Read mumuye Zang Shonang Yeesɔ 11 Bible Online

Zang Shonang Yeesɔ 11 - mumuye bible

Zang Shonang Yeesɔ 11

¹Rɛɛ zang shonang Yeesɔ, nɛɛ rɛɛ zang ɓɔɔ ri shing danggn tɔ, ɓɔɔ ri ka tipi Yahudi nandon, ri tãayi nɛɛ zang ɓɔɔ ri zang Isirela kpang, ri ta Ruu Laa tɔ jong.

²Ɓɔɔ Bituru daa ka Urushalima zang ɓɔɔ ri tɔɔ zang yee zang ɓɔɔ ri zang Isirela kpang shaa ka gbongkarɛ, ri rangkɛ wu.

³Ri tɔɔ, “Mɔɔ daa zanti ka gãa zang ɓɔɔ ri zi Laa kpang, ɓɔɔ ri yee shaa kpang ɓɛɛ, mɔɔ ti shaa vuu shaanang nɛɛ ri, ka ruu viya?”

⁴A Bituru kɔɔ ri ruu bìí kaa nandon nɛɛ naa ɓɔɔ gaayu ɓɛɛ tɔɔ:

⁵“Bɛɛ n gàá Laa ka gari Joopa, a n rɔ̃kɔ. N zi vuu a nɛɛ lapa naa fɔ̃ɔrɔ nyaa pɛɛrɛ bang ɓɔɔ zang yaa naa nɛɛ soo ɓɔɔ zang mãlɛ ka nyaa ɓiɓɛ ɓɔɔ dɛ̃ɛti ɓɛɛ. Vuu bii naa shi ka tĩng mɛɛ naabm.

⁶A n pɛ̃ɛrɛ waasɛ̃, n zi rɛɛ yɔpɔ soro nɛɛ yɔpɔ kpaasi, a ɓɔɔ vuu ɓɔɔ ri gɔ̃ nɛɛ buru ɓɛɛ, nɛɛ jaaning.

⁷A n tãa yee kɔ̀ɔ́ m nɛɛ, ‘Bituru, yupaa, mɔɔ nyɔrɛ mɔɔ shaayi.’

⁸N kɔɔyi nɛɛ, ‘Kpang, Kpanti vuu ɓɔɔ shi kpang daa nyaa mɛɛ gngn kpang.’

⁹A yee bìí kasɛ nyaa tɔkn nɛɛ lapa daa kaa doo ziti tɔɔ, ‘Vuu ɓɔɔ Laa kɔɔyi nɛɛ tɔ̃ɔ mɔɔ tɔɔ kpang nɛɛ shi kpang, kpang.’

¹⁰Zang palɛ vuu keɓe nɔngkɔ dakn taati, a zang gɔ̃ vuu bìí zang daa nɛɛ mani ka lapa.

¹¹Knti bee kpang zang taati, ri tantɛ nyaa nwannang ka gãa ɓɔɔ ruu kagn ɓɛɛ. Zang shong ri ka bii mɛɛ nɛɛ Kayisariya.

¹²Suru Laa kɔɔ m tɔɔ n daa nɛɛ ri, ń rɛ̃rɛ gn ziti kpang. Zang ɓɔɔ ri dũng Laa mangbete zang Joopa keɓe, ri daa nɛɛ n ka Kayisariya, a ruu daa ka yeti gãa Koneliyu nandon.

¹³A Koneliyu kɔɔ ruu naa ɓɔɔ wu zi zang nyaa shonang Laa ɓɔɔ ka lapa, ka yeti gãa ɓiɓɛ a kɔɔ wu tɔɔ, ‘Shong zang ɓɔɔ, wu daa ka Joopa, zang daa ɓaa mɔɔ nyaa ka Siman ɓɔɔ zang ɓaa wu nɛɛ Bituru ɓɛɛ.

¹⁴Naa kɔ̀ɔ́ mɔɔ ruu ɓɔɔ ta yuu ɓaaɓɛ nɛɛ zang ɓɔɔ ri ka yeti gãa ɓaaɓɛ nandon.’

¹⁵Ɓɔɔ n gaayu yee rannang hn, Suru Laa a ka bii ɓarɛ naa ɓɔɔ gaayu a ka bii ɓuru ɓɛɛ.

¹⁶A n kpàa danggn ruu ɓɔɔ Kpanti Yeesɔ kɔɔyi tɔɔ, ‘Yɔhana palɛ nɔɔ batizima ɓi nɛɛ mii, zang naa palɛ nɔɔ manɛ nɛɛ Suru Laa’ ɓɛɛ.

¹⁷Ruu zi tɔ nɛɛ Laa a ri vuu ɓɔɔ wu a ruu ka diki ɓɔɔ ruu shing danggn ka bìí Kpanti Yeesɔ Kirisi tɔ jong. N m kaa wi, n zãa Laa wiya?”

¹⁸Ka ɓɔɔ ri tãa vuu keɓe, ri rangkɛ rɛɛ Bituru takpang, ri dɔɔ kaa Laa, ri kɔɔyi nɛɛ, “Nɛɛ nɔngkɔ, Laa a rɛɛ zang ɓɔɔ ri zang Isirela kpang gbalang tɔ jong nɛɛ ri kɔ̃sɔ yeti ɓarɛ, tɔ̀ɔ, ri vɔ kaa takpang.”

¹⁹Zang ɓɔɔ ri tántɛ́, ka ruu jĩng ɓɔɔ zang dang zang ka knti ɓɔɔ Istifanu vɔ tɔ ɓɛɛ, ri daarɛ beebang ka tipi Fonishiya nɛɛ tipi Kuburu, nɛɛ gari Antakiya. Ri kɔɔ zang ɓɔɔ Ruu Laa kpang, ri kɔ̀ɔrɔ́ zang Yahudi kɔ shɛ̃ɛning.

²⁰A zang ɓɔɔ kagn teteng ɓarɛ zang Kuburu nɛɛ ɓɔɔ Kiranɛ, ri daa ka Antakiya ri daa kɔɔ zang ɓɔɔ ri zang Isirela kpang Ruu Tɔ̃ɔ Laa jong, ka yuu Kpanti Yeesɔ.

²¹Laa yi ri naa kagn, ka ruu nɔngkɔ, zang dɔɔli ri shing danggn, a ri nwang kaa zang Laa.

²²Zang ɓɔɔ ri dũng Laa ka Urushalima, ri tãa ruu keɓe, a ri shong Baranaba kaa Antakiya.

²³Ɓɔɔ daa shɛ̃ɛ nɔng, a zi naa ɓɔɔ Laa á ri tĩnang tãanang tɔ, tãa tĩnang jong. A mã ri danggn nɛɛ ri dũng Laa nɛɛ yeti ɓarɛ nandon.

²⁴Baranaba ɓi zang tɔ̃ɔ, Suru Laa kagn bii ɓiɓɛ, ti shing danggn ka bìí Laa dɔɔli, ka ruu nɔngkɔ, zang dɔɔli ri a ka bii Laa.

²⁵A Baranaba daa ka gari Taasu nɛɛ wu daa kãa nɔng Shaawulu.

²⁶Daa ĩi wu, a atɛ wu ka Antakiya. Ri ziti ri nwalɛ nɛɛ zang, ɓɔɔ ri dũng Laa, a ri ti tusu zang dɔɔli vuu, saa gbete. Zang gaayu zang ɓɔɔ ri dũng Laa ɓaanang ka Antakiya kɔ nɛɛ Kirista.

²⁷Ka diki kaɓa, zang nyaa shonang Laa ɓɔɔ ri yupaa nɛɛ Urushalima, ri daa ka Antakiya.

²⁸Zang gbete ka teteng ɓarɛ, zang ɓaa wu nɛɛ Agabu, Laa a wu naa vuu palɛnang, a yupaa kɔɔyi tɔɔ, nyɔkɔ bang a kana ka koo nandon. (Nyɔkɔ keɓe náa á ka saa ɓɔɔ Kaladiyu nwang Kpanti ɓɛɛ).

²⁹Rɛɛ zang ɓɔɔ ri dũng Laa ri mang ka yeti ɓarɛ nɛɛ rí kpalɛ vuu naa ɓɔɔ zang ɓu walɛ katɔ ɓɛɛ, ri yi rɛɛ manzung ɓuru ɓɔɔ ri dũng doo Laa kɔ doori ka tipi Yahudi ɓɛɛ naa ka bii.

³⁰Ri kpalɛ kati nɔngkɔ, a ri shòng rɛɛ zang bang, zang ɓɔɔ ri dũng Laa saka bìí kaa nɛɛ naa rɛɛ Baranaba nɛɛ Shaawulu.