Read mumuye Rooma 1 Bible Online

Rooma 1 - mumuye bible

Rooma 1

¹Labeenang keɓe, a nɛɛ bii mɛɛ nkɔ Bulu ɓɔɔ n jaafoo Yeesɔ Kirisi ɓɛɛ. A n ti zang shonang ɓɔɔ Yeesɔ zɔ̃ng m, a shing m nɛɛ, n kɔ̀ɔrɔ̀ zang Ruu Tɔ̃ɔ Laa ɓɛɛ.

²Ruu Tɔ̃ɔ keɓe, Laa á nyaa ɓiɓɛ tɔ dòo tɛ̃ɛ tɛ̃ɛ ka tĩng, nɛɛ bii rɛɛ zang nyaa shonang ɓiɓɛ, a zang ti bee ka yeti labeenang ɓiɓɛ.

³Ruu keɓe, ɓi ka yuu Jaa ɓiɓɛ Kpanti ɓuru Yeesɔ Kirisi. Ka bii shɔnzang, wu ɓi zɔ̃ng Dawuda.

⁴Ka nwannang ɓiɓɛ ɓɔɔ shi kpang ɓi kagn kpang ɓɛɛ, Laa túsù nɛɛ naa vuu palɛnang ɓiɓɛ nɛɛ, Yeesɔ Kirisi kɔ Jaa ɓiɓɛ, ka ɓɔɔ wu wisi wu paa nɛɛ saa ɓɛɛ.

⁵Laa a ruu gbalang nɛɛ bii ɓiɓɛ kɔ, a ruu nwàng zang shonang ɓiɓɛ ka ruu Yeesɔ, tɔ̀ɔ, rúu gɔ̃ zang koolaa nandon ri shing danggn, ri ti dũng nyaa ɓiɓɛ.

⁶Ɓɔɔ nɔɔ zang Rooma, nɔɔ jong kagn. Nɔɔ doo ka teteng zang ɓɔɔ Laa zɔ̃ngkɔ ri, nɛɛ ri nwang zang Yeesɔ Kirisi ɓɛɛ kɔ.

⁷Ka ruu nɔngkɔ, n bèé nɔɔ nandon laa keɓe, ɓɔɔ nɔɔ ka gari Rooma, ɓɔɔ Laa kasɛ ruu manɛ katɔ, a zɔ̃ngkɔ nɔɔ nɛɛ nɔ́ɔ naa nwang zang ɓiɓɛ ɓɛɛ. Daa ɓuru Laa nɛɛ, Kpanti ɓuru Yeesɔ Kirisi ri yi nɔɔ naa ka bii, a ri ti shing yeti manɛ ri valɛ katɔ.

⁸N gaayu, n zãa Laa mɛɛ nɛɛ bii Yeesɔ Kirisi, ka ruu ɓɔɔ, zang koo nandon, ri rang ruu ka yuu danggn shinang manɛ ɓɛɛ.

⁹Laa ɓɔɔ n pàlɛ́ wu shonang, nɛɛ suru mɛɛ ka ɓɔɔ n kɔɔrɔ zang Ruu Tɔ̃ɔ Jaa ɓiɓɛ, zi tɔ nɛɛ n gaa wu ka ruu manɛ, n yaa diki kpang.

¹⁰N gaayi, diki diki nɛɛ wu nɛɛ kasɛ tɔ, wu yàa m gbalang jong, n daa leng jĩng ka nɔɔ diki wu bee takpang.

¹¹N kasɛ nɔɔ zinang katɔ gbãng gbãng, tɔ̀ɔ, n a nɔɔ vuu ɓɔɔ Suru Laa alɛ zang ɓɛɛ. Tɔ̀ɔ, wu mã nɔɔ danggn kati.

¹²N tɔɔ, n kɔɔyi nɛɛ, ruu mã nɔɔ zɔɔ danggn, nɛɛ danggn ɓɔɔ ruu shing ka bii Laa ɓɛɛ.

¹³Manzung, ɓɔɔ ri dũng doo Laa kɔ ɓɛɛ, n kasɛ nɔɔ zi vuu keɓe. N mang diki diki nɛɛ n daa leng nɔɔ, a vuu ɓɔɔ zãa m kagn. N kasɛ n shing zang ɓɔɔ ka teteng manɛ, ri dũng Laa naa ɓɔɔ n wàlɛ̀ zang ɓɔɔ ri dũng Laa ka teteng zang nimbang, ɓɔɔ ri ɓarɛ zang Yahudi kpang ɓɛɛ.

¹⁴N m zang ɓɔɔ pàlɛ́ zang piti shonang ɓɛɛ, zang Heleni nɛɛ zang ɓɔɔ ri zang Heleni kpang ɓɛɛ, zang ɓɔɔ ri bèe laa katɔ nɛɛ zang ɓɔɔ ri bèe laa kpang ɓɛɛ.

¹⁵Ka ruu nɔngkɔ, bii shaa m, n kasɛ n tɔɔ, n naa rang nɔɔ ɓɔɔ nɔɔ kaa gari Rooma, Ruu Tɔ̃ɔ Laa jong.

¹⁶Yusɛ̃ɛ Ruu Tɔ̃ɔ Laa kɔɔnang tuu m kpang. Ruu Tɔ̃ɔ Laa kɔ naa vuu palɛnang Laa ɓɔɔ wu ta yuu zang piti, ɓɔɔ ri shing danggn tɔ nɛɛ mani ɓɛɛ. Zang Yahudi kɔ shɔɔnang, wu tɛɛ zang ɓɔɔ zang Yahudi kpang ɓɛɛ.

¹⁷Ka ruu ɓɔɔ, Ruu Tɔ̃ɔ Laa kɔ tusu zang naa ɓɔɔ Laa shingnɛ, zang wu nwang zang tɔ̃ɔ ka tĩng ɓiɓɛ ɓɛɛ. Nwannang tɔ̃ɔ ɓɔɔ gaayu nɛɛ danggn shinnang, wu waa nyaa nɛɛ mani ɓɛɛ. Naa ɓɔɔ Labeenang Laa kɔɔ ɓɛɛ nɛɛ, “Zang ɓɔɔ ɓi zang tɔ̃ɔ ka tĩng Laa, ka ruu danggn ɓɔɔ wu shing ka bii Laa ɓɛɛ, wukɔ walɛ suru bii.”

¹⁸Gnvɔ Laa tusu bii tɔ nɛɛ lapa, ka yuu zang piti ɓɔɔ ri palɛ vuu shi kpang, nɛɛ zang ɓɔɔ yeti ɓarɛ shi kpang, ɓɔɔ ri kasɛ nɛɛ zang zi vuu ɓɔɔ niizang ka yuu Laa kpang, nɛɛ yeti shi kpang ɓarɛ ɓɛɛ.

¹⁹Laa dang ri jĩng ka ruu ɓɔɔ vuu ɓɔɔ naa zang zi ka yuu Laa, ri zi tɔ ɓɛɛ. Ka ruu ɓɔɔ, Laa tusu ri tɔ ɓɛɛ.

²⁰Ɓɔɔ bɛ̀ɛ́ Laa mãa koo gn kpang, vuu ɓɔɔ zang zi kpang ka yuu ɓiɓɛ, naa vuu palɛnang ɓiɓɛ nɛɛ nwannang ɓiɓɛ, ri zi tɔ gbayi gbayi. Zang ri zili vuu keɓe katɔ ka vuu ɓɔɔ Laa mãarɛ ɓɛɛ. Ka ruu nɔngkɔ, vuu ɓɔɔ ri jãa nyaa kagn ɓɛɛ kpang.

²¹Ka ruu ɓɔɔ, ri zi Laa tɔ, a ri a wu bannang kaa takpang, nɛɛ wukɔ Laa kpang. Ri ti zã̀a wu kpang. A rɛ̃rɛnang ɓarɛ sɔ̀ɔ gbalang kpang. A yeti ɓarɛ tɔɔyi, ri zi vuu ɓɔɔ kaa takpang.

²²Ri tɔɔ ri zũng katɔ, a ɓeekpang, ri ɓarɛ shoko.

²³Ka ɓɔɔ ri nɛ̀ɛ́ bang Laa ɓɔɔ nwang ɓi dòndòng, ri bang ɓarɛ vuu ɓɔɔ shɔnzang palɛ, nwàng naa shɔnzang ɓɔɔ vɔ katɔ, nɛɛ jaaning, nɛɛ yɔpɔ jĩngti, a ɓɔɔ rɛɛ vuu ɓɔɔ ri gɔ̃ nɛɛ buru ɓɛɛ.

²⁴Ka ruu ɓɔɔ, shɔnzang ri shoko nɔngkɔ, Laa yaa ri, ri palɛ vuu ɓɔɔ sãnsãnrãng ɓɔɔ yeti ɓarɛ kasɛ ɓɛɛ. A ri pálɛ̀ vuu yusɛ̃ɛ nɛɛ zɔɔ.

²⁵Ri kɔ̃sɔ ruu niizang ɓɔɔ ka yuu Laa nɛɛ sèé. Ri bang vuu ɓɔɔ Laa mã̀ayi, a ri pálɛ̀ wu shonang, ri yaa Laa ɓɔɔ zang dɔɔ wu dòndòng ka nɔngkɔ. Nɔ́ngkɔ̀.

²⁶Ka ruu nɔngkɔ, Laa yaa ri nɛɛ ri palɛ vuu yusɛ̃ɛ ɓɔɔ yeti ɓarɛ kasɛ ɓɛɛ. Zang soro ɓarɛ ri yaa roonang nɛɛ zang varɛ, ri rooro kaa nɛɛ zang soro kɔ doori. Vuu ɓɔɔ zang pálɛ̀ gngn nɔngkɔ kpang ɓɛɛ.

²⁷Zang varɛ ri palɛ doo nɔngkɔ, ri yaa roonang tɔ nɛɛ zang soro ri rooro kaa doo nɛɛ zang varɛ kɔ. Zang varɛ ri palɛ vuu yusɛ̃ɛ nɛɛ zɔɔ, ka ruu nɔngkɔ, zang dang ri jĩng naa ɓɔɔ dàá ri ɓɛɛ, ka ruu vuu shi kpang ɓɔɔ ri pálɛ̀ ɓɛɛ.

²⁸Ka ruu ɓɔɔ, shɔnzang ri kasɛ nɛɛ ri yítì vuu ɓɔɔ niizang ɓɔɔ zang zi ka yuu Laa ka yeti ɓarɛ kpang. Laa yaa ri tɔ ri rɛ̃rɛ vuu ɓɔɔ shi kpang, tɔɔ ri palɛ vuu ɓɔɔ daa naa palɛnang kpang ɓɛɛ.

²⁹Yeti ɓarɛ ɓi gnvɔ kɔ shɛ̃ɛning, ka zɔ̃ng zɔ̃ng, nɛɛ vuu shi kpang, ri kasɛ vuu ɓɔɔ ka naa zang ɓɛɛ. Ri pàlɛ́ zɔɔ shi kpang. Ri kaa sũnyaa dɔɔli, ri nyɔ zang vɔrɔ, ri gaarɛ nyaa. A ri nwãarɛ zɔɔ. Ri rɛ̃rɛ vuu shi kpang ka yuu zang diki diki, ri rang zang.

³⁰Ri rang yee shi kpang ka yuu zɔɔ, ri kasɛ Laa kpang, ri tuu yuu ɓarɛ dɔɔli, ri ti kɔɔrɔ ruu bang bang ka yuu ɓarɛ. Ri nwangsɛ vuu shi kpang ka zɔ̃ng zɔ̃ng, ri ɓaa shoo ka nyaa zang ɓɔɔ ri yi ri ɓɛɛ kpang.

³¹Ri shoko, ri pálɛ̀ vuu ɓɔɔ ri kɔɔyi nɛɛ ri palɛ ɓɛɛ kpang, ri kasɛ ruu zang kpang, gn zang ti kɔng ri kpang.

³²Ri zi tɔ nɛɛ nyaa dannang Laa kɔɔyi nɛɛ zang ɓɔɔ ri palɛ vuu ɓɔɔ naa weɓe, daa naa ɓɔɔ zang nyɔ ri vɔrɔ ɓɛɛ. Ri huu shoo wu ka nɔng palɛnang kɔ shɛ̃ɛning kpang, ri tãa tĩnang zang ɓɔɔ ri pálɛ̀ vuu keɓe ɓɛɛ.