Read mumuye Yɔhana 15 Bible Online

Yɔhana 15 - mumuye bible

Yɔhana 15

¹“Yeesɔ kɔɔ zang ɓɔɔ ri mantɛ vuu ka bii ɓiɓɛ tɔɔ, N nwang naa laa inabi ɓɔɔ tɔ̃ɔ ɓɛɛ. Daa mɛɛ ɓi kaa zang ɓɔɔ gãng jĩng ka laa inabi ɓɛɛ.

²Nasãng mɛɛ ɓɔɔ nɛɛ ra jaa kpang, Daa mɛɛ dɔng katɔ. Nasãng ɓɔɔ nɛɛ ra jaa katɔ, kpɛ̃lɛ bii ɓiɓɛ katɔ, tɔ̀ɔ, wu gisi jaa ránang kaa dɔɔli.

³Ruu ɓɔɔ n kɔɔ nɔɔ, a nɔɔ tarɛ ɓɛɛ, shíng nɔɔ manɛ tɔ, vuu shi kpang ɓi tɔ̀ɔ́ kagn bii manɛ kpang.

⁴Nɔɔ nwáng nɛɛ n, n ti nwáng nɛɛ nɔɔ. Nasãng ɓɔɔ nɛɛ ka bii laa inabi kpang ra jaa ɓi kpang. Nɔɔ doo nɔngkɔ, nɔɔ nɛɛ nwáng nɛɛ n kpang, nɔɔ zunung vuu ɓɔɔ palɛnang kpang.

⁵“Nkɔ laa inabi, nɔɔ manɛ kaa nasãng. Zang ɓɔɔ nɛɛ nwáng nɛɛ n, n nɛɛ ti nwang nɛɛ wu, wukɔ ra jaa dɔɔli. Ka ruu ɓɔɔ, n nɛɛ kpang, nɔɔ zunung vuu ɓɔɔ palɛnang kpang ɓɛɛ.

⁶Zang ɓɔɔ nɛɛ nwang nɛɛ n kpang, zang kaɓa nwang naa nasãng ɓɔɔ zang tásɛ̀, wu tɔɔrɔ ɓɛɛ. Zang kpalɛ nasãng ɓɔɔ naa weɓe zang vang ka waa, waa wu shaa ri.

⁷Nɔɔ nɛɛ nwang nɛɛ n, ruu mɛɛ nɛɛ ti nwang ka yeti manɛ, nɔɔ gàá vuu ɓɔɔ yeti manɛ kasɛ ɓɛɛ, zang a nɔɔ katɔ.

⁸Zang zi bannang Daa mɛɛ ka zang dɔɔli ɓɔɔ nɔɔ ɓaa ri nyaa ɓɛɛ kɔ, tɔ̀ɔ, zang ti zi kati nɛɛ nɔɔ zang ɓɔɔ ri mantɛ vuu ka bii mɛɛ ɓɔɔ niizang ɓɛɛ.

⁹Naa ɓɔɔ Daa mɛɛ kasɛ m, n kasɛ nɔɔ doo nɔngkɔ. Nɔɔ yáa kasɛnang kɔ n kàsɛ̀ nɔɔ ɓee kpang.

¹⁰Naa nɔɔ ta nyaa ɓɔɔ n dang nɔɔ ɓɛɛ kpang, n kàsɛ́ nɔɔ katɔ sasak. Naa ɓɔɔ n ta rɛɛ nyaa ɓɔɔ Daa mɛɛ dang m kpang, a ti kasɛ m sasak ɓɛɛ.

¹¹“N kɔ̀ɔ́ nɔɔ vuu keɓe, tɔ̀ɔ, nɔɔ tãa tĩnang ɓɔɔ n tãa ɓɛɛ kaa jong. Tĩnang manɛ wu nwang kaa nyaa kiiri.

¹²N dang nyaa n tɔɔ, nɔɔ yi tĩng ka ɓɔɔ nɔɔ kàsɛ́ zɔɔ katɔ, naa ɓɔɔ n kasɛ nɔɔ ɓɛɛ.

¹³Zang kasɛnang ɓɔɔ ɓa ɓɔɔ zang wu a yuu ɓiɓɛ, nɛɛ zang nyɔ wu vɔrɔ ka ruu rɛɛ ɓeesang kagn kpang.

¹⁴Nɔkɔ rɛɛ masang, nɔɔ nɛɛ palɛ vuu ɓɔɔ n kɔɔ nɔɔ katɔ ɓɛɛ.

¹⁵N ɓàa nɔɔ tɔ̀ɔ́ nɛɛ nɔɔ zang ɓɔɔ ri pàlɛ́ m shonang kpang, ka ruu ɓɔɔ, zang ɓɔɔ pàlɛ́ zang shonang zi vuu ɓɔɔ dabang gãa ɓiɓɛ palɛ kpang ɓɛɛ. N ɓáa nɔɔ nɛɛ, rɛɛ masang, ka ruu ɓɔɔ, n kɔ̀ɔ nɔɔ vuu ɓɔɔ n tãa ka nyaa Daa mɛɛ tɔ nandon ɓɛɛ.

¹⁶Wu nɔkɔ zɔ̃ng m kpang, ɓi nkɔ shɛ̃ɛrɛ nɔɔ, n a nɔɔ shonang, tɔɔ nɔɔ daa ra jaa. Zɔ̃ng jaa ɓɔɔ nɔɔ rárɛ́, ri nwang dòndòng. Tɔ̀ɔ, vuu ɓɔɔ nɔɔ gaa nandon ka naa Daa, nɛɛ nung mɛɛ, Daa wu a nɔɔ kati.

¹⁷Ka ruu ruu keɓe kɔ n dang nɔɔ nyaa nɛɛ nɔɔ yi tĩng ka ɓɔɔ, nɔɔ kasɛ ruu zɔɔ katɔ ɓɛɛ.

¹⁸“Zang ɓɔɔ ri zi Laa kpang ri bɛ̃ɛ nɔɔ katɔ. Ri nɛɛ bɛ̃ɛ nɔɔ tɔ, danggn wu ning nɔɔ kpang, ri bɛ̃ɛ ɓi nkɔ shɔɔnang.

¹⁹Naa nɔɔ nɛ̀ɛ́ zang ɓɔɔ ri zi Laa kpang, ri nɛɛ kàsɛ́ nɔɔ katɔ. N shɛ̃ɛrɛ nɔɔ nɛɛ koo keɓe kɔ, nɔɔ manɛ tɔ̀ɔ́ zang ɓarɛ kpang, ka ruu nɔngkɔ, ri kasɛ nɔɔ kpang.

²⁰Danggn wu ning nɔɔ vuu ɓɔɔ n kɔɔ nɔɔ ɓee kpang. N kɔɔ nɔɔ nɛɛ, ‘Zang shonang ɓɔɔ ɓa dabang gãa ɓiɓɛ katɔ ɓi kagn kpang.’ Zang ɓɔɔ ri dang m jĩng, ri naa dang nɔɔ jĩng doo katɔ kɔ. Ri nɛɛ ɓaa shoo ka vuu ɓɔɔ n tùsù ri, ri naa ɓaa shoo katɔ ka ɓɔɔ manɛ kɔ doori.

²¹Ri palɛ nɔɔ vuu keɓe piti, ka ruu ɓɔɔ, nɔɔ zang mɛɛ ɓɛɛ. A ri ti zi zang ɓɔɔ shong m kpang ɓɛɛ.

²²Naa n nɛ̀ɛ́ á tɔ, n nɛ̀ɛ́ ràng ri ruu tɔ kpang, zang nɛɛ tɔɔ kpang nɛɛ ri palɛ vuu shi kpang tɔ kpang. Kãntang keɓe, n a tɔ, n tusu ri vuu shi kpang tɔ ri ti yaa kpang, vuu ɓɔɔ ri kɔɔ ɓɛɛ takpang.

²³Zang ɓɔɔ nɛɛ bɛ̃ɛ m, bɛ̃ɛ Daa mɛɛ ɓi doo katɔ kɔ.

²⁴Naa n nɛɛ palɛ vuu ɓɔɔ, zang palɛ gngn kpang keɓe ka teteng ɓarɛ kpang, zang nɛɛ kɔɔ kpang nɛɛ ri palɛ vuu shi kpang tɔ kpang. Ri zi rɛɛ vuu ɓɔɔ zang zirɛ, zang mã naa ka danggn tɔ, a ri bɛ̃ɛ m doo nɛɛ mani, nɛɛ Daa mɛɛ piti.

²⁵Vuu keɓe, ɓèe ɓi nyaa vuu ɓɔɔ zang bee ka labeenang nyaa dannang ɓarɛ ɓɛɛ. Zang beeyi nɛɛ, ‘Ri bɛ̃ɛ m, n palɛ wu vuu ɓɔɔ kpang.’

²⁶“Danggn wu ning nɔɔ kpang, zang ɓɔɔ naa yi nɔɔ naa ka bii a ditɔ. N nɛɛ dàá tɔ bii Daa mɛɛ, n shong nɔɔ wu ditɔ. Zang keɓe wukɔ Suru ɓɔɔ a nɛɛ bii Laa ɓɛɛ, wukɔ tusu zang ruu ɓɔɔ niizang ka yuu Laa. Wukɔ naa kɔ̀ɔ́ zang ruu ka yuu mɛɛ.

²⁷Nɔɔ dòo zang ɓɔɔ ri kɔ̀ɔ́ zang ruu ka yuu mɛɛ kɔ, ka ruu ɓɔɔ, nɔɔ doo nɛɛ n, ka diki ɓɔɔ n gaayu shonang mɛɛ palɛnang ɓɛɛ.