Read mumuye 1 Koranti 4 Bible Online

1 Koranti 4 - mumuye bible

1 Koranti 4

¹N kasɛ zang piti ri zirɛ nɛɛ ɓɔɔ ruu zang shonang Yeesɔ Kirisi, ruu dũng wu ɓɛɛ, Laa a ruu vuu ɓɔɔ wu waasɛ katɔ ɓɛɛ tɔ ka naa, nɛɛ ruu gãng jĩng kagn.

²Vuu ɓɔɔ zang kasɛ ka bìí zang ɓɔɔ gãng zang jĩng ka vuu ɓɛɛ, wu gãng jĩng ka vuu nɛɛ yeti gbete.

³Naa nɔɔ kɔɔyi nɛɛ n palɛ vuu shi kpang, ɓi wukɔ kpãa m kpang. Naa zang ɓɔɔ ri kɔɔyi nɛɛ n palɛ vuu shi kpang. Naa ri dɔɔ m doo katɔ, ɓi wukɔ kpãa m kpang. Naa doo nkɔ nɛɛ yuu mɛɛ, n dɔ̀ng yuu mɛɛ ruu kpang.

⁴Niizang, n zi vuu ɓɔɔ jĩng kpantɛ m, n palɛ ɓɛɛ kpang. Ɓi ti nkɔ dɔ̌ng yuu mɛɛ ruu nɛɛ zang yaa m tɔ kpang. Ɓi Laa dɔ̌ng m ruu ɓiri.

⁵Ka ruu nɔngkɔ, daa naa ɓɔɔ nɔɔ dɔng zang ruu ɓɛɛ kpang. Nɔɔ yaa gbongkarɛ diki ɓiɓɛ wu arɛ. Diki ɓɔɔ Kpanti Yeesɔ gbãayu kagn ɓɛɛ. Naa nwangsɛ dĩiri vuu ɓɔɔ zang waasɛ̃ katɔ kãntang keɓe ditɔ. Ti naa nwangsɛ rɛ̃rɛnang ɓɔɔ zang ɓu rɛ̃rɛ ka yeti ɓiɓɛ ditɔ. Ka diki kaɓa kɔ, Laa naa dɔ̀ɔ zang ɓu nɛɛ dɔɔnang ɓɔɔ daa teetee nɛɛ zang ɓu ɓɛɛ.

⁶Rɛɛ manzung, ka vuu kɔ n kɔ̀ɔrɔ̀ nɔɔ ɓee, n tuu Apolo a ɓɔɔ yuu mɛɛ n gã̀sɛ́ nɔɔ vuu nɛɛ mani, tɔ̀ɔ, nɔɔ zi kati. N ti kasɛ nɛɛ nɔɔ naa zi dĩiri ruu ɓɔɔ, tɔɔ, “Nɔɔ ɓa vuu ɓɔɔ zang bee ka yeti labeenang Laa ɓɛɛ kpang.” Daa naa ɓɔɔ nɔɔ tuu yuu manɛ ka ruu zang ɓɔɔ, nɔɔ ti zì zang ɓɔɔ naa vĩi kpang.

⁷Ɓɔɔ mɔɔ zi yuu ɓaaɓɛ nɛɛ mɔɔ ɓa zang piti katɔ ɓɛɛ, mɔɔ ɓu wiya? Vuu ɓaaɓɛ ɓɔɔ kagn ɓɔɔ wu Laa kɔ a mɔɔ kpang kagn ya? Laa kɔ nɛɛ a mɔɔ vuu piti, a mɔɔ rangkɛ yee vi bang bang ka yuu vuu kaɓa naa kaka ɓaaɓɛ a mɔɔ viya?

⁸Nɔɔ wàlɛ̀ vuu ɓɔɔ nɔɔ kasɛ manɛ tɔ nandon. Nɔɔ tuu yuu manɛ nɛɛ nɔɔ manɛ kaa zang ying. Nɔɔ nwáng kpanti tɔ, a rùu ɓuru gn kpanti kpang. Naa nɔɔ nɛ̀ɛ́ kpanti niizang, wukɔ nɛ̀ɛ́ tɔ̃ɔ, ruu nɛɛ roo kpanti kaa nɛɛ nɔɔ ka nyaa zɔɔ.

⁹N zirɛ, mɔɔ kɔ̀ɔ́ nɛɛ Laa zɔ̃ng ruu, ɓɔɔ ruu zang shonang Yeesɔ Kirisi nɛɛ rukɔ ruu waa nyaa knti. Rùu ɓuru naa zang ɓɔɔ zang dɔng ri ruu nɛɛ zang nyɔ ri vɔrɔ ɓɛɛ. Ruu shìi ka dalɛ ka nihn, tɔ̀ɔ, zang piti ka koo nɛɛ rɛɛ zang nyaa shonang Laa ɓɔɔ ka lapa ɓɛɛ, ri tɛ̃ɛ ruu jĩng kaa bii.

¹⁰Ruu nwang kaa naa zang shoko, ka ruu Yeesɔ Kirisi. Nɔɔ tuu yuu manɛ naa zang ɓɔɔ ri zũng katɔ ɓɔɔ ri ɓakɛ yuu kaa nɛɛ Yeesɔ Kirisi ɓɛɛ. Rùu lakɛ naa ɓuru bii kpang. Kaka ɓi kagn bii manɛ. Zang seng nɔɔ manɛ katɔ, ruu ɓuru zang ɓɔɔ zang palɛ ri vuu yusɛ̃ɛ ɓɛɛ.

¹¹Wee ruu rang yee ka nyaa ɓee, nyɔkɔ nyɔ ruu katɔ, sutu mã ruu, ruu hã̀lɛ̀ ɓuru sɛ̃ɛ fɔ̃ɔrɔ ka bii, zang dang ruu jĩng, a gãa ɓɔɔ ruu nwáng kagn ti kpang.

¹²Ruu palɛ shonang nɛɛ naa ɓuru gbãng gbãng. Zang nɛɛ dãlɛ ruu, ruu gaa ri Laa nɛɛ, Laa wu palɛ ri tɔ̃ɔ. Zang dang ruu jĩng a ruu mã danggn.

¹³Zang ri nɛɛ kɔɔrɔ ruu shi kpang ka yuu ɓuru, ruu kàsɛ́ ri nyaa ɓuru tɔ̃ɔ. Zang ri risi ruu naa vuu ɓɔɔ zang vang ka dòndòng ka koo ɓɛɛ. Naa doo kãntang keɓe, ri zí ruu naa zang ɓɔɔ ri ɓarɛ ka tipi, zang naalɛ ri nɛɛ doo ɓɛɛ.

¹⁴N bèé nɔɔ vuu keɓe nɛɛ, tɔ̀ɔ, yusɛ̃ɛ wu tuu nɔɔ kpang. N kasɛ nɛɛ n tusu nɔɔ m vuu kɔ jong, ka ruu ɓɔɔ, nɔɔ manɛ wujɛ mɛɛ ɓɔɔ n kasɛ ri katɔ ɓɛɛ.

¹⁵Naa zang ɓɔɔ ri tùsù nɔɔ vuu, ka yuu Yeesɔ Kirisi doo labang kopi, dáa manɛ ɓɔɔ yi nɔɔ ɓi gbete kɔ nwani. Ɓi nkɔ nwàng naa daa manɛ ka gbalang Yeesɔ Kirisi keɓe, ka ruu ɓɔɔ, nkɔ kɔɔ nɔɔ Ruu Tɔ̃ɔ Laa shɔɔnang ɓɛɛ.

¹⁶Ka ruu nɔngkɔ, n gaa nɔɔ katɔ, nɔɔ palɛ vuu naa ɓɔɔ n palɛ ɓɛɛ.

¹⁷Vuu ɓɔɔ palɛ n shong Timoti nɛɛ wu a ka bìí manɛ ɓɛɛ kɔ. Tɔ̀ɔ, wu naa kpaa nɔɔ danggn nwannang mɛɛ ka gbalang Yeesɔ Kirisi, naa ɓɔɔ n tùsù zang ka nɔng piti, a ɓɔɔ ti ka nɔng ɓɔɔ nɔɔ kpalɛ zɔɔ ka Gãa Laa ɓɛɛ piti, nɛɛ ri palɛ ɓɛɛ. Timoti ɓi jaa mɛɛ ɓɔɔ n kasɛ wu katɔ ɓɛɛ, ka ruu ɓɔɔ, ruu nɛɛ wu gbete ka bìí Yeesɔ Kirisi ɓɛɛ. Ti palɛ shonang Kpanti Yeesɔ Kirisi nɛɛ yeti gbete ɓɛɛ.

¹⁸Zang ɓɔɔ ka teteng manɛ ri lakɛ jĩng, ri kɔɔ ɓu nɛɛ n nɛɛ a tɔ, n naa leng nɔɔ kpang ya?

¹⁹Laa nɛɛ kasɛ nyaa tɔ, diki bee kpang, n a ditɔ ka nɔng manɛ. N naa zi kati nɛɛ jĩng mɛɛ, vuu ɓɔɔ zang ɓɔɔ ri lakɛ jĩng keɓe, ri nɛɛ ri zunung palɛnang tɔ ɓɛɛ. Wu vuu ɓɔɔ ri kɔɔ nɛɛ nyaa kɔ shɛ̃ɛning ɓɛɛ kpang.

²⁰Ka ruu ɓɔɔ, kpanti roonang Laa ɓi yee ɓɔɔ zang rangkɛ nɛɛ nyaa waati kpang, ɓi vuu naa vuu palɛnang Laa.

²¹Nɔɔ kasɛ wiya? Ɓɔɔ n a nɛɛ gbãa, nɛɛ ɓɔɔ n a nɛɛ yeti ɓɔɔ valɛ katɔ nɛɛ zang kasɛnang, ka bii manɛ ya?