Read mumuye Rooma 10 Bible Online

Rooma 10 - mumuye bible

Rooma 10

¹Rɛɛ manzung, n kasɛ ka yeti mɛɛ gbãng gbãng, a n ti gaa Laa ka yuu zang mɛɛ zang Yahudi, nɛɛ Laa wu ta yuu ɓarɛ jong.

²N kɔɔ ruu katɔ ka yuu ɓarɛ nɛɛ, ri kasɛ katɔ gbãng gbãng nɛɛ ri pàlɛ́ Laa shonang. A ri zi gbalang ɓɔɔ ri pàlɛ́ Laa shonang kaa tɔ̀ɔ́ tɔ̃ɔ kpang.

³Ka ruu ɓɔɔ, ri zi gbalang ɓɔɔ risi zang, zang nwang zang tɔ̃ɔ ka tĩng Laa ɓɛɛ kpang. A ri kãa gbalang ɓɔɔ ri nwang zang tɔ̃ɔ ka tĩng ɓiɓɛ kaa nɛɛ yuu ɓarɛ. Ri tà gbalang ɓɔɔ Laa shìng zang, nɛɛ zang nwang zang tɔ̃ɔ nɛɛ mani ka tĩng ɓiɓɛ ɓɛɛ kpang.

⁴Ka ruu ɓɔɔ, Kirisi shing tɔ naa vuu palɛnang nyaa dannang Laa di nyaa tɔ ɓɛɛ. Zang ɓɔɔ nɛɛ shing danggn ka bii Laa, Laa risi wu kaa tɔ wu nwang zang tɔ̃ɔ ka tĩng ɓiɓɛ.

⁵Musa bée naa ɓɔɔ nyaa ɓɔɔ Laa dangnɛ shingnɛ zang nwáng zang tɔ̃ɔ ka tĩng Laa tɔ́ɔ, “Naa mɔɔ tɔɔ mɔɔ nwang ningkãari, palɛ vuu piti ɓɔɔ nyaa dannang Laa kɔɔ ɓɛɛ”.

⁶A ka yuu naa ɓɔɔ Laa risi zang ri nwang zang tɔ̃ɔ tɔ ka tĩng ɓiɓɛ ka ruu danggn ɓɔɔ ri shing ka bii ɓiɓɛ, Musa kɔɔyi nɛɛ, “Mɔ́ɔ hɛ̃ɛ yuu ɓaaɓɛ kpang nɛɛ, Ɓu wi vangnɛ daa ka lapa wiya?” (Wu daa atɛ Kirisi ka tipi.)

⁷Mɔɔ ti hɛ̃ɛ yuu ɓaaɓɛ kpang nɛɛ, ɓu wi daa ka koo ɓɔɔ ka tipi dii wiya? (Wu daa nwangsɛ Kirisi nɛɛ saa.)

⁸Vuu ɓɔɔ zang kɔɔ keɓe, “Ruu ɓɔɔ Laa kɔ̀ɔ ɓɛɛ, ɓi nɛɛ mɔɔ naabm, ka yeti nyaa ɓaaɓɛ, ti kagn ka yeti ɓaaɓɛ.” Ɓi ruu ɓɔɔ ruu kɔɔ nɔɔ, nɛɛ tɔ̀ɔ, nɔɔ shing danggn ɓɛɛ kɔ.

⁹Naa mɔɔ kɔɔ nɛɛ nyaa ɓaaɓɛ nɛɛ, “Yeesɔ kɔ Kpanti,” a mɔɔ ti shing danggn nɛɛ Laa wisi wu paa nɛɛ sàa. Laa ta yuu ɓaaɓɛ katɔ.

¹⁰Ka ruu ɓɔɔ, zang nɛɛ shing danggn nɛɛ yeti, tɔ̀ɔ Laa wu risi zang, zang nwang zang tɔ̃ɔ ka tĩng ɓiɓɛ ɓɛɛ. Zang nɛɛ kɔɔ tɔ nɛɛ nyaa zang, Laa wu ti, ta yuu zang kati.

¹¹Labeenang Laa kɔɔyi tɔ̀ɔ, “Zang piti ɓɔɔ nɛɛ shing danggn ka bii ɓiɓɛ yusɛ̃ɛ tuu wu kpang.”

¹²Ruu keɓe muku zang piti, ka ruu ɓɔɔ, gbalang ɓɔɔ zang ta yuu zang Yahudi nɛɛ zang ɓɔɔ ri zang Yahudi kpang, ɓi gbete ɓɛɛ. Laa ɓi wukɔ Kpanti zang piti, shing zang piti ɓɔɔ ri gaa wu, ri walɛ vuu tɔ̃ɔ dɔɔli.

¹³Naa ɓɔɔ labeenang Laa kɔɔyi ɓɛɛ tɔɔ, “Zang piti ɓɔɔ nɛɛ gàa Laa nɛɛ nung Laa, Laa ta yuu ɓiɓɛ katɔ.”

¹⁴A zang nɛɛ shing danggn ka bii Laa kpang, zang palɛ biya zang gaa wu, wu ta yuu zang viya? A zang shing danggn biya ka bii zang ɓɔɔ zang tãa ruu ɓiɓɛ gngn kpang viya? Zang nɛɛ kɔɔ katɔ kpang, zang palɛ biya zang tãa ruu ka yuu ɓiɓɛ, tɔ̀ɔ, zang shing danggn kati viya?

¹⁵A zang ɓɔɔ yuu paa biya wu daa kɔɔ zang Ruu Laa, zang nɛɛ shong wu katɔ kpang ɓɛɛ viya? Labeenang Laa kɔɔyi tɔɔ, “Zang ɓɔɔ ri à Ruu Tɔ̃ɔ kɔɔnang, doo ɓarɛ shili dɔɔli.”

¹⁶A kaa tɔ̀ɔ́ zang piti ri dũ̀ng vuu ɓɔɔ Ruu Tɔ̃ɔ Laa kɔɔ ɓɛɛ kpang. Ka ruu ɓɔɔ Ishaya kɔɔ ka yeti Labeenang ɓiɓɛ tɔɔ, “Kpanti, zang ɓɔɔ ri shing danggn ka ruu ɓɔɔ ruu kɔɔ ri ɓɛɛ kpang.”

¹⁷Ka ruu nɔngkɔ, zang nɛɛ tãa ruu ɓɔɔ zang kɔɔ tɔ, zang shing danggn kati. Zang tã̀á ruu keɓe, ka ɓɔɔ zang kɔɔ ruu Kirisi ɓɛɛ.

¹⁸N hɛ̃ɛ katɔ ɓɛɛ, Ri tã̀a Ruu Tɔ̃ɔ Laa kpang niizang ya? Ri tã̀a katɔ. Labeenang Laa kɔɔyi tɔɔ, “Ri kɔɔ ruu keɓe ka dalɛ koo nandon. Ruu ɓarɛ daa ka dĩiri ɓɔɔ koo waa nyaa ɓɛɛ.”

¹⁹Ń ti hɛ̃ɛ tɔkn ɓɛɛ, zang Isirela ri zi vuu ɓɔɔ Ruu Tɔ̃ɔ bìí kɔɔ kpang niizang ya? Musa kɔ kasɛ nyaa ruu keɓe shɔɔnang tɔɔ, “N shing nɔɔ zang Isirela nɔɔ kaa sũnyaa zang ɓɔɔ ri daa naa kpang ɓɛɛ. N shing nɔɔ, gnvɔ wu shàa nɔɔ nɛɛ zang ɓɔɔ ri zi vuu kpang tingkiring ɓɛɛ”.

²⁰Ishaya kaa vɔrɔ kpang, kɔɔyi tɔɔ, “Zang ɓɔɔ ri kãa m kpang rikɔ ĩi m kaa jong. N ti nwáng nyaa ka zang ɓɔɔ bɛ̀ɛ́ ri hɛ̃ɛ nɔng mɛɛ kpang ɓɛɛ”.

²¹Ɓɔɔ wu a ka yuu zang Isirela, Ishaya kɔɔyi tɔɔ, “N dĩ̀i zang ɓɔɔ ri taarɛ yuu dɔɔli, zang ɓɔɔ ri ɓaa shoo ka nyaa mɛɛ kpang ɓɛɛ, naa, laa hãa nyaa nɛɛ mani.”