Read mumuye Zang Shonang Yeesɔ 12 Bible Online

Zang Shonang Yeesɔ 12 - mumuye bible

Zang Shonang Yeesɔ 12

¹Ka diki kaɓa kɔ, kpanti Hiridu gaayu ɓɔɔ wu dang zang ɓɔɔ ka teteng zang ɓɔɔ ri dũng Laa jĩng.

²Shingnɛ zang dɔng yuu Yakub jaa nàá Yɔhana nɛɛ yere bang a Yakub vɔrɛ.

³Zirɛ vuu kɔ wu pálɛ́ ɓee zang Yahudi ri tãa tĩnang dɔɔli, a yi Bituru kaa jong. Palɛ vuu keɓe ka diki nyaalaa Borodi ɓɔɔ zang tɛ̃ɛ yisi kagn kpang ɓɛɛ.

⁴Yi Bituru tɔ, a loo wu ka sãa, a wu zang ɓɔɔ ri gã sãa ɓɛɛ ka naa, nɛɛ ri gãng jĩng ka wu. Basɛ zang sɔɔja ɓɔɔ gã wu nɔng dɛ̃ɛti. Nɔng ɓu sɔɔja kagn dɛ̃ɛti. Hiridu mang ka yeti ɓiɓɛ, nɛɛ nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ nɛɛ ɓa tɔ, wu naa jɛ̃ɛ Bituru ruu kati, ka jĩng zang piti.

⁵Ka ruu nɔngkɔ, ya Bituru ka sãa ka nɔngkɔ. A zang ɓɔɔ ri dũng Laa, ri ti gàá Laa ɓi kana gbãng gbãng ka ruu Bituru.

⁶Nɛɛ zĩi ka diki ɓɔɔ nɔng nɛ́ɛ gãntɛ tɔ, Hiridu nwángsɛ̀ Bituru kaa jĩng zang piti ɓɛɛ, Bituru roo katɔ ka teteng zang ziti ɓɔɔ ri gã wu ɓɛɛ. Zang mã wu nɛɛ saka ziti. Zang ɓɔɔ ri gã sãa ɓɔɔ ri kagn ziti, ka nyaa gãa sãa nɛɛ biling.

⁷Zang nyaa shonang Laa ɓɔɔ ka lapa ɓɛɛ, nwang nyaa ka yeti sãa. Shiiyi, a yeti sãa yakɛ kaa gbayi gbayi. Zang nyaa shonang Laa bìí zĩiti Bituru ka nyaa zãngzãng a hingsi wu. Kɔɔ wu tɔɔ, “Yupaa pati.” Soo saka ɓɔɔ zang mãlɛ naa Bituru nɛɛ mani tantɛ tɛ̃ɛnang ka tipi.

⁸A zang nyaa shonang Laa ɓɔɔ ka lapa keɓe kɔɔ wu tɔɔ, “Hãa fɔ̃ɔrɔ ɓaaɓɛ ta nɛɛ koodoo.” Bituru hãayi. A ti kɔɔ wu tɔɔ, “Lu fɔ̃ɔrɔ nyaa pɛɛrɛ ɓaaɓɛ ta ka bii mɔɔ arɛ ruu daayi.”

⁹Bituru dũng wu, ri nwangnɛ mani ka biling. Bituru zi ɓiri mɔɔ kɔɔ nɛɛ vuu kɔ zang nyaa shonang Laa ɓɔɔ ka lapa palɛ ɓee, ɓi niizang kpang. Kɔ̀ɔ́ ɓi naa nɛɛ wu rɔ̃kɔ katɔ.

¹⁰Ri ɓa zang ɓɔɔ ri gã sãa ɓɔɔ tĩng shɔɔnang, ri ti naa ɓa ɓɔɔ tɔkn. Ri naa a ka nyaa gãa saka ɓɔɔ zang ɓa kaa wukɔ, zang daa ka yeti gari ɓɛɛ. Nyaa gãa bii puu nɛɛ yuu ɓiɓɛ, a ri nwang ka biling. Ri yi gbalang sasak, ri a ka nɔng ɓɔɔ gbalang bang keɓe waa nyaa ɓɛɛ, a zang nyaa shonang Laa ɓɔɔ ka lapa ɓɛɛ, tantɛ wu kaa yaanang.

¹¹A Bituru zi vuu ɓɔɔ pálɛ́ wu kati, a kɔɔyi tɔɔ, “N zi tɔ kati nɛɛ vuu keɓe niizang kɔ nwani. Laa shong zang nyaa shonang ɓiɓɛ ɓɔɔ ka lapa ɓɛɛ náa tà m nɛɛ naa Hiridu, a ti ta m nɛɛ vuu ɓɔɔ zang Yahudi nandon, ri shing gn nɛɛ naa palɛ m ɓɛɛ.”

¹²Ɓɔɔ wu zi naa weɓe, daa ka gãa Marayamu nàá Yɔhana ɓɔɔ zang ɓaa wu nɛɛ Maraku ɓɛɛ. Zang dɔɔli ri kpalɛ zɔɔ ka nɔng, ri gàá Laa.

¹³Bituru ɓaa nyaa ka nyaa gãa biling, a jaa zang soro ɓɔɔ palɛ shonang, ɓɔɔ zang ɓaa wu nɛɛ Rooda arɛ naa kasɛ wu nyaa.

¹⁴Jaa zang soro keɓe naa tãa yee Bituru, a tãa tĩnang dɔɔli. Ka ruu nɔngkɔ, yurɛ gbãayu ka yeti gãa, puu nyaa gãa kpang. Dàa kɔɔ zang tɔɔ, Bituru shii ka nyaa gãa.

¹⁵Ri kɔɔ wu nɛɛ, “Shoko ta mɔɔ katɔ.” Jaa bìí yi tĩng nɛɛ wukɔ niizang. Ri kɔɔyi nɛɛ, “Ɓi zang nyaa shonang Laa ɓɔɔ ka lapa ɓɛɛ.”

¹⁶Bituru ti shii ɓi ka nyaa gãa ka nɔngkɔ ɓaa nyaa. Ri naa puu nyaa gãa kaa nɛɛ knti. Ɓɔɔ ri zi wu ri mã naa ka danggn.

¹⁷Kɔɔ ri nɛɛ naa, nɛɛ ri vɔ̃ nyaa. A kɔɔ ri naa ɓɔɔ Laa nwangsɛ wu nɛɛ sãa kati. Kɔɔ ri tɔɔ, “Nɔɔ kɔɔ Yakub nɛɛ rɛɛ manzung ɓɔɔ nimbang ruu keɓe.” A yaa ri, daa ɓi kaa nɔng ɓɔɔgn.

¹⁸Ɓɔɔ nɔng naa gãntɛ, rɛɛ sɔɔja ri haa nyaa nɛɛ zɔɔ dɔɔli nɛɛ Bituru daa ka niya?

¹⁹Hiridu kɔɔ zang nɛɛ zang kãa Bituru ta. Zang kãa wu, zang ĩi wu kpang. Ka ruu nɔngkɔ, Hiridu jɛ̃ɛ zang sɔɔja ɓɔɔ ri gã Bituru ruu, a shingnɛ zang nyɔkɔ ri vɔrɔ. Ka knti vuu keɓe, Hiridu yupaa nɛɛ tipi Yahudi daa ka Kayisariya daa nwang ka nɔngkɔ diki bee katɔ.

²⁰Diki bee tɔ ɓɔɔ yeti Hiridu lasɛ dɔɔli nɛɛ zang Taya nɛɛ zang Sidong ɓɛɛ, ka ruu nɔngkɔ, ri see zɔɔ dɔɔli, ri daa ka bii ɓiɓɛ. Ri gaayu ri rang yee nɛɛ Balastu, yɔɔ ɓɔɔ wukɔ zang bang rɛɛ jaa doo kpanti ɓɛɛ. A ri raa bii kaa nɛɛ bii ɓiɓɛ kɔ, ri gaa kpanti kati nɛɛ wu nwang nɛɛ ri ka nyaa zɔɔ. Ka ruu ɓɔɔ, ri wàlɛ́ vuu shaanang ɓarɛ ka tipi kpanti kɔ ɓɛɛ.

²¹Hiridu shìng zang keɓe diki. Ɓɔɔ diki ɓɔɔ wu shing ri naa arɛ, Hiridu hãa fɔ̃ɔrɔ kpanti ɓiɓɛ, a nwang ka yuu laa kpanti, a rang ri yee.

²²Ri goo nyaa nɛɛ, “Wee ɓi shɔnzang rang yee kpang, ɓi vuu gãnti rang yee.”

²³Zang nyaa shonang Laa ɓɔɔ ka lapa tantɛ wu waanang nɛɛ kɔnang, ka ruu ɓɔɔ, a Laa bannang kpang ɓɛɛ. Jaagn ri shaa wu, a vɔrɛ.

²⁴Ruu Laa ti bàa nɔng ɓi kana daa kana nɛɛ tĩng.

²⁵Baranaba nɛɛ Shaawulu ri daa palɛ vuu ɓɔɔ zang shong ri ka Urushalima tɔ, a ri gbãayu. Ri atɛ Yɔhana ɓɔɔ zang ɓaa wu nɛɛ Maraku ɓɛɛ ka naa ning.