Read mumuye 1 Koranti 12 Bible Online

1 Koranti 12 - mumuye bible

1 Koranti 12

¹Manzung, ruu rɛ̃rɛ nɔɔ kaa yuu vuu ɓɔɔ Suru Laa a zang ɓɛɛ. N kasɛ nɔɔ zi vuu keɓe katɔ tɔ̃ɔ tɔ̃ɔ.

²Nɔɔ zi tɔ nɛɛ ɓeleng bɛ̀ɛ́ nɔɔ shing danggn gn ka bii Kpanti Laa kpang, zang tusu nɔɔ gbalang ka zɔ̃ng zɔ̃ng. Ka ruu nɔngkɔ, nɔɔ bang vaka ɓɔɔ nyaa ɓarɛ nɔɔ katɔ ɓɛɛ.

³Ka ruu nɔngkɔ, n kasɛ nɔɔ zi tɔ̃ɔ tɔ̃ɔ. Naa zang ɓɔɔ rang yee, nɛɛ naa vuu palɛnang ɓɔɔ Suru Laa a wu, zang kaɓa ràng yee shi kpang ka yuu Yeesɔ kpang. Zang ɓɔɔ ti zunung kɔɔnang katɔ nɛɛ, “Yeesɔ kɔ Kpanti ɓuru.” Kpang, naa Suru Laa kɔ a wu naa kɔɔnang kpang ɓɛɛ.

⁴Vuu ɓɔɔ Suru Laa a zang naa nɛɛ zang ri palɛ, ɓi kagn ka zɔ̃ng zɔ̃ng. A Suru Laa ɓi kaa gbete kɔ nwani.

⁵Shonang ɓɔɔ zang ti pàlɛ́ Yeesɔ kagn ka zɔ̃ng zɔ̃ng, a Kpanti Yeesɔ ɓɔɔ zang ri palɛ wu shonang keɓe, ɓi kaa gbete kɔ nwani.

⁶Naa ɓɔɔ zang ri palɛ shonang kagn ka zɔ̃ng zɔ̃ng, a Laa ɓɔɔ a zang naa vuu palɛnang nɛɛ ri palɛ vuu keɓe nandon, ɓi kaa gbete.

⁷Suru Laa tusu zang bii ɓiɓɛ ka bm bm, tɔ̀ɔ, zang kaɓa wu yi zang Laa nandon naa kaa jong ka bii.

⁸Suru Laa a zang gbete naa, wu rang yee nɛɛ zũnang. Suru gbete keɓe, wu ti a zang ɓɔɔ naa, wu kɔɔ vuu ɓɔɔ Laa tusu wu ɓɛɛ.

⁹Suru Laa a zang ɓɔɔ naa, ri shing danggn ka bii kpanti Yeesɔ, wu ti a zang ɓɔɔ naa ri masɛ zang kɔɔnang.

¹⁰Zang ɓɔɔ zang a ri naa, ri palɛ vuu ɓɔɔ zang zirɛ zang mã naa ka danggn ɓɛɛ. Zang ɓɔɔ zang a wu ɓi naa, nɛɛ wu kɔɔ vuu ɓɔɔ Laa tusu wu ɓɛɛ. Zang ɓɔɔ zang a ri ɓarɛ naa, ri zi vuu ɓɔɔ a nɛɛ bii Suru Laa, nɛɛ ɓɔɔ a nɛɛ bii Suru Laa kpang ɓɛɛ. Zang ɓɔɔ zang a ri naa, ri rang nyaa ɓɔɔ ri kpɛ̃ɛrɛ katɔ kpang ɓɛɛ. Zang ɓɔɔ zang a ri ɓarɛ naa, ri kɔɔ zang dĩiri nyaa kaɓa.

¹¹Ka vuu kɔɔ zang palɛ nandon ɓee, ɓi doo Suru gbete keɓe kɔ, a zang naa, zang ri palɛ nɔngkɔ. Wu a zang ɓu naa vuu palɛnang kaɓa náabm̀, naa ɓɔɔ wu kasɛ ka yeti ɓiɓɛ ɓɛɛ.

¹²Nɔɔ zi tɔ nɛɛ vuu ɓɔɔ ɓakɛ, a raa bii shɔnzang ka zɔ̃ng zɔ̃ng. A bii shɔnzang ɓi kaa gbete kɔ nwani, vuu keɓe ri ɓakɛ zɔɔ nɔng gbete, tɔ̀ɔ, ri nwang kaa bii gbete. Yeesɔ Kirisi nwang doo nɔngkɔ.

¹³Ruu doo nɔngkɔ. Zang ɓɔɔ kagn teteng ɓuru, ri ɓarɛ zang Yahudi, a zang ɓɔɔ ɓarɛ zang Yahudi kpang. Zang ɓɔɔ ri ɓarɛ jaafoo a zang ɓɔɔ ɓarɛ jaafoo kpang. Ruu nandon, ruu raa tɔ naa zang gbete, ka làa ɓɔɔ zang palɛ ruu batizima ɓɛɛ. Ka ruu ɓɔɔ ka diki kaɓa, Laa a ruu Suru ɓiɓɛ gbete kaɓa kɔ ɓɛɛ. Laa a ruu ɓi Suru gbete kaɓa kɔ nandon nɛɛ wu nwang ka yeti ɓuru.

¹⁴Vuu dɔɔli ɓakɛ, a raa bii shɔnzang kati. Bii shɔnzang wu vuu gbete kɔ shɛ̃ɛning kpang.

¹⁵Naa doo shɔnzang kɔɔyi nɛɛ, “N m naa kpang, ka ruu nɔngkɔ, n m ka bii kpang.” Ruu keɓe kɔ shing wu nwang tɔ̀ɔ́ bii kpang, kpang.

¹⁶Naa shoo kɔɔ jong nɛɛ, “N m jĩng kpang, ka ruu nɔngkɔ, n m ka bii kpang.” Nwáng kaa wukɔ wu yáa bii ya?

¹⁷Naa bii shɔnzang nɛ̀ɛ́ jĩng kɔ shɛ̃ɛning, nɛɛ tãa nɔng nɛɛ viya? Naa bii shɔnzang nɛɛ shoo kɔ shɛ̃ɛning, nɛɛ gũng sɛ̃ɛ vuu nɛɛ viya?

¹⁸A Laa mã̀a bii ɓuru kaa tɔ̀ɔ́ nɔngkɔ kpang, Laa mã̀a bii shɔnzang nɛɛ vuu ka zɔ̃ng zɔ̃ng, naa ɓɔɔ wu kasɛ ɓɛɛ.

¹⁹Naa bii ɓuru nɛɛ vuu gbete kɔ shɛ̃ɛning nɛɛ ɓi bii kpang.

²⁰Niizang, vuu kagn bii ɓuru dɔɔli, a bii ɓi kaa gbete ganggang.

²¹Ka ruu nɔngkɔ, gbalang ɓɔɔ jĩng kɔɔ naa nɛɛ, “N palɛ vi nɛɛ mɔɔ viya?” Kagn kpang. Yuu ti kɔɔ doo nɛɛ “N palɛ vi nɛɛ nɔɔ viya?” kpang.

²²Wu nɔngkɔ kpang. Vuu ɓɔɔ ka bii ɓuru ɓɔɔ ruu zirɛ nɛɛ ri lakɛ kpang, naa ri kpang ruu nwàng ningkãari kpàng,

²³Vuu ɓɔɔ ka bii ɓuru ɓɔɔ ruu risi naa vuu ɓɔɔ kpang ruu gãng jĩng ka rikɔ gbãng gbãng. Vuu ɓɔɔ ruu zi ka bii ɓuru nɛɛ shi kpang, ruu gãng jĩng ka rikɔ tɔ̃ɔ tɔ̃ɔ.

²⁴A vuu ɓɔɔ yusɛ̃ɛ tuu ruu ri kpang, ruu yaa ri ka nɔngkɔ. Laa shĩili bii shɔnzang nɔngkɔ, tɔ̀ɔ, ruu a vuu ɓɔɔ daa naa ɓɔɔ ruu a wu bannang kpang bannang kati.

²⁵Ka ruu nɔngkɔ, zang basɛ bii katɔ kpang. Vuu keɓe nandon ri yi zɔɔ naa ɓarɛ ka bii teetee.

²⁶Naa vuu gbete ka bii ɓuru dang jĩng, bii nimbang keɓe ri dang jĩng kaa nyaa zɔɔ.

²⁷Ɓɔɔ manɛ, nɔɔ nandon nɔɔ ɓakɛ zɔɔ tɔ, nɔkɔ manɛ kaa bii Kirisi ɓɔɔ ɓi gbete ɓɛɛ. Zang ɓu ka teteng manɛ, ka bii keɓe kɔ.

²⁸Ka teteng zang ɓɔɔ ri dũng Laa ɓɛɛ, Laa kɔɔyi, nɛɛ zang ɓu wu nwangnɛ, shonang ɓiɓɛ kagn. Gaayu zɔ̃ngkɔ zang ɓɔɔ nɛɛ ri nwang zang shonang Yeesɔ Kirisi. A naa zɔ̃ngkɔ zang ɓɔɔ nɛɛ ri kɔɔ zang ruu ɓɔɔ Laa tusu ri ɓɛɛ. Ri ɓang knti zang tĩng. A zɔ̃ngkɔ zang ɓɔɔ nɛɛ ri màsɛ̀ zang kɔnang, ri ɓang knti. Zɔ̃ngkɔ zang ɓɔɔ nɛɛ ri yi zang naa ka bii. Nɛɛ zang ɓɔɔ ri nwang ɓarɛ zang bang ɓɔɔ ri yiti zang ɓɛɛ. A zang ɓɔɔ ri rang yee nɛɛ nyaa zang ɓɔɔ ri kpɛ̃ɛrɛ katɔ kpang nɛɛ náa ɓɔɔ Suru Laa a ri ɓɛɛ.

²⁹Zang piti ri zang shonang Kirisi kɔ nandon kpang, zang piti ri wu zang nyaa shonang Laa kpang, wu zang piti ri tusu zang Ruu Laa kpang. Laa a zang piti naa nɛɛ ri palɛ vuu ɓɔɔ zang zirɛ zang mã naa ka danggn kpang.

³⁰Wu zang piti, ri màsɛ́ zang kɔnang kpang, wu ti zang piti, ri kɔɔ ruu nɛɛ nyaa ɓɔɔ ri kpɛ̃ɛrɛ katɔ kpang ɓɛɛ kpang, wu zang piti nwangsɛ zang dĩiri ruu kaɓa kpang.

³¹Ɓɔɔ manɛ, nɔɔ shing manɛ jĩng nɛɛ Suru Laa naa a nɔɔ naa ditɔ, nɛɛ nɔɔ palɛ vuu ɓɔɔ ri ɓa weɓe shinang katɔ ɓɛɛ. Vuu ɓɔɔ ɓa veɓe nandon keɓe, nɔɔ palɛ vuu ka gbalang kɔ n túsú nɔɔ ɓee.