɛ, yaa kaa tɔkɔlɔng. Yeesɔ zi tɔ nɛɛ diki a tɔ, ɓɔɔ wu yaa koo keɓe, wu daa ka bii Daa ɓiɓɛ ɓɛɛ. Yeesɔ kasɛ zang ɓiɓɛ ɓɔɔ ka koo keɓe, ka ruu nɔngkɔ, kasɛ nɛɛ wu tusu ri naa ɓɔɔ wu kasɛ ri dɔɔli ɓɛɛ.

²Yeesɔ nɛɛ zang ɓɔɔ ri mantɛ vuu ka bii ɓiɓɛ, ri shaa vuu shaanang laarang kana. A sheetang shìng Yahuda Isikariyoti jaa Siman, rɛ̃rɛnang tɔ, ka yeti ɓiɓɛ nɛɛ wu nyɔ yuu Yeesɔ.

³Yeesɔ ti zi tɔ, nɛɛ Daa ɓiɓɛ a wu naa vuu palɛnang tɔ nandon. Ti zi tɔ nɛɛ wu à nɛɛ bii Laa, nɛɛ wu ti gbãayu ka bii Laa ka nɔng.

⁴A Yeesɔ seepaa nɛɛ nɔng vuu shaanang. Tu fɔ̃ɔrɔ ɓiɓɛ ɓɔɔ biling, a mã fɔ̃ɔrɔ ɓiɓɛ ɓɔɔ nɛɛ wili bii tɔ, alɛ nɛɛ manɛ ɓɛɛ ka sang.

⁵A tɛ̃ɛ mii ka waka, a gaa tɔɔsung ɓɔɔ wu sɔɔ zang ɓɔɔ ri mantɛ vuu kaa bii ɓiɓɛ doo. Wu ti alɛ nɛɛ fɔ̃ɔrɔ bii alɛnang ɓɔɔ wu mã ka sang ɓɛɛ.

⁶A tɔ ka yuu Siman Bituru, a Bituru hɛ̃ɛ tɔɔ, “Mɔɔ nɛɛ mɔɔ sɔɔ m doo ya Kpanti?”

⁷Yeesɔ kasɛ wu nyaa tɔɔ, “Mɔɔ zi dĩiri vuu ɓɔɔ n pàlɛ́ mɔɔ kãntang keɓe kpang, mɔɔ naa zi ditɔ nɛɛ knti.”

⁸Bituru kɔɔ wu tɔɔ, “Mɔɔ sɔ̀ɔ doo mɛɛ kpang dòndòng.” Yeesɔ kɔɔ wu tɔɔ, “Naa n sɔ̀ɔ mɔɔ doo kpang, ruu mɛɛ hãa kagn nɛɛ mɔɔ kpang.”

⁹A Siman Bituru kɔɔ wu kati tɔɔ, “Mɔ́ɔ sɔ̀ɔ wu doo mɛɛ kɔ shɛ̃ɛning kpang, sɔɔ naa mɛɛ jong nɛɛ yuu mɛɛ.”

¹⁰Yeesɔ kɔɔ wu tɔɔ, “Zang ɓɔɔ nɛɛ wili bii tɔ, bii rĩiti tɔ̀ɔ́ bii ɓiɓɛ kpang, sɔɔ bii ɓiɓɛ ɓi tɔ̀ɔ́ tɔkn kpang. Sɔɔ ɓi kaa doo kɔ shɛ̃ɛning. Wee nɔɔ ɓee, bii manɛ tu tɔ nandon, yaa kaa zang gbete.”

¹¹(Yeesɔ zi zang ɓɔɔ naa nyɔ yuu ɓiɓɛ ɓi tɔ, ka ruu nɔngkɔ, kɔɔyi tɔɔ, “Bii manɛ tu tɔ nandon, yaa ɓɔ̀ɔ́ zang gbete.”)

¹²Yeesɔ hangsɛ ri doo sɔɔnang tɔ, a hãa fɔ̃ɔrɔ ɓiɓɛ kaa nɔng, a gbãayu daa nwáng ka nɔng ɓiɓɛ ka nɔng vuu shaanang. A hɛ̃ɛ ri tɔɔ, “Nɔɔ zi vuu ɓɔɔ n pàlɛ́ nɔɔ kãntang keɓe ɓu tɔ ya?

¹³Nɔɔ ɓáa m nɛɛ maalang, a nɔɔ ɓaa m nɛɛ kpanti. Nɔɔ ɓaa waasɛ̃, ka ruu ɓɔɔ, n maalang, a n ti Kpanti niizang ɓɛɛ.

¹⁴Wee n maalang, n ti Kpanti manɛ, n sɔɔ nɔɔ doo tɔ ɓee, nɔ́ɔ sɔɔ zɔɔ doo jong dòo nɔngkɔ.

¹⁵N tusu nɔɔ naa tɔ, nɔɔ palɛ vuu kɔ n pàlɛ̀ nɔɔ ɓee doo nɔngkɔ.

¹⁶N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ pàlɛ́ zang shonang, ɓa dabang gãa ɓiɓɛ ɓi kpang. Zang nyaa shonang ti ɓa zang ɓɔɔ shong wu ɓi kpang.

¹⁷Wee nɔɔ zi vuu keɓe tɔ ɓee, naa nɔɔ palɛ, nɔkɔ naa tãa tĩnang.

¹⁸“N kɔɔ ruu keɓe ka yuu manɛ nandon kpang. N zi zang ɓɔɔ n shɛ̃ɛrɛ ri m tɔ. Vuu keɓe nwáng nɔngkɔ, naa ɓɔɔ zang bee ka yeti Labeenang Laa ɓɛɛ. Labeenang Laa kɔɔyi tɔɔ, ‘Zang ɓɔɔ n basɛ borodi mɛɛ nɛɛ wu, ràa m yuu knti tɔ. Nwáng zang ɓɔɔ shing jĩng nɛɛ n kpang tɔ.’

¹⁹N kɔɔ nɔɔ vuu keɓe kãntang, bɛ̀ɛ́ vuu bìí palɛ gn kpang. Nɛɛ palɛ tɔ, nɔɔ zi kaa gn nɛɛ nkɔ zang ɓɔɔ n kɔɔ nɔɔ nɛɛ n wukɔ ɓɛɛ.

²⁰N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ nɛɛ ta zang ɓɔɔ n shong ɓɛɛ, ta m tɔ jong. Zang ɓɔɔ nɛɛ ti ta m, ta ɓi zang ɓɔɔ shong m ɓɛɛ.”

²¹Yeesɔ kɔɔ vuu keɓe tɔ, a vuu bìí kpãa wu ka yeti, a kɔɔ kaa faarik tɔɔ, “N kɔɔ nɔɔ ruu ɓɔɔ niizang kɔ nwani, zang gbete ka teteng manɛ nyɔ yuu mɛɛ ditɔ.”

²²Zang ɓɔɔ ri mantɛ vuu ka bii ɓiɓɛ ri pɛ̃ɛrɛ zɔɔ, ri zi zang ɓɔɔ Yeesɔ kɔɔ ruu bìí ka yuu ɓiɓɛ kpang.

²³Zang gbete ka teteng ɓarɛ ɓɔɔ Yeesɔ kasɛ wu dɔɔli ɓɛɛ, nwáng nɛɛ wu naabm.

²⁴A Siman Bituru rang wu yee, kɔɔ wu tɔɔ, “Hɛ̃ɛ Yeesɔ nɛɛ, wu kɔɔ ruu ka yuu wiya?”

²⁵A yɔɔ kaɓa wɔ ka bii Yeesɔ naabm, a hɛ̃ɛ wu nɛɛ, “Ɓu wiya Kpanti?”

²⁶Yeesɔ kasɛ wu nyaa tɔɔ, “Zang ɓɔɔ n hãa borodi keɓe ka yɔkɔ, n a wu, zang bìí kɔ naa mãlɛ́ yuu mɛɛ.” A sha borodi tɔkɔlɔng hãa ka yɔkɔ a, a Yahuda, jaa Siman Isikariyoti.

²⁷Ɓɔɔ Yahuda ta borodi hn, sheetang ta rɛ̃rɛnang ɓiɓɛ. Yeesɔ kɔɔ wu tɔɔ, “Vuu ɓɔɔ mɔɔ mangnɛ, nɛɛ mɔɔ palɛ ɓɛɛ, palɛ ta pati.”

²⁸Zang ɓɔɔ kagn nɔng vuu shaanang ɓɔɔ zi vuu ɓɔɔ pálɛ̀, a Yeesɔ kɔɔ wu nɔngkɔ ɓɛɛ kpang.

²⁹Zang ɓɔɔ ri kɔɔ ɓarɛ nɛɛ naa ɓɔɔ duku saka ɓarɛ ka naa Yahuda kɔ, Yeesɔ kɔɔ wu nɛɛ wu hoo vuu ɓɔɔ ri shaa ɓɛɛ. Zang ɓɔɔ ri kɔɔ ɓarɛ nɛɛ Yeesɔ shong wu nɛɛ wu daa a zang ɓɔɔ vuu ka naa kpang saka.

³⁰Yahuda ta borodi, a tantɛ nwannang daa biling. Bɛɛ kaa nɔng zĩi.

³¹Yahuda nwáng tɔ ka biling, a Yeesɔ kɔɔ zang ɓɔɔ ri mantɛ vuu ka bìí ɓiɓɛ, ɓɔɔ nimbang tɔɔ, “Kãntang keɓe, shɔnzang ri zi bannang mɛɛ ɓɔɔ n Jaa Shɔnzang kaa tɔ. Bannang Laa ti tusu bii kana jong, ka ruu vuu ɓɔɔ n palɛ ɓɛɛ.

³²Zang nɛɛ zi bannang Laa kana ka bii mɛɛ, Laa ti tusu zang bannang mɛɛ ɓɔɔ n Jaa Shɔnzang ditɔ jong. Laa suukãng kpang, a m bannang tantɛnang.

³³Wujɛ mɛɛ, n nwang tɔ̀ɔ́ nɛɛ nɔɔ diki wu bee tɔkɔlɔng kpang. Nɔɔ naa kãa m ditɔ. N kɔ̀ɔ nɔɔ doo vuu ɓɔɔ n kɔ̀ɔ zang bang bang zang Yahudi ɓɛɛ kɔ, ‘Nɔng ɓɔɔ n daa ɓɛɛ, nɔɔ zunung daanang kpang.’

³⁴Kãntang keɓe, n dang nɔɔ kaa nyaa ɓɔɔ shɔɔ. Nɔɔ kasɛ ruu zɔɔ katɔ. Naa ɓɔɔ n kasɛ nɔɔ, nɔɔ kasɛ ruu zɔɔ doo nɔngkɔ.

³⁵Naa nɔɔ kàsɛ́ ruu zɔɔ, zang zi ka wukɔ nɛɛ nɔɔ manɛ zang ɓɔɔ ri mantɛ vuu ka bìí mɛɛ ɓɛɛ.”

³⁶Siman Bituru hɛ̃ɛ Yeesɔ tɔɔ, “Mɔɔ daa ka niya, Kpanti?” Yeesɔ kasɛ wu nyaa tɔɔ, “Nɔng ɓɔɔ n daa ɓɛɛ, mɔɔ dũng m kãntang keɓe kpang. Mɔɔ naa dũng m kaa nɛɛ knti.”

³⁷Bituru hɛ̃ɛ wu tɔɔ, “Kpanti, n dũ̀ng mɔɔ kãntang kpang ka ruu viya? N kasɛ tɔ, n vɔ ka ruu ɓaaɓɛ katɔ.”

³⁸Yeesɔ hɛ̃ɛ wu tɔɔ, “Mɔɔ vɔ katɔ ka ruu mɛɛ niizang ya? N kɔ̀ɔ́ mɔɔ ruu ɓɔɔ niizang kɔ nwani, ɓɔɔ kn naa ɓaa nyaa bɛ̀ɛ́ mɔɔ laa nyaa tɔ, daa doo taati, nɛɛ mɔɔ zi m nung ɓaa kpang.”