Read mumuye Rooma 9 Bible Online

Rooma 9 - mumuye bible

Rooma 9

¹Vuu kɔ n kɔ̀ɔ́ ɓee, niizang kɔ nwani. N suu sèé kpang, kaa ruu ɓɔɔ, n m zang Kirisi ɓɛɛ. Rɛ̃rɛnang mɛɛ ɓɔɔ Suru Laa roo kpanti kagn, ti kɔɔyi nɛɛ niizang, n suu sèé kpang.

²Niizang, yeti mɛɛ lasɛ dɔɔli, vuu ɓɔɔ ti kɔng m ka yeti ka ruu rɛɛ manzung zang Isirela di nyaa kpang.

³Naa nɛ̀ɛ́ yi ri naa ka bii katɔ, n nɛ̀ɛ́ gàa Laa wu kù m nyaa. Ń nwàng tɔ̀ɔ́ zang Kirisi kpang, ka ruu rɛɛ manzung ɓɔɔ zɔ̃ng ɓuru gbete ɓɛɛ.

⁴Rikɔ zang Isirela, Laa shing ri, ri ràa wujɛ ɓiɓɛ, a tusu ri bannang ɓiɓɛ. Laa mã nyaa nɛɛ ri, a ri nyaa ɓɔɔ wu dangnɛ ɓɛɛ. Rikɔ zunung Laa bannang ka gbalang ɓɔɔ tɔ̃ɔ ɓɛɛ. A Laa ti a rikɔ nyaa.

⁵Ri ɓarɛ zɔ̃ng rɛɛ dabang ɓɔɔ ka tĩng tɛ̃ɛ tɛ̃ɛ ɓɛɛ. Kirisi ka bii shɔnzang ɓiɓɛ, nwangnɛ doo laa ɓarɛ kɔ. Zang wu dɔɔ Laa ta dòndòng, ɓɔɔ wukɔ kpanti ka yuu vuu piti ɓɛɛ. Nɔngkɔ.

⁶N tɔɔ kpang nɛɛ, Laa palɛ vuu ɓɔɔ wu a zang nyaa kagn kpàng, kpang. Ka ruu ɓɔɔ wu zang Isirela nandon kɔ, zang ɓɔɔ Laa shɛ̃ɛrɛ ri nɛɛ ri zang ɓiɓɛ kɔ kpang.

⁷Zɔ̃ng Ibirayi ɓi ti wujɛ Laa kɔ nandon kpang. Laa kɔɔ Ibirayi nɛɛ, “Zang naa gã zɔ̃ng Ishaaku kɔ shɛ̃ɛning nɛɛ ri zɔ̃ng ɓaaɓɛ kɔ”.

⁸Nɛɛ nɔngkɔ, wu wujɛ Ibirayi nandon wujɛ Laa kpang. Ɓi wujɛ ɓɔɔ Laa a nyaa, a zang yì Ibirayi ri, rikɔ zɔ̃ng Ibirayi.

⁹Vuu ɓɔɔ Laa kɔɔyi ka ɓɔɔ wu a Ibirayi nyaa keɓe tɔɔ, “Ka laa ɓɔɔ n shingnɛ, n gbãayu ditɔ, Saratu naa yi jaa zang varɛ”.

¹⁰A wu ti weɓe kɔ shɛ̃ɛning kpang. Ka ɓɔɔ Rebeka túu jaa, yì dabang ɓuru Ishaaku wujɛ ziti.

¹¹Ka ɓɔɔ bɛ̀ɛ́ zang yi ri gn kpang, ri ti pálɛ́ vuu tɔ̃ɔ gn nɛɛ vuu shi kpang, kpang. Laa kasɛ nɛɛ zɔ̃nnang ɓɔɔ wu zɔ̃ng jaa gbete ka teteng ɓarɛ wu nwang vuu ɓɔɔ wu kasɛ ɓɛɛ. Laa kɔɔ nàá ɓarɛ tɔɔ, “Zang ɓɔɔ bang kɔ naa pàlɛ́ zang ɓɔɔ wujaa shonang.” Ka ruu nɔngkɔ, Laa zɔ̃ng zang ɓi ka ruu nyaa ɓɔɔ wu ɓaa zang ɓɛɛ, wu ka ruu, vuu ɓɔɔ zang palɛ ɓɛɛ kpang.

¹³Naa ɓɔɔ zang bee ka yeti labeenang Laa ɓɛɛ nɛɛ, “N kasɛ m Yakubu n bɛ̃ɛ Isuwa katɔ”.

¹⁴Rùu kɔ̀ɔ́ ɓu kaa nɛɛ viya? Nɛɛ Laa palɛ vuu gn dang gbete ya? Nɔngkɔ kpang tingkiring.

¹⁵Ka ruu ɓɔɔ, Laa kɔɔ Musa tɔɔ, “Gn kɔng m ka ruu zang ɓɔɔ gn ɓarɛ kɔng m katɔ ɓɛɛ. N pálɛ̀ tɔ̃ɔ m ka ruu zang ɓɔɔ n kasɛ n pàlɛ́ ri tɔ̃ɔ ɓɛɛ”.

¹⁶Ka ruu nɔngkɔ, wu vuu ɓɔɔ shɔnzang kasɛ, nɛɛ vuu ɓɔɔ wu palɛ kɔ shingnɛ, Laa wu zɔ̃́ng wu kpang, ɓi gn zang ɓɔɔ kɔng wu ɓɛɛ, kɔ shingnɛ.

¹⁷Ka ruu ɓɔɔ, Laa kɔɔ Firawuna ka yeti labeenang ɓiɓɛ tɔɔ, “N yi mɔɔ kpanti, nɛɛ tɔ̀ɔ, n tusu naa vuu palɛnang mɛɛ ka vuu ɓɔɔ n palɛ nɛɛ mɔɔ ɓɛɛ. Ń ti shingnɛ zang koo nandon ri tãa ruu mɛɛ kati.”

¹⁸Nɛɛ nɔngkɔ, gn kɔng Laa ka ruu zang ɓɔɔ gn ɓarɛ kɔng wu katɔ ɓɛɛ. Wu ti shing zang ɓɔɔ, ri táarɛ́ yuu.

¹⁹Zang gbete ka teteng manɛ hɛ̃ɛ m katɔ nɛɛ, “Laa nɛɛ palɛ vuu ɓi nɔngkɔ ɓɛɛ, kɔ̀ɔ́ ka ruu vi nɛɛ, ruu palɛ vuu shi kpang tɔ viya? Wi zunung ɓɔɔ wu bɛ̃ɛ vuu ɓɔɔ Laa kasɛ palɛnang wiya?”

²⁰Masang, mɔkɔ wi mɔɔ kasɛ Laa nyaa wiya? Ɓari hɛ̃ɛ zang ɓɔɔ mãa wu katɔ nɛɛ, “Ka ruu vi mɔɔ mãa m nɔngkɔ viya ya?”

²¹Zang ɓɔɔ mãarɛ ɓari palɛ tapɔng katɔ naa ɓɔɔ yeti ɓiɓɛ kasɛ ɓɛɛ. Ka tapɔng gbete keɓe, mãa ɓari katɔ nɛɛ mani ziti. Ɓɔɔ gbete wu shing ka ruu vuu shaanang nɔng mung nwannang. Ɓɔɔ gbete wu nwãarɛ vuu shaanang diki waati kagn.

²²Vuu ɓɔɔ Laa pálɛ̀ nwang doo nɔngkɔ. Laa kasɛ nɛɛ wu tusu gnvɔ ɓiɓɛ wu ti nwangsɛ naa vuu palɛnang ɓiɓɛ. Ka ruu nɔngkɔ, mã danggn gbãng gbãng nɛɛ zang ɓɔɔ bɛ̀ɛ́ nɛɛ wu jɛ̃ɛ ri ruu nɛɛ gnvɔ yeti ɓiɓɛ ɓɛɛ. A ɓɔɔ zang ɓɔɔ ri daa naa ɓɔɔ wu ningsi ri kaa tɔ ɓɛɛ.

²³Palɛ vuu keɓe nɛɛ wu tusu bannang ɓiɓɛ. Bannang ɓɔɔ wu nwangsɛ ruu, ɓɔɔgn ɓuru kɔng wu katɔ ɓɛɛ. Zang ɓɔɔ wu kpàlɛ̀ ri bii doo ka tĩng nɛɛ ri ta bannang ɓiɓɛ ɓɛɛ.

²⁴Ka ruu ɓɔɔ, ɓi rukɔ zang ɓɔɔ wu zɔ̃ngkɔ ruu ɓɛɛ. Zɔ̃ngkɔ ruu ka teteng zang Yahudi kɔ shɛ̃ɛning kpang, zɔ̃ngkɔ jong ka teteng zang ɓɔɔ ri zang Yahudi kpang ɓɛɛ.

²⁵Naa ɓɔɔ Laa kɔɔ ka yeti Labeenang ɓɔɔ Yushaawu bee nɛɛ, “Zang ɓɔɔ bɛ̀ɛ́ ri zang mɛɛ kpang, n ɓaa ri kaa nɛɛ ‘Zang mɛɛ,’ Zang tipi ɓɔɔ bɛ̀ɛ́ n kasɛ ri kpang, n ɓaa ri kaa nɛɛ ‘Zang ɓɔɔ n kasɛ ri dɔɔli ɓɛɛ’.

²⁶Ka nɔng ɓɔɔ Laa kɔɔyi nɛɛ, ‘Nɔɔ wu zang mɛɛ kpang ɓɛɛ,’ Laa ɓɔɔ ningkãari ti naa ɓàa ri doo ka nɔngkɔ, nɛɛ ri wujɛ ɓiɓɛ”.

²⁷Ishaya kɔɔ ruu ka yuu zang Isirela tɔɔ, “Naa zang Isirela ri shang doo naa seseele ɓɔɔ ka nyaa waapo, zang ɓɔɔ zang naa ta yuu ɓarɛ ri dɔɔli kpang.”

²⁸Ka ruu ɓɔɔ, Laa naa jɛ̃ɛ zang koo ruu ditɔ nandon, pĩiri jĩng kpang ɓɛɛ.

²⁹Naa ɓɔɔ Ishaya kɔɔ ka tĩng ɓɛɛ nɛɛ, “Naa Laa ɓɔɔ ɓa zang piti bannang katɔ nɛ̀ɛ́ yàa ruu zɔ̃ng ɓuru kagn kpang, ruu nɛɛ raa tɔ naa gari Sɔɔdom, ruu nɛɛ nwang kaa naa gari Gomora.”

³⁰Ruu kɔ̀ɔ́ ɓu nɛɛ viya? Ruu kɔɔ nɛɛ, zang ɓɔɔ ri zang Yahudi kpang, ɓɔɔ bɛ̀ɛ́ ri tɔɔ ri risi yuu ɓarɛ, ri nwang zang tɔ̃ɔ ka tĩng Laa kpang. A Laa risi ri tɔ, ri nwáng zang tɔ̃ɔ tɔ ka tĩng ɓiɓɛ, ka ruu danggn ɓɔɔ ri shing ka bii ɓiɓɛ ɓɛɛ.

³¹A zang Isirela ɓɔɔ Laa shɛ̃ɛrɛ ri katɔ, ri tɔɔ ri kãa ɓarɛ nyaa ɓɔɔ Laa dangnɛ ɓɔɔ shing ri, ri nwang zang tɔ̃ɔ ka tĩng Laa ɓɛɛ, a ri wàlɛ̀ kaa takpang.

³²Ri walɛ kpang ka ruu viya? Ka ruu ɓɔɔ, ri shing gn ɓarɛ ka vuu tɔ̃ɔ ɓɔɔ ri pálɛ̀ ɓɛɛ, wu ka danggn ɓɔɔ ri shing ka bii Laa kpang. Ri kpaa doo ka tari ɓɔɔ shing zang, zang kpaa doo ɓɛɛ.

³³Zang bee ka yeti labeenang Laa nɛɛ, “Nɔɔ ɓaa shoo, ǹ shing tari ka Siyona, ɓɔɔ zang kpaa doo kagn ɓɛɛ. Tari bang ɓɔɔ shíng zang, zang watɛ ɓɛɛ. Zang piti ɓɔɔ nɛɛ shing danggn ka bii ɓiɓɛ yusɛ̃ɛ tuu wu kpang.”