Read mumuye Yɔhana 5 Bible Online

Yɔhana 5 - mumuye bible

Yɔhana 5

¹Diki naa bee tɔ tɔkɔlɔng, ka knti vuu keɓe, Yeesɔ daa Urushalima, ka diki kaɓa, zang Yahudi ri shaa vuu shaanang nyaalaa ɓarɛ.

²Ka Urushalima, ka nyaa gãa ɓɔɔ zang ɓaa nɛɛ nyaa gãa mɛ̀ɛrɛ́, too mii kagn nɔngkɔ naabm, zang ɓaa nɛɛ Bɛsɛda, nɛɛ nyaa Yahudi. Zang waa putali maani ka nyaa too mii bìí.

³Zang kɔnang dɔɔli ri rooro ka nɔngkɔ, rɛɛ zang jĩng ringtang, nɛɛ zang ɓɔɔ kàa katɔ, nɛɛ zang ɓɔɔ bii vɔ katɔ ɓɛɛ. [Ri gã mii ɓɔɔ zang nyàá ɓɛɛ.

⁴Ka ruu ɓɔɔ, lee ɓɔɔ zang nyaa shonang Laa ɓɔɔ ka lapa daa ka too mii, nyàá mii ɓɛɛ. Nɛɛ nyàa mii tɔ, zang kɔnang ɓɔɔ nɛɛ shɛ̃ɛ yeti mii shɔɔnang, naa doo kɔnang viya yi wu, yaa wu nɔng katɔ.]

⁵Yɔɔ ɓɔɔ kagn ka nyaa mii ka nɔngkɔ ɓɔɔ kàa katɔ, daa saa bmati tu kopi tu mantaati ɓɛɛ.

⁶Yeesɔ zi wu roo ka nɔngkɔ, a ti zi tɔ, nɛɛ yɔɔ bìí roo tɔ nɔngkɔ diki ɓiɓɛ bee katɔ. Yeesɔ hɛ̃ɛ wu tɔɔ, “Mɔɔ kasɛ tɔ kɔnang ɓaaɓɛ wu yaa mɔɔ nɔng ya?”

⁷Yɔɔ ɓɔɔ kàa katɔ kasɛ wu nyaa tɔɔ, “Maalang, zang ɓɔɔ tuu m, wu hãa m ka mii, zang nyaa shonang Laa ɓɔɔ ka lapa nɛɛ nyàa mii tɔ ɓɛɛ kpang. N nɛɛ tɔɔ n daa yeti mii, zang ɓɔɔ wu ti ɓa m, wu daa yeti mii shɔɔnang.”

⁸Yeesɔ kɔɔ wu tɔɔ, “Yupaa ta, mɔɔ tuu siri ɓɔɔ mɔɔ roo kagn ɓɛɛ, mɔɔ rarɛ.”

⁹Kɔnang yaa yɔɔ nɔng tantɛnang, a tuu siri, a gaayu rannang kati. Yeesɔ pálɛ́ vuu keɓe ka Diki Ɔ̃sɔnang.

¹⁰Ka ruu nɔngkɔ, zang bang bang zang Yahudi ri kɔɔ yɔɔ ɓɔɔ zang masɛ wu ɓɛɛ nɛɛ, “Lɛ̀ɛ́kɔ Diki Ɔ̃sɔnang, mɔɔ ta nyaa dannang ɓuru tɔ, ka ruu ɓɔɔ, mɔɔ tuu siri ɓaaɓɛ lɛɛkɔ ɓɛɛ.”

¹¹Yɔɔ kasɛ ri nyaa tɔɔ, “Yɔɔ ɓɔɔ masɛ m kɔ, kɔɔ m nɛɛ, Tuu siri ɓaaɓɛ ta mɔɔ rarɛ.”

¹²A ri hɛ̃ɛ wu nɛɛ, “Ɓu wi zang ɓɔɔ kɔɔ mɔɔ nɛɛ mɔɔ tuu siri ɓaaɓɛ mɔɔ rarɛ wiya?”

¹³A ɓeekpang yɔɔ ɓɔɔ zang masɛ wu zi zang ɓɔɔ masɛ wu nung kpang, ka ruu ɓɔɔ Yeesɔ tantɛ daanang ka teteng zang dɔɔli ɓɔɔ ri kpálɛ̀ zɔɔ ka nɔng ɓɛɛ.

¹⁴Nɛɛ knti, Yeesɔ ĩi wu ka yeti Gãa Laa, a kɔɔ wu tɔɔ, “Zirɛ, kɔnang ɓaaɓɛ yàa mɔɔ nɔng tɔ, mɔɔ palɛ vuu shi kpang takpang. Ka ruu ɓɔɔ, vuu ɓɔɔ ɓa weɓe katɔ nɛɛ palɛ mɔɔ ɓɛɛ.”

¹⁵A yɔɔ yaa nɔng, daayi daa kɔɔ zang bang bang zang Yahudi nɛɛ ɓi Yeesɔ masɛ wu.

¹⁶Ka ruu ɓɔɔ, Yeesɔ palɛ vuu keɓe ka Diki Ɔ̃sɔnang, rɛɛ zang bang bang zang Yahudi ri gaayu gbalang kãanang ɓɔɔ ri kpãa wu ɓɛɛ.

¹⁷Yeesɔ kɔɔ ri tɔɔ, “Daa mɛɛ palɛ shonang ɓi doo naa, n ti palɛ shonang jong.”

¹⁸Ka ruu rúu kɔ wu kɔɔ ɓɛɛ, zang Yahudi ri kãa gbalang kaa gbãng gbãng nɛɛ ri nyɔ wu vɔrɔ. Wu ka ruu ɓɔɔ, wu ta nyaa ɓɔɔ zang dang ka yuu Diki Ɔ̃sɔnang kɔ shɛ̃ɛning kpang. Ka ruu ɓɔɔ, ti ɓaa Laa nɛɛ Daa ɓiɓɛ ɓɛɛ. Gãsɛ yuu ɓiɓɛ kaa teetee nɛɛ Laa.

¹⁹Yeesɔ kasɛ ri nyaa tɔɔ, “N kɔɔ nɔɔ ruu ɓɔɔ niizang kɔ nwani, Jaa zunung ɓɔɔ wu pálɛ̀ vuu ɓɔɔ nɛɛ yuu ɓiɓɛ kpang, pálɛ̀ ɓi vuu ɓɔɔ zi Daa ɓiɓɛ pálɛ̀ ɓɛɛ. Ka ruu ɓɔɔ, vuu ɓɔɔ Daa pálɛ̀ piti Jaa pálɛ̀ doo nɔngkɔ ɓɛɛ.

²⁰Daa kasɛ ruu Jaa katɔ, a tí tusu Jaa vuu ɓɔɔ wukɔ Daa wu palɛ katɔ. Ti naa tusu Jaa vuu bang bang ɓɔɔ ɓa weɓe ditɔ, tɔ̀ɔ, nɔɔ zirɛ, nɔɔ mã naa kaa danggn.

²¹Naa ɓɔɔ Daa wisi zang paa nɛɛ sàa, wu a ri suru bii, Jaa ti a zang ɓɔɔ wu kasɛ, suru bii doo nɔngkɔ.

²²Daa nɛɛ yuu ɓiɓɛ jɛ̃ɛ zang ruu ɓi kpang, yaa ruu jɛ̃ɛnang piti ɓi kaa naa Jaa nandon.

²³Tɔ̀ɔ, zang ri á Jaa bannang kati, naa ɓɔɔ ri á Daa ɓɛɛ. Zang ɓɔɔ nɛɛ á Jaa bannang kpang, á Daa ɓɔɔ shong wu bannang doo kpang kɔ.

²⁴“N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ nɛɛ tãa ruu ɓɔɔ n kɔɔ ɓɛɛ, nɛɛ ti shing danggn ka bii zang ɓɔɔ shong m, wàlɛ́ suru bii ɓɔɔ waa nyaa kpang katɔ. Laa ti naa dɔng wu ruu ɓi takpang. Ɓa yuu vɔrɔ ɓɔɔ suru tɔ, wɔ ɓi tɔ.

²⁵N kɔ̀ɔ́ nɔɔ ruu ɓɔɔ niizang kɔ nwani, diki a kana, diki bìí ti a tɔ, diki ɓɔɔ zang ɓɔɔ ri vɔlɔ tɔ ri tãa yee Jaa Laa ɓɛɛ. Zang ɓɔɔ ri tãayi, a ri ti dũngnɛ, ri nwáng ningkãari tɔkn.

²⁶Naa ɓɔɔ Daa kɔ a zang suru bii ɓɛɛ, á Jaa naa doo nɔngkɔ, nɛɛ, wu nwáng zang ɓɔɔ a zang suru bii ɓɛɛ.

²⁷Ti á Jaa naa tɔ nɛɛ wu jɛ̃ɛ zang ruu ka ruu ɓɔɔ wukɔ Jaa Shɔnzang ɓɛɛ.

²⁸“Nɔ́ɔ mã naa ka danggn ka ruu vuu keɓe kpang, ka ruu ɓɔɔ, diki a kana, diki ɓɔɔ zang ɓɔɔ ri vɔlɔ tɔ nandon ri tãa yee mɛɛ nɛɛ yeti saa ɓarɛ ɓɛɛ.

²⁹Ri nwangkɛ, zang ɓɔɔ ri nɛɛ palɛ vuu tɔ̃ɔ, zang wisi ri paa ri walɛ suru bii. Zang ɓɔɔ ri nɛɛ palɛ vuu shi kpang, zang wisi ri paa, tɔ̀ɔ zang jɛ̃ɛ ri ruu ɓɛɛ.

³⁰“N palɛ vuu ɓɔɔ jong nɛɛ yuu mɛɛ kpang. N jɛ̃ɛ zang ruu m naa ɓɔɔ Laa kɔɔ m ɓɛɛ. N ti shɛ̃ɛrɛ zang m ka ɓɔɔ n jɛ̃ɛ zang ruu kpang, ka ruu ɓɔɔ n pálɛ̀ m vuu ɓɔɔ n kasɛ kpang ɓɛɛ. N palɛ m vuu ɓɔɔ zang ɓɔɔ shong m kasɛ ɓɛɛ.

³¹“Naa n kɔ̀ɔ́ ruu ka yuu mɛɛ, zang ta ruu mɛɛ nɛɛ ɓi niizang kɔ nwani kpang.

³²Zang ɓɔɔ kɔ̀ɔ́ zang ruu ka yuu mɛɛ kagn. N zi tɔ, ruu ɓɔɔ wu kɔɔ ɓɛɛ ɓi niizang.

³³Nɔɔ shong zang ka bii Yɔhana, Yɔhana kɔɔ ruu ɓɔɔ niizang ɓɛɛ.

³⁴N shing gn wu ka yuu vuu ɓɔɔ zang kɔɔ ka yuu mɛɛ kpang. N kɔɔ vuu keɓe, tɔ̀ɔ, nɔɔ ta yuu manɛ kati.

³⁵“Yɔhana nwáng naa waa zàáng sɔɔ ɓɔɔ shaayi, a yakɛ nɔng ɓɛɛ. Nɔɔ tãa tĩnang nwannang ka nɔng ɓɔɔ wu yakɛ ɓɛɛ, diki bee kaa tɔ̀ɔ́ dɔɔli kpang.

³⁶Vuu ɓɔɔ n palɛ, tusu zang vuu ka yuu mɛɛ, ɓa vuu ɓɔɔ Yɔhana kɔɔ ka yuu mɛɛ katɔ. Shonang ɓɔɔ Daa mɛɛ a m nɛɛ n palɛ kɔ, n palɛ ɓee. Wukɔ tusu zang, tɔɔ zang zi kagn nɛɛ Daa kɔ shong m.

³⁷A Daa ɓɔɔ shong m ti kɔɔ ruu jong ka yuu mɛɛ. Nɔɔ tãa yee Daa gngn kpang, nɔɔ ti zi waa nyaating ɓiɓɛ gngn kpang.

³⁸Ruu ɓiɓɛ ti kagn yeti manɛ kpang, ka ruu ɓɔɔ, nɔɔ shing danggn ka zang ɓɔɔ wu shong ɓɛɛ kpang ɓɛɛ.

³⁹Nɔɔ ĩi jĩng ka ɓɔɔ nɔɔ gã labeenang waasɛ̃, ka ruu ɓɔɔ, nɔɔ kɔɔ nɛɛ nɔɔ wàlɛ́ suru bii ɓɔɔ waa nyaa kpang katɔ kagn ɓɛɛ. Labeenang Laa keɓe, kɔɔ ruu ka yuu mɛɛ kɔ.

⁴⁰A nɔɔ ti kasɛ anang ka bii mɛɛ, n a nɔɔ suru bii kpang.

⁴¹“N shing gn m ka dɔɔnang ɓɔɔ shɔnzang dɔ̀ɔ́ m ɓɛɛ kpang.

⁴²N zi zɔ̃ng manɛ m tɔ. Nɔɔ kasɛ Laa nɛɛ yeti manɛ kpang.

⁴³N a m nɛɛ nung Daa mɛɛ, a nɔɔ ta m kpang. Naa zang ɓɔɔ à anang yuu ɓiɓɛ nɔɔ ta wu katɔ.

⁴⁴Nɔɔ kasɛ nɛɛ nɔɔ dɔ̀ɔ́ zɔɔ ka naa manɛ. Nɔɔ kasɛ kpang nɛɛ Laa ɓɔɔ wukɔ Laa gbete gãagãa, wu dɔɔ nɔɔ kpang. A nɔɔ palɛ biya nɔɔ shing danggn ka bii mɛɛ viya?

⁴⁵“Nɔ́ɔ tɔɔ kpang nɛɛ, naa nkɔ kɔ̀ɔrɔ́ Daa ruu vuu shi kpang manɛ. Kpang, zang ɓɔɔ kɔ̀ɔrɔ́ Daa ruu vuu shi kpang manɛ ɓi kagn. Musa ɓɔɔ nɔɔ shing danggn ka bii ɓiɓɛ gbãng gbãng ɓɛɛ, wukɔ kɔ̀ɔ́rɔ Daa.

⁴⁶Naa nɔɔ nɛɛ shing danggn katɔ ka bii Musa niizang, nɔɔ nɛɛ shíng danggn tɔ ka bii mɛɛ, ka ruu ɓɔɔ, Musa bèe vuu ka yuu mɛɛ kɔ ɓɛɛ.

⁴⁷Wee nɔɔ shing danggn ka vuu ɓɔɔ wu bee kpang ɓee, nɔɔ shing danggn biya ka ruu ɓɔɔ, n kɔ̀ɔ́ ɓee viya?”