Read mumuye Yɔhana 20 Bible Online

Yɔhana 20 - mumuye bible

Yɔhana 20

¹Nɔng gãntɛ tɔ gbete ka knti Diki Ɔ̃sɔnang, Marayamu Magadaliya daa ka yuu sàa bɛ̀ɛ́ nɔng yakɛ gn kpang. Zirɛ zang jĩiri tari ɓɔɔ zang ku nyaa sàa nɛɛ mani ɓɛɛ tɔ.

²Ka ruu nɔngkɔ, yurɛ daa ka bii Siman Bituru nɛɛ yɔɔ ɓɔɔ mantɛ vuu ka bii Yeesɔ ɓɔɔ gbete ɓɔɔ bɛ̀ɛ́ Yeesɔ kasɛ wu dɔɔli ɓɛɛ. A kɔɔ ri tɔɔ, “Zang tuu vɔrɔ Kpanti Yeesɔ tɔ nɛɛ yeti sàa, ruu zi nɔng ɓɔɔ zang shing wu kagn ɓɛɛ kpang.”

³Ka ruu nɔngkɔ, Bituru nɛɛ yɔɔ ɓɔɔ mantɛ vuu ka bii Yeesɔ kaɓa, ri yupaa nɛɛ ri dàá ka yuu saa.

⁴Ri yuu katɔ nandon, a yɔɔ ɓɔɔ mantɛ vuu ka bii Yeesɔ kaɓa, yurɛ yaa Bituru doo, a wukɔ daa shɛ̃ɛ yuu sàa shɔɔnang.

⁵Ɓaa yuu ka dii, a lengse jĩng ka yeti sàa, zi fɔ̃ɔrɔ nyaa pɛɛrɛ ɓɔɔ zang leng Yeesɔ kagn ɓɛɛ. Dàa yeti sàa kaa takpang.

⁶Siman Bituru a ka knti, a daa ɓi dɔ̃ɔ gbete ka yeti sàa. Zi fɔ̃ɔrɔ ɓɔɔ zang leng Yeesɔ nɛɛ mani ka nɔngkɔ.

⁷A ɓɔɔ fɔ̃ɔrɔ ɓɔɔ bɛ̀ɛ́ zang kãng yuu Yeesɔ nɛɛ mani ɓɛɛ, ka nɔng gbete nɛɛ fɔ̃ɔrɔ ɓɔɔ zang leng Yeesɔ nɛɛ mani kpang. Zang leng ɓi ka bm dang gbete.

⁸A yɔɔ ɓɔɔ mantɛ vuu ka bii Yeesɔ ɓɔɔ wukɔ shɛ̃ɛ yuu sàa shɔɔnang kaɓa, daa yeti sàa kaa jong. Zi kaa jong nɔngkɔ, a shing danggn kati nɛɛ Yeesɔ seepaa tɔ nɛɛ sàa.

⁹(Bɛ̀ɛ́ ri zi dĩiri vuu ɓɔɔ zang bee ka yeti labeenang Laa nɛɛ Yeesɔ naa yupaa ditɔ nɛɛ sàa ɓɛɛ gn kpang.)

¹⁰A zang ɓɔɔ ri mantɛ vuu ka bii ɓiɓɛ keɓe, ri gbãayu, ri daa gãa.

¹¹Marayamu gbãayu ka yuu sàa tɔkn, shii ka nyaa sàa biling a kaayi. Kaayi, a ɓaa yuu ka dii, a lengse jĩng ka yeti sàa.

¹²A zi zang nyaa shonang Laa ɓɔɔ ka lapa ziti, ri hãlɛ fɔ̃ɔrɔ puru. Ri nwalɛ ka nɔng ɓɔɔ zang wɔɔ vɔrɔ Yeesɔ kagn ɓɛɛ. Gbete nwang ka yupaa, a gbete nwang ka doo dii.

¹³Ri hɛ̃ɛlɛ Marayamu nɛɛ, “Jaa soro, mɔɔ kaa viya?” Marayamu kasɛ ri nyaa tɔɔ, “Zang tuu Kpanti mɛɛ tɔ, n zi nɔng ɓɔɔ zang shing wu kagn kpang.”

¹⁴Kɔ̀ɔ́ tɔ naa weɓe, a raa jĩng zi Yeesɔ shii tɔ. Zi kaa takpang nɛɛ Yeesɔ kɔ kpang.

¹⁵Yeesɔ hɛ̃ɛ wu tɔɔ, “Jaa soro, mɔɔ kaa viya? Mɔɔ kãa wiya?” Marayamu kɔ̀ɔ́ ɓi naa zang gbãng kɔ, a kɔɔ wu nɛɛ “Maalang, mɔkɔ nɛɛ tuu wu, tusu m nɔng ɓɔɔ mɔɔ shing wu kagn, n daa tuu wu.”

¹⁶Yeesɔ ɓaa wu nyaa nɛɛ “Marayamu.” A raa jĩng ka bìí ɓiɓɛ, a kɔɔ nɛɛ nyaa Yahudi nɛɛ, “Rabii” (Dĩiri ruu keɓe ɓi “maalang”).

¹⁷Yeesɔ kɔɔ wu tɔɔ, “Mɔ́ɔ yi m naa gn bii kpang, ka ruu ɓɔɔ, n gbãayu gn lapa ka bii Daa mɛɛ kpang ɓɛɛ. Dàa ka bii rɛɛ manzung, mɔɔ daa kɔɔ ri nɛɛ, N gbãayu kana ka bii Daa mɛɛ ɓɔɔ dòo Daa manɛ kɔ ɓɛɛ, Laa mɛɛ, ɓɔɔ ti dòo Laa manɛ kɔ ɓɛɛ.”

¹⁸A Marayamu Magadaliya daayi, daa kɔɔ rɛɛ zang ɓɔɔ ri mantɛ vuu ka bii Yeesɔ ɓɛɛ, nɛɛ wu zi Kpanti Yeesɔ tɔ, a kɔɔ ri vuu ɓɔɔ Yeesɔ kɔɔ wu ɓɛɛ kati.

¹⁹Nɛɛ laarang ka diki kaɓa, ka diki ɓɔɔ nɔng gãntɛ tɔ gbete, ka knti Diki Ɔ̃sɔnang ɓɛɛ. Zang ɓɔɔ ri mantɛ vuu ka bii Yeesɔ ri kpalɛ zɔɔ ka yeti gãa, ri kulu nyaa gãa katɔ, ka ruu ɓɔɔ, ri kaa vɔrɔ zang Yahudi ɓɛɛ. Yeesɔ a doo nɛɛ mani, naa shii ka teteng ɓarɛ, a kɔɔ ri tɔɔ, “Yeti manɛ wu lasɛ kpang.”

²⁰Kɔɔ vuu keɓe tɔ, a tusu ri naa ɓiɓɛ nɛɛ kagn. Ɓɔɔ zang ɓɔɔ ri mantɛ vuu ka bii ɓiɓɛ, ri zi Kpanti Yeesɔ naa weɓe, ri tãa tĩnang dɔɔli.

²¹Yeesɔ kɔɔ ri tɔkn tɔɔ, “Yeti manɛ wu lasɛ kpang. Naa ɓɔɔ Daa shong m ka koo, n shong nɔɔ doo nɔngkɔ ka koo.”

²²Kɔ̀ɔ́ tɔ naa weɓe, a sha ɔ̃kɔnang ɓiɓɛ nɛɛ nyaa ka bii ɓarɛ, a kɔɔyi tɔɔ, “Nɔɔ ta Suru tɔ̃ɔ Laa ta.

²³Naa nɔɔ yàa zang gbalang vuu shi kpang ɓarɛ, Laa yàa ri tɔ kɔ doori. Naa nɔɔ yaa ri gbalang vuu shi kpang ɓarɛ kpang, Laa yaa ri doo kpang kɔ doori.”

²⁴Ka diki ɓɔɔ Yeesɔ nwang nyaa ka bii ɓarɛ ɓɛɛ, Tooma, ɓɔɔ zang ɓaa wu nɛɛ jaa bãnang, ɓɔɔ ka teteng zang kopi tu ziti ɓɔɔ ri mantɛ vuu ka bii Yeesɔ, ɓi ka nɔng kpang.

²⁵A rɛɛ zang ɓɔɔ ri mantɛ vuu ka bii Yeesɔ nimbang, ri kɔɔ wu nɛɛ, “Ruu zi Kpanti Yeesɔ tɔ.” Kɔɔ ri ɓi nɛɛ, “Naa n zi too koosa ka naa ɓiɓɛ, a n hãa saa naa mɛɛ kagn, a n ti hãa naa mɛɛ ka kagn buru ɓiɓɛ kpang, n shing danggn m kpang.”

²⁶Diki ɓa tɔ mantaati zang ɓɔɔ ri mantɛ vuu ka bii Yeesɔ ri kaa nyaa zɔɔ, ka yeti gãa. Tooma nɛɛ ri. Ri kulu nyaa gãa katɔ, a Yeesɔ a doo nɛɛ mani, naa shii ka teteng ɓarɛ, a kɔɔ ri tɔɔ, “Yeti manɛ wu lasɛ kpang.”

²⁷A kɔɔ Tooma tɔɔ, “Hãa saa naa ɓaaɓɛ ka nihn, mɔɔ ti pɛ̃ɛrɛ naa mɛɛ. Mɔɔ dĩi naa ɓaaɓɛ, mɔɔ hãa ka kagn buru mɛɛ. Mɔ́ɔ nwàng wu zang ɓɔɔ yaa gn naa kpang, nwang ɓaa zang ɓɔɔ shing danggn ɓɛɛ.”

²⁸Tooma kasɛ wu nyaa tɔɔ, “Mɔkɔ Kpanti mɛɛ nɛɛ Laa mɛɛ.”

²⁹Yeesɔ kɔɔ wu tɔɔ, “Mɔɔ shing danggn kaa ruu ɓɔɔ mɔɔ zi m tɔ ɓɛɛ ya? Tĩnang tãanang ɓi ɓɔɔ zang ɓɔɔ ri zi m kpang, ri shing danggn doo nɛɛ mani ɓɛɛ.”

³⁰Yeesɔ palɛ vuu ɓɔɔ zang zirɛ zang mã naa ka danggn dɔɔli ka jĩng zang ɓɔɔ ri mantɛ vuu ka bii ɓiɓɛ ɓɛɛ. Zang bee rùu rɛɛ vuu ɓɔɔ Yeesɔ palɛ ka yeti labeenang keɓe nandon kpang.

³¹Zang bee weɓe, nɛɛ tɔ̀ɔ, nɔɔ shing danggn kati, nɛɛ Yeesɔ kɔ Kirisi, Jaa Laa. Nɔɔ nɛɛ shing danggn tɔ ka bii ɓiɓɛ, nɔ́ɔ walɛ suru bii kati.