Read mumuye 1 Koranti 13 Bible Online

1 Koranti 13 - mumuye bible

1 Koranti 13

¹Naa n zunung yee rannang doo katɔ nɛɛ nyaa shɔnzang ɓɔɔ ka koo, a ɓɔɔ nɛɛ nyaa zang nyaa shonang Laa ɓɔɔ ri ka lapa ɓɛɛ. A n kasɛ zang kaa takpang, n nwang naa gbongshɛng ɓɔɔ kaa nyaa ɓɛɛ. N ti nwang naa gbongbolong ɓɔɔ ri goo nyaa ɓɛɛ.

²Naa Laa a m naa vuu palɛnang, naa ɓɔɔ n kɔɔrɔ vuu ɓɔɔ Laa tusu m ɓɛɛ. Naa n ti zi vuu piti. Vuu ɓɔɔ Laa waasɛ katɔ ka yuu ɓiɓɛ n ti zi tɔ jong. Naa Laa a m dòo zɔ̃ng danggn shinnang ɓɔɔ naa n zunung katɔ, n kɔɔ kɔpɔ wu dɔ̃sɔ ka nɔng ɓɔɔgn. Naa n kasɛ zang kpang, n m vuu ɓɔɔ kpang tingkiring.

³Naa n tuu doo vuu naa mɛɛ nandon, n bàsɛ̀ zang ɓɔɔ vuu naa ɓarɛ kagn kpang ɓɛɛ. A n ti kasɛ tɔ nɛɛ zang tuu m zang dɔɔ m ka waa. Naa n kasɛ zang kpang, vuu keɓe ri nwang m vuu ɓɔɔ kpang.

⁴Naa mɔɔ kàsɛ̀ zang katɔ, mɔɔ mã danggn dɔɔli. Mɔɔ ti pàlɛ́ zang tɔ̃ɔ, mɔɔ kaa sũnyaa kpang. Mɔɔ ràng yee bang bang ka yuu ɓaaɓɛ kpang. Mɔɔ ti tuu yuu ɓaa kpang.

⁵Zang ɓɔɔ kasɛ zang katɔ nwáng ɓi nwannang ɓɔɔ tɔ̃ɔ nɛɛ zang. Kàsɛ̀ ɓi yuu ɓiɓɛ kɔ shɛ̃ɛning kpang. Lasɛ yeti ɓi pati kpang. Yiti vuu shi kpang ɓɔɔ zang pàlɛ̀ wu ɓɛɛ ka yeti kpang.

⁶Zang ɓɔɔ kàsɛ̀ zang katɔ, naa zang palɛ vuu tɔ̃ɔ tãa tĩnang katɔ. Naa zang palɛ vuu shi kpang, tãa tĩnang kpang.

⁷Zang kasɛnang yaa vuu nyaa ka gbalang kpang, shing danggn ɓi sasak, yaa gn naa ka vuu kpang, mã danggn ka vuu piti.

⁸Zang ɓɔɔ kàsɛ̀ zang katɔ, di nyaa zang kasɛnang ɓi kpang. Diki a kana ɓɔɔ zang ri naa yaa vuu ɓɔɔ Laa tusu ri kɔɔrɔnang. Diki a kana ɓɔɔ zang ri naa kɔ̀ɔrɔ̀ ruu tɔ̀ɔ́ nɛɛ nyaa ɓɔɔ ri kpɛ̃ɛrɛ kpang, kpang. Vuu zinang ti naa waa nyaa kaa tɔ.

⁹Vuu ɓɔɔ ruu zi ɓɛɛ, nɛɛ Ruu Laa ɓɔɔ ruu kɔɔ ɓɛɛ, ri ɓarɛ nyaa kiiri kpang.

¹⁰Ka diki ɓɔɔ Laa naa shing vuu piti, wu nwang nyaa kiiri, ka diki kaɓa kɔ, vuu ɓɔɔ wu nyaa kiiri kpang keɓe, ri waa nyaa kati.

¹¹Ɓɔɔ bɛ̀ɛ́ n doo wujɛ, n rangkɛ yee naa wujɛ. N ti rɛ̃rɛ naa wujɛ. N zili vuu m nɛɛ jĩng wujɛ. A ɓɔɔ n bangnɛ, n yaa vuu wujɛ ɓɔɔ n palɛ ɓɛɛ tɔ nandon.

¹²Vuu ɓɔɔ ruu zili kãntang keɓe, ruu zirɛ mɔɔ kɔɔ nɛɛ ruu pɛ̃ɛrɛ ka vĩilaa ɓɔɔ wu kalang kalang kpang ɓɛɛ. Diki a ditɔ ɓɔɔ ruu zi ri tɔ̃ɔ tɔ̃ɔ nɛɛ jĩng ɓɛɛ. Vuu ɓɔɔ n zi kãntang keɓe, wu gň nyaa kiiri kpang. Ka diki kaɓa, n naa zi kaa nyaa kiiri naa ɓɔɔ Laa zì m tɔ nandon ɓɛɛ.

¹³Vuu kagn taati ɓɔɔ ri waa nyaa ɓarɛ kpang ɓɛɛ. Vuu keɓe rikɔ danggn shinnang, nɛɛ gn ɓɔɔ zang yaa naa kpang ɓɛɛ, nɛɛ zang kasɛnang, ka teteng vuu taati keɓe, zang kasɛnang kɔ ɓa ri.