Read mumuye Yɔhana 16 Bible Online

Yɔhana 16 - mumuye bible

Yɔhana 16

¹“N kɔɔ nɔɔ vuu keɓe nandon, ka ruu ɓɔɔ, zang nɛɛ dang nɔɔ jĩng, nɔɔ yaa danggn ɓɔɔ nɔɔ shing ka bii mɛɛ kpang ɓɛɛ.

²Zang naa nwangsɛ nɔɔ ditɔ kaa gãa zɔɔ kpalɛnang. Diki a kana, ɓɔɔ zang ɓɔɔ nɛɛ nyɔ nɔɔ vɔrɔ, kɔ̀ɔ́ ɓi nɛɛ wu palɛ vuu ɓɔɔ Laa kasɛ ɓɛɛ.

³Zang ri palɛ nɔɔ vuu keɓe, ka ruu ɓɔɔ, ri zi Daa kpang, ri ti zi m kpang kɔ doori ɓɛɛ.

⁴N kɔɔ nɔɔ vuu keɓe, ka ruu ɓɔɔ, laa ɓɔɔ ri palɛ vuu keɓe nɛɛ a tɔ, nɔ́ɔ kpaa danggn kati nɛɛ bɛ̀ɛ́ n kɔɔ nɔɔ tɔ ɓɛɛ. N kɔ̀ɔ nɔɔ ruu keɓe ka tĩng kpang, ka ruu ɓɔɔ, bɛ̀ɛ́ n doo nɛɛ nɔɔ ɓɛɛ.

⁵“Kãntang keɓe, n gbãayu kaa tɔ, ka bìí zang ɓɔɔ shong m ɓɛɛ. Zang ɓɔɔ ti hɛ̃ɛ m ka teteng manɛ gbete nɛɛ n daa ka niya kpang, ka ruu viya?

⁶Wee n kɔɔ nɔɔ kãntang ɓee, yeti manɛ lasɛ dɔɔli kaa tɔ kɔ jong.

⁷N kɔ̀ɔ́ nɔɔ ruu ɓɔɔ niizang kɔ nwani, daanang mɛɛ kɔ tɔ̃ɔ, ka ruu ɓɔɔ, naa n daa kpang, zang ɓɔɔ naa yi nɔɔ naa ka bii ɓɔɔ wukɔ Suru Laa, a nɔng manɛ kpang. N nɛɛ daa tɔ, n shong wu kati wu a kaa nɔng manɛ.

⁸Nɛɛ a tɔ, naa tusu zang koo rɛ̃rɛnang shi kpang ɓɔɔ ri rɛ̃rɛ ka yuu vuu shi kpang palɛnang, nɛɛ vuu tɔ̃ɔ ɓɔɔ Laa kasɛ ɓɛɛ, a ɓɔɔ ti naa ɓɔɔ Laa naa jɛ̃ɛ zang ruu ɓɛɛ, nɛɛ ri ning gbalang ɓarɛ katɔ.

⁹Naa dɔ̌ng ri ruu ka ruu vuu shi kpang palɛnang, ka ruu ɓɔɔ, ri shing danggn ka bii mɛɛ kpang ɓɛɛ.

¹⁰Wu ti dɔ̀ng ri ruu ka ruu vuu tɔ̃ɔ ɓɔɔ Laa kasɛ ɓɛɛ, ka ruu ɓɔɔ n gbãayu kaa bii Daa nɔɔ zi m takpang dòndòng ɓɛɛ.

¹¹A ɓɔɔ ka ruu naa ɓɔɔ Laa naa jɛ̃ɛ zang ruu ɓɛɛ, ka ruu ɓɔɔ, zang dɔng zang ɓɔɔ wukɔ kpanti koo keɓe ruu ɓi tɔ ɓɛɛ.

¹²“Vuu ɓɔɔ n nɛɛ kɔ̀ɔ́ nɔɔ doogn dɔɔli, nɔɔ zunung danggn mãnang gn naa ɓɔɔ nɔɔ ta ɓɛɛ kpang.

¹³Suru keɓe ɓɔɔ wukɔ tusu zang ruu ɓɔɔ niizang ka yuu Laa nɛɛ a tɔ, naa shing nɔɔ, nɔɔ zi vuu ɓɔɔ niizang ɓɛɛ. Rang yee nɛɛ yuu ɓiɓɛ kpang, kɔ̀ɔ́ vuu ɓɔɔ wu tãa nɛɛ nyaa Laa ɓɛɛ, wu ti kɔɔ nɔɔ vuu ɓɔɔ naa a ka knti ɓɛɛ.

¹⁴Shing zang, zang a m bannang, ka ruu ɓɔɔ, tuu vuu ɓɔɔ n kɔɔ ɓɛɛ, wu naa nwangsɛ nɔɔ dĩiri ɓiɓɛ ɓɛɛ.

¹⁵Vuu Daa mɛɛ piti ɓi ɓɔɔ mɛɛ, ka ruu nɔngkɔ, n kɔɔ nɛɛ Suru Laa naa tuu yee ɓɔɔ n a wu, wu kɔɔ nɔɔ.

¹⁶“Diki yaa kaa tɔkɔlɔng bɛ̀ɛ́ nɔɔ zi m takpang, diki nɛɛ ti bee tɔ tɔkɔlɔng, nɔɔ zi m tɔkn.”

¹⁷Ka teteng zang ɓɔɔ ri mantɛ vuu ka bii ɓiɓɛ, zang ɓɔɔ ri hɛ̃ɛlɛ zɔɔ nɛɛ, “Nɛɛ wu kɔɔ ruu ɓu nɛɛ viya? A kɔɔ kati nɛɛ, ‘Diki yaa kaa tɔkɔlɔng ɓɔɔ nɔɔ zi m takpang.’ A kɔɔ tɔkn nɛɛ, ‘Diki nɛɛ ti bee tɔ tɔkɔlɔng, nɔɔ zi m tɔkn.’ A ɓɔɔ nɛɛ, ‘Ka ruu ɓɔɔ n gbãayu ka bii Daa mɛɛ ɓɛɛ viya?’

¹⁸Ɓu vi, ‘Diki nɛɛ bee tɔ kɔ, wu kɔɔ ɓɛɛ viya?’ Ruu zi vuu ɓɔɔ wu kɔɔ ɓɛɛ ɓuru kpang.”

¹⁹Yeesɔ zi tɔ nɛɛ, ri kasɛ nɛɛ ri hɛ̃ɛ wu dĩiri ruu keɓe, a kɔɔ ri tɔɔ, “N kɔɔyi nɛɛ, ‘Diki nɛɛ bee tɔ tɔkɔlɔng nɔɔ zi m takpang a ɓɔɔ nɛɛ, diki nɛɛ bee tɔ tɔkɔlɔng tɔkn, nɔɔ zi m kaa tɔ.’ Nɔɔ hɛ̃ɛlɛ zɔɔ ɓu ka ruu ɓiɓɛ kɔ ka naa manɛ ya?

²⁰N kɔ̀ɔ́ nɔɔ ruu ɓɔɔ niizang kɔ nwani, nɔɔ naa kaayi, nɔɔ ɓaa nyaavaa, zang koo ri tãa ɓarɛ tĩnang. Yeti manɛ naa lasɛ, yeti lasɛnang manɛ naa raa tĩnang tãanang ditɔ.

²¹Zang soro ɓɔɔ jaa kɔng wu, yeti ɓiɓɛ lasɛ katɔ, ka ruu ɓɔɔ, làá jĩng dannang ɓiɓɛ a tɔ ɓɛɛ. Nɛɛ yi jaa tɔ, danggn jaa ɓɔɔ kɔ̀ng wu, ning wu kaa tɔ, ka ruu ɓɔɔ, tãa kaa tĩnang ka ruu jaa shɔnzang ɓɔɔ wu nwangsɛ ka koo ɓɛɛ.

²²Ɓɔɔ manɛ nwáng doo nɔngkɔ, kãntang keɓe, yeti manɛ lasɛ dòo katɔ. N a ditɔ ka bii manɛ tɔkn, nɔɔ naa tãa tĩnang ditɔ ka yeti manɛ dɔɔli. Zang ɓɔɔ zunung ɓɔɔ wu nwangsɛ tĩnang keɓe nɛɛ yeti manɛ kpang.

²³“Diki kaɓa nɛɛ naa a tɔ, nɔɔ gàa vuu ɓɔɔ tɔ̀ɔ́ ka naa mɛɛ kpang. N kɔ̀ɔ́ nɔɔ ruu ɓɔɔ niizang kɔ nwani. Daa naa a nɔɔ vuu ɓɔɔ nɔɔ gáa ka naa ɓiɓɛ nɛɛ nung mɛɛ katɔ.

²⁴Nɔɔ gàa vuu gngn nɛɛ nung mɛɛ kpang, nɔɔ gàa ta, tɔɔ Laa wu a nɔɔ, tɔ̀ɔ, tĩnang manɛ wu nwang kaa nyaa kiiri.”

²⁵“N kɔɔ nɔɔ ruu keɓe nɛɛ nyaa vuu jeenang. Diki a ka naa, ɓɔɔ n kɔ̀ɔ nɔɔ ruu tɔ̀ɔ́ nɛɛ nyaa vuu jeenang kpang ɓɛɛ. N kɔ̀ɔ́ nɔɔ ruu kaa yuu Daa mɛɛ faarik.

²⁶Diki kaɓa nɛɛ a tɔ, nɔɔ naa gàa wu nɛɛ nung mɛɛ, n kɔɔ nɛɛ n naa gàá nɔɔ wu kpang.

²⁷Ka ruu ɓɔɔ, Daa nɛɛ yuu ɓiɓɛ kasɛ nɔɔ katɔ ɓɛɛ. Kasɛ nɔɔ ka ruu ɓɔɔ nɔɔ kasɛ m katɔ, a nɔɔ ti shing danggn tɔ, nɛɛ n a nɛɛ bii Laa ɓɛɛ.

²⁸N à nɛɛ bii Daa, a n à ka koo keɓe. N naa yaa koo keɓe ditɔ tɔkn, n gbãayu ka bii Daa.”

²⁹A zang ɓɔɔ ri mantɛ vuu ka bii ɓiɓɛ, ri kɔɔ wu nɛɛ, “Mɔɔ rang yee kana faarik faarik kati. Mɔɔ ràng yee tɔ̀ɔ́ nɛɛ nyaa vuu jeenang kpang.

³⁰Ruu zi tɔ kati nɛɛ mɔɔ zi vuu ɓaa tɔ nandon. Mɔɔ ti zi vuu ɓɔɔ zang ri rɛ̃rɛ ka yeti ɓarɛ tɔ. Ka ruu nɔngkɔ, ruu shing danggn tɔ, nɛɛ mɔɔ a ɓaa nɛɛ bii Laa kɔ niizang.”

³¹Yeesɔ hɛ̃ɛ ri tɔɔ, “Nɔɔ shing danggn tɔ kati ya?

³²Diki a doo naa, diki bìí ti a tɔ, ɓɔɔ zang naa tantɛ nɔɔ nandon, zang ɓu daa gãa ɓiɓɛ ɓɛɛ. Nɔɔ naa yaa m ka bm gbete. N wu ka bm niizang kpang, ka ruu ɓɔɔ Daa kagn nɛɛ n ɓɛɛ.

³³N kɔɔ nɔɔ vuu keɓe, nɛɛ nɔɔ nwáng nɛɛ n, tɔɔ, nɔɔ nwáng kaa waasɛ̃. Nɔɔ dang jĩng katɔ ka koo keɓe. Nɔ́ɔ mã danggn kagn, n ɓá vuu ɓɔɔ ka koo keɓe yuu tɔ.”