Read mumuye Yɔhana 6 Bible Online

Yɔhana 6 - mumuye bible

Yɔhana 6

¹Diki naa bee tɔ tɔkɔlɔng, Yeesɔ ta waapo Galili, ɓɔɔ zang ti ɓaa dòo nɛɛ waapo Tiberiya kɔ ɓɛɛ, ka dang.

²Zang dɔɔli ri dũng wu, ka ruu ɓɔɔ, ri zi vuu ɓɔɔ zang zirɛ zang mã naa ka danggn ɓɔɔ wu palɛ, ka ɓɔɔ wu masɛ zang ɓɔɔ vuu palɛ ri katɔ ɓɛɛ.

³Yeesɔ vang kɔpɔ daa nwáng nɛɛ zang ɓɔɔ ri mantɛ vuu ka bii ɓiɓɛ ka nɔngkɔ.

⁴Bɛ̀ɛ́ nyaalaa Pasika ɓɔɔ zang Yahudi ri kpaa danggn diki ɓɔɔ Laa tɛɛ kagn ɓɛɛ a naabm tɔ.

⁵Yeesɔ tuu jĩng ka lapa, a zi zang dɔɔli ri a ka bii ɓiɓɛ, a hɛ̃ɛ Filibu tɔɔ, “Rùu hoo borodi ka niya, ruu a zang keɓe ri shaayi wiya?”

⁶Hɛ̃ɛ ruu keɓe nɛɛ wu gãsɛ Filibu ɓi katɔ waati, ka ruu ɓɔɔ, zi vuu ɓɔɔ wu naa pàlɛ̀ ɓi tɔ ɓɛɛ.

⁷Filibu kasɛ wu nyaa tɔɔ, “Naa ruu hoo borodi doo nung dinari laa kopi, daa naa ɓɔɔ zang sha zang ɓu tɔkɔlɔng kpang.”

⁸Zang ɓɔɔ mantɛ vuu ka bii ɓiɓɛ ɓɔɔ zang ɓaa wu nɛɛ Anduru jaa naa Siman Bituru, kɔɔ wu nɛɛ,

⁹“Jaa kagn nihn, nɛɛ borodi ka naa maani, nɛɛ jaazĩi seseere ziti. Vuu keɓe pàlɛ́ zang kɔ gaagaa ɓee ɓu viya?”

¹⁰Yeesɔ kɔɔ ri tɔɔ, “Nɔɔ kɔɔ zang nɛɛ ri nwalɛ ka tipi.” (Wisi kagn nɔng bìí dɔɔli.) A zang ri nwalɛ kaa tipi. Zang varɛ ɓɔɔ ri ka nɔng, daa labang maani katɔ.

¹¹A Yeesɔ see borodi ka naa a zãa Laa kati, a basɛ zang ɓɔɔ ri nwalɛ ka tipi ɓɛɛ. Pálɛ́ doo nɔngkɔ nɛɛ jaazĩi. Zang ɓu walɛ naa ɓɔɔ daa wu nyaa ɓɛɛ.

¹²Zang ri shaa tɔ, ri puu tɔ, a kɔɔ zang ɓɔɔ ri mantɛ vuu ka bìí ɓiɓɛ nɛɛ, “Nɔɔ kpalɛ ɓɔɔ ri yàarɛ̀ ta, nɔɔ yaa ɓɔɔ wu lasɛ kpang.”

¹³A ri kpalɛ kaa nandon vuu ɓɔɔ ri yàarɛ̀ ka borodi maani ɓɔɔ ri shaa ɓɛɛ, zang kpalɛ, yi nyaa saang kopi tu ziti.

¹⁴Ɓɔɔ zang ri zi vuu ɓɔɔ zang zirɛ zang mã naa ka danggn ɓɔɔ Yeesɔ palɛ, ri kɔɔrɔ nɛɛ, “Niizang, wee zang nyaa shonang Laa ɓɔɔ naa a ka koo ɓɛɛ kɔ.”

¹⁵Ɓu doo ɓɔɔ Yeesɔ zirɛ nɛɛ zang a kaa tɔ, ri yi wu kpanti nɛɛ gbãng gbãng ning, yaa nɔng daa ka yuu kɔpɔ tɔkn ka bm.

¹⁶Laa hãa nyaa tɔ, a zang ɓɔɔ ri mantɛ vuu ka bii ɓiɓɛ ri shooro ri daa nyaa waapo dii.

¹⁷Ri vang tonsi, ri daa kana nɛɛ ri ta kaa waapo, ri dàa Kafanahu. Nɔng tɔ̀ɔ́ tɔ, Yeesɔ à bii ɓarɛ gn kpang.

¹⁸Bɛɛ mii rãa kana, ka ruu ɓɔɔ jasung bang ra ɓɛɛ.

¹⁹Ri yaa nyaa rang tɔ, ri daa tɔ, mɛli taati kɔ dɛ̃ɛti, a ri zi Yeesɔ ra ka yuu paa mii, a kana bii tonsi naabm. Ri káa vɔrɔ.

²⁰A kɔɔ ri tɔɔ, “Nɔɔ kaa vɔrɔ kpang, ɓi nkɔ”

²¹Ri kasɛ kati nɛɛ wu vang ta yeti tonsi. Vang tɔ ka yeti tonsi, a tonsi tantɛ nyaa rang dang ɓɔɔ ri daa ɓɛɛ shɛ̃ɛnang kati.

²²Nɔng naa gãntɛ, a zang dɔɔli ɓɔɔ Yeesɔ yaa ri ka nyaa rang dang ri zirɛ nɛɛ bɛ̀ɛ́ tonsi nɛɛ gbete kɔ nwani. Nɛɛ zang ɓɔɔ ri mantɛ vuu ka bii Yeesɔ ri nɛɛ vang tonsi nɛɛ wu kpang, ri nɛɛ daa ɓarɛ ka bm.

²³A tonsi ɓɔɔ ri alɛ nɛɛ Tiberiya ri naa shiiri ka nyaa rang, naabm nɛɛ nɔng ɓɔɔ zang dɔɔli ri shaa borodi ɓɔɔ Yeesɔ zãa Laa a ri ɓɛɛ.

²⁴Ɓɔɔ zang ri zi naa weɓe, Yeesɔ nɛɛ zang ɓɔɔ ri mantɛ vuu ka bii ɓiɓɛ, ri tɔ̀ɔ́ nɔng kpang. A zang bìí ri vang rɛɛ tonsi ɓɔɔ ka nɔng ɓɛɛ, ri daa ka Kafanahu nɛɛ ri daa kãa Yeesɔ.

²⁵Ri ta waapo tɔ, a ri daa ĩi Yeesɔ ka nyaa waapo dang. Ri hɛ̃ɛ wu nɛɛ “Maalang, mɔɔ a nihn gn viya?”

²⁶Yeesɔ kɔɔ ri tɔɔ, “N kɔ̀ɔ́ nɔɔ ruu ɓɔɔ niizang kɔ nwani, nɔɔ kãa m ka ruu ɓɔɔ nɔɔ zi vuu ɓɔɔ zang zirɛ zang mã naa ka danggn ɓɔɔ n pálɛ̀ ɓɛɛ kpang. Nɔɔ kãa m manɛ ka ruu borodi ɓɔɔ nɔɔ nɛɛ shaa ka buru gaagaa ɓɛɛ.

²⁷Nɔ́ɔ dang jĩng nɛɛ nɔɔ kãa vuu shaanang ɓɔɔ lasɛ katɔ ɓɛɛ kpang. Nɔɔ dang jĩng ka nɔng vuu shaanang ɓɔɔ lasɛ kpang dòndòng, ɓɔɔ n Jaa Shɔnzang n naa a nɔɔ ɓɛɛ. Ka ruu ɓɔɔ, wukɔ zang ɓɔɔ Laa tusu nɛɛ wu a wu naa tɔ ɓɛɛ.”

²⁸Ri hɛ̃ɛ wu nɛɛ, “Ruu palɛ vi tɔ̀ɔ ruu palɛ vuu ɓɔɔ Laa kasɛ nɛɛ ruu palɛ viya?”

²⁹Yeesɔ kasɛ ri nyaa tɔɔ, “Nɔɔ shing danggn ka zang ɓɔɔ wu shong ɓɛɛ. Wee vuu ɓɔɔ Laa kasɛ nɛɛ nɔɔ pálɛ̀ ɓɛɛ kɔ.”

³⁰A ri hɛ̃ɛ wu tɔkn tɔɔ, “A mɔɔ pálɛ́ ɓu vi ɓɔɔ ruu zirɛ ruu mã naa ka danggn, tɔ̀ɔ, ruu shing danggn kaa bii ɓaaɓɛ viya?

³¹Rɛɛ dabang ɓuru ri shaa vuu ɓɔɔ zang ɓaa nɛɛ Maanaa ka ɓɔɔ bɛ̀ɛ́ ri ka waala ɓɛɛ. Zang bee ka yeti Labeenang Laa nɛɛ, ‘A ri borodi nɛɛ lapa, ri shaayi.’ ”

³²Yeesɔ kɔɔ ri tɔɔ, “N kɔ̀ɔ́ nɔɔ ruu ɓɔɔ niizang kɔ nwani, wu Musa a nɔɔ borodi ɓɔɔ a nɛɛ lapa ɓɛɛ kpang. Ɓi Daa mɛɛ álɛ́ nɔɔ borodi ɓɔɔ niizang ɓɛɛ nɛɛ lapa.

³³Ka ruu ɓɔɔ, borodi Laa, ɓi zang ɓɔɔ à nɛɛ lapa á zang koo keɓe suru bii ɓɛɛ.”

³⁴Ri gàa wu nɛɛ, “Maalang, alɛ ruu kaa borodi keɓe kɔ diki diki.”

³⁵Yeesɔ kɔɔ ri kati tɔɔ, “Nkɔ borodi ɓɔɔ a zang suru bii ɓɛɛ. Zang ɓɔɔ nɛɛ a ka bìí mɛɛ, nyɔkɔ nyɔ wu takpang. Zang ɓɔɔ nɛɛ ti shing danggn ka bìí mɛɛ, sutu mãa wu takpang.

³⁶Naa ɓaasi n kɔ nɔɔ ɓɛɛ nɔɔ zi m tɔ nɔɔ ti shing danggn gn ka bii mɛɛ kpang.

³⁷Zang ɓɔɔ Laa a m, a kaa bii mɛɛ nandon. Zang ɓɔɔ nɛɛ a ka bii mɛɛ, n hing wu kpang.

³⁸Ka ruu ɓɔɔ, n a nɛɛ lapa, nɛɛ n naa palɛ vuu ɓɔɔ zang ɓɔɔ shong m kasɛ ɓɛɛ kɔ, wu vuu ɓɔɔ yeti mɛɛ kasɛ ɓɛɛ kpang.

³⁹Zang ɓɔɔ shong m, kasɛ nɛɛ n ning zang gbete ka teteng zang kɔ wu a m ri ɓɛɛ kpang. Nɛɛ n naa wisi ri paa katɔ kɔ jong, ka diki ɓɔɔ koo waa nyaa ɓɛɛ.

⁴⁰Ka ruu ɓɔɔ, Daa mɛɛ kasɛ nɛɛ zang ɓɔɔ nɛɛ shing jĩng ka bii mɛɛ ɓɔɔ n Jaa, nɛɛ ti shing danggn ka bìí mɛɛ, wu walɛ suru bii ɓɔɔ waa nyaa kpang ɓɛɛ. N ti naa wisi wu paa, n a wu suru bii ka diki ɓɔɔ koo waa nyaa ɓɛɛ.”

⁴¹A zang Yahudi ri gaayu yee gɔ̃ɔrɔnang ka yuu ɓiɓɛ. Ka ruu ɓɔɔ, kɔɔyi tɔɔ, “Nkɔ borodi ɓɔɔ à nɛɛ lapa ɓɛɛ.”

⁴²A ri kɔɔrɔ nɛɛ, “Wee ɓi Yeesɔ jaa Yusufu kpang ya? Ruu zi rɛɛ diiɓɛ nɛɛ niiɓɛ tɔ kpang ya? A palɛ kaa biya kɔɔ lɛɛkɔ nɛɛ, wu a nɛɛ lapa viya?”

⁴³Yeesɔ kɔɔ ri tɔɔ, “Nɔɔ yáa yee kɔ nɔɔ gɔ̃ɔrɔ ɓi ta.”

⁴⁴A kɔɔ ri tɔɔ, “Naa Daa mɛɛ ɓɔɔ shong m dɔ̃ zang, zang a ka bii mɛɛ kpang, zang ɓɔɔ zunung anang ka bii mɛɛ nɛɛ yuu ɓiɓɛ kpang. N ti naa wisi wu paa ka diki ɓɔɔ koo waa nyaa ɓɛɛ.

⁴⁵Rɛɛ zang nyaa shonang Laa ri beeyi nɛɛ, ‘Ri nandon Laa kɔ naa tusu ri vuu.’ Zang ɓɔɔ nɛɛ ɓaa shoo ka vuu ɓɔɔ Daa mɛɛ tusu, nɛɛ ti mantɛ vuu ka bii ɓiɓɛ, a katɔ ka bii mɛɛ.

⁴⁶N kɔ̀ɔ́ ɓu nɛɛ zang ɓɔɔ zi Daa tɔ kagn kpang. Ɓi zang ɓɔɔ a nɛɛ bii Laa kɔ zi Daa ɓi shɛ̃ɛning.

⁴⁷N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ nɛɛ shing danggn ka bii mɛɛ, suru bii ɓɔɔ waa nyaa kpang kagn bii ɓiɓɛ.

⁴⁸Nkɔ borodi ɓɔɔ a zang suru bii ɓɛɛ.

⁴⁹Rɛɛ dabang manɛ, ri shaa vuu shaanang ɓɔɔ zang ɓaa nɛɛ maanaa ka ɓɔɔ ri dòo ka waala, ri vɔlɔ doo nɛɛ mani.

⁵⁰Borodi ɓɔɔ a nɛɛ lapa keɓe, naa zang ɓɔɔ shaayi, vɔ takpang.

⁵¹Nkɔ borodi ɓɔɔ a zang suru bii, ɓɔɔ n a nɛɛ lapa ɓɛɛ. Naa zang ɓɔɔ shaa borodi keɓe, nwáng ningkãari dòndòng. Ɓi bii mɛɛ kɔ borodi keɓe, ɓɔɔ n naa mãlɛ́, tɔ̀ɔ, zang koo ri walɛ suru bii ɓɛɛ.”

⁵²Zang Yahudi bìí ri làa zɔɔ nyaa ka naa ɓarɛ gbãng gbãng ri hɛ̃ɛyi nɛɛ, “Yɔɔ keɓe a ruu yɔpɔ bii ɓiɓɛ biya, ruu shaayi viya?”

⁵³Yeesɔ kɔɔ ri tɔɔ, “N kɔ̀ɔ́ nɔɔ ruu ɓɔɔ niizang kɔ nwani, naa nɔɔ shaa yɔpɔ bii mɛɛ, ɓɔɔ n Jaa Shɔnzang kpang, a nɔɔ ti ɓoo zĩi mɛɛ kpang, suru bii ɓi kagn bìí manɛ kpang.

⁵⁴Zang ɓɔɔ nɛɛ sháà yɔpɔ bii mɛɛ, nɛɛ ti ɓoo zĩi mɛɛ, walɛ suru bii ɓɔɔ waa nyaa kpang katɔ. N ti naa wisi wu paa ka diki ɓɔɔ koo waa nyaa ɓɛɛ.

⁵⁵Ka ruu ɓɔɔ, yɔpɔ bii mɛɛ, ɓi vuu shaanang ɓɔɔ niizang ɓɛɛ. Zĩi mɛɛ, ɓi ti vuu ɓoonang ɓɔɔ niizang ɓɛɛ.

⁵⁶Zang ɓɔɔ nɛɛ shaa yɔpɔ bii mɛɛ, nɛɛ ti ɓoo zĩi mɛɛ, nwang ɓi nɛɛ n, n ti nwáng ka yeti ɓiɓɛ.

⁵⁷Naa ɓɔɔ Daa ɓɔɔ shíng zang, zang nwang ningkãari ɓɔɔ wukɔ shong m, shing m n nwàng ningkãari. Naa zang ɓɔɔ shaa yɔpɔ bii mɛɛ, n shing wu doo nɔngkɔ, wu nwang ningkãari.

⁵⁸Weɓe kɔ, borodi ɓɔɔ a nɛɛ lapa ɓɛɛ. Ɓi naa maanaa ɓɔɔ rɛɛ dabang manɛ ɓɔɔ ri vɔlɔ tɔ, ri shaarɛ ɓɛɛ kpang. Naa zang ɓɔɔ shaa borodi keɓe, vɔ takpang dòndòng.”

⁵⁹Yeesɔ kɔɔ ruu keɓe ka ɓɔɔ bɛ̀ɛ́ wu tusu zang vuu ka gãa zɔɔ kpalɛnang ka Kafanahu ɓɛɛ.

⁶⁰Zang dɔɔli ka teteng zang ɓɔɔ ri mantɛ vuu ka bii ɓiɓɛ ɓɛɛ, ɓɔɔ ri tãa ruu keɓe, ri kɔɔyi nɛɛ, “Vuu kɔ wu tusu ɓee, kpãa nyaa dɔɔli, ɓu wi ɓaa shoo tãayi wiya?”

⁶¹Yeesɔ tantɛ zinang nɛɛ ri gɔ̃ɔrɔ yee ka ruu vuu ɓɔɔ wu tusu ɓɛɛ kɔ, a kɔɔ ri nɛɛ, “Ruu keɓe lasɛ nɔɔ yeti, nɔɔ yaa danggn ɓɔɔ nɔɔ shing ɓɛɛ kaa tɔ ya?

⁶²A naa nɔɔ zi m, ɓɔɔ n Jaa Shɔnzang, n gbãayu kana ka nɔng ɓɔɔ bɛ̀ɛ́ n kagn, nɔɔ palɛ biya?

⁶³Ɓi Suru Laa a zang suru bii ɓiri, bii shɔnzang zunung vuu ɓɔɔ palɛnang ɓi kpang. Ruu ɓɔɔ n kɔɔrɔ nɔɔ ɓɛɛ, ɓi ka yuu Suru ɓɔɔ a zang suru bii ɓɛɛ.

⁶⁴Zang ɓɔɔ kagn ka teteng manɛ, ri shing danggn gn kpang kɔ sasak.” Yeesɔ kɔɔ nɔngkɔ, ka ruu ɓɔɔ, zi zang ɓɔɔ ri shing danggn kpang nɛɛ zang ɓɔɔ ri naa nyɔ yuu ɓiɓɛ ɓi tɔ dòo ka tĩng ɓɛɛ.

⁶⁵A gisi ruu keɓe tɔkn tɔɔ, “Wee vuu ɓɔɔ palɛ, n kɔɔ nɔɔ tɔɔ, naa Daa dɔ̃ zang, zang a ka bii mɛɛ kpang, zang ɓɔɔ zunung anang nɛɛ yuu ɓiɓɛ kpang kɔ.”

⁶⁶Ka ruu nɔngkɔ, vuu ɓɔɔ yi nɛɛ diki kaɓa daa nɛɛ mani, zang dɔɔli ka teteng zang ɓɔɔ ri dũng wu, ri yaa wu, ri rakɛ tɔ̀ɔ́ nɛɛ wu kpang.

⁶⁷A Yeesɔ hɛ̃ɛ zang kopi tu ziti ɓɔɔ ri mantɛ vuu ka bii ɓiɓɛ ɓɛɛ nɛɛ, “Nɔɔ yaa m kaa tɔ jong ya?”

⁶⁸Siman Bituru kasɛ wu nyaa tɔɔ, “Kpanti, ruu daa kaa bii wiya? Mɔkɔ kɔ̀ɔ́ ruu ɓɔɔ a zang suru bii ɓɔɔ waa nyaa kpang ɓɛɛ.

⁶⁹Ruu shing danggn tɔ, a ruu ti zi tɔ nɛɛ mɔkɔ ɓaa zang ɓɔɔ Laa zɔ̃ng katɔ ɓɛɛ.”

⁷⁰Yeesɔ kasɛ ri nyaa tɔɔ, “Wu nkɔ shɛ̃ɛrɛ nɔɔ wee nɔɔ kopi tu ziti ɓee kpang ya? Zang gbete ka teteng manɛ ɓi suru shi kpang.”

⁷¹Rang ruu keɓe ɓi ka yuu Yahuda, jaa Siman Isikariyoti. Yahuda ka teteng zang kopi tu ziti ɓɔɔ ri mantɛ vuu ka bii Yeesɔ ɓɛɛ, wukɔ ti naa nyɔ yuu Yeesɔ.