Read mumuye Yɔhana 18 Bible Online

Yɔhana 18 - mumuye bible

Yɔhana 18

¹Yeesɔ hangsɛ Laa gaanang tɔ, a nwangnɛ nɛɛ zang ɓɔɔ ri mantɛ vuu ka bii ɓiɓɛ, ri daa ta ràng ɓɔɔ zang ɓaa nɛɛ Kidirɔng ɓɛɛ ka dang. Zang láng vɔ̀ɔ́ laa inabi kagn ka nɔngkɔ, Yeesɔ shɛ̃ɛ ka yeti ɓiɓɛ nɛɛ zang ɓɔɔ ri mantɛ vuu ka bii ɓiɓɛ ɓɛɛ.

²Yahuda ɓɔɔ naa nyɔ yuu Yeesɔ zi nɔng tɔ jong, ka ruu ɓɔɔ, Yeesɔ ri kpalɛ zɔɔ ka nɔngkɔ nɛɛ, zang ɓɔɔ ri mantɛ vuu ka bii ɓiɓɛ diki diki ɓɛɛ.

³Ka ruu nɔngkɔ, Yahuda sèe rɛɛ sɔɔja nɛɛ zang ɓɔɔ ri gã Gãa Laa, ɓɔɔ rɛɛ zang bang zang ɓɔɔ ri dɔɔ vuu ka Gãa Laa nɛɛ rɛɛ zang Farisi ri shong ri ɓɛɛ, a daa nɛɛ ri ka vɔ̀ɔ́ laa inabi. Zang keɓe ri tùurù vuu waa ka naa, nɛɛ waa zàáng sɔɔ a ɓɔɔ waa tooshi.

⁴Yeesɔ ti zi vuu ɓɔɔ zang naa palɛ wu ɓi tɔ, a yupaa naa shii ka tĩng ɓarɛ, a hɛ̃ɛ ri tɔɔ, “Nɔɔ kãa ɓu wiya?”

⁵Ri kasɛ wu nyaa tɔɔ, “Ruu kãa Yeesɔ yɔɔ Nazara.” A kɔɔ ri tɔɔ, “Nkɔ ɓee.” Yahuda ɓɔɔ nyɔ yuu Yeesɔ shii nɛɛ ri ka nɔngkɔ.

⁶Ɓɔɔ Yeesɔ kɔɔ ri nɛɛ “Nkɔ ɓee,” ri wɔ nɛɛ knti, a ri watɛ ka tipi.

⁷Yeesɔ hɛ̃ɛ ri tɔkn nɛɛ, “Nɔɔ kãa wiya?” Ri kɔɔyi nɛɛ, “Ruu kãa Yeesɔ, yɔɔ Nazara.”

⁸Yeesɔ kasɛ ri nyaa tɔɔ, “N kɔɔ nɔɔ tɔ nɛɛ, nkɔ ɓee. Nɔɔ nɛɛ kãa nkɔ, nɔɔ yaa rɛɛ zang ɓɔɔ mantɛ vuu ka bii mɛɛ keɓe ɓarɛ ka nɔngkɔ ri daayi.”

⁹Vuu keɓe nwang naa ɓɔɔ wu kɔɔ ka tĩng ɓɛɛ, kɔɔyi nɛɛ, “N ning zang ɓɔɔ mɔɔ a m ri ka naa gbete kpang ɓɛɛ.”

¹⁰Bɛ̀ɛ́ yere bang kagn naa Siman Bituru. A Bituru zɔ̃ngnɛ ku jaafoo kpanti zang ɓɔɔ ri dɔɔ vuu ka Gãa Laa. Dɔng wu shoo nakn kak. (Zang ɓaa jaafoo bìí nɛɛ Malaku.)

¹¹Yeesɔ kɔɔ Bituru nɛɛ, “Hãa yere bang ɓaaɓɛ ta ka kpãa ka nɔng, mɔɔ kɔ̀ɔ ɓu nɛɛ n tà jĩng dannang ɓɔɔ Daa mɛɛ nɛɛ n dàng ɓɛɛ kpang ya?”

¹²A rɛɛ sɔɔja zang Rooma nɛɛ zang bang ɓarɛ, a ɓɔɔ rɛɛ zang ɓɔɔ ri gã Gãa Laa ɓɛɛ, ri yi Yeesɔ. Ri mã wu.

¹³A ri atɛ wu ka bii Anas kɔ shɔɔnang. Anas, ɓi Kayifa ɓeekpang. Kayifa kɔ kpanti zang ɓɔɔ ri dɔɔ vuu kaa Gãa Laa ka saa kaɓa.

¹⁴Kayifa kɔ kɔɔ rɛɛ zang bang bang zang Yahudi nɛɛ, zang gbete kɔ wu vɔ jong ka nung ɓɔɔ zang dɔɔli nɛɛ vɔ ɓɛɛ.

¹⁵Siman Bituru nɛɛ yɔɔ ɓɔɔ mantɛ vuu doo ka bìí Yeesɔ kɔ ɓɛɛ, ri dũng Yeesɔ. Kpanti zang ɓɔɔ ri dɔɔ vuu ka Gãa Laa zi yɔɔ kaɓa nung tɔ gbãng gbãng. Ka ruu nɔngkɔ, zang yaa wu daa kaa nɛɛ Yeesɔ ka dàbang gãa kpanti zang ɓɔɔ ri dɔɔ vuu ka Gãa Laa ɓɛɛ.

¹⁶A Bituru shii ɓi kaa nyaa gãa biling. Yɔɔ kaɓa nwang tɔkn ka biling, naa rang yee nɛɛ jaa zang soro ɓɔɔ gã nyaa gãa nɛɛ wu yaa Bituru wu a yeti gãa. A zang yaa Bituru kati, a kaa dàbang gãa.

¹⁷A jaa zang soro ɓɔɔ gã nyaa gãa, hɛ̃ɛ Bituru tɔɔ, “Mɔɔ wu dòo zang ɓɔɔ ri mantɛ vuu ka bii yɔɔ kaɓa kɔ kpang ya?” Bituru kasɛ wu nyaa tɔɔ, “Kpang, n m zang ɓiɓɛ kpang.”

¹⁸Sɔ̀ɔrɔ́ si katɔ, a rɛɛ zang ɓɔɔ ri palɛ zang shonang nɛɛ zang ɓɔɔ ri gã gãa, ri dɔɔ waa. Ri shiiri kaa nyaa waa nɛɛ waa wu nwãa ri bii. Bituru dàa kaa jong, dàa shii nɛɛ ri, nɛɛ waa wu nwãa wu bii jong.

¹⁹Kpanti zang ɓɔɔ ri dɔɔ vuu ka Gãa Laa hɛ̃ɛlɛ Yeesɔ ruu ka yuu zang ɓɔɔ ri mantɛ vuu ka bii ɓiɓɛ ɓɛɛ, nɛɛ ruu vuu ɓɔɔ wu tusu zang ɓɛɛ.

²⁰Yeesɔ kasɛ wu nyaa tɔɔ, “N waa m katɔ n tùsù zang koo vuu kpang. Vuu ɓɔɔ n tusu piti, n tusu m ka gãa zɔɔ kpalɛnang, a ɓɔɔ ka yeti Gãa Laa. Nɔng ɓɔɔ zang Yahudi nandon ri kpalɛ kagn ɓɛɛ. N kɔ̀ɔ vuu ɓɔɔ m gngn nɛɛ nwĩiri kpang.

²¹A mɔɔ hɛ̃ɛlɛ m ka ruu viya? Hɛ̃ɛlɛ rɛɛ zang ɓɔɔ ri tãa vuu ɓɔɔ n tusu ɓɛɛ. Hɛ̃ɛ ri vuu ɓɔɔ n kɔɔ ri. Ri zi vuu ɓɔɔ n kɔɔ tɔ.”

²²Ɓɔɔ Yeesɔ kasɛ nyaa naa weɓe, zang gbete ka teteng zang ɓɔɔ ri gã Gãa Laa, ɓɔɔ ri shii ka nɔng, nyɔ Yeesɔ nɛɛ naa ka kashoo. A kɔɔ wu nɛɛ “Mɔɔ ráng kpanti zang ɓɔɔ ri dɔɔ vuu ka Gãa Laa ruu nɔngkɔ ka ruu viya?”

²³Yeesɔ kɔɔ wu tɔɔ, “N nɛɛ kɔɔ vuu ɓɔɔ kagn shi kpang, kɔ̀ɔ́ zang kɔ ka nihn piti ɓee vuu bìí ta. Vuu ɓɔɔ n kɔɔyi nɛɛ niizang kɔ nwani, mɔɔ nyɔ m ɓu kaa ruu viya?”

²⁴A Anas dɔ̃ wu kaa dòo naa ɓɔɔ zang mã wu ɓɛɛ, ka bii Kayifa ɓɔɔ wukɔ kpanti zang ɓɔɔ ri dɔɔ vuu ka Gãa Laa ɓɛɛ.

²⁵Bituru shii dòo ka nɔng ɓaasi nɛɛ waa wu nwãa wu bii. A zang ɓɔɔ ri shiiri nɛɛ wu, ri hɛ̃ɛ wu nɛɛ, “Mɔɔ dòo zang ɓɔɔ ri mantɛ vuu ka bii yɔɔ kaɓa kɔ kpang ya?” Bituru laa nyaa kɔɔyi tɔɔ, “Kpang, n m zang ɓiɓɛ kpang.”

²⁶Zang gbete ka teteng zang ɓɔɔ ri pàlɛ́ kpanti zang ɓɔɔ ri dɔɔ vuu ka Gãa Laa shonang, ti shing zang nɛɛ jaafoo ɓɔɔ Bituru dɔng wu shoo nɛɛ yere bang kɔ ɓɛɛ, rang yee. Hɛ̃ɛ Bituru nɛɛ, “N zi bɛ̀ɛ́ mɔkɔ nɛɛ yɔɔ kaɓa, ka vɔ̀ɔ́ laa inabi kpang ya?”

²⁷A Bituru laa nyaa tɔkn nɛɛ, “Kpang.” A kn tantɛ nyaa kaa ɓaanang.

²⁸Nɛɛ gãndi zang zang, zang nwangsɛ Yeesɔ nɛɛ gãa Kayifa, zang daa nɛɛ wu ka gãa gɔmna. Zang Yahudi ri daa yeti gãa kpang, ka ruu ɓɔɔ, ri kasɛ nɛɛ ri palɛ vuu ɓɔɔ nyaa dannang ɓarɛ zãa ri palɛnang katɔ kpang, tɔɔ ri naa shaa vuu shaanang nyaalaa ɓɔɔ zang kpaa danggn diki ɓɔɔ Laa tɛɛ kagn kati.

²⁹Ka ruu nɔngkɔ, Bilatu nwang kaa biling, daa ĩi ri, a hɛ̃ɛyi tɔɔ, “Nɔɔ nɛɛ, vuu shi kpang ɓɔɔ yɔɔ keɓe palɛ ɓu viya?”

³⁰Ri kasɛ wu nyaa tɔɔ, “Naa nɛɛ palɛ vuu shi kpang ɓɔɔ kagn kpang, ruu nɛɛ atɛ wu ka bii ɓaaɓɛ kpang.”

³¹Bilatu kɔɔ ri tɔɔ, “Nɛɛ nɔngkɔ, nɔɔ dita nɛɛ wu nɔɔ daa jɛ̃ɛ wu ruu naa ɓɔɔ nyaa dannang manɛ kɔɔ ɓɛɛ.” Ri kasɛ wu nyaa tɔɔ, “Kpanti Rooma a ruu naa nɛɛ ruu nyɔ zang vɔrɔ kpang.”

³²Vuu keɓe nwang ka naa ɓɔɔ Yeesɔ kɔɔ ɓɛɛ. Bɛ̀ɛ́ kɔɔ ri zɔ̃ng vɔrɔ ɓɔɔ wu naa vɔ ɓɛɛ tɔ.

³³Bilatu gbãayu daa ka yeti gãa, daa shong zang nɛɛ zang atɛ wu, a hɛ̃ɛ wu nɛɛ, “Mɔkɔ Kpanti zang Yahudi ya?”

³⁴Yeesɔ hɛ̃ɛ wu nɛɛ, “Ruu keɓe mɔkɔ hɛ̃ɛ nɛɛ yuu ɓaaɓɛ ya, kɔ zang ɓɔɔ kɔɔ mɔɔ ruu kagn yuu mɛɛ?”

³⁵Bilatu kasɛ wu nyaa tɔɔ, “Ɓɔɔ mɔɔ zirɛ, n zang Yahudi ya? Ɓi zang ɓaaɓɛ, nɛɛ rɛɛ zang bang bang zang ɓɔɔ ri dɔɔ vuu ka Gãa Laa, ri atɛ mɔɔ ka bii mɛɛ. Mɔɔ palɛ viya?”

³⁶Yeesɔ kɔɔyi tɔɔ, “Kpanti roonang mɛɛ nwáng ɓi nɛɛ koo keɓe kpang. Naa kpanti roonang mɛɛ nɛɛ ɓɔɔ koo keɓe, zang mɛɛ ri nɛɛ gáa nyaa kana. Zang nɛɛ á zang bang bang Yahudi n kpang. Kpanti roonang mɛɛ nwáng ɓi nɛɛ koo keɓe kpang.”

³⁷A Bilatu hɛ̃ɛ wu kati tɔɔ, “Mɔɔ ɓu Kpanti ya?” Yeesɔ kasɛ wu nyaa tɔɔ, “Naa ɓɔɔ mɔɔ kɔɔ ɓɛɛ, n Kpanti kɔ. N a ka koo keɓe, a zang yi m nɛɛ n kɔɔ zang ruu ɓɔɔ niizang. Zang ɓɔɔ nɛɛ kasɛ ruu ɓɔɔ niizang katɔ, ɓaa shoo katɔ ka yee mɛɛ.”

³⁸A Bilatu hɛ̃ɛ wu tɔɔ, “A zang ɓaa vi nɛɛ ruu ɓɔɔ niizang viya?” A Bilatu nwang ka biling tɔkn daa kɔɔ zang Yahudi tɔɔ, “N ĩi vuu shi kpang ɓɔɔ n dɔ̌ng yɔɔ keɓe ruu kagn ɓɛɛ kpang.

³⁹Vuu ɓɔɔ n pálɛ̀ nɔɔ kagn diki diki ka nyaalaa pasika. N yaarɛ nɔɔ zang gbete naa ka teteng zang ɓɔɔ zang mã ri ka sãa ɓɛɛ. Nɔɔ kasɛ tɔ, n yaa nɔɔ kpanti zang Yahudi naa ya?”

⁴⁰Ri mɛ́ɛ nyaa nabm ka lapa nandon nɛɛ, “Wu yɔɔ keɓe kpang. Ruu kasɛ mɔɔ yaa ruu ɓuru Baraba naa.” Baraba keɓe, ɓi ka teteng zang ɓɔɔ ri hàá nyaa ka gari a zang nyɔ zang vɔrɔ ɓɛɛ.