Read mumuye Zang Shonang Yeesɔ 19 Bible Online

Zang Shonang Yeesɔ 19 - mumuye bible

Zang Shonang Yeesɔ 19

¹Ɓɔɔ bɛ̀ɛ́ Apolo doo ka Koranti, Bulu riki tipi kaɓa, a sòo nyaa daa ka Afisa. Ĩi zang ɓɔɔ ri dũng Laa ka nɔng,

²a hɛ̃ɛ ri nɛɛ, “Ka ɓɔɔ nɔɔ shing danggn ka bii Laa ɓɛɛ, Suru ɓiɓɛ a katɔ ka bii manɛ ya?” Ri kasɛ wu nyaa tɔɔ, “Kpang, ruu tãa ruu Suru Laa gngn kpang.”

³Bulu hɛ̃ɛ ri nɛɛ, “Nɛɛ nɔngkɔ, zang pàlɛ̀ nɔɔ manɛ zɔ̃ng batizima kiya?” Ri kɔɔ wu nɛɛ, “Zɔ̃ng ɓɔ̀ɔ́ Yɔhana.”

⁴Bulu kɔɔ ri tɔɔ, “Batizima Yɔhana ɓi ɓɔ̀ɔ́ zang ɓɔɔ ri kɔ̃sɔ yeti ɓɛɛ. A kɔɔ zang nɛɛ ri shing danggn ka bii zang ɓɔɔ a ka knti ɓiɓɛ ɓɛɛ. Zang keɓe wukɔ Yeesɔ.”

⁵Ɓɔɔ ri tãa naa weɓe, a zang pàlɛ̀ ri batizima kaa nɛɛ nung Kpanti Yeesɔ.

⁶Bulu shĩili ri naa ɓiɓɛ ka yuu, a Suru Laa a kaa bii ɓarɛ. A ri gaayu yee rannang kaa nɛɛ nyaa ɓɔɔgn. Ri kɔɔrɔ zang Ruu Laa.

⁷Zang bìí ri zang varɛ kɔ shɛ̃ɛning kopi tu ziti.

⁸Bulu daa ka yeti gãa zɔɔ kpalɛnang, kɔɔ zang Ruu Laa nɛɛ gbãng gbãng ning. Nwang nɛɛ ri ka nɔngkɔ shala taati. Làá nyaa nɛɛ zang, kasɛ nɛɛ ri ta ruu ɓɔɔ wu kɔ̀ɔ́ ri ka yuu Kpanti roonang Laa ɓɛɛ.

⁹Zang ɓɔɔ ri taarɛ yuu, ri shing danggn kpang. Ri kɔɔ ruu shi kpang ka yuu gbalang keɓe, ka tĩng zang ɓɔɔ ri kpalɛ zɔɔ ɓɛɛ nandon. Ka ruu nɔngkɔ, Bulu yaa ri, sèe kaa zang ɓɔɔ ri dũng Laa kɔ shɛ̃ɛning daa nɛɛ ri ka yeti gãa ɓɔɔ zang tusu zang labeenang kagn ɓɔɔ zang ɓáa nɛɛ nung Tirana ɓɛɛ. Laa nyaa nɛɛ ri ka nɔngkɔ, ka yuu Ruu Laa diki diki.

¹⁰Pálɛ́ nɔngkɔ, saa ziti ka ruu nɔngkɔ, zang ɓɔɔ ri ka tipi Asiya ri tãa Ruu Laa, zang Yahudi nɛɛ zang ɓɔɔ ri zang Isirela kpang ɓɛɛ nandon.

¹¹Laa palɛ vuu ɓɔɔ zang zirɛ zang mã naa ka danggn dɔɔli, ɓɔɔ zang zi gngn kpang ɓɛɛ nɛɛ naa Bulu.

¹²Ka ruu nɔngkɔ, zang talɛ sɛ̃ɛ fɔ̃ɔrɔ ɓɔɔ wu àlɛ́ jĩng nɛɛ mani nɛɛ fɔ̃ɔrɔ ɓɔɔ wu hã̀lɛ́ ka bii, zang daa nɛɛ mani ka bii zang ɓɔɔ ri kɔng katɔ ɓɛɛ, a kɔnang ɓarɛ yaa ri bii. Rɛɛ suru shi kpang ri ti nwangnɛ ri yaa zang bii.

¹³A zang Yahudi ɓɔɔ kagn ɓɔɔ ri rakɛ ri daarɛ gari gari ri nwangsɛ suru shi kpang nɛɛ bii zang, ri kasɛ nɛɛ ri nwángsɛ̀ suru shi kpang kaa jong nɛɛ nung Kpanti Yeesɔ. Ri kɔɔyi nɛɛ, “N dang mɔɔ nyaa nɛɛ nung Yeesɔ ɓɔɔ Bulu kɔɔrɔ zang ruu ɓiɓɛ ɓɛɛ.”

¹⁴Yɔɔ Yahudi ɓɔɔ kagn zang ɓaa wu nɛɛ Siiba, ɓi zang bang zang ɓɔɔ ri dɔɔ vuu ka gãa Laa ɓɛɛ. Wujɛ ɓiɓɛ kagn manziti ri pálɛ̀ vuu keɓe doo nɔngkɔ.

¹⁵A suru shi kpang kɔɔ ri tɔɔ, “N zi Yeesɔ nung ɓi tɔ, n ti zi Bulu nung tɔ. Nɔɔ manɛ kaa rɛɛ wiya?”

¹⁶Zang ɓɔɔ suru shi kpang ka bii ɓiɓɛ zaayi, yi ri, a ɓa kaka ɓarɛ nandon. Nyɔ ri zɛ̃ɛzɛ̃ɛ. A ri yurɛ ri nwangnɛ yeti gãa fɔ̃ɔrɔ ka bii ɓarɛ kpang. Ti shìng ri nyaa vuu waa nɛɛ bii piti piti.

¹⁷Zang ɓɔɔ ri ka Afisa, rɛɛ zang Yahudi nɛɛ zang ɓɔɔ ri zang Isirela kpang, ri tãa vuu keɓe katɔ nandon. Zang ri ti kaa vɔrɔ nandon, a zang dɔɔ nung Kpanti Yeesɔ kati.

¹⁸Zang dɔɔli ka teteng zang ɓɔɔ ri shing danggn tɔ, ri álɛ́, ri kɔɔrɔ vuu shi kpang ɓɔɔ bɛ̀ɛ́ ri palɛ ɓɛɛ ka shoo zang piti.

¹⁹Zang dɔɔli ɓɔɔ ri hɛ̃ɛ paa ri sèerè labeenang ɓarɛ nandon, ri dɔ̀ɔrɔ̀ nɛɛ waa ka jĩng zang nandon. Zang gãrɛ nɛɛ naa zang mãlɛ́ rɛɛ labeenang keɓe daa nung Azurufa labang dakn laa ziti tu kopi.

²⁰Ka ruu nɔngkɔ, Ruu Laa daa nɛɛ tĩng, a ti baa nɔng nandon.

²¹Ka knti ɓɔɔ vuu keɓe palɛ tɔ nɔngkɔ, Bulu kɔɔ ka yeti ɓiɓɛ nɛɛ wu sɔɔ nɛɛ tipi Makidoniya nɛɛ tipi Akaya wu daa kaa Urushalima. A ti kɔɔyi nɛɛ, “N nɛɛ daa tɔ Urushalima, n daa katɔ, n daa zi Rooma.”

²²Shong zang ɓɔɔ ri yi wu naa ka shonang ri ziti, Timoti nɛɛ Erasitu ka tĩng ka Makidoniya, a nwang kaa Asiya tɔkn tɔkɔlɔng.

²³Ka diki kaɓa, zang hàa nyaa dɔɔli ka Afisa ka ruu gbalang keɓe.

²⁴Yɔɔ ɓɔɔ kagn sãa vuu nɛɛ azurufa zang ɓaa nung ɓiɓɛ nɛɛ Dimitiriyu. Ri sãa gãa vuu gãnti ɓɔɔ zang ɓaa nɛɛ Aritimi ɓɛɛ tɔkɔlɔng tɔkɔlɔng hn nɛɛ azurufa. Shonang keɓe shingnɛ zang ɓɔɔ ri palɛ shonang nɛɛ wu, ri walɛ saka dɔɔli.

²⁵Dimitiriyu ɓáarɛ́ ri nyaa, a ti ɓaa nyaa jong ka zang ɓɔɔ ri palɛ doo zɔ̃ng shonang keɓe kɔ ɓɛɛ. A kɔɔ ri tɔɔ “Jèe, nɔɔ zi tɔ ruu wàlɛ́ vuu naa ɓuru ka shonang keɓe kɔ.

²⁶Nɔɔ zi tɔ nɛɛ jĩng manɛ, nɔɔ ti tãa vuu ɓɔɔ Bulu palɛ tɔ. Kɔɔyi nɛɛ vuu gãnti ɓɔɔ shɔnzang pálɛ̀ ɓi vuu ɓɔɔ kpang tingkiring. Zang dɔɔli ri ta ruu ɓiɓɛ tɔ ka Afisa keɓe nɛɛ tipi Asiya nandon.

²⁷Naa ruu nɛɛ palɛ waasɛ̃ kpang zang ɓáa shonang ɓuru keɓe kaa nung shi kpang. Wu ti nɔngkɔ shɛ̃ɛning kpang, nàá jaa gãa ɓuru, Aritimi ɓɔɔ zang a wu bannang dɔɔli keɓe, gãa ɓiɓɛ zang risi ɓi tɔ naa vuu ɓɔɔ kpang. Zang ti làsɛ́ bannang ɓɔɔ zang a wu kaa tɔ. Vuu gãnti ɓɔɔ zang bang wu katɔ, ka tipi Asiya nɛɛ koo nandon ɓɛɛ.”

²⁸Ɓɔɔ ri tãa naa weɓe, yeti ɓarɛ lasɛ dɔɔli, ri gaayu nyaa gɔɔnang, ri kɔɔyi nɛɛ, “Aritimi vuu gãnti zang Afisa wukɔ bang.”

²⁹Nɔng shoo tãanang ɓi tɔ̀ɔ́ ka gari kpang. Zang gari ri yuku ri daarɛ ka nɔng ɓɔɔ zang kpalɛ zɔɔ kagn ka gari ɓɛɛ. Vuu ɓɔɔ ri mang ka yeti ɓarɛ gbete. Zang ti gɔ̃ɔ Gaayu nɛɛ Arisitaku zang Makidoniya ɓɔɔ ri ra doo nɛɛ Bulu ɓɛɛ, zang daa nɛɛ ri ka nɔng bìí.

³⁰Bulu kasɛ nɛɛ wu daa nɔng ɓɔɔ zang kpalɛ yuu kaɓa jong, a zang ɓɔɔ ri dũng Laa ri zãa wu daanang.

³¹Zang bang ɓɔɔ ri ka tipi kaɓa ɓɔɔ ri wusang Bulu, ri shong nyaa ka bii ɓiɓɛ, ri gaa wu nɛɛ wu tɔɔ kpang nɛɛ wu a ka nɔng kɔ zang kpalɛ zɔɔ ɓee kpang.

³²Zang ɓɔɔ ri kpalɛ zɔɔ, ri zi naa zɔɔ takpang, zang ri goo nyaa nɛɛ hn, zang ɓɔɔ ri ti kɔɔ ɓarɛ nɛɛ hn, zang dɔɔli ka teteng zang ɓɔɔ ri kpalɛ zɔɔ, ri ti zi vuu ɓɔɔ pálɛ̀, a zang kpalɛ zɔɔ ɓɛɛ kpang.

³³Zang Yahudi ri dɔ̃ Alezanda nɛɛ wu daa shii ka tĩng zang, wu rang yee nɛɛ zang. Ka ruu nɔngkɔ, zang ɓɔɔ ri kɔɔ ɓarɛ nɛɛ zang kpalɛ yuu ka ruu ɓiɓɛ kɔ. A Alezanda tuu naa ka lapa nɛɛ tɔɔ zang vɔ̃ nyaa kati, tɔ̀ɔ, wu rang zang yee kati.

³⁴Ɓɔɔ ri zirɛ nɛɛ wu zang Yahudi, ri goo nyaa dɔ̃ɔ gbete ka lapa sasak dàa áwà ziti katɔ. Ri kɔɔyi nɛɛ, “Aritimi vuu gãnti zang Afisa wukɔ bang.”

³⁵Zang ɓɔɔ wukɔ bèé zang laa ka gari ɓɛɛ, naa palɛ tɔ zang vɔ̃ nyaa tɔ, a rang ri yee tɔɔ, “Ɓɔɔ nɔɔ zang gari Afisa ɓɛɛ, ɓu wi zi kpang nɛɛ gari Afisa kɔ gãng jĩng ka gãa vuu gãnti Aritimi, a ɓɔɔ ti tari ɓɔɔ watɛ nɛɛ lapa ɓɛɛ, kpang wiya?

³⁶Zang ɓɔɔ laa nyaa vuu keɓe kagn kpang, ka ruu nɔngkɔ, nɔɔ vɔ̃ nyaa, nɔ́ɔ palɛ vuu hakaka kpang.

³⁷Nɔɔ átɛ̀ rɛɛ zang keɓe ka nihn, ri ɓɔ̀ɔ wu vuu ka gãa vuu gãnti kpang, ri ti dãa nàá jaa gãa ɓuru katɔ kpang.

³⁸Ka ruu nɔngkɔ, Dimitiriyu nɛɛ zang shonang ɓiɓɛ, ri nɛɛ mang zang ɓɔɔ kagn ka yeti, ri daa ɓaa nyaavaa. Zang ɓɔɔ ri jɛ̃ɛ ruu kagn.

³⁹Vuu ɓɔɔ nɛɛ kpãa nɔɔ kagn ka bm, ruu ti ɓaa nyaa ka zang gari ri kpalɛ, zang wu tãa ruu manɛ.

⁴⁰Naa ruu palɛ waasɛ̃ kpang, zang jɛ̃ɛ ruu rúu nɛɛ ruu shingnɛ zang hàá nyaa ka ruu vuu kɔ nɔɔ palɛ lɛ̀ɛ́kɔ ɓee. Vuu ɓɔɔ naa shingnɛ ruu haa nyaa keɓe kagn kpang. Naa zang hɛ̃ɛ ruu, nyaa ɓɔɔ ruu kasɛ zang kagn waasɛ̃, ka ruu vuu keɓe kpang.”

⁴¹Kɔɔ ruu tɔ naa weɓe, a jee ri nyaa nɛɛ zang sãtɛ ta.