Read mumuye Rooma 8 Bible Online

Rooma 8 - mumuye bible

Rooma 8

¹Zang ɓɔɔ ri nwang tɔ gbete nɛɛ Yeesɔ Kirisi, Laa dɔng ri ruu ɓarɛ takpang.

²Ka ruu ɓɔɔ, nyaa dannang Suru Laa ɓɔɔ a ruu suru bii nɛɛ bii Yeesɔ Kirisi, ta m tɔ nɛɛ naa nyaa dannang ɓɔɔ vuu shi kpang nɛɛ ɓɔɔ vɔrɔ.

³Vuu ɓɔɔ nyaa dannang Laa zunung palɛnang kpang, ka ruu ɓɔɔ, bii shɔnzang lakɛ naa bii kpang, Laa palɛ tɔ. Laa ningsi vuu shi kpang ka bii shɔnzang, ka ɓɔɔ wu shong nyaa nɛɛ Jaa ɓiɓɛ ɓɔɔ arɛ, tuu bii naa bii shɔnzang ɓɔɔ palɛ vuu shi kpang ɓɛɛ.

⁴Laa pálɛ́ vuu keɓe nɛɛ tɔɔ, ruu nwang naa ɓɔɔ Suru Laa kasɛ ɓɛɛ, wu naa ɓɔɔ bii shɔnzang kasɛ kpang. Ruu palɛ vuu tɔ̃ɔ ɓɔɔ nyaa dannang Laa kasɛ nɛɛ zang wu palɛ, ruu palɛ kaa nyaa kiiri.

⁵Zang ɓɔɔ ri nwàng ɓarɛ ka naa ɓɔɔ bii shɔnzang ɓarɛ kɔɔ ri nɛɛ ri nwang ɓɛɛ, ri rɛ̃rɛ ɓarɛ naa ɓɔɔ bii ɓarɛ kasɛ ɓɛɛ. Zang ɓɔɔ ri nwàng naa ɓɔɔ Suru kɔɔ ri nɛɛ ri nwangnɛ, ri rɛ̃rɛ ɓarɛ ka yuu vuu ɓɔɔ Suru kasɛ ɓɛɛ.

⁶Naa zang rɛ̃rɛ shi kpang, naa ɓɔɔ bii shɔnzang kasɛ ɓɛɛ kɔ shɛ̃ɛning, nwǎng zang ɓi vɔrɔ. Naa zang rɛ̃rɛ ka yuu vuu ɓɔɔ Suru Laa kasɛ, Laa shingnɛ zang walɛ suru bii ɓɔɔ waa nyaa kpang, a yeti zang ti valɛ katɔ.

⁷Ka ruu ɓɔɔ, naa zang shing rɛ̃rɛnang zang, ka yuu vuu ɓɔɔ bii zang kasɛ ɓɛɛ kɔ shɛ̃ɛning, zang risi yuu zang kaa naa zang ɓɔɔ shing jĩng nɛɛ Laa kpang ɓɛɛ. Ka ruu ɓɔɔ, dũ̀ng nyaa ɓɔɔ Laa dangnɛ ɓi kpang ɓɛɛ. Niizang, zunung dũnnang ɓi kpang tingkiring.

⁸Zang ɓɔɔ ri palɛ vuu ɓɔɔ bii ɓarɛ kasɛ, ri shingnɛ Laa wu tã̀a tĩnang kpang.

⁹Nɔɔ nwàng manɛ tɔ̀ɔ́ naa ɓɔɔ bii manɛ kɔɔ nɔɔ ɓɛɛ kpang, naa Suru Laa nɛɛ nwang kagn niizang ka yeti manɛ ɓɛɛ. Zang ɓɔɔ Suru Kirisi nɛɛ kagn ka yeti ɓiɓɛ kpang, ɓi zang Kirisi kpang.

¹⁰Naa Kirisi nwàng kagn yeti manɛ, naa bii manɛ vɔ doo katɔ, ka ruu vuu shi kpang ɓɔɔ nɔɔ pálɛ̀ ɓɛɛ, Suru Laa a nɔɔ suru bii ditɔ, ka ruu ɓɔɔ, Laa ta nɔɔ tɔ, nɛɛ nɔɔ zang tɔ̃ɔ ka tĩng ɓiɓɛ ɓɛɛ.

¹¹Laa ɓɔɔ wisi Yeesɔ paa nɛɛ saa, suru ɓiɓɛ nɛɛ nwàng ka yeti manɛ, Laa keɓe ɓɔɔ wisi Kirisi paa nɛɛ saa, a nɔɔ suru bii ditɔ. A nɔɔ suru bii nɛɛ bii Suru ɓiɓɛ ɓɔɔ nwang ka yeti manɛ ɓɛɛ.

¹²Ka ruu nɔngkɔ manzung, zang mã ruu nyaa kagn nɛɛ ruu palɛ vuu ɓɔɔ bii shɔnzang ɓuru kasɛ ɓɛɛ kpang.

¹³Naa ruu nwang naa ɓɔɔ bii ɓuru kasɛ, ruu vɔ katɔ. A naa Suru Laa yi ruu naa kagn, ruu yaa vuu shi kpang ɓɔɔ ruu palɛ dɔ̃ɔ gbete, ruu nwáng ditɔ ningkãari.

¹⁴Zang ɓɔɔ ri dũng vuu ɓɔɔ Suru Laa tusu ri, rikɔ wujɛ Laa.

¹⁵Ka ruu ɓɔɔ, Laa a nɔɔ Suru ɓɔɔ risi nɔɔ naa jaafoo waati kpang, shing nɔɔ, nɔɔ kaa vɔrɔ tɔkn kpang ɓɛɛ. Suru Laa keɓe shing nɔɔ nɔ́ɔ nwang manɛ wujɛ Laa kɔ jong. Wukɔ ti yi nɔɔ naa ka bii, nɔɔ ɓaa Laa kaa nɛɛ, “Mɔkɔ Daa ɓuru.”

¹⁶Suru Laa ɓakɛ zɔɔ nɛɛ suru bii ɓuru ri kɔɔyi nɛɛ, ruu wujɛ Laa.

¹⁷Wee ruu wujɛ ɓiɓɛ ɓee, ruu naa wàlɛ́ vuu tɔ̃ɔ ɓɔɔ Laa shìng zang ɓiɓɛ ɓɛɛ. A ruu ti naa walɛ vuu ɓɔɔ shìng Kirisi ditɔ nɛɛ wu, ka ruu ɓɔɔ, ruu nɛɛ dàng jĩng tɔ jong naa ɓɔɔ Kirisi dang ɓɛɛ, Laa ti naa a ruu bannang jong naa ɓɔɔ wu a Kirisi ɓɛɛ.

¹⁸N zi tɔ, jĩng kɔ ruu dang kãntang ɓee, daa naa ɓɔɔ zang gãsɛ nɛɛ bannang ɓɔɔ Laa naa a ruu ɓɛɛ kpang.

¹⁹Niizang, vuu ɓɔɔ Laa mã́arɛ̀ ɓɛɛ nandon, ri gã diki ɓɔɔ Laa naa nwàngsɛ́ wujɛ ɓiɓɛ bii ɓɛɛ.

²⁰Kãntang keɓe, vuu ɓɔɔ Laa mãarɛ, zi naa ɓɔɔ vuu nwang kpang ɓɛɛ. Wu ka ruu ɓɔɔ ri kasɛ ɓarɛ nɔngkɔ kpang. Ɓi Laa kɔ shing ka yeti ɓiɓɛ nɔngkɔ.

²¹Nɛɛ wu ta yuu vuu kɔ wu mãarɛ ɓee ditɔ, tɔ̀ɔ, ri pũng kaa takpang. Tɔ̀ɔ, wu ti a ri bannang ɓɔɔ wu alɛ̀ wujɛ ɓiɓɛ ɓɛɛ.

²²Ruu zi ɓuru tɔ nɛɛ, vuu ɓɔɔ Laa mãarɛ nandon ri tãa kɔnang, ri ti ju doo kana, mɔɔ kɔ̀ɔ́ nɛɛ zang ɓɔɔ jaa kɔng wu ɓɛɛ.

²³Wu vuu ɓɔɔ Laa mãarɛ kɔ tãa kɔnang gbete kpang. Rùu ɓɔɔ Suru Laa ɓɔɔ Laa gaayu a ruu nwang ka yeti ɓuru ɓee, ruu ju doo nɔngkɔ ka yeti ɓuru, ka wee ruu gã diki ɓɔɔ Laa naa kɔ̀ɔ́yi nɛɛ ruu kaa wujɛ ɓiɓɛ ɓɛɛ, tɔ̀ɔ, bii ɓuru wu wɔ kaa nandon.

²⁴Zang tà yuu ɓuru ka ruu gn ɓɔɔ ruu shing ɓɛɛ kɔ. A ruu nɛɛ zi vuu ɓɔɔ ruu shing gn ka yuu ɓiɓɛ tɔ, ɓi tɔ̀ɔ́ gn shinnang kpang. Zang shing gn ɓi jong ka yuu vuu ɓɔɔ zang zi tɔ ɓɛɛ kpang.

²⁵Naa ruu shing gn ka vuu ɓɔɔ ruu zi gn kpang, ruu mã danggn, ruu gã vuu bìí.

²⁶Suru Laa, a doo nɔngkɔ, wu yi ruu naa ka bii, wee ruu lakɛ naa ka bii kpang ɓee. Ka ruu ɓɔɔ, ruu zunung ɓɔɔ ruu gàá Laa tɔ̃ɔ tɔ̃ɔ kpang ɓɛɛ. Suru Laa kɔ bàkɛ́ Ruu Laa nɛɛ junang ɓɔɔ nyaa zunung kɔɔnang kpang ɓɛɛ.

²⁷A Laa ɓɔɔ zi yeti shɔnzang tɔ nandon, zi vuu ɓɔɔ Suru rɛ̃rɛ tɔ. Ka ruu ɓɔɔ, Suru bakɛ Laa ka ruu zang Laa, ka doo vuu ɓɔɔ yeti Laa kasɛ ɓɛɛ.

²⁸Ruu zi tɔ nɛɛ, ka yeti vuu piti, Laa palɛ shonang ka ruu zang ɓɔɔ ri kasɛ wu katɔ ɓɛɛ. Tɔ̀ɔ, vuu keɓe wu nwàng ri tɔ̃ɔ kati. Rikɔ zang ɓɔɔ Laa ɓaa ri nyaa nɛɛ tɔ̀ɔ, ri palɛ vuu ɓɔɔ wu kasɛ nɛɛ wu pàlɛ́ nɛɛ ri ɓɛɛ.

²⁹Zang ɓɔɔ Laa shɛ̃ɛrɛ ri ɓarɛ tɔ, kusu ri ɓarɛ dang gbete nɛɛ ri nwang naa Jaa ɓiɓɛ. Tɔ̀ɔ, Jaa ɓiɓɛ kɔ wu nwang kaa jamari rɛɛ ɓeezung ɓɔɔ ri dɔɔli ɓɛɛ.

³⁰A Laa tá (shɛ̃ɛrɛ) rɛɛ zang ɓɔɔ wu ɓàa ri nyaa dang gbete. Zang kɔ wu ɓaa ri nyaa ɓee, risi ri nɛɛ ri nwang zang tɔ̃ɔ ka tĩng ɓiɓɛ. A á zang kɔ wu risi ri nɛɛ ri nwang zang tɔ̃ɔ ɓee, bannang kati.

³¹Nɛɛ nɔngkɔ ɓɛɛ, ruu kɔɔ ɓu kaa nɛɛ vi tɔkn viya? Laa nɛɛ ɓàng nɛɛ ruu ɓɛɛ, wi shii bàng nɛɛ ruu, wu ɓa ruu kaka wiya?

³²Laa zãa Jaa ɓiɓɛ jĩng dannang kpang, a zang wu, nɛɛ zang nyɔ wu vɔrɔ ka ruu ɓuru nandon. Naa a ruu vuu piti ɓi kaa tɔ̀ɔ́ waati nɛɛ wu ning kpang ya?

³³Ɓu wi kɔɔyi nɛɛ zang ɓɔɔ Laa shɛ̃ɛrɛ ri, ri palɛ vuu shi kpang tɔ wiya? Laa kɔ kɔ̀ɔ nɛɛ, ri palɛ vuu shi kpang, kpang.

³⁴Ɓu wi dɔ̌ng ri ruu wiya? Ɓi Yeesɔ Kirisi ɓɔɔ vɔrɛ, Laa wisi wu paa nɛɛ saa. Nwang ka nakn Laa. Wukɔ ti bàkɛ́ Laa ka ruu ɓuru.

³⁵Ɓu wi zunung ɓɔɔ wu basɛ ruu nɛɛ kasɛnang ɓɔɔ Kirisi kàsɛ̀ ruu nɛɛ mani ɓɛɛ wiya? Vuu gãsɛnang ɓɔɔ a ka zɔ̃ng zɔ̃ng ɓɛɛ ya? Vuu ɓɔɔ kpãa ruu dɔɔli ɓɛɛ ya? Naa doo jĩng dannang yupaa ya? Naa nyɔkɔ nwangnɛ ya? Naa vuu ɓɔɔ ruu hãa ka bii kpang ya? Naa zang shìng ruu doo baabii ya? Naa zang nyɔkɔ ruu vɔrɔ ɓɛɛ ya?

³⁶Zang bee nɔngkɔ ka yeti Labeenang Laa nɛɛ, “Zang kɔɔ ruu diki diki nɛɛ zang nyɔ ruu vɔrɔ ka ruu ɓaaɓɛ kɔ. Zang palɛ ruu naa mɛ̀ɛrɛ́ ɓɔɔ zang daa yee ri kaa tɔ ɓɛɛ”.

³⁷Wu nɔngkɔ kpang, zang ɓɔɔ basɛ ruu nɛɛ Yeesɔ kpang. Ka vuu kɔ palɛ ruu ɓee nandon zang ɓɔɔ kàsɛ̀ ruu ɓuru katɔ keɓe, yiki ruu naa kagn, ruu ɓa vuu keɓe yuu gbãng gbãng.

³⁸N zi m tɔ nɛɛ, vuu ɓɔɔ basɛ ruu kagn nɛɛ kasɛnang ɓɔɔ Laa kasɛ ruu nɛɛ mani ɓɛɛ kpang. Naa ruu vɔ doo katɔ, naa ruu doo ningkãari, naa doo zang nyaa shonang Laa ɓɔɔ ri ka lapa, nɛɛ zang nyaa shonang Laa ɓɔɔ bang bang ɓɔɔ ri ka lapa ɓɛɛ, naa doo vuu ɓɔɔ kagn kãntang, nɛɛ vuu ɓɔɔ naa a ka tĩng ɓɛɛ.

³⁹Naa doo vuu ɓɔɔ ka lapa, nɛɛ vuu ɓɔɔ ka tipi dii. Vuu ɓɔɔ kagn ka teteng vuu ɓɔɔ Laa mã́arɛ̀ ɓɔɔ zunung ɓɔɔ wu basɛ ruu, nɛɛ kasɛnang ɓɔɔ Laa tusu ruu nɛɛ bii Kpanti ɓuru Yeesɔ Kirisi ɓɛɛ kpang.