Read mumuye Yɔhana 4 Bible Online

Yɔhana 4 - mumuye bible

Yɔhana 4

¹Yeesɔ zirɛ nɛɛ zang Farisi ri tãa nyaa tɔ, nɛɛ wu walɛ zang ɓɔɔ ri mantɛ vuu ka bii ɓiɓɛ tɔ dɔɔli, nɛɛ wu ti pàlɛ́ zang batizima kana dɔɔli ɓa ɓɔɔ Yɔhana palɛ ɓɛɛ katɔ.

²(Wu wukɔ ti pàlɛ́ zang batizima nɛɛ yuu ɓiɓɛ kpang, ɓi zang ɓɔɔ ri mantɛ vuu ka bii ɓiɓɛ ri palɛ.)

³Tãa tɔ nɔngkɔ, a Yeesɔ yaa tipi Yahudi gbãayu tɔkn daa Galili.

⁴Gbalang ɓɔɔ wu tɛɛ nɛɛ mani sɔ̀ɔ nɛɛ tipi Samariya kɔ gbete.

⁵A naa a kaa gari Sayika ka tipi Samariya. Gari bìí naabm nɛɛ tipi, jaa lannang, ɓɔɔ Yakubu a jaa ɓiɓɛ Yusufu ɓɛɛ.

⁶Toomii ɓɔɔ Yakubu ɓeeyi kagn nɔngkɔ. Yeesɔ lee tɔ, ka ruu doo ɓɔɔ wu ra ɓɛɛ, a naa nwang ka nyaa toomii bìí, bɛ̀ɛ́ laa kaa dalɛ yuu.

⁷A jaa soro tipi Samariya arɛ nɛɛ wu naa wɔ mii. Yeesɔ gaa wu nɛɛ, “A m mii jong n ɓooyi.”

⁸(Bɛɛ zang ɓɔɔ ri mantɛ vuu ka bii ɓiɓɛ, ri daa ɓarɛ tɔ ka gari nɛɛ ri daa hoo vuu shaanang.)

⁹Jaa soro Samariya kasɛ wu nyaa tɔɔ, “Mɔɔ ɓaa zang Yahudi, n m zang Samariya. Mɔɔ gaa mii ka naa mɛɛ ka ruu viya?” (Zang Yahudi nɛɛ zang Samariya ri pálɛ́ vuu jong nɔng gbete nɛɛ zɔɔ kpang.)

¹⁰Yeesɔ kasɛ wu nyaa tɔɔ, “Naa mɔɔ nɛ̀ɛ́ zi vuu ɓɔɔ Laa a zang tɔ. A mɔɔ nɛɛ ti zi zang ɓɔɔ gaa mii ka naa ɓaaɓɛ tɔ. Mɔɔ nɛ̀ɛ́ gàa wu tɔ, wu nɛ̀ɛ́ á mɔɔ mii ɓɔɔ a zang Suru bii ɓɔɔ waa nyaa kpang tɔ.”

¹¹Jaa soro kasɛ wu nyaa tɔɔ, “Maalang, vuu ɓɔɔ mɔɔ wɔ mii nɛɛ mani kpang, toomii ti bee katɔ. A mɔɔ walɛ mii ɓɔɔ a zang suru bii ka niya?

¹²Toomii keɓe ɓi dabang ɓuru Yakubu a ruu. Ti ɓóo mii kagn, nɛɛ wujɛ ɓiɓɛ, nɛɛ vuu vaa ɓiɓɛ piti, a naa vɔrɛ. Mɔɔ ɓá dabang ɓuru Yakubu ɓaa ɓu kaa tɔ ya?”

¹³Yeesɔ kasɛ wu nyaa tɔɔ, “Zang piti ɓɔɔ ɓoo mii toomii keɓe sutu mãa wu ditɔ tɔkn.

¹⁴Zang piti ɓɔɔ ɓoo mii ɓɔɔ n a wu, sutu mãa wu takpang, ka ruu ɓɔɔ, mii ɓɔɔ n a wu, nwàng kaa naa sɔlɔng mii ka yeti ɓiɓɛ ɓɛɛ. Sɔlɔng mii ɓɔɔ nwangsɛ mii ɓɔɔ á wu suru bii ɓɔɔ waa nyaa kpang ɓɛɛ.”

¹⁵A jaa soro kɔɔ wu tɔɔ, “Maalang, a m mii keɓe karɛ, tɔ̀ɔ, sutu wu mãa m takpang, ń ti alɛ nihn takpang, nɛɛ n wɔ mii kpang.”

¹⁶Yeesɔ kɔɔ wu tɔɔ, “Daayi mɔɔ daa ɓaa ɓaavɛ nyaa, nɔɔ arɛ.”

¹⁷Jaa soro kasɛ wu nyaa tɔɔ, “Varɛ mɛɛ kagn kpang.” Yeesɔ kɔɔ wu tɔɔ, “Nyaa ɓɔɔ mɔɔ kasɛ nɛɛ varɛ ɓaaɓɛ kagn kpang, niizang kɔ nwani.

¹⁸Ka ruu ɓɔɔ, mɔɔ gee varɛ daa maani ɓɛɛ. Yɔɔ ɓɔɔ mɔɔ nwàng nɛɛ wu kãntang keɓe, wu varɛ ɓaaɓɛ kpang. Ruu ɓɔɔ mɔɔ kɔ̀ɔ m kãntang keɓe, ɓi niizang kɔ nwani.”

¹⁹Jaa soro kɔɔyi nɛɛ, “Maalang, n zirɛ mɔɔ ɓaa zang nyaa shonang Laa.

²⁰Rɛɛ dabang ɓuru ɓɔɔ ri ka tĩng ɓɛɛ, ri báng Laa ka yuu kɔpɔ keɓe. Ɓɔɔ nɔɔ zang Yahudi nɔɔ ti kɔ̀ɔ́ manɛ nɛɛ nɔng Laa bannang ɓi ka Urushalima.”

²¹Yeesɔ kɔɔ wu tɔɔ “Jaa soro, n kɔɔ mɔɔ ruu ɓɔɔ niizang, diki a kana, ɓɔɔ nɔɔ bang Daa ka nihn kpang, nɔɔ, ti bang wu ka Urushalima kpang ɓɛɛ.

²²Ɓɔɔ nɔɔ zang Samariya, nɔɔ zi zang ɓɔɔ nɔɔ bang wu manɛ kpang. Ɓɔɔ ruu zang Yahudi ruu zi Laa ɓɔɔ ruu bang wu ɓuru tɔ, ka ruu ɓɔɔ, zang yuu tanang nwáng ɓi nɛɛ teteng zang Yahudi kɔ ɓɛɛ.

²³Diki a dòo naa, kãntang keɓe diki bìí a tɔ, zang ɓɔɔ ri bang Laa nɛɛ yeti gbete ri naa bang Laa kaa waasɛ̃, nɛɛ naa ɓɔɔ Suru Laa a ri ɓɛɛ. Daa kasɛ zang ɓɔɔ naa weɓe kɔ, nɛɛ ri bang wu.

²⁴Laa ɓi Suru, ka ruu nɔngkɔ, zang ɓɔɔ ri bang wu, ri báng wu nɛɛ naa ɓɔɔ Suru ɓiɓɛ a ri ɓɛɛ. Ri ti báng wu nɛɛ yeti gbete.”

²⁵Jaa soro kɔɔ wu nɛɛ, “N zi tɔ, Masiya ɓɔɔ zang ɓaa wu nɛɛ Kirisi a ditɔ. Nɛɛ a tɔ, naa kɔɔ ruu vuu ditɔ nandon.”

²⁶A Yeesɔ kɔɔ wu kati nɛɛ, “Wee n rang yee nɛɛ mɔɔ ɓee, nkɔ Kirisi bìí.”

²⁷Lɔɔ nyaa gn kpang, a zang ɓɔɔ ri mantɛ vuu ka bii ɓiɓɛ ri gbãayu. Ɓɔɔ ri zi wu rang yee nɛɛ jaa soro bìí, ri mã naa ka danggn, a zang ɓɔɔ hɛ̃ɛ jaa soro kaa takpang nɛɛ, “Mɔɔ kasɛ viya?” Kɔ, wu ti hɛ̃ɛ Yeesɔ nɛɛ, “Mɔɔ rang yee nɛɛ jaa soro keɓe ka ruu viya,” kpang.

²⁸A jaa soro yaa bɛng mii ɓiɓɛ, gbãayu daa ka yeti gari, daa kɔɔ zang nɛɛ,

²⁹“Nɔɔ arɛ nɔɔ zi yɔɔ ɓɔɔ kɔɔ m vuu ɓɔɔ n pálɛ́ ka tĩng ɓɛɛ nandon. Naa ɓu bɛ̀ɛ́ Kirisi kɔ ya?”

³⁰A zang ri nwang nɛɛ yeti gari, ri a ka bii Yeesɔ.

³¹Ka knti jaa soro, zang ɓɔɔ ri mantɛ vuu ka bii ɓiɓɛ ri yì wu tĩng ka bii nɛɛ, “Shaa vuu shaanang ta, maalang.”

³²Kasɛ ri nyaa tɔɔ, “Vuu ɓɔɔ n shaa ɓɛɛ kagn, ɓɔɔ nɔɔ zi kpang ɓɛɛ.”

³³A zang ɓɔɔ ri mantɛ vuu ka bii ɓiɓɛ, ri hɛ̃ɛlɛ zɔɔ nɛɛ, “Zang ɓɔ̀ɔ́gn atɛ wu vuu shaanang tɔ ya?”

³⁴Yeesɔ kɔɔ ri tɔɔ, “Vuu shaanang mɛɛ ɓi palɛnang vuu ɓɔɔ zang ɓɔɔ shong m kasɛ ɓɛɛ, ń ti hangsɛ shonang ɓɔɔ wu a m ɓɛɛ.

³⁵Nyaa vuu jeenang ɓɔɔ nɔɔ kɔ̀ɔrɔ́ kagn nɛɛ, ‘Shala yaa doo dɛ̃ɛti tɔɔ zang yee zee.’ N kɔɔ nɔɔ, nɔɔ túu jĩng karɛ nɔɔ zi jaa. Zee zũng jĩng tɔ, daa naa yeenang tɔ.

³⁶Zang jaa lannang wàlɛ́ ɓi kaa vuu ɓɔɔ Laa shing wu katɔ ɓɛɛ. Kpalɛ zang ɓiɓɛ kana, tɔɔ ri walɛ suru bii ɓɔɔ waa nyaa kpang ɓɛɛ. Tɔɔ, zang ɓɔɔ ɓaa jĩng vuu, nɛɛ zang ɓɔɔ naa yeeyi ri tãa tĩnang kaa nyaa zɔɔ.

³⁷Ka ruu nɔngkɔ, nyaa vuu jeenang ɓɔɔ zang kɔɔ nɛɛ, ‘Zang ɓɔɔ ɓáa jĩng vuu, a zang ɓɔɔ wu naa yee ɓi kaa tɔ,’ niizang kɔ nwani.

³⁸N shong nɔɔ nɛɛ nɔɔ daa yee vuu ka jaa ɓɔɔ wu nɔkɔ lang kpang ɓɛɛ. Zang ɓɔɔgn ri langnɛ, nɔɔ wàlɛ́ vuu shaanang manɛ kaa nɔng ɓɔɔ ri pálɛ̀ shonang ɓɛɛ.”

³⁹Zang Samariya dɔɔli ka gari kaɓa, ri shing danggn ka bìí Yeesɔ ka ruu vuu ɓɔɔ jaa soro kɔɔyi tɔɔ, “Kɔɔ m vuu ɓɔɔ n pálɛ́ ka tĩng nandon” ɓɛɛ.

⁴⁰Ɓɔɔ zang tipi Samariya ri naa a ka bìí Yeesɔ, ri gàa wu nɛɛ wu nwáng nɛɛ ri. A nwáng kaa nɛɛ ri diki ziti.

⁴¹Zang dɔɔli tɔkn ri shing danggn ka bii ɓiɓɛ, ka ruu vuu ɓɔɔ wu kɔɔrɔ ri ɓɛɛ.

⁴²A ri kɔɔ jaa soro tɔɔ, “Rùu shing danggn wu ka ruu vuu ɓɔɔ mɔɔ kɔɔ ruu kpang. Ruu tãa ruu ɓiɓɛ tɔ nɛɛ shoo ɓuru, a ruu ti zi tɔ niizang, nɛɛ yɔɔ keɓe kɔ naa ta yuu zang koo.”

⁴³Diki ziti ɓa tɔ, Yeesɔ yupaa nɛɛ wu daa kaa tipi Galili.

⁴⁴(Bɛɛ ti kɔɔ tɔ nɛɛ, “Zang a zang nyaa shonang Laa bannang ɓi jong ka tipi ɓiɓɛ kpang.”)

⁴⁵Ɓɔɔ naa shɛ̃ɛ tipi Galili, zang Galili ri ta wu waasɛ̃, ka ruu ɓɔɔ, ri daa nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ ka Urushalima, a ri zi vuu ɓɔɔ wu pálɛ́ ka diki nyaalaa nandon ɓɛɛ.

⁴⁶Yeesɔ daa tɔkn ka Kaana ɓɔɔ ka tipi Galili ɓɛɛ, nɔng ɓɔɔ wu risi mii, mii raa mii inabi ɓɛɛ. Zang ɓɔɔ pàlɛ́ kpanti shonang kagn ka Kafanahu, ɓɔɔ jaa ɓiɓɛ vuu palɛ katɔ ɓɛɛ.

⁴⁷Ɓɔɔ yɔɔ kaɓa tãa nyaa nɛɛ Yeesɔ yaa tipi Yahudi tɔ, a tɔ ka tipi Galili, yupaa daa ka bii ɓiɓɛ, daa bakɛ wu nɛɛ wu daa màsɛ̀ wu jaa ɓiɓɛ ɓɔɔ vɔ tɔ yaa kaa tɔkɔlɔng ɓɛɛ jong.

⁴⁸Yeesɔ kɔɔ wu tɔɔ, “Nɔɔ nɛɛ zi vuu ɓɔɔ zang zirɛ zang mã naa ka danggn, zang ti ãa nyaa ka nɔng ɓɔɔ zang zi ɓɛɛ gn kpang, nɔɔ shing danggn kpang.”

⁴⁹Yɔɔ ɓɔɔ pàlɛ́ kpanti shonang kɔɔyi nɛɛ, “Maalang, arɛ ruu daayi, jaa mɛɛ nɛ̀ɛ́ vɔrɛ.”

⁵⁰Yeesɔ kɔɔ wu nɛɛ, “Dita, jaa ɓaaɓɛ nwáng ningkãari, vɔ kpang.” Yɔɔ shing danggn ka vuu ɓɔɔ Yeesɔ kɔɔ ɓɛɛ, a yi gbalang daa ɓiri.

⁵¹Dàá gãa kana, a zang ɓɔɔ ri pàlɛ́ wu shonang, ri kpisi wu yuu ka gbalang, ri kɔɔ wu tɔɔ, “Bii jaa ɓaaɓɛ valɛ tɔ.”

⁵²A hɛ̃ɛ ri laa ɓɔɔ bii jaa valɛ kagn ɓɛɛ. Ri kɔɔ wu nɛɛ bii ɓɔɔ zaa jaa nɛɛ yaa wu nɔng ka ɓɔɔrɔ, bɛ̀ɛ́ laa nɛɛ kpɛ̃ɛ doo tɔkɔlɔng waati.

⁵³Daa jaa kpaa danggn kati nɛɛ Yeesɔ nɛɛ kɔɔ ka laa kaɓa kɔ nɛɛ, “Dita, jaa ɓaaɓɛ nwáng ningkãari, vɔ kpang.” Ka ruu nɔngkɔ, yɔɔ nɛɛ zang gãa ɓiɓɛ nandon ri shing danggn kati.

⁵⁴Ɓu dòo ɓɔɔ Yeesɔ gbãayu nɛɛ, tipi Yahudi a ka tipi Galili, pálɛ́ vuu ɓɔɔ zang zirɛ zang mã naa ka danggn daa kaa nɛɛ weɓe ziti.