Read mumuye Rooma 16 Bible Online

Rooma 16 - mumuye bible

Rooma 16

¹N kasɛ nɔɔ zirɛ nɛɛ Fibi, jaa soro ɓɔɔ shing danggn dòo naa ɓɔɔ ruu shing kɔ, ɓi zang tɔ̃ɔ. Fibi keɓe, palɛ zang Laa shonang ka gari Sensheriya.

²Nɔ́ɔ ta wu naa zang ɓɔɔ ɓi ɓɔɔ Laa ɓɛɛ, naa ɓɔɔ zang Laa ri ta zɔɔ ɓɛɛ. Nɔ́ɔ a wu vuu ɓɔɔ wu kasɛ ka naa manɛ ɓɛɛ. Ka ruu ɓɔɔ, pàlɛ̀ zang tɔ̃ɔ tɔ dɔɔli a ti pàlɛ̀ m jong ɓɛɛ.

³Nɔɔ jèe m Pirisila nɛɛ ɓeevɛ Akpiila nyaa. Zang ɓɔɔ ruu pálɛ̀ Yeesɔ Kirisi shonang nɛɛ ri ɓɛɛ.

⁴Ri á zang yuu ɓarɛ nɛɛ, zang nyɔ rikɔ jong vɔrɔ, ka nung ɓɔɔ zang nyɔ m ɓɛɛ. N zãa ri tɔ gbãng gbãng. Wu nkɔ zã̀á ri ka bm kpang, zang ɓɔɔ bɛ̀ɛ́ ri zi Laa kpang, a ri dũng kaa Laa nandon, ri zã̀á ri jong.

⁵Nɔɔ jèe m zang ɓɔɔ ri dũng Laa ɓɔɔ ri kpálɛ̀ yuu ka gãa ɓarɛ nyaa jong. Nɔ́ɔ jèe m masang Abinɛtu ɓɔɔ n kasɛ wu dɔɔli ɓɛɛ nyaa. Wukɔ zang tĩng shɔɔnang ka tipi Asiya ɓɔɔ shing danggn ka bii Yeesɔ Kirisi ɓɛɛ.

⁶Nɔɔ jèe Marayamu ɓɔɔ palɛ shonang tɔ gbãng gbãng ka ruu manɛ ɓɛɛ, nyaa.

⁷Nɔ́ɔ jee Adaranika nɛɛ Yuniya, ɓɔɔ ri doo zang Yahudi naa nkɔ, ɓɔɔ zang mã ri nɛɛ n ka sãa ɓɛɛ nyaa. Zang zi ri nung tɔ gbãng gbãng ka teteng rɛɛ zang shonang Kirisi. Rikɔ gaayu Laa dũnnang shɔɔnang, a n naa dũngnɛ.

⁸Nɔɔ jèe m masang Ampiliyalu ɓɔɔ n kasɛ wu gbãng gbãng nyaa, ka ruu ɓɔɔ, wu zang Kpanti Kirisi naa nkɔ ɓɛɛ.

⁹Nɔ́ɔ jèe m Urubanu zang ɓɔɔ ruu palɛ shonang Kirisi nɛɛ wu ɓɛɛ nyaa. Nɔɔ ti jèe m masang Isitaki ɓɔɔ n kasɛ wu dɔɔli ɓɛɛ nyaa.

¹⁰Nɔɔ jèe m Abali ɓɔɔ zang ri zi tɔ nɛɛ palɛ Kirisi shonang nɛɛ yeti gbete ɓɛɛ nyaa. Nɔ́ɔ ti jèe m zang ɓɔɔ ri ka gãa Aristobulu ɓɛɛ nyaa.

¹¹Nɔɔ jèe m Hirodiyɔn nyaa. Hirodiyɔn ɓi doo zang Yahudi kɔ naa nkɔ. Nɔ́ɔ ti jèe m zang ɓɔɔ ri dũng doo Kpanti Yeesɔ kɔ ɓɔɔ ri ka gãa Narikisa ɓɛɛ nyaa.

¹²Nɔɔ jèe m rɛɛ Tarafina nɛɛ Tarafusa nyaa. Ri pàlɛ́ Laa doo shonang kɔ. Nɔ́ɔ ti jèe masang Barasisa ɓɔɔ n kasɛ wu dɔɔli ɓɛɛ nyaa. Ɓi jaa soro ɓɔɔ pálɛ́ shonang Kpanti Yeesɔ tɔ dɔɔli ɓɛɛ.

¹³Nɔɔ jèe m Rufu nyaa. Zang ɓɔɔ ɓa zang piti nɛɛ shonang Kpanti Yeesɔ palɛnang ɓɛɛ. Nɔ́ɔ ti jèe m ɓéenàa ɓɔɔ nwang kaa doo nàá mɛɛ kɔ ɓɛɛ, nyaa.

¹⁴Nɔɔ jèe m rɛɛ Asekiritu, nɛɛ Filigon nɛɛ Hami nɛɛ Patoroba nɛɛ Hama nɛɛ rɛɛ zang piti ɓɔɔ ri dũng dòo Kpanti Yeesɔ kɔ, ɓɔɔ ri nɛɛ zɔɔ ɓɛɛ, nyaa.

¹⁵Nɔɔ jèe m rɛɛ Filologu nɛɛ Juliya, a ɓɔɔ Neru nɛɛ ɓéenàa, a Olimpa nɛɛ zang piti ɓɔɔ ri dũng dòo Laa kɔ, ɓɔɔ ri nɛɛ zɔɔ ɓɛɛ nyaa.

¹⁶Nɔɔ jèe zɔɔ nyaa, nɔɔ kɔ̃ng zɔɔ katɔ, naa ɓɔɔ zang ɓɔɔ ri dũng Kirisi ri palɛ ɓɛɛ. Zang ɓɔɔ ri dũng doo Kirisi kɔ nɛɛ nɔng piti piti ri jée nɔɔ nyaa.

¹⁷Manzung, ɓɔɔ ri dũng doo Laa kɔ ɓɛɛ, n gaa nɔɔ katɔ, nɔɔ gãng jĩng ka zang ɓɔɔ ri basɛ teteng zang, a ri ti shing zang ɓɔɔ ri shing danggn, ri yaa gbalang Laa ɓɛɛ. Ri tusu nɔɔ vuu náa ɓɔɔgn naa ɓɔɔ zang tusu nɔɔ tɔ ɓɛɛ kpang. Nɔɔ yaa gbalang ɓarɛ katɔ.

¹⁸Ka ruu ɓɔɔ, zang ɓɔɔ ri palɛ naa weɓe ri pàlɛ́ ɓarɛ Kpanti ɓuru Kirisi shonang kpang, ri kãa ɓarɛ ɓɔɔ buru ɓarɛ. Ri nwãarɛ zang ɓɔɔ ri zi vuu kpang nɛɛ nyaa ɓɛlɛɓɛlɛ, nɛɛ nyaa tĩnang ɓarɛ.

¹⁹Zang piti ri tãa nyaa naa ɓɔɔ nɔɔ yiti Ruu Laa gbãng gbãng ɓɛɛ tɔ. Ka ruu nɔngkɔ, n tãa tĩnang manɛ. N kasɛ nɔɔ zũng katɔ ka ɓɔɔ nɔɔ palɛ vuu tɔ̃ɔ ɓɛɛ. Ruu manɛ wu hãa kagn nɛɛ vuu shi kpang, kpang.

²⁰Laa ɓɔɔ shing ruu, ruu nwang ka nyaa zɔɔ naa lasɛ naa vuu palɛnang Sheetang ditɔ, wu shingnɛ nɔ́ɔ náa Sheetang kaa nɛɛ doo. N gaayi Kpanti ɓuru Yeesɔ Kirisi wu palɛ nɔɔ tɔ̃ɔ.

²¹Timoti zang ɓɔɔ ruu palɛ shonang nɛɛ wu jée nɔɔ nyaa. Lukiyu, nɛɛ Jaasong a ɓɔɔ Susibatara ɓɔɔ ri doo zang Yahudi kɔ, ri jée nɔɔ nyaa jong.

²²Nkɔ Tatiyu ɓɔɔ n bèe labeenang keɓe, n jée nɔɔ nyaa jong n m zang ɓɔɔ dũng doo Kirisi kɔ ɓɛɛ.

²³Gaayu, zang ɓɔɔ n nwang ka gãa ɓiɓɛ, ɓɔɔ zang ɓɔɔ ri dũng Kirisi ri kpalɛ zɔɔ ka gãa ɓiɓɛ ɓɛɛ, jée nɔɔ nyaa jong. Erasitu ɓɔɔ zang gari ri shing saka ka naa ɓiɓɛ, nɛɛ manzung ɓuru Kpaatu ɓɔɔ dũng doo Kirisi kɔ, ri jée nɔɔ nyaa.

²⁴Kpanti ɓuru Yeesɔ Kirisi wu palɛ nɔɔ tɔ̃ɔ nandon. Nɔngkɔ.

²⁵Ruu dɔɔ Laa, ɓɔɔ zunung ɓɔɔ wu shingnɛ nɔɔ shing danggn gbãng gbãng, ka doo Ruu Tɔ̃ɔ Yeesɔ Kirisi ɓɔɔ n kɔɔ ɓɛɛ. Bɛ̀ɛ́ zang waasɛ Ruu Tɔ̃ɔ keɓe katɔ, ka sáa dɔɔli ɓɔɔ ɓa ɓɛɛ, a zang nwangsɛ tɔ kati.

²⁶A kãntang keɓe labeenang ɓɔɔ zang nyaa shonang Laa ri beere shing tɔ, ruu niizang nwangsɛ bii tɔ. Laa ɓɔɔ nwàng ɓi ningkãari dòndòng, ti kɔɔ tɔ nɛɛ zang koo piti ri zi ruu ɓɔɔ niizang keɓe. Tɔ̀ɔ, zang piti ri ɓaa shoo kaa nyaa Laa, ri shing danggn kaa bii ɓiɓɛ.

²⁷Ruu dɔɔ Laa ɓɔɔ wukɔ gbete, ɓɔɔ zũng dɔɔli ɓɛɛ dòndòng, ka ruu vuu ɓɔɔ Yeesɔ Kirisi palɛ ɓɛɛ. Nɔngkɔ.