Read mumuye Rooma 4 Bible Online

Rooma 4 - mumuye bible

Rooma 4

¹Ruu kɔɔ ɓu kaa vi ka yuu Ibirayi dabang rɛɛ dabang ɓuru viya?

²Naa Laa nɛɛ shingnɛ nwang zang tɔ̃ɔ ka tĩng ɓiɓɛ, ka ruu vuu ɓɔɔ wu palɛ, vuu ɓɔɔ Ibirayi nɛ̀ɛ́ kɔɔrɔ ruu bang bang ka yuu ɓiɓɛ nɛɛ kagn. A nɛ̀ɛ́ kɔɔrɔ ruu keɓe kaa tɔ̀ɔ́ ka tĩng Laa kpang.

³Labeenang Laa kɔɔyi nɛɛ, “Ibirayi shing danggn ka bii Laa, a ka ruu danggn ɓɔɔ wu shing ɓɛɛ, Laa ta wu nɛɛ wu zang tɔ̃ɔ.”

⁴Zang ɓɔɔ palɛ shonang nɛɛ zang shu wu katɔ, vuu ɓɔɔ zang a wu, wu waati kpang, ɓi ka ruu shonang ɓɔɔ wu pálɛ̀ ɓɛɛ.

⁵A zang ɓɔɔ palɛ shonang tɔ̃ɔ ɓi kpang, nɛɛ shing danggn ɓi ka bii Laa, ɓɔɔ shing zang ɓɔɔ palɛ vuu shi kpang, wu nwang zang tɔ̃ɔ. Zang keɓe, danggn ɓɔɔ wu shingnɛ risi wu, wu nwang zang tɔ̃ɔ ka tĩng Laa.

⁶Dawuda ti kɔɔ ruu doo nɔngkɔ, ka yuu tĩnang zang piti ɓɔɔ Laa ta wu, nɛɛ wu zang tɔ̃ɔ. Wu ka ruu shonang tɔ̃ɔ ɓɔɔ wu palɛ ɓɛɛ kpang ɓɛɛ. Dawuda kɔɔyi tɔɔ,

⁷“Tĩnang tãanang ɓi ɓɔɔ zang ɓɔɔ Laa yaa ri gbalang vuu shi kpang ɓarɛ tɔ ɓɛɛ. Zang ɓɔɔ Laa kɔsɔ vuu shi kpang ɓarɛ tɔ ɓɛɛ.

⁸Tĩnang tãanang ɓi ɓɔɔ zang ɓɔɔ Laa kpáarɛ̀ danggn vuu shi kpang ɓiɓɛ kpang ɓɛɛ.”

⁹Tĩnang kɔ Dawuda ràng ruu ka yuu ɓiɓɛ, ɓi ɓɔ̀ɔ́ zang ɓɔɔ ri yee shaa katɔ kɔ shɛ̃ɛning ya? Kpang, ɓi ɓɔɔ zang ɓɔɔ ri yee kpang jong. Danggn wu ning nɔɔ kpang, labeenang kɔɔyi tɔɔ, “Ibirayi shing danggn ka bii Laa, a ka ruu danggn ɓɔɔ wu shing ɓɛɛ, Laa ta wu, nwáng zang tɔ̃ɔ ka tĩng ɓiɓɛ”.

¹⁰Vuu keɓe nwang gn vi nɔngkɔ viya? Ka knti ɓɔɔ Ibirayi yee shaa tɔ ɓɛɛ ya? Kɔ bɛ̀ɛ́ yee shaa gn kpang ya? Vuu keɓe nwang nɔngkɔ bɛ̀ɛ́ yee shaa gn kpang.

¹¹Zang yèe Ibirayi shaa ɓi kaa nɛɛ knti. Shaa kɔ zang yee wu ɓee, ɓi vuu ɓɔɔ zang zi kagn nɛɛ Laa kasɛ wu katɔ ka ruu danggn ɓɔɔ wu shing ka bii Laa. Laa ti ta wu nɛɛ, wu zang tɔ̃ɔ ka tĩng ɓiɓɛ ɓɛɛ. Laa tá wu bɛ̀ɛ́ zang yee wu shaa gn kpang. Ka ruu nɔngkɔ, Ibirayi kɔ nwang kaa dabang zang piti ɓɔɔ ri shing danggn ka bii Laa. A Laa ti ta ri tɔ, nɛɛ ri zang tɔ̃ɔ ka tĩng ɓiɓɛ, naa zang yee ri shaa ti katɔ kpang ɓɛɛ.

¹²Ibirayi ti doo dabang zang ɓɔɔ zang yee ri shaa katɔ kɔ. Wu ka ruu ɓɔɔ, zang yee ri shaa katɔ kɔ shɛ̃ɛning kpang. Ka ruu ɓɔɔ ri nwangnɛ, ri shing danggn ka bii Laa naa ɓɔɔ dabang ɓuru Ibirayi nwangnɛ bɛ̀ɛ́ zang yee wu shaa gn kpang ɓɛɛ.

¹³Laa a Ibirayi nɛɛ zɔ̃ng ɓiɓɛ nyaa, nɛɛ koo keɓe naa nwang ɓɔɔ ɓarɛ. Laa a nyaa keɓe wu ka ruu ɓɔɔ Ibirayi dũng nyaa ɓɔɔ Laa dang ɓɛɛ kpang. Ɓi ka ruu ɓɔɔ shing danggn ka bii Laa, a Laa ta wu kati nɛɛ wu zang tɔ̃ɔ ɓɛɛ.

¹⁴Naa zang ɓɔɔ ri dũng nyaa ɓɔɔ Laa dangnɛ, rikɔ tà vuu ɓɔɔ Laa a nyaa ɓɛɛ, danggn shinnang ɓi kaa waati. A nyaa ɓɔɔ Laa arɛ, shaarɛ ɓi kaa waati.

¹⁵Ka ruu ɓɔɔ, naa zang ɓɔɔ ta nyaa Laa, Laa dang zang jĩng katɔ ɓɛɛ. A nɔng ɓɔɔ nyaa dannang kagn kpang, zang tɔɔ kpang nɛɛ zang ta nyaa ɓɔɔ zang dangnɛ tɔ kpang.

¹⁶Ka ruu nɔngkɔ, vuu di yuu ɓi ka danggn ɓɔɔ zang shing ka bii Laa ɓɛɛ. Tɔ̀ɔ, Laa wu palɛ vuu ɓɔɔ wu a nyaa nɛɛ wu palɛ ɓɛɛ kati, ka ruu ɓɔɔ Laa palɛ tɔ̃ɔ katɔ ɓɛɛ. Laa a nyaa keɓe wu ka ruu zɔ̃ng Ibirayi ɓɔɔ ri dũng nyaa ɓɔɔ Laa dangnɛ ɓɛɛ kpang. Ɓi ɓɔɔ zang piti ɓɔɔ ri zɔ̃ng Ibirayi ka ruu ɓɔɔ ri shing danggn naa ɓɔɔ wu shing ɓɛɛ. Ibirayi ɓi kaa dabang ɓuru nandon.

¹⁷Labeenang Laa kɔɔyi nɛɛ, “N shing mɔɔ tɔ, mɔ́ɔ nwang dabang zang koolaa dɔɔli.” Wukɔ daa ɓuru ka tĩng Laa ɓɔɔ wu shing danggn ka bii ɓiɓɛ ɓɛɛ. Laa ɓɔɔ wisi zang paa nɛɛ sàa, zang nwang ningkãari, a ti mãarɛ vuu shɔɔ katɔ ɓɛɛ.

¹⁸Ibirayi shing danggn ka bii Laa ɓi doo ka laa ɓɔɔ vuu bìí nwàng naa mɔɔ yaa gn naa kaa tɔ ɓɛɛ. Ka ruu nɔngkɔ, nwáng dabang zang koolaa, naa ɓɔɔ Laa a wu nyaa ɓɛɛ nɛɛ, “Zɔ̃ng ɓaaɓɛ naa shang dɔɔli.”

¹⁹Ibirayi yaa danggn ɓɔɔ wu shing ka bii Laa naa kpang, nɛɛ tɔkɔlɔng ning, naa doo ɓɔɔ sáa ɓiɓɛ yaa kaa tɔkɔlɔng wu daa laa maani ɓɛɛ. Zi tɔ nɛɛ bii ɓiɓɛ wɔng tɔ, a ɓeeso Saratu daa naa jaa yinang takpang.

²⁰Ibirayi yaa danggn ɓɔɔ wu shing ka bii Laa ɓɛɛ kpang, a ti yaa gn naa ka ruu, nyaa ɓɔɔ Laa a wu ɓɛɛ kpang. Danggn ɓɔɔ wu shing ka bii Laa, a wu kaka, a dɔɔ Laa kati.

²¹Zi ɓi tɔ gbãng gbãng ka yeti ɓiɓɛ, nɛɛ Laa zunung ɓɔɔ wu palɛ vuu ɓɔɔ wu a nyaa ɓɛɛ katɔ.

²²Ka ruu nɔngkɔ, “Laa ta wu nɛɛ wu zang tɔ̃ɔ ka ruu danggn ɓɔɔ wu shing ɓɛɛ”.

²³Ruu kɔ zang kɔɔyi nɛɛ, “Zang tà wu nɛɛ wu zang tɔ̃ɔ ɓee,” zang bèe ka yeti labeenang Laa ka ruu Ibirayi ka bm kpang.

²⁴Zang bee kaa ruu ɓuru jong. Ɓɔɔ Laa naa ta rùu nɛɛ rùu zang tɔ̃ɔ ka tĩng ɓiɓɛ ɓɛɛ. Ɓɔɔ rùu shing danggn ka bii Laa, ɓɔɔ wisi Kpanti ɓuru Yeesɔ paa nɛɛ saa ɓɛɛ.

²⁵Laa a Yeesɔ nɛɛ wu vɔ ka ruu vuu shi kpang ɓuru. A Laa ti wisi wu paa tɔkn ningkãari nɛɛ tɔ̀ɔ, ruu nwang zang tɔ̃ɔ kaa tĩng Laa.