Read mumuye 1 Koranti 5 Bible Online

1 Koranti 5 - mumuye bible

1 Koranti 5

¹Zang ri kɔɔrɔ nɛɛ zang ɓɔɔ kagn teteng manɛ ri palɛ dũndũng. Naa doo zang ɓɔɔ ri zi Laa kpang, ri pálɛ̀ zɔ̃ng vuu shi kpang keɓe kpàng. N tãayi nɛɛ zang gbete ka teteng manɛ, rooro nɛɛ soro ɓeedaa.

²Zang ri nɛɛ pálɛ̀ naa weɓe ka teteng manɛ, nɔɔ palɛ biya nɔɔ tuu yuu manɛ viya? Nɔɔ káa katɔ kɔ jong, ka ruu vuu shi kpang manɛ. Nɔɔ hing zang ɓɔɔ pálɛ̀ vuu shi kpang keɓe katɔ, wu yaa teteng manɛ.

³Wee n ka nɔng nɛɛ nɔɔ kpang ɓee, n rɛ̃rɛ ruu manɛ katɔ. N dɔ̀ng zang ɓɔɔ palɛ vuu keɓe ruu tɔ, nɛɛ nung Yeesɔ Kirisi, mɔɔ kɔɔ nɛɛ, n nɛɛ nɔɔ nɔng gbete. Nɔɔ palɛ vuu kɔ n kɔɔ nɔɔ ɓee. Nɔɔ nɛɛ kpalɛ zɔɔ nɔng gbete, yeti mɛɛ dàá gbete nɛɛ ɓɔɔ manɛ. Naa vuu palɛnang Kpanti ɓuru Yeesɔ ti kagn teteng manɛ ning.

⁵Nɔɔ yàa Sheetang zang keɓe, wu lasɛ yɔpɔ bii ɓiɓɛ, tɔ̀ɔ, suru bii ɓiɓɛ wu wɔ kati, ka diki ɓɔɔ Kpanti ɓuru Yeesɔ naa gbãayu ka koo keɓe ɓɛɛ.

⁶Daa naa ɓɔɔ nɔɔ tuu yuu manɛ naa wee nɔɔ pálɛ̀ ɓee kpang. Nɔɔ zi kpang nɛɛ yisi tɔkɔlɔng tàntɛ́ yeti borodi bàanang wu shing borodi wu puuyi kpang ya?

⁷Ka ruu nɔngkɔ, nɔɔ nwangsɛ vuu shi kpang keɓe nɔɔ yaa teteng manɛ, ka ruu ɓɔɔ, nɛɛ bàá ka teteng manɛ ɓɛɛ. Nɔɔ nwangsɛ vuu shi kpang keɓe, tɔ̀ɔ, nɔɔ nwang kaa zang ɓɔɔ shi kpang ka bii ɓarɛ kpang ɓɛɛ. Ɓɔɔ ruu dũng Laa ɓɛɛ, ruu ɓuru kaa kalang kalang, ka ruu ɓɔɔ, Yeesɔ Kirisi vɔ ka ruu ɓuru ɓɛɛ. Yeesɔ nwang naa jamɛ̀ɛrɛ́ ɓɔɔ zang dɔɔ Laa, ka laa ɓɔɔ zang shaa nyaalaa pasika ɓɛɛ.

⁸Ka ruu nɔngkɔ, ruu yáa nɔɔ zɔ̃ng vuu shi kpang ta nandon, tɔ̀ɔ, vuu shi kpang kaɓa, wu baa kaa tɔ̀ɔ́ teteng ɓuru kpang. Ruu palɛ nɔɔ tɔ̃ɔ, ruu ti dũng gbalang Laa nɛɛ yeti gbete. Kaa naa weɓe kɔ, ruu nwang naa borodi ɓɔɔ zang tɛ̃ɛ yisi kagn kpang tingkiring ɓɔɔ zang Yahudi ri sháa ka nyaalaa pasika ɓɛɛ. Wee naa ɓɔɔ ruu shaa nyaalaa kaɓa jong tɔ̃ɔ ɓɛɛ kɔ.

⁹Ka yeti labeenang ɓɔɔ n bee nɔɔ tĩng shɔɔnang ɓɛɛ, n kɔ̀ɔ nɔɔ nɛɛ nɔ́ɔ nwàng nɔng gbete nɛɛ zang ɓɔɔ ri palɛ dũndũng ɓɛɛ kpang.

¹⁰N kɔɔ wu nɛɛ nɔɔ nwàng nɔng gbete nɛɛ zang ɓɔɔ ri dũ̀ng Laa kpang, kpang. Zang ɓɔɔ ri dũ̀ng Laa kpang, ri ti palɛ dũndũng, a ri ti shing jĩng ka vuu zang, ri ɓɔɔrɔ vuu, ɓɔɔ ri ti bang vaka, ri ɓarɛ nɛɛ ruu ka koo keɓe diki diki. Ruu palɛ biya ruu nwàng nɛɛ ri kpang viya?

¹¹N kɔɔ nɔɔ m nɛɛ, nɔɔ nwàng nɔng gbete nɛɛ zang ɓɔɔ kɔɔyi nɛɛ wu dũng Laa a palɛ dũndũng, shing jĩng ka vuu zang, ti bang doo vaka, dãlɛ zang, ti ɓoo saa, a ti ɓɔɔrɔ vuu ɓɛɛ kpang. Nɔɔ ti shaa vuu shaanang nɛɛ rɛɛ zɔ̃ng zang keɓe kpang tingkiring.

¹²Zang a m naa nɛɛ n jɛ̃ɛ zang ɓɔɔ ri dũng Laa kpang ruu kpang. Rùu màngkɛ́ ɓuru zang ɓɔɔ ri dũng Laa kɔ shɛ̃ɛning, ri nɛ̀ɛ́ pálɛ̀ vuu shi kpang.

¹³Ɓi Laa naa jɛ̃ɛ zang ɓɔɔ ri dũ̀ng wu kpang ruu. Ka ruu nɔngkɔ, naa ɓɔɔ zang bee ka yeti labeenang Laa ɓɛɛ, “Nɔɔ hing zang ɓɔɔ palɛ vuu shi kpang katɔ, wu yaa teteng manɛ.”