Read mumuye 1 Koranti 15 Bible Online

1 Koranti 15 - mumuye bible

1 Koranti 15

¹Manzung, n kaaɓi n kpaa nɔɔ danggn Ruu Tɔ̃ɔ ɓɔɔ ɓeleng n kɔɔ nɔɔ ka tĩng ka yuu Yeesɔ Kirisi ɓɛɛ. Bɛɛ nɔɔ ta ruu bìí tɔ, a nɔɔ shii tɔ kagn nɛɛ kaka manɛ gbãng gbãng.

²Laa ti tá yuu manɛ kana ka ruu ruu kaɓa, nɔɔ nɛɛ dũng vuu ɓɔɔ n kɔɔ nɔɔ nɛɛ yeti gbete ɓɛɛ. Nɔɔ nɛɛ ti zi vuu ɓɔɔ nɔɔ shing danggn kagn tɔ niizang ɓɛɛ.

³N kɔɔ nɔɔ Ruu Tɔ̃ɔ keɓe tɔ ka tĩng, ɓɔɔ Yeesɔ Kirisi kɔɔ m ka tĩng ɓɛɛ. Ruu Tɔ̃ɔ keɓe ɓa vuu piti katɔ, Ruu Tɔ̃ɔ keɓe, kɔɔ ruu nɛɛ Kirisi vɔ ka ruu vuu shi kpang ɓɔɔ ruu palɛ ɓɛɛ. Naa ɓɔɔ zang bée ka yeti labeenang Laa ka tĩng tɛ̃ɛ tɛ̃ɛ nɛɛ wu naa palɛ ɓɛɛ.

⁴Zang nɛɛ Yeesɔ vɔrɛ, zang gbãa wu, Laa wisi wu paa ka lee ɓɔɔ diki ɓiɓɛ daa taati ka sàa ɓɛɛ. Naa ɓɔɔ zang bée ka labeenang Laa ka tĩng nɛɛ naa palɛ ɓɛɛ.

⁵Ɓɔɔ Laa wisi wu paa tɔ, tusu Bituru yuu ɓiɓɛ. A naa tusu zang kopi tu ziti ɓɔɔ ri mantɛ vuu ka bii ɓiɓɛ, yuu ɓiɓɛ jong.

⁶Ka laa ɓɔ̀ɔ́gn ti tusu zang ɓɔɔ ri dũng wu, ri ɓa laa maani dakn maani katɔ yuu ɓiɓɛ, a ri zi wu jong. Ka teteng zang ɓɔɔ ri zi wu kaɓa, zang ɓɔɔ ri vɔlɔ tɔ, a ɓɔɔ nimbang ɓarɛ doo ningkãari.

⁷Diki ɓɔɔ kagn tusu Yakub yuu ɓiɓɛ. Nɛɛ knti, naa tùsù zang shonang ɓiɓɛ nandon yuu ɓiɓɛ jong.

⁸Nkɔ m kaa zang ɓɔɔ wu gɔɔ nyaa yuu ɓiɓɛ tusunang ka bii mɛɛ ɓɛɛ. Ɓɔɔ n nwang m naa jaa ɓɔɔ bɛ̀ɛ́ daa naa yinang gn kpang ɓɛɛ.

⁹Ka teteng zang shonang Yeesɔ nandon, nkɔ waa nyaa knti tingkiring. N daa naa ɓɔɔ zang ɓaa m nɛɛ zang shonang Yeesɔ kpang, ka ruu ɓɔɔ, ka ting, n dang zang ɓɔɔ ri dũng Laa jĩng ɓɛɛ.

¹⁰A gn mɛɛ naa kɔng Laa. Ka ruu tɔ̃ɔ ɓɔɔ wu palɛ zang, palɛ m tɔ̃ɔ, a shing m n raa zang ɓɔɔ nɔɔ zi m kãntang keɓe. Tɔ̃ɔ ɓɔɔ wu palɛ m, wu waati kpang. Nwáng vuu tɔ̃ɔ tɔ, ka ruu ɓɔɔ, n palɛ shonang nɛɛ kaka mɛɛ, n ɓa zang shonang ɓɔɔ nimbang nandon ɓɛɛ. N palɛ vuu keɓe wu nɛɛ yuu mɛɛ kpang, ɓi tɔ̃ɔ ɓiɓɛ ɓɔɔ ka bii mɛɛ palɛ.

¹¹Naa doo nkɔ kɔɔ ruu tɔ̃ɔ keɓe, naa ti nkɔ kpang, naa rikɔ kɔɔyi pálɛ̀ vuu ɓɔɔ kpang. Ruu nandon ruu kɔɔ nɔɔ doo ruu tɔ̃ɔ gbete keɓe kɔ ka yuu Yeesɔ Kirisi, a nɔɔ ti shing danggn tɔ jong.

¹²Ruu Tɔ̃ɔ kɔ, ruu kɔɔrɔ zang ɓee, kɔɔyi nɛɛ Laa wísí Yeesɔ Kirisi paa nɛɛ sàa. Laa nɛɛ wísí Yeesɔ Kirisi paa tɔ nɛɛ sàa, a palɛ biya, zang ɓɔɔ ka teteng manɛ ri kɔ̀ɔ́ nɛɛ zang naa wisi zang ɓɔɔ ri vɔlɔ tɔ nɛɛ sàa kpang viya?

¹³Naa zang nɛɛ naa wisi zang paa nɛɛ sàa kpang, nwang kaa naa ɓɔɔ Laa wisi Yeesɔ Kirisi paa doo nɛɛ sàa kpang kɔ ɓɛɛ.

¹⁴Naa Laa wisi Yeesɔ Kirisi paa nɛɛ sàa kpang, nwang kaa naa ɓɔɔ rúu kɔ rùu kɔɔrɔ nɔɔ ɓee, ɓi waati ɓɛɛ. Nɔɔ ti shing danggn tɔ ka yuu vuu ɓɔɔ kagn kpang ɓɛɛ.

¹⁵Laa nɛɛ wisi Yeesɔ Kirisi paa nɛɛ sàa kpang, nwang kaa naa ruu kɔɔ rúu tɔ nɛɛ sèé ka yuu Laa. Ka ruu ɓɔɔ ruu kɔ̀ɔrɔ̀ zang tɔ nɛɛ, ɓi Laa wisi Yeesɔ Kirisi paa nɛɛ sàa ɓɛɛ. A ɓeekpang niizang, Laa wisi zang paa katɔ nɛɛ sàa kpang ɓɛɛ.

¹⁶Nɛɛ niizang, Laa wisi zang paa nɛɛ sàa kpang, Laa wisi Yeesɔ Kirisi paa doo nɛɛ sàa kpang kɔ.

¹⁷Laa nɛɛ wisi Yeesɔ Kirisi paa gn nɛɛ sàa kpang, nwang kaa naa ɓɔɔ nɔɔ shing danggn manɛ waati ɓɛɛ. Laa yaa nɔɔ gbalang vuu shi kpang manɛ ɓi gn kpang.

¹⁸Ti nwang kaa naa ɓɔɔ zang ɓɔɔ ri shing danggn tɔ ka bii Yeesɔ Kirisi a ri vɔlɔ, ri shaarɛ ɓarɛ tɔ ɓɛɛ.

¹⁹Naa ruu shing jĩng ka bii Yeesɔ nɛɛ wu yi ruu naa ka bii ka ruu vuu koo keɓe kɔ shɛ̃ɛning, ruu nwáng vuu gn kɔnang ɓa zang piti.

²⁰Niizang, Laa wisi Yeesɔ Kirisi paa tɔ nɛɛ sàa. Ka teteng zang ɓɔɔ ri vɔlɔ ɓɛɛ, Laa wisi wukɔ paa shɔɔnang, a ruu zi kaa wukɔ nɛɛ Laa naa wisi zang ɓɔɔ ri vɔlɔ tɔ paa ditɔ jong nɛɛ sàa.

²¹Ka tĩng tɛ̃ɛ tɛ̃ɛ, vɔrɔ a ka koo nɛɛ bii zang gbete, ti doo zang gbete kɔ shingnɛ, Laa wisi ruu paa nɛɛ sàa.

²²Zang ɓɔɔ ri vɔ̀lɔ́ kãntang keɓe ka ruu ɓɔɔ zang yi ri nɛɛ bii Adamu, Laa ti naa a zang piti suru bii doo nɔngkɔ, ka ruu ɓɔɔ ri ɓakɛ bii tɔ nɛɛ Kirisi ɓɛɛ.

²³Vuu keɓe piti ri palɛ ka laa ɓarɛ. Kirisi kɔ yupaa shɔɔnang nɛɛ sàa. Ka diki ɓɔɔ wu naa gbã́ayu ka koo keɓe, Laa naa wisi zang ɓɔɔ ri ɓarɛ ɓɔ̀ɔ́ Kirisi paa ditɔ nandon.

²⁴Tɔ̀ɔ, diki ɓɔɔ koo waa nyaa kagn wu a kati. Ka laa kaɓa, Yeesɔ naa ɓa vuu piti ɓɔɔ ri roo kpanti ka koo keɓe yuu, nɛɛ vuu piti ka lapa ɓɔɔ naa vuu palɛnang ɓarɛ kagn ɓɛɛ. Wu naa ningsi naa vuu palɛnang ɓarɛ. Wu tuu kpanti ka yuu vuu piti, wu a Laa ɓɔɔ wukɔ Daa ɓiɓɛ kati.

²⁵Ɓɔɔ kãntang keɓe, ɓi Kirisi kɔ kpanti, diki ɓɔɔ Laa naa ɓa yuu zang ɓɔɔ ri shing jĩng nɛɛ Kirisi kpang nandon, wu a nɛɛ mani. Laa wu ti shing ri, Yeesɔ wu naalɛ ri nɛɛ doo.

²⁶Vɔrɔ kɔ̀ vuu ɓɔɔ shing jĩng nɛɛ Kirisi kpang, ɓɔɔ Laa naa ningsi wukɔ doo knti.

²⁷Nwáng kaa naa ɓɔɔ zang bèe ka yeti labeenang Laa nɛɛ, Laa “Shing Jaa ɓiɓɛ tɔ, wu naa vuu piti nɛɛ doo ɓiɓɛ.” Ɓɔɔ zang bee naa weɓe ruu zi tɔ vuu piti naa ɓaa shoo ɓi kaa nyaa Yeesɔ kɔ. Nwàng wu naa ɓɔɔ Laa naa sɔɔrɔ yuu ɓiɓɛ ka dii ka tĩng Yeesɔ kpang, ka ruu ɓɔɔ, Laa kɔ shing vuu kaɓa ri sɔɔrɔ yuu ɓarɛ ka dii ka tĩng Yeesɔ ɓɛɛ.

²⁸Laa nɛɛ shing vuu piti tɔ, nɛɛ ri sɔɔrɔ yuu ɓarɛ ka dii ka tĩng Yeesɔ. Tɔ̀ɔ, Kirisi nɛɛ yuu ɓiɓɛ ɓɔɔ wukɔ Jaa Laa ɓɛɛ, wu sɔɔrɔ yuu ɓiɓɛ kaa dii ka tĩng Laa, ɓɔɔ wukɔ shing wu ka tĩng nɛɛ wu náa vuu piti nɛɛ doo ɓiɓɛ ɓɛɛ. Tɔ̀ɔ, Laa wu roo kpanti kaa yuu vuu piti, a vuu piti ri ɓakɛ zɔɔ kaa nɔng ɓiɓɛ.

²⁹Zang ɓɔɔ kagn zang palɛ ri batizima, ka ruu zang ɓɔɔ ri vɔlɔ tɔ ɓɛɛ. Naa nɛɛ niizang kɔ, zang ɓɔɔ ri vɔlɔ tɔ, ri yupaa tɔ̀ɔ́ nɛɛ sàa kpang, ka ruu vi zang kaɓa ri kɔɔyi nɛɛ ri palɛ batizima ka nung zang ɓɔɔ ri vɔlɔ tɔ viya?

³⁰A rukɔ, naa Laa naa wisi zang paa tɔ̀ɔ́ nɛɛ sàa kpang, ka ruu vi, ruu mãlɛ́ yuu ɓuru ka naa vɔrɔ diki diki viya?

³¹Manzung, n kɔɔ nɔɔ, n nwàng m naa ɓɔɔ n vɔlɔ diki diki ɓɛɛ. N suu sèé kpang, naa n nɛɛ kɔ̀ɔ́yi nɛɛ n tãa tĩnang ka ruu ɓɔɔ nɔɔ manɛ kaa zang Yeesɔ Kirisi ɓɔɔ wukɔ kpanti ɓuru ɓɛɛ.

³²Ɓɔɔ bɛ̀ɛ́ n doo ka Afisa zang dɔɔli ri bɛ̃ɛ ruu mɛɛ. Nwang kaa naa ɓɔɔ n gaa nyaa nɛɛ zing ɓɔɔ ri shaa varɛ dɔɔli ɓɛɛ. Naa Laa nɛɛ wisi zang paa nɛɛ sàa kpang, n dàng jĩng nɔngkɔ ka ruu viya? Vuu keɓe nwǎng m ɓu viya? Naa zang nɛɛ naa yupaa tɔ̀ɔ́ nɛɛ sàa kpang, naa ɓɔɔ zang kɔɔrɔ ɓɛɛ, “Ruu shaa nɔɔ vuu shaanang, ruu tãa nɔɔ tĩnang, ka ruu ɓɔɔ ɓuru ruu vɔlɔ kaa tɔ ɓɛɛ.”

³³Nɔ́ɔ yaa zang ri nwãarɛ nɔɔ kpang. “Naa mɔɔ rakɛ nɛɛ zang ɓɔɔ ri palɛ shi kpang, mɔɔ naa palɛ doo shi kpang naa ɓɔɔ ri palɛ ɓɛɛ kɔ.”

³⁴Nɔɔ yaa vuu shoko manɛ ta, a nɔɔ ti yaa vuu shi kpang ɓɔɔ nɔɔ palɛ ɓɛɛ. N kɔɔ nɔngkɔ, tɔ̀ɔ, yusɛ̃ɛ wu tuu nɔɔ. Ka ruu ɓɔɔ, zang ɓɔɔ ka teteng manɛ ri zi Laa kpang ɓɛɛ.

³⁵Zang ɓɔɔ hɛ̃ɛ katɔ, nɛɛ “Zang ɓɔɔ ri vɔlɔ ri naa yupaa biya? Bii ɓarɛ naa nwang ɓi kaa biya?”

³⁶Zang ɓɔɔ ri hɛ̃ɛlɛ naa weɓe, ri ɓarɛ shoko. Mɔɔ zi kpang nɛɛ, jĩng vuu ɓɔɔ zang ɓaa ka tipi vɔ ka gbongkarɛ, tɔ̀ɔ, wu tarɛ kpang ya?

³⁷Jĩng vuu ɓɔɔ mɔɔ ɓaa ka tipi, ɓi jĩng vuu waati. Mɔɔ ɓaa wu vuu bìí dɔ̃ɔ gbete kpang. Mɔɔ nɛɛ ɓaa jĩng zaakn kpang, mɔɔ ɓaa jĩng vuu ɓɔɔgn.

³⁸Laa a zɔ̃ng vuu ɓu bii ɓɔɔ wu kasɛ ɓɛɛ. Shing zɔ̃ng jĩng vuu ɓu wu tá bii naa ɓɔɔ zɔ̃ng ɓiɓɛ ta ɓɛɛ.

³⁹Vuu ɓɔɔ ningkãari ka koo keɓe ri ɓarɛ ka zɔ̃ng zɔ̃ng. Zɔ̃ng ɓu bii ɓarɛ náabm̀. Bii shɔnzang ɓi náabm̀, bii rɛɛ yɔpɔ jĩngti ɓi ti náabm̀. Bii rɛɛ jaaning ɓi náabm̀, a ɓɔɔ jaazĩi ti náabm̀.

⁴⁰Vuu ɓɔɔ ri ka lapa bii ɓarɛ kagn. Vuu ɓɔɔ ri ka koo keɓe, bii ɓarɛ ti doogn kɔ. Shinang vuu ɓɔɔ ri ka lapa náabm̀. Shinang vuu ɓɔɔ ri ka tipi ɓi ti náabm̀.

⁴¹Laa ɓɔɔ ruu zi ka lapa ɓɛɛ, yakɛ nɔng náabm̀, a shala ti yakɛ nɔng náabm̀. Shinang rɛɛ sang ɓi ti náabm̀. Sang ɓu jong nɛɛ shinang ɓiɓɛ náabm̀ náabm̀.

⁴²Bii zang ɓɔɔ yupaa nɛɛ sàa nwáng ɓi doo nɔngkɔ. Bii shɔnzang nwàng ɓi doo naa jĩng vuu kɔ. Ɓɔɔ zang gbã́a bii, pũng ɓi katɔ. Laa nɛɛ naa wisi wu paa nɛɛ sàa, bii ɓiɓɛ raa ɓi kaa vuu ɓɔɔ pũ̀ng takpang, ɓɛɛ.

⁴³Ɓɔɔ zang gbãayi, shi ka jĩng zang kpang, ti lakɛ naa ka bii kpang. Zang nɛɛ wisi wu kaa paa, bii raa kaa vuu ɓɔɔ shi dɔɔli ɓɛɛ. Ti lakɛ naa kaa gn bii ning.

⁴⁴Ɓɔɔ zang gbãayi ɓi bii shɔnzang, ɓɔɔ zang naa wisi wu paa ɓi ka bii suru. Bii shɔnzang kagn, bii ɓɔɔ ɓi ɓɔɔ suru ɓi doo kagn kɔ.

⁴⁵Ka yeti labeenang Laa, zang beeyi nɛɛ, “Laa mãa Adamu, ɓɔɔ wukɔ shɔnzang ɓɔɔ nwang ningkãari shɔɔnang ɓɛɛ.” A Adamu ɓɔɔ a doo knti ɓɔɔ wukɔ Kirisi ɓɛɛ, ɓi kaa suru ɓɔɔ arɛ, nɛɛ wu a zang suru bii ɓɛɛ.

⁴⁶Ɓi vuu ɓɔɔ ɓɔ̀ɔ́, Suru Laa kɔ a shɔɔnang kpang, ɓi vuu ɓɔɔ bii yɔpɔ kagn, nɛɛ kaka kɔ a shɔɔnang, tɔ̀ɔ, ɓɔɔ Suru Laa wu naa a kati.

⁴⁷Laa mãa Adamu ɓɔɔ tĩng shɔɔnang ɓi nɛɛ tapuru ɓɔɔ ka tipi ɓɛɛ. Adamu ɓɔɔ ɓang wu, a ɓi nɛɛ lapa.

⁴⁸Zang ɓɔɔ nwàng ɓarɛ ka koo keɓe, ri nwàng ɓarɛ naa zang ɓɔɔ Laa mãa wu nɛɛ tapuru ɓɛɛ. A zang ɓɔɔ ri nwang ɓarɛ ka lapa, ri naa nwáng ɓarɛ naa zang ɓɔɔ à nɛɛ lapa ɓɛɛ.

⁴⁹Ɓɔɔ kãntang keɓe, ruu nwàng naa zang ɓɔɔ Laa mãa wu nɛɛ tapuru ɓɛɛ. Lee ɓɔɔ ruu naa nwáng ditɔ naa zang ɓɔɔ a nɛɛ lapa ɓɛɛ.

⁵⁰Manzung, n kɔ̀ɔ́ nɔɔ nɛɛ vuu ɓɔɔ zang mãa nɛɛ yɔpɔ nɛɛ kaka, a ɓɔɔ zĩi, daa nɔng ɓɔɔ Laa roo kpanti ɓi kpang. Vuu ɓɔɔ pṹng katɔ, nwang vuu ɓɔɔ pũ̀ng kpang ɓi kpang.

⁵¹Nɔɔ ɓaa shoo, n kɔɔ vuu ɓɔɔ bɛ̀ɛ́ zang waasɛ katɔ ɓɛɛ. Ruu vɔlɔ wu katɔ nandon kpang. Zang naa kɔ̃sɔ ruu bii ɓi katɔ kɔ jong nandon tantɛnang,

⁵²naa ɓɔɔ zang ka jĩng ɓɛɛ. Ka ɓɔɔ zang naa jee vuukãng ɓɔɔ zang di nyaa vuu piti kagn ɓɛɛ. Zang nɛɛ jee tɔ, zang piti ɓɔɔ ri vɔlɔ tɔ, ri yuku paa tɔkn. Laa a ri kaa bii ɓɔɔ naa pũng takpang ɓɛɛ. Ka làá kaɓa, Laa naa kɔ̃sɔ ruu bii katɔ nandon.

⁵³Bii ɓuru kɔ pũng katɔ, ti vɔ katɔ ɓee, naa raa kaa vuu ɓɔɔ naa pũng takpang, ti vɔ takpang ɓɛɛ.

⁵⁴Ka laa ɓɔɔ bii ɓɔɔ pũng katɔ, ti vɔ katɔ kɔ̃sɔ bii, nwang kaa ɓɔɔ pũng takpang, ti vɔ takpang. Naa nwang kaa naa ɓɔɔ zang bée ka yeti labeenang Laa doo tɛ̃ɛ tɛ̃ɛ ɓɛɛ. Zang beeyi nɛɛ, “Laa ɓa vɔrɔ yuu tɔ, ti ningsi naa vuu palɛnang vɔrɔ tɔ.”

⁵⁵“Vɔrɔ ɓa suru bii yuu takpang dòndòng. Náa ɓɔɔ wu palɛ zang vuu nɛɛ mani ti takpang.”

⁵⁶Vɔrɔ nyɔ zang ɓi ka ruu vuu shi kpang ɓɔɔ zang palɛ ɓɛɛ. Vuu shi kpang ti walɛ kaka ɓi ka nyaa dannang ɓɔɔ Laa a ɓɛɛ.

⁵⁷Ruu zã̀a Laa tɔ, ka ruu ɓɔɔ shingnɛ, ruu ɓa vɔrɔ yuu tɔ, nɛɛ vuu shi kpang piti ɓɛɛ. Ruu ɓa ri yuu nɛɛ naa vuu palɛnang Kpanti ɓuru Yeesɔ Kirisi.

⁵⁸Ka ruu nɔngkɔ, manzung, ɓɔɔ n kasɛ nɔɔ katɔ ɓɛɛ, n kɔɔ nɔɔ, nɔɔ shii nɛɛ kaka, vuu ɓɔɔ wu shing nɔɔ nɔ́ɔ kɔ̃sɔ yeti manɛ kpang. Nɔɔ palɛ shonang Kpanti ɓuru Yeesɔ Kirisi nɛɛ yeti manɛ nandon, ka ruu ɓɔɔ, nɔɔ zi tɔ nɛɛ shonang ɓɔɔ nɔɔ pàlɛ́ Kpanti Kirisi naa nwǎng nɔɔ vuu tɔ̃ɔ katɔ ɓɛɛ.