Read mumuye Zang Shonang Yeesɔ 7 Bible Online

Zang Shonang Yeesɔ 7 - mumuye bible

Zang Shonang Yeesɔ 7

¹Kpanti zang ɓɔɔ ri dɔɔ vuu ka Gãa Laa, hɛ̃ɛ Istifanu tɔɔ, “Rúu kɔ zang kɔ̀ɔrɔ́ ka yuu ɓaaɓɛ ɓee nɔngkɔ niizang ya?”

²Istifanu kasɛ wu nyaa tɔɔ, “Rɛɛ manzung nɛɛ rɛɛ daa mɛɛ, nɔɔ ɓaa shoo. Laa ɓɔɔ wukɔ ɓa zang piti bannang ɓɛɛ, nwang nyaa ka bii dabang ɓuru Ibirayi, bɛ̀ɛ́ wu doo ka tipi Masopotaami. Bɛ̀ɛ́ daa nwang gn ka gari Haran kpang.

³Laa kɔɔ wu nɛɛ, ‘Yaa gãa ɓaaɓɛ ta, nɛɛ tipi ɓaaɓɛ, mɔɔ daa ka nɔng ɓɔɔ n tùsú mɔɔ naa kagn ɓɛɛ.’

⁴“A Ibirayi yaa tipi Masopotaami kati daa nwang kaa Haran. Dáa Ibirayi naa vɔrɛ a Laa naa shing Ibirayi nɛɛ wu sèe gãa, wu a ka tipi kɔ nɔɔ kagn kãntang ɓee.

⁵Bɛ̀ɛ́ Laa a wu tipi ka nihn kɔ́ tɔkɔlɔng nɛɛ ɓi ɓɔɔ ɓiɓɛ kpang. A Laa a Ibirayi nyaa tɔɔ wu á Ibirayi ditɔ, wu nwang kaa ɓɔɔ ɓiɓɛ nɛɛ zang ɓiɓɛ ɓɔɔ zang naa yiki ka knti ɓɛɛ. Ka diki kaɓa, bɛ̀ɛ́ Laa a wu jaa gn kpang.

⁶Laa kɔɔ wu ruu keɓe hn. ‘Zɔ̃ng ɓaaɓɛ ri daa nwang zang zanti ka koolaa ɓɔɔgn, ri daa nwang jaafoo ka nɔng. Zang dang ri jĩng saa laa maani dakn dɛ̃ɛti.

⁷N naa dang zang ɓɔɔ zɔ̃̀ng ɓaaɓɛ ri shòng ri jĩng ditɔ. Tɔ̀ɔ, nɛɛ knti, ri nwangnɛ, ri yaa koolaa kaɓa, ri a ka nihn, ri naa báng m.’

⁸A Laa a Ibirayi nyaa ka yuu shaa yeenang. Ka ruu nɔngkɔ, ɓɔɔ zang naa yi Ishaaku, Ibirayi yee wu shaa, bɛ̀ɛ́ diki ɓiɓɛ daa tɔ mantaati. Zang yi ting nɛɛ shaa yeenang keɓe, ka ɓɔɔ Ishaaku naa yi Yakubu, a Yakubu naa yiki rɛɛ dabang ɓuru kopi tu ziti ɓɛɛ.

⁹“Rɛɛ dabang ɓuru (Yusufu ɓeezung), ri kaa sũnyaa nɛɛ Yusufu, a ri màlɛ̀ wu nɛɛ wu daa nwang jaafoo ka tipi Masara. A Laa yáa wu ɓi kaa takpang.

¹⁰Laa nwangsɛ wu ka jĩng dannang ɓiɓɛ nandon. Laa a wu zũnang a ka ruu nɔngkɔ Firawuna kpanti Masara, kasɛ wu dɔɔli, a shing wu nɛɛ wu nwang gɔmna ka tipi Masara nɛɛ wu ti nwang zang bang ka gãa Firawuna.

¹¹“A nyɔkɔ naa nwang ka tipi Masara, nɛɛ tipi Kaana nandon. Nyɔkɔ keɓe, dàng zang jĩng dɔɔli. Rɛɛ dabang ɓuru ri walɛ vuu shaanang kpang.

¹²Ɓɔɔ Yakubu tãa nyaa nɛɛ vuu shaanang kagn ka Masara. A shong rɛɛ dabang ɓuru nɛɛ ri daa walɛ vuu shaanang. Wee daanang ɓɔɔ shɔɔnang ɓɛɛ.

¹³Ɓɔɔ ri naa paasɛ daanang, Yusufu tusu ri yuu ɓiɓɛ kati, a Firawuna naa zi rɛɛ zang gãa Yusufu nung kati.

¹⁴A Yusufu shòng daa ɓiɓɛ Yakubu nyaa, kɔɔ wu nɛɛ wu a nɛɛ zang gãa ɓiɓɛ nandon ka Masara. Zang gãa Yakubu nandon, ri laa taati tu kopi tu maani.

¹⁵A Yakubu naa daa Masara kati. Yakubu nɛɛ rɛɛ dabang ɓuru, ri daa vɔlɔ kaa nɔngkɔ.

¹⁶Zang sɔɔrɔ vɔrɔ ɓarɛ ka Shɛɛkɛm. A zang gbãa ri ka sàa ɓɔɔ Ibirayi hoo ka naa wujɛ Hamɔ, a shu ri saka ɓɛɛ.

¹⁷“Ka ɓɔɔ diki ɓɔɔ Laa tɔɔ wu pàlɛ́ Ibirayi vuu ɓɔɔ wu a Ibirayi nyaa kagn a naabm ka naa, zang ɓuru ɓɔɔ ri ka Masara ri shang tɔ dɔɔli.

¹⁸Nɛɛ knti, zang naa yi kpanti ɓɔɔgn ka Masara ɓɔɔ zi vuu ɓɔɔ ka yuu Yusufu kpang ɓɛɛ.

¹⁹Kpanti keɓe ta yeti shi kpang, nɛɛ rɛɛ zɔ̃ng ɓuru, dàng rɛɛ dabang ɓuru jĩng, ka ruu ɓɔɔ, shíng ri nɛɛ gbãng gbãng ning nɛɛ ri vang jaa rɛ̃ɛting ɓarɛ ka biling nɛɛ tɔ̀ɔ, ri vɔlɔ ɓɛɛ.

²⁰“Zang yi Musa ka laa keɓe kɔ. Musa shi dɔɔli, a Laa kasɛ ruu ɓiɓɛ katɔ. Zang nwang nɛɛ wu ka gãa daa ɓiɓɛ shala taati kɔ nwani.

²¹Ɓɔɔ zang naa nwangsɛ wu ka biling, jaa Firawuna ɓɔɔ zang soro tuu wu raa kaa jaa ɓiɓɛ, a hingti wu kaa naa jaa ɓiɓɛ.

²²Zang tusu Musa labeenang, a zang tusu wu vuu ɓɔɔ zang mantɛ ka tipi Masara nandon, a zunung yee rannang nɛɛ vuu palɛnang dɔɔli.

²³“Sáa Musa daa tɔ laa ziti, a kɔɔ ka yeti ɓiɓɛ nɛɛ, wu daa leng jĩng doo ka rɛɛ ɓeezung, zang Isirela.

²⁴Daa tɔ, lee ɓɔɔ a zi yɔɔ Masara dang yɔɔ Isirela gbete jĩng kana. Ka ruu nɔngkɔ, dàa ta yɔɔ ɓɔɔ zang dang wu jĩng ɓɛɛ nyaa, a nyɔ yɔɔ Masara vɔrɔ.

²⁵Musa kɔɔ ɓi nɛɛ zang ɓiɓɛ ri zi katɔ nɛɛ Laa kasɛ nɛɛ wu ta yuu ɓarɛ nɛɛ naa ɓiɓɛ, a ri zi ɓarɛ kaa takpang.

²⁶Nɔng naa gãntɛ tɔ, a zi zang Isirela ziti ri gaa nyaa. Nɛɛ wu basɛ ri kaa tɔ, a kɔɔ ri tɔɔ, ‘Nɔɔ ɓaa shoo, nɔɔ jaa nàá zɔɔ, nɔ́ɔ dàng zɔɔ jĩng kpang.’

²⁷“Zang ɓɔɔ dang zang gbete jĩng ɓɛɛ, dɔ̃ Musa nɛɛ kaa, a hɛ̃ɛ nɛɛ, ‘Wi shing mɔɔ zang bang, a ɓɔɔ zang ɓɔɔ jɛ̃ɛ ruu rúu wiya?’

²⁸Mɔɔ nɛɛ mɔɔ nyɔ m vɔrɔ naa ɓɔɔ mɔɔ nɛ́ɛ nyɔ yɔɔ Masara ka ɓɔɔrɔ ɓɛɛ ya?

²⁹Ɓɔɔ Musa tãa naa weɓe, Musa yurɛ daa ka tipi Madayana, daa nwang zanti ka nɔngkɔ.

³⁰“Saa ɓa tɔ laa ziti, a zang nyaa shonang Laa ɓɔɔ ka lapa nwang nyaa ka wu, ka jaa laa ɓɔɔ waa shaayi ka yeti jĩngti, ka doo kɔpɔ Sinayi naabm ɓɛɛ.

³¹Musa zi vuu keɓe, a mã naa ka danggn. Dàa naabm nɛɛ wu daa zirɛ, a tãa yee Kpanti Laa kɔɔ wu tɔɔ,

³²‘Nkɔ Làá rɛɛ dabang ɓaaɓɛ, Làá Ibirayi nɛɛ Ishaaku, nɛɛ Yakubu.’ Bii zàá Musa kana, ka ruu vɔrɔ ɓɔɔ wu kaa ɓɛɛ, a pɛ̃ɛrɛ nɔng bìí takpang.

³³“A Kpanti Laa kɔɔ wu tɔɔ, ‘Túlú koodoo ɓaaɓɛ ka ruu ɓɔɔ nɔng kɔ mɔɔ shii kagn ɓee, ɓi nɔng ɓɔɔ shi kpang kagn kpang ɓɛɛ.

³⁴N pɛ̃ɛrɛ tɔ, n zi jĩng ɓɔɔ zang mɛɛ dang ka Masara tɔ. N ti tã̀a kaanang ɓɔɔ ri kaa ɓɛɛ tɔ. N arɛ n tɔ́ɔ, n yaa ri naa. Arɛ n shong mɔɔ, mɔɔ gbãayu ka Masara.’

³⁵“Musa keɓe ɓɔɔ zang Isirela bɛ̃ɛ wu ɓɛɛ kɔ. Ɓɔɔ ri kɔɔ wu tɔ́ɔ, wi shing mɔɔ zang bang, a ɓɔɔ zang ruu jɛ̃ɛnang ka yuu ɓuru wiya ɓɛɛ. Laa shong wukɔ, nɛɛ wu naa nwang zang bang, a ɓɔɔ zang ɓɔɔ ta ri ɓɛɛ nɛɛ bii zang nyaa shonang Laa ɓɔɔ ka lapa ɓɔɔ nwang nyaa ka wu ka jaa laa ɓɔɔ waa shaa ɓɛɛ.

³⁶Musa nwangsɛ ri nɛɛ Masara. Palɛ vuu ɓɔɔ zang zirɛ zang mã naa ka danggn dɔɔli ka Masara, ɓɔɔ ka waapo Maliya, a ɓɔɔ ti ka jĩngti, saa laa ziti.

³⁷“Musa kɔ, kɔɔ zang Isirela tɔɔ, ‘Laa naa zɔ̃̌ng nɔɔ zang nyaa shonang ɓiɓɛ ditɔ, naa ɓɔɔ wu zɔ̃ng m ɓɛɛ. Zang nyaa shonang keɓe, naa a ɓi doo nɛɛ teteng zang manɛ kɔ.’

³⁸Musa keɓe kɔ nwang nɛɛ rɛɛ zang Isirela ɓɔɔ ri kpalɛ zɔɔ ka jĩngti, a ɓɔɔ zang nyaa shonang Laa ɓɔɔ ka lapa ɓɔɔ rang wu yee ka kɔpɔ Sinayi ɓɛɛ, a ɓɔɔ rɛɛ dabang ɓuru. Wukɔ ti tà ruu rúu Laa ɓɔɔ a zang suru bii ɓɛɛ, a á ruu.

³⁹“A rɛɛ dabang ɓuru ri ɓaa shoo ka nyaa ɓiɓɛ kpang. Ri bɛ̃ɛ wu, ka yeti ɓarɛ, ri kasɛ nɛɛ ri nɛɛ gbãayu ɓarɛ ka Masara.

⁴⁰A ri kɔɔ Haruna tɔɔ, ‘Mãa ruu rɛɛ vaka ta, ɓɔɔ sɔ̀ɔ́ ruu tĩng ɓɛɛ. Ruu zi vuu ɓɔɔ palɛ Musa ɓɔɔ nwángsɛ̀ ruu nɛɛ Masara ɓuru takpang.’

⁴¹Ka diki keɓe kɔ, ri mãa vaka naa napo. Ri dɔ̀ɔ wu vuu, a ri nwãa vuu shaanang nɛɛ ri tãa tĩnang, ka ruu vuu ɓɔɔ ri palɛ nɛɛ yuu ɓarɛ ɓɛɛ.

⁴²A Laa raa ri yuu knti. A yaa ri nɛɛ ri bang rɛɛ sang ɓɔɔ ka lapa ɓɛɛ, naa ɓɔɔ rɛɛ zang nyaa shonang Laa ri bee ka yeti labeenang ɓɛɛ. Zang nyaa shonang Laa beeyi tɔɔ, “ ‘Zang Isirela, nɔɔ dɔ̀ɔ nkɔ vuu vaa ɓɔɔ nɔɔ yele ka jĩngti saa laa ziti ɓɛɛ ya?

⁴³Nɔɔ tuu manɛ putali vaka manɛ ɓɔɔ zang ɓaa nɛɛ Moleki ɓɛɛ, nɔɔ rakɛ nɛɛ mani, a ɓɔɔ sang vaka manɛ ɓɔɔ zang ɓaa nɛɛ Ramfa ɓɛɛ. Ri ɓarɛ vaka ɓɔɔ nɔɔ palɛ nɛɛ nɔɔ bang ri katɔ ɓɛɛ. Ka ruu nɔngkɔ, n yáa nɔɔ, zang ri sèe nɔɔ, ri daa ɓa tipi Babila nɛɛ mani.’

⁴⁴“Rɛɛ dabang ɓuru ri rakɛ nɛɛ putali ka jĩngti. Putali ɓɔɔ tusu ri nɛɛ Laa kagn ka teteng ɓarɛ ɓɛɛ. Zang palɛ putali keɓe naa ɓɔɔ Laa kɔɔ Musa, a ti tusu wu ɓɛɛ.

⁴⁵Nɛɛ knti, rɛɛ dabang ɓuru ɓɔɔ ri ta putali keɓe, ka naa rɛɛ daa ɓarɛ, ri tuu kaa naa, ka ɓɔɔ Jashuwa sɔɔ ri tĩng ɓɛɛ. Ri naa ta tipi keɓe, ka naa rɛɛ zang ɓɔɔ ri nwalɛ ka nɔng, a Laa hingki zang, yaa rɛɛ dabang ɓuru nɔng ɓɛɛ. Putali keɓe, nwang ka nɔngkɔ sasak a nɔng ka yuu Dawuda.

⁴⁶Laa kasɛ ruu Dawuda dɔɔli, a Dawuda gaa Laa nɛɛ Laa wu yaa wu, wu mãa Làá dabang ɓuru Yakubu, gãa nwannang.

⁴⁷Ɓi kaa Sulemanu naa mãa Gãa bìí kati.

⁴⁸“Nɔɔ zi tɔ nɛɛ Laa ɓɔɔ wukɔ ɓa zang piti, nwàng ki gãa ɓɔɔ zang mãa nɛɛ naa ɓi kpang naa ɓɔɔ zang nyaa shonang Laa kɔɔ ka tĩng ɓɛɛ tɔɔ,

⁴⁹“Kpanti Laa tɔɔ, ‘Lapa nwang ɓi naa laa nwannang mɛɛ, a tipi ɓi kaa nɔng doo tɛ̃ɛnang mɛɛ. Nɔɔ mãa m zɔ̃ng gãa kiya? Nɔng ɓɔɔ nɔɔ tɔɔ n ɔ̃sɔ kagn kiya?

⁵⁰Wu nkɔ palɛ vuu piti keɓe nɛɛ naa vuu palɛnang mɛɛ kpang ya?’

⁵¹“Nɔɔ taarɛ yuu dɔɔli. Yeti manɛ nɛɛ shoo manɛ nɔɔ dòo katɔ. Nɔɔ kàsɛ̀ nɛɛ nɔɔ tãa vuu ɓɔɔ Suru Laa kɔ̀ɔ́ nɔɔ kpang. Nɔɔ pálɛ̀ dòó vuu ɓɔɔ rɛɛ dáa manɛ ri palɛ ɓɛɛ kɔ.

⁵²Zang nyaa shonang Laa kagn gbete ɓɔɔ rɛɛ dáa manɛ dang wu jĩng kpang ya? Zang ɓɔɔ ri kɔɔ ruu anang zang tɔ̃ɔ keɓe ka tĩng, rɛɛ daa manɛ ti nyɔ̀kɔ̀ ri vɔrɔ. Wee nɔɔ ti nyɔ yuu ɓiɓɛ tɔ, zang nyɔ wu vɔrɔ tɔ.

⁵³Nɔkɔ tà nyaa dannang Laa, ɓɔɔ zang nyaa shonang Laa ɓɔɔ ka lapa a ruu ɓɛɛ. A nɔɔ dũ̀ng kaa takpang.”

⁵⁴Ɓɔɔ zang ɓɔɔ ri jɛ̃ɛ zang ruu, ri tãa vuu ɓɔɔ Istifanu kɔɔ ɓɛɛ, gnvɔ shaa ri, ri shaa tãri.

⁵⁵Suru Laa a ka bii Istifanu, ka ruu nɔngkɔ, tuu jĩng ka lapa, a zi bannang Laa nɛɛ Yeesɔ ɓɔɔ shii ka kagn ɓiɓɛ ɓɛɛ.

⁵⁶A kɔɔyi tɔɔ, “Nɔɔ zirɛ, n zirɛ lapa puuyi, a Jaa Shɔnzang shii ka nakn Laa.”

⁵⁷Ri mɛɛ nyaa ka lapa, a ri huuru shoo ɓarɛ nɛɛ saa naa. A ri ká ka yuu ɓiɓɛ dɔ̃ɔ gbete.

⁵⁸Ri nwangsɛ wu nɛɛ yeti gari, a ri luku wu nɛɛ tari. Zang ɓɔɔ ri zi vuu keɓe jĩng ka bii ri tɛ̃̀ɛ, jasang ɓɔɔ bɛ̀ɛ́ ka nɔng, zang ɓaa wu nɛɛ Shaawulu fɔ̃ɔrɔ ɓarɛ nɛɛ wu gãng jĩng kagn.

⁵⁹Ri luku Istifanu kana, a gaa Laa tɔɔ, “Kpanti Yeesɔ, ta suru mɛɛ ta.”

⁶⁰A tang nɛɛ gutu, mɛɛ nyaa ka lapa tɔɔ, “Kpanti, mɔɔ yiti vuu shi kpang kɔ ri palɛ ɓee ka yeti ɓaaɓɛ kpang.” Kɔɔ vuu keɓe tɔ a vɔ kati.