Read mumuye Zang Shonang Yeesɔ 21 Bible Online

Zang Shonang Yeesɔ 21 - mumuye bible

Zang Shonang Yeesɔ 21

¹Ruu jee ri nyaa, a ruu basɛ zɔɔ, ruu vang laana ruu daayi. Ruu sha dɔ̃ɔ gbete, ruu a ka gari Kosi. Nɔng naa gãntɛ, a ruu daa ka gari Rodesa, a ruu naa yupaa ruu daa gari Patara.

²Ruu walɛ laana ɓɔɔ nɛɛ ri tarɛ ri daa ka Fonishiya, a ruu vang kagn.

³Ruu a tɔ ka nɔng ɓɔɔ ruu zi gari Kuburu kaa tɔ ɓɛɛ, ruu yaa wu kaa ka nagang. Ruu daa ɓuru kaa tipi Siriya, ruu naa shooro ka gari Taya ka ruu ɓɔɔ laana wìtí zang vuu ka nihn kɔ ɓɛɛ.

⁴Ruu ĩi zang ɓɔɔ ri dũng Laa ɓɔɔ kagn ka nɔng, a ruu nwang nɛɛ ri diki manziti. Suru Laa kɔɔ ri nɛɛ ri kɔɔ Bulu nɛɛ wu daa Urushalima kpang.

⁵Ɓɔɔ diki paa yunang ɓuru a ɓiri, ruu yupaa ruu yi gbalang daanang ɓuru. Ri seepaa nɛɛ wujɛ, nɛɛ soro ɓarɛ nandon, ri naa shing ruu. Ruu nwang tɔ nɛɛ ri, ruu yaa yeti gari tɔ, a ruu tang nɛɛ gutu ka nyaa waapo, ruu gaa Laa. Ruu jee zɔɔ nyaa, a ruu basɛ zɔɔ kati.

⁶Ruu vang laana, a ri gbãayu, ri daa gãa ɓarɛ kati.

⁷Ɓɔɔ ruu yi gbalang daanang nɛɛ gari Taya, ruu naa a ka gari Talamaya. Ruu jee zɔɔ nyaa nɛɛ zang ɓɔɔ ri dũng Laa ɓɔɔ ri ka nɔng ɓɛɛ. Ruu roo ka nɔng ɓarɛ diki gbete.

⁸Nɔng naa gãntɛ ruu yupaa ruu daa Kayisariya. Ruu daa ka yeti gãa Filibu ɓɔɔ kɔɔrɔ zang Ruu Tɔ̃ɔ Laa ɓɛɛ, ruu nwang ka nɔngkɔ. Filibu kagn teteng zang manziti ɓɔɔ zang shɛ̃ɛrɛ ri ka Urushalima ɓɛɛ.

⁹Wujɛ ɓiɓɛ zang soro dɛ̃ɛti ɓɔɔ zang gee ri gn kpang ɓɛɛ. Ri ɓaarɛ zang nyaa shonang Laa.

¹⁰Ruu nwang tɔ ka nɔngkɔ diki ɓuru bee tɔ tɔkɔlɔng, a zang nyaa shonang Laa ɓɔɔ zang ɓaa wu nɛɛ Agabu ɓɛɛ, a nɛɛ tipi Yahudi.

¹¹Ɓɔɔ wu a ka bii ɓuru, tuu guruji ɓɔɔ Bulu mã sãng nɛɛ mani, mã doo nɛɛ naa ɓiɓɛ nɛɛ mani. A kɔɔyi tɔɔ, “Suru Laa kɔɔyi tɔɔ, Zang Yahudi ɓɔɔ ri ka Urushalima, ri daa mã zang guruji keɓe doo naa weɓe kɔ, ri a zang ɓɔɔ ri zang Isirela kpang ɓɛɛ.”

¹²Ɓɔɔ ruu tãa naa weɓe, ruu nɛɛ zang ɓɔɔ ri ka nɔng, ruu gàa Bulu nɛɛ wu daa Urushalima takpang.

¹³A kasɛ ruu nyaa tɔɔ, “Nɔɔ palɛ ɓu vi, nɔɔ káarɛ̀ nɔngkɔ, nɔɔ lɔɔrɔ m sisĩng viya? N daa Urushalima keɓe m katɔ. Ri nɛɛ kasɛ ri mã m katɔ kɔ shɛ̃ɛning kpang, ri nyɔ m vɔrɔ ka ruu nung Kpanti Yeesɔ, n kasɛ m tɔ.”

¹⁴Ta yee ɓuru kpang, ka ruu nɔngkɔ, ruu yaa wu. Ruu kɔɔ ɓuru kati nɛɛ, “Laa wu palɛ vuu ɓɔɔ yeti ɓiɓɛ kasɛ ɓɛɛ.”

¹⁵Ruu nwang tɔ ka nɔngkɔ diki bee ruu tɔkɔlɔng, a ruu kpalɛ vuu ɓuru, ruu yi gbalang Urushalima daanang kati.

¹⁶Ka teteng zang ɓɔɔ ri dũng Laa ka Kayisariya, zang ɓɔɔ ri shing ruu, ri atɛ ruu ka gãa yɔɔ gari Kuburu ɓɔɔ zang ɓaa wu nɛɛ Manasong ɓɛɛ. Nɛɛ ruu nwang ka gãa ɓiɓɛ kɔ. Yɔɔ keɓe, ka teteng zang ɓɔɔ ri gaayu Laa dũnnang doo pati ɓɛɛ.

¹⁷Ɓɔɔ ruu shɛ̃ɛ Urushalima, zang ɓɔɔ ri dũng Laa, ri ta ruu waasɛ̃.

¹⁸Ɓɔɔ nɔng naa gãntɛ Bulu daa nɛɛ ruu ka bii Yakub, zang bang bang zang ɓɔɔ ri dũng Laa, ri kpalɛ zɔɔ ka nɔng nandon.

¹⁹Bulu jee ri nyaa, a gaa tɔɔsung ɓɔɔ wu kɔɔrɔ ri vuu ɓɔɔ Laa palɛ ka teteng zang ɓɔɔ ri zang Isirela kpang, ka ruu shonang ɓɔɔ wu palɛ ɓɛɛ. Kɔɔ ri ruu keɓe gbete gbete nandon.

²⁰Ɓɔɔ ri tãa naa weɓe, ri dɔɔ Laa. A ri kɔɔ wu nɛɛ, “Manzung ɓuru, mɔɔ zi tɔ waa, zang labang dɔɔli ri shing danggn tɔ ka bii Laa ka teteng zang Yahudi, ri ti pĩiri jĩng nɛɛ nyaa dannang Laa dũnnang kpang.

²¹Ri ti tãa nyaa nɛɛ mɔɔ tusu zang Yahudi ɓɔɔ ri nwang ka teteng zang ɓɔɔ ri zang Isirela kpang ɓɛɛ, nɛɛ ri dũ̀ng nyaa ɓɔɔ Musa dang ɓɛɛ takpang. Mɔɔ nɛɛ ri yee wujɛ ɓarɛ shaa kpang, nɛɛ ri dũ̀ng vuu ɓɔɔ dabang ɓuru ri kpɛ̃ɛrɛ ruu kpang.

²²Ruu palɛ ɓu kaa biya? Ri tã̀á nyaa katɔ nɛɛ mɔɔ a tɔ.

²³Ka ruu nɔngkɔ, palɛ vuu ɓɔɔ ruu kɔ̀ɔ́ mɔɔ keɓe. Zang varɛ ri kagn ka nihn dɛ̃ɛti ɓɔɔ ri tũng vuu ka tĩng Laa ɓɛɛ.

²⁴Daa nɛɛ ri, mɔɔ pálɛ́ vuu ɓɔɔ zang pálɛ̀, tɔɔ zang nwang zang tɔ̃ɔ tɔkn ka tĩng Laa ɓɛɛ. Mɔkɔ mɔɔ shu vuu ɓɔɔ ri nɛɛ shu ɓɛɛ nandon, tɔ̀ɔ, zang kpɛ̃ɛ ri yuu kati. Tɔ̀ɔ, ri zi kati nandon, nɛɛ vuu ɓɔɔ zang kɔɔrɔ ri ka yuu ɓaaɓɛ ɓi niizang kpang. Nɛɛ mɔɔ dũng ɓaa doo nyaa ɓɔɔ Musa dang ɓɛɛ kɔ.

²⁵Ka ruu zang ɓɔɔ bɛ̀ɛ́ ri zang Isirela kpang, ɓɔɔ ri dũng kaa Laa kãntang ɓɛɛ, nyaa ɓuru daa gbete, a ruu bee ri laa tɔ nɛɛ ri shaa vuu ɓɔɔ zang yee vaka kpang, ri shaa zĩi kpang, ri ti shaa vuu ɓɔɔ zang bɔ̃ɔ vɔ̃ɔrɔ katɔ kpang, ri ti rooro nɛɛ zang soro ɓɔɔ soro ɓarɛ kpang, kpang.”

²⁶A Bulu daa nɛɛ rɛɛ zang keɓe. Ɓɔɔ nɔng naa gãntɛ pálɛ́ vuu ɓɔɔ zang pálɛ̀, tɔ̀ɔ, zang nwang zang tɔ̃ɔ ka tĩng Laa ɓɛɛ. A daa kaa yeti Gãa Laa nɛɛ wu kɔɔ zang diki ɓɔɔ vuu ɓɔɔ ri palɛ, nɛɛ ri nwang zang tɔ̃ɔ ka tĩng Laa waa nyaa kagn ɓɛɛ. Diki ɓɔɔ zang dɔ̀ɔ́ Laa vuu vaa kagn ka ruu zang ɓu ɓɛɛ.

²⁷Diki manziti bìí yaa ka tɔkɔlɔng waa nyaa kaa tɔ, a zang Yahudi tipi Asiya, ri zi Bulu ka yeti Gãa Laa. Ri zàrɛ̀ zang ɓɔɔ ri kpalɛ ɓɛɛ nandon, a ri yi wu.

²⁸Ri gòo nyaa nɛɛ “Zang Isirela nɔɔ yi ruu naa ka bii. Wee yɔɔ ɓɔɔ tusu vuu nɛɛ nɔng piti piti, nɛɛ zang ri kasɛ ruu zang ɓuru kpang, nɛɛ zang ri dũng nyaa ɓɔɔ Musa dang ɓɛɛ kpang, kɔɔrɔ ruu shi kpang ka yuu Gãa Laa keɓe. Palɛ wu ti vuu keɓe kɔ shɛ̃ɛning kpang, átɛ̀ zang ɓɔɔ ri zang Isirela kpang ka yeti Gãa Laa keɓe. Shing tɔ nihn nwang nɔng shi kpang tɔ ka jĩng Laa.”

²⁹Ri kɔɔ nɔngkɔ ka ruu ɓɔɔ, bɛ̀ɛ́ ri zi Torofimu yɔɔ tipi Afisa nɛɛ Bulu ka gari ɓɛɛ. Ri kɔɔ ɓarɛ nɛɛ naa átɛ́ yɔɔ tɔ ka yeti Gãa Laa.

³⁰Gari nandon, nɔng shoo tãanang ɓi tɔ̀ɔ́gn kpang. Zang ri yuku nɛɛ nɔng piti piti ri arɛ, ri yi Bulu ri gɔ̃ wu, ri nwangsɛ wu nɛɛ yeti Gãa Laa. A zang tantɛ nyaa gãa kulunang.

³¹Ri nɛɛ ri nyɔ wu kaa vɔrɔ, a nyaa daa ka shoo zang bang sɔɔja Rooma nɛɛ zang haa nyaa kana ka gari Urushalima nandon.

³²Zang bang sɔɔja tantɛ rɛɛ zang bang sɔɔja seenang nɛɛ rɛɛ sɔɔja ɓɔɔ, a daa nɛɛ ri ka nɔng ɓɔɔ zang haa nyaa kagn ɓɛɛ. Ɓu doo ɓɔɔ zang ri zi zang bang sɔɔja nɛɛ rɛɛ sɔɔja ɓiɓɛ, ri yaa Bulu nyɔnang.

³³Zang bang sɔɔja bìí daa ka bii Bulu naabm a yi wu. Kɔɔ zang nɛɛ zang ri mã wu nɛɛ soo saka ziti. A hɛ̃ɛ zang nɛɛ, “Yɔɔ keɓe ɓu wiya, á palɛ zang viya?”

³⁴Zang ɓɔɔ ri kpalɛ zɔɔ, ri goo nyaa ka lapa, zang ɓu kɔɔ náabm̀, zang ɓu kɔɔ náabm̀. Ka ruu nyaa ɓɔɔ ri hàa dɔɔli ɓɛɛ, zang bang sɔɔja tãa dĩiri ruu bìí kpang, ka ruu nɔngkɔ, kɔɔ zang nɛɛ zang dita nɛɛ Bulu ka nɔng ɓɔɔ gãa rɛɛ sɔɔja kagn ɓɛɛ.

³⁵Ɓɔɔ Bulu a tɔ ka nɔng ɓɔɔ zang nàalɛ́ doo kagn zang vangnɛ zang daa ka yeti nɔng gãa rɛɛ sɔɔja ɓɛɛ, sɔɔja ri tuu wu katɔ, ka ruu ɓɔɔ, zang ɓɔɔ ri kpalɛ zɔɔ ri sèé gnvɔ kana dɔɔli ɓɛɛ.

³⁶Zang ɓɔɔ ri kpalɛ zɔɔ, ri a kana knti ɓarɛ ri goo nyaa nɛɛ, “Nɔɔ nyɔ wu vɔrɔ ta.”

³⁷Yaa kaa tɔkɔlɔng nɛɛ ri shɛ̃ɛ kaa nɛɛ Bulu ka nɔng gãa rɛɛ sɔɔja, a Bulu hɛ̃ɛ zang bang sɔɔja tɔɔ, “Mɔɔ kàsɛ́ tɔ, n rang mɔɔ yee ya?” A zang bang sɔɔja kɔɔyi tɔɔ, “A ɓeekpang mɔɔ zunung nyaa Heleni ɓaa katɔ ya?”

³⁸“Wu mɔkɔ yɔɔ tipi Masara ɓɔɔ sɔɔ zang tĩng zang haa nyaa ka nihn, a mɔɔ see zang ɓɔɔ ri haa nyaa labang dɛ̃ɛti mɔɔ daa nɛɛ ri ka jĩngti kpang ya?”

³⁹A Bulu kasɛ wu nyaa tɔɔ, “N m zang Yahudi, zang yi m ka gari Taasu ka tipi Silisiya. Zang zi gari ɓuru tɔ dɔɔli. Yàa m gbalang jong n ràng zang kɔ ri kpalɛ ɓee yee.”

⁴⁰Zang bang sɔɔja yàa wu gbalang, a shii ka yupaa nɔng ɓɔɔ zang vang nɛɛ mani ɓɛɛ. A wii zang ɓɔɔ ri kpalɛ naa. Ri vɔ̃ nyaa tɔ, a Bulu rang ri yee nɛɛ nyaa zang Yahudi tɔɔ: