Read mumuye Zang Shonang Yeesɔ 4 Bible Online

Zang Shonang Yeesɔ 4 - mumuye bible

Zang Shonang Yeesɔ 4

¹Bituru nɛɛ Yɔhana ri rang yee doo ka naa nyaa nɛɛ zang ɓɔɔ ri kpalɛ zɔɔ ɓɛɛ, a rɛɛ zang ɓɔɔ ri dɔɔ vuu ka Gãa Laa, nɛɛ zang bang zang ɓɔɔ ri gã Gãa Laa nɛɛ rɛɛ Saduki, ri a ka bii ɓarɛ.

²Yeti ɓarɛ lasɛ nɛɛ Bituru nɛɛ Yɔhana, ka ruu ɓɔɔ, ri tusu zang vuu, a ti kɔɔ ri nɛɛ Yeesɔ yupaa tɔ nɛɛ sàa, ka ruu nɔngkɔ, zang yupaa katɔ nɛɛ sàa ɓɛɛ.

³Ka ruu nɔngkɔ, ri yiki Bituru nɛɛ Yɔhana, ri daa loo ri ka sãa nɛɛ nɔng wu gãntɛ ka gbongkarɛ, ka ruu ɓɔɔ, bɛ̀ɛ́ kaa nɛɛ laarang.

⁴Zang dɔɔli ka teteng zang ɓɔɔ ri tãa ruu ɓɔɔ Bituru nɛɛ Yɔhana ri kɔɔyi, ri shing danggn. Zang varɛ ɓɔɔ ri shing danggn tɔ, ri daa kaa nung labang maani.

⁵Nɔng naa gãntɛ tɔ, a rɛɛ zang bang bang zang Yahudi nɛɛ rɛɛ dabang ɓarɛ, nɛɛ rɛɛ zang ɓɔɔ ri tusu zang labeenang Laa ɓɛɛ, ri kpalɛ zɔɔ ka Urushalima.

⁶Ri kpalɛ zɔɔ nɛɛ rɛɛ Anas, kpanti zang ɓɔɔ ri dɔɔ vuu ka Gãa Laa ɓɛɛ, nɛɛ Kayifa, nɛɛ Yɔhana, nɛɛ Alezanda, a ɓɔɔ kaa kpanti zang ɓɔɔ ri dɔɔ vuu ka Gãa Laa ɓeezung.

⁷Zang atɛ Bituru nɛɛ Yɔhana ka tĩng ɓarɛ, a ri hɛ̃ɛ ri tɔɔ, “Nɔɔ walɛ naa vuu palɛnang ka niya nɔɔ palɛ vuu keɓe nɛɛ mani wiya? Nɔɔ palɛ nɛɛ nung wiya?”

⁸A Suru Laa a kaa bii Bituru, a kasɛ ri nyaa tɔɔ, “Rɛɛ zang bang bang zang Yahudi nɛɛ dabang,

⁹nɔɔ nɛ́ɛ hɛ̃ɛ ruu, ruu keɓe ka ruu ɓɔɔ, ruu yi zang ɓɔɔ vuu palɛ katɔ naa ka bii, nɛɛ naa ɓɔɔ ruu masɛ wu,

¹⁰n kaaɓi, n kɔɔ nɔɔ nɛɛ zang Isirela piti faarik, nɛɛ yɔɔ kɔ shii ka tĩng manɛ ɓee, zang masɛ wu nɛɛ nung Yeesɔ Kirisi, yɔɔ gari Nazara ɓɔɔ nɔɔ ɓaa wu naa ka laa, a Làa naa wisi wu paa ka sàa ɓɛɛ.

¹¹Yeesɔ keɓe kɔ, “ ‘Tari ɓɔɔ nɔɔ zang ɓɔɔ mãa gãa nɔɔ bɛ̃ɛyi, wukɔ naa raa tari ɓɔɔ yiti gãa ɓɛɛ kati.’

¹²“Zang ɓɔɔ ta yuu zang ɓɔɔ takpang, ka ruu ɓɔɔ, zang ɓɔɔ kagn ka koo keɓe gbete ɓɔɔ Laa a zang nung ɓiɓɛ, nɛɛ wukɔ ta yuu zang ɓɛɛ kpang ɓɛɛ.”

¹³Zang ɓɔɔ ri jɛ̃ɛ zang ruu, ri zi naa ɓɔɔ Bituru nɛɛ Yɔhana ri rang yee ri kaa vɔrɔ kpang ɓɛɛ. A zang ti kɔɔ ri nɛɛ Bituru nɛɛ Yɔhana ɓarɛ zang waati, ri bee laa gngn kpang ɓɛɛ, ri mã naa ka danggn. Ri naa zi kati nɛɛ zang keɓe ri nwáng ɓarɛ nɛɛ Yeesɔ.

¹⁴Ka ɓɔɔ ri zi yɔɔ ɓɔɔ zang masɛ wu shìi nɛɛ Bituru nɛɛ Yɔhana, vuu ɓɔɔ ri kɔɔ takpang.

¹⁵A ri kɔɔ Bituru nɛɛ Yɔhana nɛɛ ri nwang ka biling gbongkarɛ. A ri tɔ̀ng zɔɔ ka naa ɓarɛ.

¹⁶Ri hɛ̃ɛ zɔɔ tɔɔ, “Ruu palɛ biya nɛɛ rɛɛ zang keɓe viya? Ka ruu ɓɔɔ, zang ɓɔɔ ri ka Urushalima nandon, ri zi tɔ nɛɛ zang keɓe ri palɛ vuu ɓɔɔ zang zirɛ zang mã naa ka danggn, ɓɔɔ zang palɛ gngn kpang ɓɛɛ. Daa naa ɓɔɔ ruu ti làá nyaa kpang.

¹⁷Ruu nɛɛ tɔɔ ruu zãa ruu keɓe nɔng bàanang, rúu ɓáa nyaa ka rɛɛ zang keɓe, ruu dàng ri nyaa nɛɛ ri rang zang ɓɔɔ yee tɔ̀ɔ́ ka nung Yeesɔ kpang.”

¹⁸A ri ɓaa Bituru nɛɛ Yɔhana nyaa tɔkn ka yeti gãa. Ri dang ri nyaa nɛɛ ri rang yee, ri tusu zang vuu tɔ̀ɔ́ nɛɛ nung Yeesɔ kpang.

¹⁹Bituru nɛɛ Yɔhana kasɛ ri nyaa tɔɔ, “Nɔɔ sée karɛ ka yeti manɛ nɔɔ zirɛ, wi tɔ̃ɔ ka tĩng Laa wiya? Naa rùu ɓaa shoo ka nyaa manɛ ya, kɔ ruu ɓaa shoo ka nyaa Laa?

²⁰Ka ruu ɓɔɔ, ruu zunung naa ɓɔɔ ruu yaa vuu ɓɔɔ ruu zi nɛɛ jĩng ɓuru, a ruu ti tãa nɛɛ shoo ɓuru kɔɔnang kpang ɓɛɛ.”

²¹Zang ɓɔɔ ri jɛ̃ɛ zang ruu, ri dàng ri nyaa gbãng gbãng, a ri yaa ri naa. Ri zi vuu ɓɔɔ ri dang ri jĩng kagn kpang, ka ruu ɓɔɔ, zang nandon ri dɔɔ Laa kana ka ruu vuu ɓɔɔ Laa palɛ ɓɛɛ.

²²Yɔɔ ɓɔɔ zang pálɛ̀ vuu ɓɔɔ zang zirɛ zang mã naa ka danggn, ɓɔɔ zang masɛ wu keɓe, sáa ɓiɓɛ ɓá laa ziti katɔ.

²³Ɓɔɔ zang yáa Bituru nɛɛ Yɔhana naa, ri tantɛ daanang ka bii zang shonang ɓɔɔ nimbang. Ri daa kɔɔ ri vuu ɓɔɔ rɛɛ zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang bang bang zang Yahudi ri kɔɔ ɓɛɛ.

²⁴Ɓɔɔ ri tãa ruu keɓe hn, ri mɛɛ nyaa dɔ̃ɔ gbete, ka lapa ri gaa Laa tɔɔ, “Dabang ɓuru, zang ɓɔɔ mãa lapa nɛɛ tipi nɛɛ mii waapo nɛɛ vuu ɓɔɔ ka yeti ɓarɛ nandon ɓɛɛ.

²⁵Mɔkɔ rang yee nɛɛ bii Suru Tɔ̃ɔ ɓaaɓɛ, nɛɛ nyaa zang shonang ɓaaɓɛ dabang ɓuru Dawuda, nɛɛ “ ‘Zang ɓɔɔ ri zi Laa kpang, ri làsɛ́ yeti ɓarɛ ka ruu viya? A zang ri tɔ̀ng zɔɔ waati ka ruu viya?

²⁶Rɛɛ kpanti zang koo ri kpalɛ bii, a rɛɛ zang bang bang, ri tɔ̀ng zɔɔ nɔng gbete nɛɛ ri gaa nyaa nɛɛ Kpanti Laa nɛɛ Kirisi ɓiɓɛ’.

²⁷Kpanti Hiridu nɛɛ kpanti Pontu Bilatu, ri kpalɛ yuu niizang ka gari keɓe nɛɛ zang ɓɔɔ ri zang Yahudi kpang, nɛɛ rɛɛ zang Isirela ka yuu Yeesɔ, zang shonang ɓaaɓɛ ɓɔɔ shi kpang kagn bii ɓiɓɛ kpang ɓɛɛ. Wukɔ Kirisi, zang ɓɔɔ mɔɔ zɔ̃ng ɓɛɛ.

²⁸Ri kpalɛ zɔɔ nɛɛ ri pálɛ̀ vuu ɓɔɔ mɔɔ shíng ɓaa doo ka tĩng nɛɛ naa vuu palɛnang ɓaaɓɛ nɛɛ, naa ɓɔɔ mɔɔ kasɛ wu nwang nɔngkɔ ɓɛɛ.

²⁹Kpanti, kãntang keɓe, zi nyaa ɓɔɔ ri dang ta, mɔ́ɔ mã ruu danggn jong, ruu rang Ruu ɓaaɓɛ, ruu kaa vɔrɔ kpang.

³⁰Dĩi naa ɓaaɓɛ mɔɔ masɛ zang. Mɔɔ a ruu naa, rúu palɛ vuu ɓɔɔ zang zirɛ zang mã naa ka danggn, nɛɛ nung Yeesɔ, zang shonang ɓaaɓɛ ɓɔɔ shi kpang ɓi kagn bii ɓiɓɛ kpang ɓɛɛ.”

³¹Ri hangsɛ nyaa Laa gaanang tɔ, a nɔng ɓɔɔ ri kpalɛ yuu, ruutu. Suru Laa a ka bii ɓarɛ, a ri gaa tɔɔsung Ruu Laa kɔɔnang, ri kaa vɔrɔ kpang.

³²Zang ɓɔɔ ri shing danggn tɔ nandon, yeti ɓarɛ gbete. Zang ɓɔɔ tɔɔ kpang nɛɛ vuu naa ɓiɓɛ, ɓi ɓɔ̀ɔ́ ɓiɓɛ ka bm kpang. Ri basɛ vuu ka naa ɓarɛ nɛɛ zɔɔ ri nandon.

³³Rɛɛ zang shonang Yeesɔ, ri kɔɔ zang ruu paa yunang Kpanti Yeesɔ nɛɛ sàa, ri káa vɔrɔ kpang. A Laa pàlɛ̀ ri tɔ̃ɔ dɔɔli.

³⁴Ka ruu nɔngkɔ, zang ɓɔɔ kagn ka teteng ɓarɛ ɓɔɔ dang jĩng ɓɛɛ kpang. Ka ruu ɓɔɔ, zang nandon ɓɔɔ vuu naa ɓarɛ kagn naa tipi nɛɛ gãa, ri mãlɛ̀, ri atɛ saka vuu ɓɔɔ ri mãlɛ́ keɓe.

³⁵Ri naa atɛ ka tĩng rɛɛ zang shonang Yeesɔ. Zang basɛ, zang a zang ɓu naa ɓɔɔ daa wu katɔ ɓɛɛ.

³⁶Ri palɛ kana naa weɓe, a Yusufu zɔ̃ng Leevi, yɔɔ Kuburu ɓɔɔ rɛɛ zang shonang Yeesɔ ri a wu nung nɛɛ Baranaba (dĩiri nung keɓe ɓi, “Jaa ɓɔɔ mã zang danggn ɓɛɛ.”)

³⁷Mãlɛ́ tipi ɓiɓɛ, a atɛ saka, naa a rɛɛ zang shonang Yeesɔ.