Read mumuye Rooma 2 Bible Online

Rooma 2 - mumuye bible

Rooma 2

¹Masang, mɔɔ kɔɔ zang katɔ nɛɛ zang ri palɛ vuu shi kpang tɔ ya? Naa mɔɔ doo zang kiya, daa naa ɓɔɔ mɔɔ kɔɔ zang ɓɔɔ nɔngkɔ kpang. Ka ruu ɓɔɔ naa mɔɔ dɔng zang ɓɔɔ ruu ka yuu vuu ɓɔɔ ri palɛ, a mɔɔ palɛ doo vuu ɓɔɔ ri palɛ ɓɛɛ kɔ, mɔɔ dɔng ɓaa yuu ɓaaɓɛ ruu.

²Ruu zi tɔ nɛɛ, naa ɓɔɔ Laa dɔng zang ɓɔɔ ri palɛ vuu ɓɔɔ naa weɓe ruu, palɛ ɓi tɔ̃ɔ.

³A mɔkɔ masang, mɔɔ palɛ doo vuu ɓɔɔ mɔɔ dɔng zang ruu ka yuu ɓiɓɛ ɓɛɛ kɔ ya? Mɔɔ kɔɔ ɓaa nɛɛ Laa naa jɛ̃ɛ mɔɔ ruu kpang ya?

⁴Mɔɔ rɛ̃̀rɛ̀ waasɛ̃ ka yuu Laa kpang, ka ruu ɓɔɔ, palɛ mɔɔ tɔ̃ɔ dɔɔli, a dang mɔɔ jĩng tantɛnang kpang, a ti mã danggn nɛɛ mɔɔ dɔɔli ɓɛɛ ya? Laa pàlɛ́ mɔɔ tɔ̃ɔ, nɛɛ tɔ̀ɔ mɔɔ kɔ̃sɔ yeti ɓaaɓɛ kati.

⁵Wee nɔɔ kpãa nyaa nɔngkɔ, a nɔɔ ti kɔ̃sɔ yeti manɛ kpang, nɔɔ kpàlɛ́ yuu manɛ ɓi gnvɔ Laa. Nɔɔ shingnɛ, jĩng ɓɔɔ Laa naa dang nɔɔ, wu bangnɛ ka diki ɓɔɔ gnvɔ ɓiɓɛ, nɛɛ ruu tɔ̃ɔ ɓɔɔ wu jɛ̃ɛ zang ɓɛɛ, naa nwangsɛ bii kagn ɓɛɛ.

⁶Ka ruu ɓɔɔ, Laa naa sɔ̀ɔrɔ́ zang ɓu doo ka doo vuu ɓɔɔ zang ɓu pálɛ̀ ɓɛɛ.

⁷Zang ɓɔɔ ri yi tĩng, ri palɛ ɓarɛ tɔ̃ɔ kɔ sasak, nɛɛ tɔ̀ɔ, Laa wu a ri bannang, wu dɔ̀ɔ ri, ri ti nwáng ningkãari dòndòng. Laa naa a ri suru bii ɓɔɔ waa nyaa kpang ɓɛɛ.

⁸Zang ɓɔɔ ri kasɛ yuu ɓarɛ dɔɔli, ri kasɛ ruu ɓɔɔ niizang kpang. Ri dũng vuu ɓɔɔ shi kpang ɓɛɛ. Gnvɔ naa shàá Laa nɛɛ ri, wu dang ri jĩng.

⁹Zang nandon ɓɔɔ ri palɛ vuu shi kpang, ri naa dang jĩng dɔɔli. Zang gaayu nɛɛ zang Yahudi kɔ shɔɔnang, wu tɛɛ zang ɓɔɔ ri zang Yahudi kpang ɓɛɛ.

¹⁰A Laa naa a zang ɓɔɔ ri pálɛ̀ vuu tɔ̃ɔ kɔ bannang, wu ti dɔɔ ri, wu ti shing ri, ri nwáng ka nyaa zɔɔ. Gaayu nɛɛ zang Yahudi kɔ shɔɔnang, wu naa tɛɛ zang ɓɔɔ ri zang Yahudi kpang ɓɛɛ.

¹¹Ka ruu ɓɔɔ, Laa jɛ̃ɛ zang ruu ɓi jong gn dang gbete kpang ɓɛɛ.

¹²Zang ɓɔɔ ri zang Yahudi kpang, ɓɔɔ ri zi nyaa dannang Laa kpang ɓɛɛ, ɓɔɔ ri palɛ vuu shi kpang, ri shaarɛ doo nɛɛ mani. Ka wee zang jɛ̃ɛ ri ruu ka doo nyaa ɓɔɔ Musa dangnɛ kpang ɓee. Zang jɛ̃ɛ ɓi zang Yahudi ɓɔɔ ri palɛ vuu shi kpang ruu ka doo nyaa ɓɔɔ Musa dang ɓɛɛ, ka ruu ɓɔɔ, ri zi nyaa ɓɔɔ Musa dangnɛ ɓarɛ tɔ ɓɛɛ.

¹³Ka ruu ɓɔɔ, zang raa zang tɔ̃ɔ ka ting Laa, wu ka rúu Ruu Laa ɓɔɔ zang tãa ɓɛɛ kɔ shɛ̃ɛning kpang. Ɓi zang ɓɔɔ ri palɛ vuu ɓɔɔ Laa dang nyaa nɛɛ zang palɛ ɓɛɛ kɔ, Laa ɓáa ri nɛɛ ri zang tɔ̃ɔ.

¹⁴Zang ɓɔɔ ri zang Isirela kpang, ri zi nyaa ɓɔɔ Laa dang ɓɛɛ ɓarɛ kpang. A ri nɛɛ pálɛ̀ vuu ɓɔɔ Laa dang nyaa ka yuu ɓiɓɛ nɛɛ zang palɛ ɓɛɛ, rikɔ nwàng kaa nyaa dannang nɛɛ yuu ɓarɛ. A ri zi nyaa ɓɔɔ Laa dang ɓɛɛ kaa takpang.

¹⁵Vuu ɓɔɔ ri palɛ kɔ túsù nɛɛ, vuu ɓɔɔ Laa dang nyaa ka yuu ɓiɓɛ kagn yeti ɓarɛ. Yeti ɓarɛ ti tusu doo nɔngkɔ. Ka ruu ɓɔɔ, lee ɓɔɔ rɛ̃rɛnang ɓarɛ kɔɔ ri nɛɛ ri palɛ vuu shi kpang tɔ, lee ɓɔɔ wu ti kɔ̀ɔ ri nɛɛ, vuu ɓɔɔ ri palɛ ɓɛɛ tɔ̃ɔ ɓɛɛ.

¹⁶Ka diki keɓe, Laa naa jɛ̃ɛ zang ɓu ruu ka yuu vuu ɓɔɔ zang ɓu waasɛ katɔ ɓɛɛ. Jɛ̃ɛ ruu keɓe, nɛɛ bii Yeesɔ Kirisi naa ɓɔɔ n kɔɔ ka Ruu Laa kɔ n kɔ̀ɔrɔ̀ nɔɔ ɓee.

¹⁷Mɔɔ nɛɛ ɓaa yuu ɓaaɓɛ nɛɛ mɔɔ zang Yahudi. Mɔɔ nɛɛ di yuu ɓaa kaa bii nyaa ɓɔɔ Laa dang ɓɛɛ, a mɔɔ dɔ̀ɔ́ bii nɛɛ mɔɔ ɓaa zang Laa.

¹⁸Mɔɔ zi vuu ɓɔɔ Laa kasɛ nɛɛ mɔɔ palɛ ɓɛɛ tɔ, a nyaa ɓɔɔ Laa dang ɓɛɛ, ti tusu mɔɔ tɔ nɛɛ, mɔɔ zɔ̃ng vuu ɓɔɔ tɔ̃ɔ ɓɛɛ.

¹⁹Nyaa zaa mɔɔ ka nɔng ɓɔɔ mɔɔ kɔɔyi nɛɛ, Nkɔ zang ɓɔɔ yi zang jĩng ringtang labalang kpang. Mɔɔ nwang naa waa ɓɔɔ yakɛ zang ɓɔɔ ri ka nɔng ɓɔɔ tɔ̀ɔ katɔ nɔng ɓɛɛ.

²⁰Mɔkɔ ti kpɛ̃ɛrɛ zang ɓɔɔ ri zũng kpang ɓɛɛ. Mɔɔ ti tusu zang ɓɔɔ ri zi vuu kpang naa wujɛ ɓɛɛ. Mɔɔ zi ɓaa tɔ nɛɛ, mɔɔ zi nyaa ɓɔɔ Laa dang ɓɛɛ tɔ. Ka ruu nɔngkɔ, mɔɔ zi vuu tɔ piti, vuu ɓɔɔ mɔɔ kɔɔyi ɓi ti niizang tingkiring.

²¹Kpɛ̃ɛrɛ yuu ɓaaɓɛ jong, mɔɔ nɛɛ tusu zang ɓɔɔ vuu katɔ ɓɛɛ. Mɔɔ ɓɔɔ shɔngɓɔ kpang, mɔɔ nɛɛ kɔɔ zang nɛɛ ri ɓɔ̀ɔ shɔngɓɔ kpang ɓɛɛ.

²²Mɔ́ɔ roo nɛɛ soro zang kpang, mɔɔ nɛɛ kɔɔyi nɛɛ, zang ri roo nɛɛ soro zang ɓɔɔ kpang ɓɛɛ. Mɔɔ nɛɛ kasɛ ruu vaka kpang, mɔɔ daa ɓɔ̀ɔ vuu ka jaka vaka kpang.

²³Mɔɔ dɔ̀ɔ́ bii nɛɛ, nyaa ɓɔɔ Laa dangnɛ manɛ kagn. Nɔɔ nɛɛ ta nyaa ɓɔɔ Laa dang ɓɛɛ tɔ, nɔɔ shingnɛ zang sèng Laa kpang.

²⁴Labeenang Laa kɔɔyi tɔɔ, “Zang ɓɔɔ ri zang Yahudi kpang, ri rang yee shi kpang ka yuu nung Laa ka ruu manɛ kɔ zang Yahudi.”

²⁵Nɔɔ nɛɛ dũng nyaa ɓɔɔ Laa dang ɓɛɛ katɔ, shaa yeenang manɛ tɔ̃ɔ. Nɔɔ nɛɛ ta nyaa ɓɔɔ Laa dang ɓɛɛ katɔ, nɔɔ nɛ̀ɛ́ yee shaa kpang gbã̀ágbãa.

²⁶Naa zang ɓɔɔ yèe shaa kpang, dũng vuu ɓɔɔ Laa dang nyaa ka yuu ɓiɓɛ katɔ, Laa rìsí wu, wu nwang naa zang ɓɔɔ yee shaa katɔ ɓɛɛ.

²⁷Ka ruu nɔngkɔ, zang ɓɔɔ ri yee shaa ɓarɛ kpang, ri naa ɓa nɔɔ ditɔ zang Yahudi, ri nɛɛ dũng nyaa ɓɔɔ Laa dang katɔ ɓɛɛ. Ka ruu ɓɔɔ, nɔkɔ zi nyaa ɓɔɔ Laa dangnɛ, a zang ti yee nɔɔ shaa katɔ, a nɔɔ tá nyaa ɓɔɔ Laa dang ɓɛɛ katɔ ɓɛɛ.

²⁸Ɓu wi zang Yahudi ɓɔɔ niizang wiya? Ɓi zang ɓɔɔ zang yee wu shaa katɔ, a ti ta bii naa zang Yahudi ɓɛɛ kpang.

²⁹Zang Yahudi ɓɔɔ niizang ɓi, zang Yahudi ɓɔɔ yeti ɓiɓɛ tɔ̃ɔ ɓɛɛ, ɓɔɔ Suru Laa kɔ̃sɔ wu ɓoro tɔ, naa ɓɔɔ zang yée shaa ɓɛɛ. Wu nyaa ɓɔɔ Musa dangnɛ kɔ̃sɔ wu kpang. Zang keɓe ɓi Laa dɔɔ wu, wu shɔnzang ri dɔɔ wu kpang.