Read mumuye Zang Shonang Yeesɔ 2 Bible Online

Zang Shonang Yeesɔ 2 - mumuye bible

Zang Shonang Yeesɔ 2

¹Diki Pentiku naa arɛ, a zang ɓɔɔ ri shíng danggn tɔ, ri kpalɛ zɔɔ ka nɔng gbete.

²A ri tãa yee nwang nɛɛ lapa naa jasung bang rarɛ, a naa baa yeti gãa ɓɔɔ ri nwang kagn ɓɛɛ.

³A ri zi vuu naa rĩiti waa, baa nɔng, a leere zang ɓɔɔ ri ka nɔng piti ka yuu.

⁴Suru Laa a kaa bii ɓarɛ, a ri gaayu yee rannang kaa nɛɛ nyaa zang ɓɔɔgn naa ɓɔɔ Suru Laa tusu ri nɛɛ ri rang ɓɛɛ.

⁵Zang Yahudi kagn ka Urushalima ka diki kaɓa. Zang varɛ ɓɔɔ ri dṹng Laa ɓɛɛ, ɓɔɔ ri a nɛɛ tipi koolaa nandon ɓɛɛ.

⁶Ɓɔɔ ri tãa yee keɓe, zang dɔɔli ri kpalɛ zɔɔ. Vuu keɓe kpãa ri dɔɔli, ka ruu ɓɔɔ, ri tãa zang ɓɔɔ ri shíng danggn tɔ keɓe ri rangkɛ yee nɛɛ nyaa ɓarɛ ɓɛɛ.

⁷Ri mã naa ka danggn, a ri kɔɔyi nɛɛ, “Zang kɔ ri rang yee ɓee, ɓu bɛ̀ɛ zang tipi Galili kɔ nandon kpang ya?

⁸A palɛ kaa biya ruu tãayi ri rang yee nɛɛ nyaa tipi ɓuru viya?

⁹Ruu álɛ̀ ɓuru nɛɛ tipi Fatiya, nɛɛ tipi Madiya, nɛɛ tipi Elama, nɛɛ tipi Masopotaami, nɛɛ tipi Yahudi, nɛɛ tipi Kapaadoosiya, nɛɛ tipi Pontu, ɓɔɔ tipi Asiya,

¹⁰nɛɛ tipi Fijiya, nɛɛ ɓɔɔ Pamfiliya, nɛɛ tipi Masara, nɛɛ ɓɔɔ kiiri Kiranɛ nyaa ka teteng ɓɔɔ ɓi tipi Libiya ɓɛɛ, nɛɛ zang zanti ɓɔɔ ri álɛ́ nɛɛ gari Rooma ɓɛɛ, ri ɓarɛ zang Yahudi a ɓɔɔ kaa zang ɓɔɔ ri risi yuu ɓarɛ nɛɛ ri kaa dòo zang Yahudi kɔ doori ɓɛɛ.

¹¹A ɓɔɔ zang Karita, nɛɛ zang Yahudi. Ruu tãayi ri kɔɔrɔ vuu bang bang ɓɔɔ Laa palɛ nɛɛ nyaa zang gãa ɓuru.”

¹²Ri mã naa ka danggn, ri zi vuu ɓɔɔ ri pálɛ́ takpang. Ri hɛ̃ɛlɛ zɔɔ kati nɛɛ, “Vuu keɓe ɓi lɛ̀ɛ́ viya?”

¹³Zang ɓɔɔ ri kpaa ri nɛɛ, “Ɓi saa palɛ ri.”

¹⁴A Bituru seepaa nɛɛ zang shonang ri kopi tu gbete, a rang zang ɓɔɔ ri kpalɛ zɔɔ yee tɔɔ, “Manzung zang Yahudi, nɛɛ zang ɓɔɔ ri nwang ka Urushalima nandon, nɔɔ ɓaa shoo n kɔɔ nɔɔ dĩiri vuu keɓe.

¹⁵Wu saa palɛ rɛɛ zang keɓe naa ɓɔɔ nɔɔ kɔɔrɔ ɓɛɛ kpang. Ɓi doo saka mandɛ̃ɛti ɓɔɔ gãndi kɔ nwani.

¹⁶Vuu keɓe, ɓi vuu ɓɔɔ zang nyaa shonang Laa Jɔɔwel kɔɔ rúu ka yuu ɓiɓɛ kɔ. Jɔɔwel kɔɔyi tɔɔ,

¹⁷“ ‘Laa kɔɔyi tɔɔ, “Ka rɛɛ diki ɓɔɔ koo waa nyaa ɓɛɛ, N naa a shɔnzang piti Suru mɛɛ. Wujɛ manɛ zang soro nɛɛ zang varɛ, ri naa kɔɔrɔ ruu naa ɓɔɔ zang nyaa shonang Laa kɔɔ ɓɛɛ. Wujɛ jasang manɛ, ri naa zili vuu ɓɔɔ Laa tusu zang ɓɛɛ. Rɛɛ dabang manɛ, ri naa rɔ̃kɔ rɔ̃kɔnang.

¹⁸Ka diki kaɓa, n naa a rɛɛ jaafoo mɛɛ zang soro nɛɛ zang varɛ naa, tɔɔ ri kɔɔrɔ ruu ɓɔɔ n kɔɔrɔ ri ɓɛɛ.

¹⁹N tusu vuu ka lapa zang zirɛ zang mã naa ka danggn. N ti tusu vuu ɓɔɔ zang zirɛ zang mã naa ka danggn ɓɛɛ ka tipi. Zĩi naa zɛ̃ɛ ka tipi, a waa naa shaa nɔng, zĩ̀irí ta nɔng piti.

²⁰Zang risi làa, wu tɔ̀ɔ kaa tɔ, shala wu ti ráa ɓi kaa zĩi, tɔ̀ɔ, diki ɓɔɔ zang a Laa bannang kagn wu arɛ. Diki kaɓa wukɔ Diki ɓɔɔ bang ɓɛɛ.

²¹Zang ɓɔɔ nɛɛ gàa Laa nɛɛ wu yi wu naa ka bii, ka diki kaɓa, Laa ta yuu ɓiɓɛ katɔ.” ’

²²“Nɔɔ ɓaa shoo ka ruu keɓe, rɛɛ manzung zang Isirela. Yeesɔ yɔɔ Nazara, zang ɓɔɔ Laa tùsù nɔɔ wu ka vuu bang bang ɓɔɔ zang zirɛ zang mã naa ka danggn, ɓɔɔ Laa palɛ nɛɛ naa ɓiɓɛ ka teteng manɛ ɓɛɛ. Naa ɓɔɔ nɔɔ ti zi tɔ ɓɛɛ.

²³Zang a nɔɔ yɔɔ keɓe, ka naa ɓɔɔ Laa shíng doo ka tĩng ɓɛɛ. Ti Laa kɔ kasɛ a nɔɔ ɓaa wu naa ka laa. Zang ɓɔɔ ri zi Laa kpang ri nyɔ wu vɔrɔ.

²⁴Laa ta wu nɛɛ naa vɔrɔ, a wisi wu paa nɛɛ saa ka ruu ɓɔɔ, daa naa ɓɔɔ vɔrɔ yiti wu kpang ɓɛɛ.

²⁵Dawuda kɔɔ ruu ka yuu ɓiɓɛ tɔɔ, “ ‘Diki diki jĩng mɛɛ ɓi ka bii Laa, N ti zi tɔ nɛɛ Laa ɓi nɛɛ n naabm. Ka ruu nɔngkɔ, n kaa vɔrɔ vuu ɓɔɔ kpang.

²⁶Ka ruu nɔngkɔ, yeti mɛɛ ɓi tĩnang kɔ shɛ̃ɛning. N dɔɔ m Laa Naa wee n m shɔnzang waati ɓee, n nwàngnɛ n yaa gn naa kpang.

²⁷Ka ruu ɓɔɔ, mɔɔ yaa m ka nɔng vɔrɔ kpang ɓɛɛ, mɔɔ ti yaa vɔrɔ zang tɔ̃ɔ ɓaaɓɛ wu pũng ka sàa kpang.

²⁸Mɔɔ tusu m gbalang ɓɔɔ n, sɔɔyi n wàlɛ́ Suru bii tɔ. Mɔɔ naa shing m ń tãa tĩnang ka tĩng ɓaaɓɛ.’

²⁹“Rɛɛ manzung, n kɔ̀ɔ́ nɔɔ ruu katɔ ka yuu dabang ɓuru Dawuda, nyaa zàa m kpang. Dawuda vɔrɛ, a zang gbãa wu, sàá ɓiɓɛ ti doogn ka nɔng ɓuru kãntang keɓe.

³⁰Dawuda ɓi zang nyaa shonang Laa, a ti zi vuu ɓɔɔ Laa tũng wu ɓi tɔ. Laa tũng wu vuu tɔɔ, wu yí zɔ̃ng ɓiɓɛ gbete wu roo kpanti.

³¹Dawuda naa zi vuu ɓɔɔ Laa naa palɛ ka tĩng ɓɛɛ, a rang ruu ka yuu naa ɓɔɔ zang wisi Kirisi paa ɓɛɛ. Dawuda kɔɔyi tɔɔ, “ ‘Zang naa yáa wu ka sàa kpang, bii ɓiɓɛ ti pũng kpang.’

³²Laa wisi Yeesɔ keɓe paa tɔ nɛɛ sàa, ruu nandon ruu zi katɔ nɛɛ jĩng ɓuru.

³³Laa wisi wu paa, a shing wu tɔ ka nakn ɓiɓɛ, a á wu suru ɓɔɔ bɛ̀ɛ́ a ruu nyaa nɛɛ wu naa a ruu ɓɛɛ. Vuu ɓɔɔ nɔɔ zirɛ, nɔɔ ti tãa kãntang keɓe, ɓi vuu ɓɔɔ Laa tɔɔ wu a ruu ɓɛɛ kɔ.

³⁴Ka ruu ɓɔɔ, Dawuda daa ka lapa kpang ɓɛɛ, a kɔɔ doo nɛɛ mani tɔɔ, ‘Kpanti Laa kɔɔ kpanti mɛɛ tɔɔ, “Nwang ka nakn mɛɛ,

³⁵n shíng zang ɓɔɔ ri shing jĩng nɛɛ mɔɔ kpang ditɔ, mɔɔ naa ri nɛɛ doo ɓaaɓɛ.” ’

³⁶“Ka ruu nɔngkɔ, zang Isirela, nɔɔ zi ta tɔ̃ɔ tɔ̃ɔ nɛɛ Yeesɔ ɓɔɔ nɔɔ ɓaa wu naa ka laa keɓe, Laa shing kaa wukɔ nwàng Kpanti, wukɔ ti Kirisi zang ɓɔɔ Laa tɔɔ, wu naa a ɓɛɛ.”

³⁷Ɓɔɔ zang ri tãa ruu keɓe, kpãa ri ka yeti dɔɔli, a ri hɛ̃ɛ Bituru nɛɛ rɛɛ zang shonang ɓɔɔ nimbang tɔɔ, “Rɛɛ manzung, rúu palɛ ɓu kaa viya?”

³⁸Bituru kɔɔ ri tɔɔ, “Zang ɓu wu yaa vuu shi kpang ɓɔɔ wu palɛ ɓɛɛ ta, zang palɛ nɔɔ batizima nɛɛ nung Yeesɔ Kirisi, tɔ̀ɔ, Laa wu yaa nɔɔ gbalang vuu shi kpang manɛ ɓɔɔ dɔɔli ɓɛɛ kati. Tɔ̀ɔ, Laa wu a nɔɔ Suru ɓiɓɛ kati.

³⁹Ka ruu ɓɔɔ, bɛ̀ɛ́ Laa á nyaa ɓi ka ruu manɛ kɔ nɛɛ wujɛ manɛ ɓɛɛ. A ɓɔɔ ti ka ruu zang ɓɔɔ bɛ̀ɛ́ ri naabm ka bii Laa kpang. Suru keɓe, ka ruu zang piti ɓɔɔ Laa ɓɔɔ wukɔ Kpanti ɓuru” naa ɓaa ri nyaa ɓɛɛ.

⁴⁰Bituru rangkɛ ri ruu ɓɔɔ kaa gn dɔɔli, a shaarɛ ri nyaa kati tɔɔ, “Nɔɔ ta yuu manɛ katɔ nɛɛ naa jĩng ɓɔɔ zang naa dǎng zang ɓɔɔ yeti ɓarɛ shi kpang ɓɛɛ.”

⁴¹Zang dɔɔli ri ta ruu ɓiɓɛ, a zang palɛ ri batizima. Ka diki kaɓa, zang ɓɔɔ gisi ka yuu zang ɓɔɔ ri shing danggn tɔ ka bii Laa ɓɛɛ ri daa nung zang labang taati katɔ.

⁴²Zang keɓe ri shing yuu ɓarɛ ɓi ka vuu ɓɔɔ zang shonang ri tusu ɓɛɛ. A ɓɔɔ kaa yuu ɓɔɔ ri kpalɛ nɛɛ zɔɔ ɓɛɛ, ɓɔɔ ti ka vuu shaanang ɓɔɔ ri shaa ka nyaa zɔɔ ɓɛɛ, a ɓɔɔ ti ka Laa gaanang.

⁴³Zang piti ri kaa vɔrɔ a Laa ti palɛ vuu ɓɔɔ zang zirɛ zang mã naa ka danggn dɔɔli nɛɛ naa zang shonang keɓe.

⁴⁴Zang ɓɔɔ ri shing danggn tɔ, ri nwang ka nɔng gbete, ri bàsɛ́ vuu naa ɓarɛ nɛɛ zɔɔ.

⁴⁵Ri mãlɛ́ vuu ɓarɛ ri bàsɛ̀ saka nɛɛ zɔɔ. Ri a zang ɓu naa ɓɔɔ daa wu katɔ ɓɛɛ.

⁴⁶Ri kpálɛ̀ zɔɔ ka Gãa Laa diki diki. A ri ti shaa vuu ɓarɛ ka nyaa zɔɔ ka gãa ɓarɛ. Ri shaa vuu shaanang, ri tãa tĩnang, ri ti ta zɔɔ nɛɛ yeti gbete.

⁴⁷Ri dɔɔ Laa, a zang piti ti rang yee tɔ̃ɔ ka yuu ɓarɛ, Laa ti gìsí ri zang ɓɔɔ wu ta yuu ɓarɛ tɔ ka zɔɔ diki diki.