Read mumuye Zang Shonang Yeesɔ 18 Bible Online

Zang Shonang Yeesɔ 18 - mumuye bible

Zang Shonang Yeesɔ 18

¹Nɛɛ knti, Bulu yaa Ataniya daa ka gari Koranti.

²Bulu ĩi yɔɔ Yahudi ɓɔɔ kagn ka gari Koranti zang ɓaa wu nɛɛ Akpiila nɛɛ ɓeeso Pirisila. Akpiila ɓi zang gari Pontu. Wee nɛ́ɛ a doo naa nɛɛ Italiya ɓɛɛ, ka ruu ɓɔɔ, kpanti Kaladiyu dang nyaa nɛɛ zang Yahudi nandon, ri yaa Rooma ta ɓɛɛ. Bulu daayi nɛɛ wu daa leng ri.

³Ka ruu ɓɔɔ, shonang ɓiɓɛ ɓi putali wàanang naa ɓɔɔ ɓarɛ, nwang kaa nɛɛ ri, palɛ shonang kaa nɛɛ ri.

⁴Bulu ri làá zɔɔ nyaa nɛɛ zang Yahudi nɛɛ zang Heleni ka Diki Ɔ̃sɔnang ka gãa zɔɔ kpalɛnang diki diki. Kasɛ nɛɛ ri ta ruu ɓɔɔ wu kɔɔ ri ɓɛɛ.

⁵Ɓɔɔ Timoti nɛɛ Siila ri a nɛɛ Makidoniya, Bulu raa jĩng ɓi kaa Ruu Laa kɔɔrɔnang dɔ̃ɔ gbete. Kɔɔrɔ zang Yahudi nɛɛ Yeesɔ kɔ Kirisi.

⁶Ri bɛ̃ɛ ruu ɓiɓɛ, a ri kɔɔrɔ vuu shi kpang ka yuu ɓiɓɛ. Yeti ɓiɓɛ lasɛ nɛɛ ri, a waa zũng tapuru ɓɔɔ ka fɔ̃ɔrɔ ɓiɓɛ ɓɛɛ, a kɔɔ ri tɔɔ, “Nɔɔ nɛɛ shaarɛ, ɓi nɔkɔ kãa nɛɛ yuu manɛ. Ruu mɛɛ hãa ɓi kagn kpang. Vuu ɓɔɔ gaayu nɛɛ lɛ̀ɛ́kɔ, n daarɛ m kaa bii rɛɛ zang ɓɔɔ ri zang Isirela kpang ɓɛɛ.”

⁷Ka ruu nɔngkɔ, yaa ri daa nwang ka gãa yɔɔ ɓɔɔ zang Isirela kpang, ɓɔɔ zang ɓaa wu nɛɛ Tatiyu Jusitu ɓɔɔ bang kaa Laa ɓɛɛ. Gãa ɓiɓɛ nɛɛ gãa zɔɔ kpalɛnang naabm.

⁸Kiripu ɓɔɔ wukɔ zang bang gãa zɔɔ kpalɛnang shing danggn ka bii Kpanti Laa nɛɛ zang ɓɔɔ ri ka gãa ɓiɓɛ piti. Zang Koranti ɓɔɔ ri ti ɓaa shoo ka Ruu Laa ɓɔɔ Bulu rang ɓɛɛ, ri shing danggn, a zang palɛ ri batizima.

⁹Diki ɓɔ̀ɔ́gn nɛɛ zĩi, Bulu rɔ̃kɔ, Kpanti Laa kɔɔ wu nɛɛ, “Mɔɔ kaa vɔrɔ kpang. Kɔɔrɔ zang ɓaa ruu, mɔɔ yaa kpang.

¹⁰N nɛɛ mɔɔ ning. Zang ɓɔɔ palɛ mɔɔ vuu ɓɔɔ kagn kpang, ka ruu ɓɔɔ, zang mɛɛ kagn gari keɓe dɔɔli ɓɛɛ.”

¹¹Ka ruu nɔngkɔ, Bulu nwang ka nɔngkɔ saa gbete, nɛɛ shala mangbete, tusu zang Ruu Laa.

¹²Ka ɓɔɔ zang Rooma naa yi Gaaliyo gɔmna tipi Akaya, zang Yahudi ri kpalɛ zɔɔ, a ri yi Bulu ri daa nɛɛ wu ka nɔng ɓɔɔ zang jɛ̃ɛ zang ruu kagn ɓɛɛ.

¹³Ri kɔɔ zang nɛɛ, “Yɔɔ keɓe kpɛ̃ɛrɛ zang nɛɛ zang ri bang Laa, wu naa ɓɔɔ zang dang ruu nyaa ɓɛɛ kpang.”

¹⁴Bɛɛ Bulu nɛɛ wu kasɛ nyaa kaa tɔ, a Gaaliyo kɔɔyi tɔɔ, “Zang Yahudi, naa ruu keɓe zang nɛ̀ɛ́ tɔɔ yɔɔ keɓe palɛ zang vuu shi kpang kɔ́ naa kãa ruu ɓɔɔ bang dɔɔli, nɛɛ daa naa ɓɔɔ n nɛɛ mã danggn nɛɛ nɔɔ katɔ.

¹⁵Wee nɔɔ laa zɔɔ nyaa manɛ ka ruu rúu, nɛɛ rɛɛ nung, nɛɛ nyaa dannang manɛ ɓee, nɔɔ palɛ manɛ ka naa manɛ. N kasɛ kpang n jɛ̃ɛ ruu ka yuu rɛɛ vuu ɓɔɔ naa weɓe kpang.”

¹⁶A hing ri nɛɛ yeti gãa ɓɔɔ zang jɛ̃ɛ ruu kagn ɓɛɛ.

¹⁷Ri yi Sɔtanɛ ɓɔɔ wukɔ zang bang gãa zɔɔ kpalɛnang, ri nyɔ wu nɛɛ gbãa ka tĩng gãa ruu jɛ̃ɛnang ka nɔngkɔ. Vuu bii ti kpãa Gaaliyo ɓi kpang tingkiring.

¹⁸Bulu nwang nɛɛ zang ɓɔɔ ri dũng Laa ka Koranti tɔkn diki bee wu katɔ, a naa yaa ri. Naa vang laana nɛɛ rɛɛ Pirisila nɛɛ Akpiila, ri daa tipi Siriya. Ka gari Sensheriya, Bulu yele suuyuu ɓiɓɛ, ka ruu ɓɔɔ, bɛ̀ɛ́ a Laa nyaa nɛɛ wu yélè suuyuu ɓiɓɛ kpang ɓɛɛ.

¹⁹Ɓɔɔ ri naa a ka Afisa, Bulu yaa rɛɛ Pirisila nɛɛ Akpiila daa ɓi kaa gãa zɔɔ kpalɛnang, ri daa laa zɔɔ nyaa ɓi nɛɛ zang Yahudi.

²⁰Zang bìí ri gaa wu nɛɛ wu nwang nɛɛ ri diki wu bee katɔ tɔkɔlɔng, a kasɛ kaa takpang.

²¹Ɓɔɔ wu tɔɔ wu daa kaa tɔ, kɔɔ ri katɔ kɔ jong nɛɛ, “Laa nɛɛ kasɛ tɔ, n gbãayu ditɔ ka bii manɛ.” A vang laana kaa nɛɛ Afisa.

²²Ɓɔɔ naa shɛ̃ɛ tipi Kayisariya, daa jee zang ɓɔɔ ri dũng Laa nyaa ka Urushalima. A tɛɛyi daa ka Antakiya.

²³Nwang tɔ ka nɔngkɔ, diki bee tɔ tɔkɔlɔng a yaa nɔng kaɓa, daa ka rɛɛ tipi Galati nɛɛ tipi Fijiya, dàa mã rɛɛ zang ɓɔɔ ri dũng Laa danggn.

²⁴Ka diki kaɓa, yɔɔ Yahudi ɓɔɔ kagn zang ɓaa wu nɛɛ Apolo, zang yi wu ka gari Alezandiriya, a à kaa Afisa. Zunung yee rannang dɔɔli, a ti zi labeenang Laa gbãng gbãng.

²⁵Zang tusu wu gbalang Laa tɔ gbãng gbãng. Suru Laa shing wu kɔ̀ɔ́ ruu, a ti tusu zang ruu ɓɔɔ niizang ka yuu Yeesɔ nɛɛ yeti gbete. A zi ɓi kaa doo batizima Yɔhana kɔɔ shɛ̃ɛning.

²⁶Gaayu yee rannang ka gãa zɔɔ kpalɛnang kaa vɔrɔ kpang. Rɛɛ Pirisila nɛɛ Akpiila ri tãa vuu ɓɔɔ wu kɔɔrɔ ɓɛɛ, a ri ɓaa wu nyaa, ri daa nɛɛ wu ka gãa ɓarɛ. Ri daa tusu wu gbalang Laa kaa waasɛ̃.

²⁷Apolo kɔɔ ka yeti ɓiɓɛ nɛɛ wu daa ka Akaya, a rɛɛ zang ɓɔɔ ri dũng Laa ri mã wu danggn, a ri bee zang ɓɔɔ ri dũng Laa ka nɔng ɓɔɔ wu daa ɓɛɛ labeenang nɛɛ ri ta wu waasɛ̃. Ɓɔɔ wu shɛ̃ɛ nɔng, yi rɛɛ zang ɓɔɔ Laa yi ri naa kagn, a ri shing danggn ka bii Laa, naa ka bii dɔɔli.

²⁸Ka ruu ɓɔɔ, zunung yee rannang dɔɔli, ɓá rɛɛ zang Yahudi yuu nɛɛ ruu ɓiɓɛ, ka ɓɔɔ ri laa nyaa nɛɛ zɔɔ ka jĩng zang piti ɓɛɛ. Tùsú zang ka yeti labeenang Laa nɛɛ Yeesɔ kɔ Kirisi.