Read mumuye Yɔhana 14 Bible Online

Yɔhana 14 - mumuye bible

Yɔhana 14

¹Yeesɔ kɔɔ zang ɓɔɔ ri mantɛ vuu ka bii ɓiɓɛ tɔɔ, “Yeti manɛ wu lasɛ kpang. Nɔɔ shíng danggn ka bii Laa, nɔɔ ti shíng jong ka bii mɛɛ.

²Ka gãa Daa mɛɛ, jaka kagn dɔɔli. Naa nɛɛ nɔngkɔ kpang, n nɛɛ kɔ̀ɔ nɔɔ tɔ. N daa shĩili nɔɔ doo nɔng nwannang.

³N nɛɛ daa tɔ, n nɛɛ daa shĩili nɔng tɔ, n gbãayu kati. Ń naa see nɔɔ, nɔ́ɔ daa nwáng nɛɛ n, ka nɔng ɓɔɔ n kagn ɓɛɛ.

⁴Nɔɔ zi gbalang ɓɔɔ nɔɔ sɔɔyi nɔɔ daa nɔng ɓɔɔ n daa ɓɛɛ tɔ.”

⁵Tooma kɔɔ wu tɔɔ, “Kpanti, ruu zi nɔng ɓɔɔ mɔɔ dàá ɓɛɛ kpang, a ruu zi gbalang ɓɔɔ ruu sɔɔ ɓɛɛ kaa biya?”

⁶Yeesɔ kɔɔ wu tɔɔ, “Nkɔ gbalang, nkɔ niizang, nkɔ suru bii. Zang ɓɔɔ nɛɛ tɔɔ wu daa bii Daa, sɔɔ nɛɛ bii mɛɛ kɔ gbete.

⁷Naa nɔɔ nɛ̀ɛ́ zi m nung tɔ, nɔɔ nɛɛ zi Daa mɛɛ nung tɔ jong. Vuu ɓɔɔ yi nɛɛ lɛɛkɔ, nɔɔ zi wu nung tɔ, nɔɔ ti zi wu tɔ nɛɛ jĩng manɛ.”

⁸Filibu kɔɔ wu tɔɔ, “Kpanti, shing ruu ta ruu zi Daa ɓaaɓɛ nung, ɓi vuu ɓɔɔ ruu kasɛ kɔ shɛ̃ɛning.”

⁹Yeesɔ kasɛ wu nyaa tɔɔ, “Filibu, n nwáng tɔ, nɛɛ nɔɔ diki mɛɛ bee tɔ, mɔɔ zi m nung gn kpang ya? Zang ɓɔɔ nɛɛ zi m tɔ, zi Daa tɔ. A mɔɔ kɔɔ m ka ruu vi nɛɛ, n shìng nɔɔ ta, nɔɔ zi Daa nung viya?

¹⁰Filibu, mɔɔ zi kpang nɛɛ n ka yeti Daa, Daa ti ka yeti mɛɛ kpang ya?” A raa jĩng kɔɔ zang ɓɔɔ ri mantɛ vuu ka bii ɓiɓɛ tɔɔ, “Ruu kɔ n kɔɔ nɔɔ ɓee, ɓi ruu mɛɛ kpang. Ɓi Daa ɓɔɔ ka yeti mɛɛ kɔ palɛ shonang ɓiɓɛ ɓiri.

¹¹Nɔɔ shing danggn ka bii mɛɛ, nɛɛ n ka yeti Daa, Daa ti ka yeti mɛɛ. Nɔɔ nɛɛ shing danggn ka ruu vuu ɓɔɔ n kɔɔ ɓɛɛ kpang, nɔɔ shing danggn ka vuu ɓɔɔ zang zirɛ, zang mã naa ka danggn kɔ n palɛ ɓee.

¹²N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ nɛɛ shing danggn ka bii mɛɛ, palɛ shonang ɓɔɔ n palɛ ɓɛɛ katɔ. Ti palɛ shonang ɓɔɔ ɓa ɓɔɔ n palɛ katɔ. Ka ruu ɓɔɔ, n gbãayu n daa kaa bìí Daa mɛɛ ɓɛɛ.

¹³N ti pàlɛ́ nɔɔ vuu piti ɓɔɔ nɔɔ gàá nɛɛ nung mɛɛ katɔ, tɔ̀ɔ, zang a Daa bannang kati ka ruu Jaa.

¹⁴Naa nɔɔ gàá viya piti nɛɛ nung mɛɛ, n naa pàlɛ́ nɔɔ katɔ.

¹⁵“Yeesɔ kɔɔyi tɔɔ, nɔɔ nɛɛ kasɛ ruu mɛɛ katɔ, nɔɔ dũng nyaa ɓɔɔ n dang ɓɛɛ katɔ.

¹⁶N ti gàá Daa, wu a nɔɔ zang ɓɔɔ naa yi nɔɔ naa ka bii ɓɔɔgn wu naa nwang nɛɛ nɔɔ dòndòng.

¹⁷Zang keɓe wukɔ Suru Laa, ɓɔɔ tusu zang ruu ɓɔɔ niizang ka yuu Laa. Zang koo ri tà wu kpang, ka ruu ɓɔɔ ri zi wu nung kpang, ri ti zi wu nɛɛ jĩng ɓarɛ kpang ɓɛɛ. Nɔɔ zi wu nung manɛ tɔ, ka ruu ɓɔɔ, nwang ɓi nɛɛ nɔɔ ɓɛɛ. Ti naa nwang ka yeti manɛ.

¹⁸“A kɔɔ ri tɔkn tɔɔ, N nɛɛ daa tɔ n yaa nɔɔ ka bm naa javɔ kpang, n a ditɔ ka bìí manɛ.

¹⁹Diki yaa kaa tɔkɔlɔng bɛ̀ɛ́ zang koo ri zi m takpang. Nɔɔ zi m manɛ katɔ, ka ruu ɓɔɔ, n naa nwang ningkãari, nɔɔ naa nwang ditɔ ningkãari jong.

²⁰Diki kaɓa nɛɛ a tɔ, nɔɔ naa zi ka lɛ̀ɛ́kɔ nɛɛ, Daa ka yeti mɛɛ, n ti kagn yeti ɓiɓɛ. A ɓɔɔ n nɛɛ nɔɔ, ruu ti gbete.

²¹“Zang ɓɔɔ nɛɛ tà rɛɛ nyaa ɓɔɔ n dang ɓɛɛ, nɛɛ ti dũngnɛ, wukɔ kasɛ ruu mɛɛ. Zang ɓɔɔ nɛɛ kasɛ ruu mɛɛ, Daa mɛɛ kàsɛ́ wu katɔ. N ti kàsɛ́ wu katɔ, n ti nwàngsɛ́ wu bii mɛɛ.”

²²Yahuda, wu ɓɔɔ zang ɓaa wu nɛɛ Isikariyoti ɓɛɛ kpang, kɔɔ wu tɔɔ, “Kpanti, ka ruu vi mɔɔ nwàngsɛ́ rukɔ bii shɛ̃ɛning, mɔɔ nwangsɛ zang koo piti kpang viya?”

²³Yeesɔ kasɛ wu nyaa tɔɔ, “Zang ɓɔɔ nɛɛ kasɛ m katɔ, dũng vuu ɓɔɔ n tusu katɔ. Daa mɛɛ kasɛ wu katɔ. Ruu ti a nɛɛ Daa mɛɛ ka bii ɓiɓɛ ruu nwáng nɛɛ wu.

²⁴Zang ɓɔɔ nɛɛ kasɛ m kpang dũ̀ng vuu ɓɔɔ n tusu ɓɛɛ kpang. Rúu kɔ nɔɔ tã̀á ɓee, ɓi ɓɔɔ yuu mɛɛ kpang, ɓi ɓɔɔ Daa ɓɔɔ shong m ɓɛɛ.

²⁵“N kɔɔ nɔɔ vuu keɓe tɔ, ka wee n nwàng doo nɛɛ nɔɔ ɓee.

²⁶Suru Laa ɓɔɔ Daa naa shong wu ka nung mɛɛ, naa tusu nɔɔ vuu ditɔ nandon. Wu ti kpaa nɔɔ danggn vuu ɓɔɔ n kɔ̀ɔ nɔɔ ɓɛɛ nandon.

²⁷“Nɔɔ nwang waasɛ̃, vuu koo keɓe shing nɔɔ, nɔɔ nwáng waasɛ̃ kpang. Nwannang waasɛ̃ keɓe a ɓi nɛɛ bii mɛɛ. Yeti manɛ wu lasɛ kpang, nɔɔ ti kaa vɔrɔ kpang.

²⁸Nɔɔ tãayi, n kɔɔ nɔɔ nɛɛ, ‘N dàá kaa tɔ, n gbãayu ditɔ tɔkn ka bii manɛ.’ Wee nɔɔ kasɛ m katɔ ɓee, nɔɔ tãa tĩnang, ka ruu ɓɔɔ, n dàá ka bii Daa ɓɛɛ. Ka ruu ɓɔɔ, Daa ɓa m bannang ɓi katɔ ɓɛɛ.

²⁹N kɔ̀ɔ nɔɔ vuu keɓe tɔ, bɛ̀ɛ́ palɛ gn kpang, ka ruu ɓɔɔ nɛɛ naa nwang tɔ niizang nɔɔ shing danggn kaa bii mɛɛ ɓɛɛ.

³⁰N rang yee tɔ̀ɔ́ nɛɛ nɔɔ, làa bée naa ɓɔɔ n kasɛ ɓɛɛ kpang, ka ruu ɓɔɔ, zang ɓɔɔ wukɔ kpanti koo a ka naa ɓɛɛ. Zunung ɓɔɔ wu palɛ m vuu ɓɔɔ kpang.

³¹N kasɛ nɛɛ zang koo keɓe ri zirɛ nɛɛ n kasɛ ruu Daa katɔ, ka ruu nɔngkɔ, n palɛ vuu piti naa ɓɔɔ wu kɔɔ m nɛɛ n palɛ ɓɛɛ. Nɔɔ yupaa ta ruu daa nɔɔ.