Read mumuye 1 Koranti 6 Bible Online

1 Koranti 6 - mumuye bible

1 Koranti 6

¹Naa zang ɓɔɔ dũng Laa pàlɛ̀ zang ɓɔɔ dũng doo Laa kɔ vuu shi kpang, yusɛ̃ɛ tuu wu ka nɔng ɓɔɔ wu daa ɓáa nyaavaa ka tĩng zang ɓɔɔ ri dũng Laa kpang, kpang ya? Wu nɛ̀ɛ́ daa nɛɛ zang kaɓa ka tĩng zang ɓɔɔ ri dũng doo Laa kɔ jong kpang ya?

²Nɔɔ zi kpang nɛɛ, zang ɓɔɔ ri dũng Laa kɔ ri naa jɛ̃ɛ zang koo ruu kpang ya? Naa nɔkɔ naa jɛ̃ɛ zang koo ruu, a nɔɔ dɔ̀ng zɔɔ ruu, ka ruu vuu tɔkɔlɔng tɔkɔlɔng ɓɔɔ nɔɔ pàlɛ́ zɔɔ ɓɛɛ kpang ya?

³Nɔɔ zi kpang nɛɛ rukɔ naa jɛ̃ɛ rɛɛ zang nyaa shonang Laa ɓɔɔ ri ka lapa ruu kpang ya? Nɛɛ nɔngkɔ, a ruu dɔ̀ng zang ruu ka yuu vuu ɓɔɔ ruu pàlɛ́ zɔɔ ka koo keɓe kpang ka ruu viya?

⁴Ka ruu nɔngkɔ, nɔɔ nɛɛ pálɛ̀ zɔɔ vuu, nɔɔ daa ɓaa zɔɔ nyaavaa ka bii zang ɓɔɔ ka teteng manɛ ɓɔɔ nɔɔ sèng ri kpang gbãagbãa, ri dɔng nɔɔ ruu.

⁵Yusɛ̃ɛ tuu nɔɔ kpang ya? Zang kagn teteng manɛ gbete ɓɔɔ zũng katɔ ɓɔɔ naa dɔng zang ɓɔɔ ri dũng doo Laa kɔ ruu kpang ya?

⁶Daa naa ɓɔɔ zang ɓɔɔ dũng Laa daa ɓàá ɓeezung ɓɔɔ dũng doo Laa kɔ nyaavaa, tɔ̀ɔ, zang ɓɔɔ shing danggn ka bii Yeesɔ Kirisi kpang, wu daa jɛ̃ɛ ri ruu ɓɛɛ kpang.

⁷Niizang, naa nɔɔ ɓàarɛ́ zɔɔ nyaavaa, ruu zi kaa wukɔ nɛɛ nɔɔ palɛ vuu shi kpang tɔ. Naa zang palɛ mɔɔ vuu shi kpang, mɔɔ mã danggn wukɔ tɔ̃ɔ. Ɓa ɓɔɔ mɔɔ daa ɓaa zang nyaavaa katɔ. Naa zang mulu mɔɔ, a mɔɔ yaa ka nɔngkɔ gbã̀ágbãa, wukɔ tɔ̃ɔ.

⁸Ɓɔɔ nɔkɔ nɛɛ yáa zang ɓɔɔ wu palɛ nɔɔ vuu shi kpang jong, nɔkɔ pàlɛ́ zɔɔ shi kpang ka naa manɛ. Nɔɔ ti mulu zɔɔ, wee nɔɔ jaa nàá zɔɔ ka gbalang Kirisi ɓɛɛ.

⁹Nɔɔ zi tɔ nɛɛ, zang ɓɔɔ ri ta yeti shi kpang, ri daa nɔng ɓɔɔ Laa roo kpanti kpang. Nɔ́ɔ nwãarɛ yuu manɛ kpang. Zang ɓɔɔ ri palɛ dũndũng, zang ɓɔɔ ri bang vaka, zang ɓɔɔ ri rooro nɛɛ soro zang, zang varɛ ɓɔɔ ri rooro doo nɛɛ zang varɛ kɔ ɓɛɛ.

¹⁰Zang ɓɔɔ ri ɓɔ̀ɔ́ shɔngɓɔ, zang ɓɔɔ ri shing jĩng ka vuu zang, zang ɓɔɔ sàa si ri, zang ɓɔɔ ri rangkɛ yee shi kpang ka yuu zang ɓɔɔ, zang ɓɔɔ ri mulu zang, nɛɛ zang piti ɓɔɔ ri palɛ rɛɛ zɔ̃ng vuu shi kpang keɓe, ri daa nɔng ɓɔɔ Laa roo kpanti kpang.

¹¹Ɓeleng, zang ɓɔɔ ka teteng manɛ, ri nwang nwannang shi kpang keɓe kɔ. A Laa naa kɔsɔ vuu shi kpang manɛ, nɔɔ kaa kalang kalang. A shɛ̃ɛrɛ nɔɔ nɛɛ nɔɔ nwang kaa zang ɓiɓɛ. Laa zí nɔɔ manɛ kaa naa zang ɓɔɔ ri palɛ tɔ̃ɔ, ka ruu ɓɔɔ, nɔɔ a bìí ɓiɓɛ nɛɛ nung Kpanti ɓuru Yeesɔ Kirisi, a ɓɔɔ nɛɛ Suru Laa ɓɔɔ ruu bang wu ɓɛɛ.

¹²A zang ɓɔɔ ka teteng manɛ kɔɔ ɓi nɛɛ, “Zang zãa m vuu ɓɔɔ kagn kpang.” Niizang zang zãa mɔɔ vuu ɓɔɔ kagn kpang. Wu vuu piti tɔ̃ɔ kpang. Ɓɔɔ mɛɛ, n kasɛ tɔ nɛɛ, zang zãa m vuu ɓɔɔ kagn kpang, a n kasɛ kaa takpang, vuu ɓɔɔ wu yi m gbãng gbãng n raa kaa naa jaafoo vuu bìí kpang.

¹³Zang ɓɔɔ kɔɔ ɓi nɛɛ, “Laa mãa vuu shaanang nɛɛ zang shaa ka buru. Ti mãa buru ka ruu vuu ɓɔɔ zang shaa ɓɛɛ.” Nɔngkɔ niizang. Lee ɓɔɔ Laa naa ningsi buru ditɔ, nɛɛ vuu shaanang ning. Laa mãa bii nɛɛ zang palɛ wu dũndũng nɛɛ mani kpang. Laa mãa bii nɛɛ zang wu dũng Kpanti Yeesɔ Kirisi nɛɛ mani. Ti kpanti Yeesɔ Kirisi kɔ a bii vuu ɓɔɔ bii kasɛ ɓɛɛ.

¹⁴Naa ɓɔɔ Laa wisi Kpanti Yeesɔ Kirisi paa nɛɛ saa. Laa naa wisi ruu paa ditɔ jong nɛɛ saa nɛɛ naa vuu palɛnang ɓiɓɛ.

¹⁵Nɔɔ zi kpang nɛɛ bii manɛ ɓi ɓɔɔ Yeesɔ Kirisi kpang ya? Naa n tuu bii Yeesɔ Kirisi dang gbete n ɓakɛ nɛɛ bii zang soro ɓɔɔ rakɛ wàázaa tɔ̃ɔ ya? Nɔ́ɔ palɛ nɔngkɔ kpang tingkiring.

¹⁶Nɔɔ zi kpang nɛɛ naa zang ɓɔɔ ɓakɛ yuu ɓiɓɛ nɛɛ zang soro ɓɔɔ rakɛ wàázaa ri nwang ɓarɛ kaa shɔnzang gbete kpang ya? Nwang kaa naa ɓɔɔ zang bee ka yeti labeenang Laa ɓɛɛ nɛɛ, “zang ziti keɓe ri nwáng kaa shɔnzang gbete.”

¹⁷Zang ɓɔɔ nɛɛ ɓakɛ yuu ɓiɓɛ nɛɛ Kpanti Yeesɔ Kirisi, suru ɓiɓɛ nwang kaa gbete nɛɛ ɓɔɔ Yeesɔ.

¹⁸Ka ruu nɔngkɔ, n kɔɔ nɔɔ, nɔɔ yáa dũndũng palɛnang. Vuu shi kpang ɓɔɔ shɔnzang palɛ nandon, zang palɛ wu ka bii kpang. Zang ɓɔɔ palɛ dũndũng, pàlɛ́ ɓi bii ɓiɓɛ vuu shi kpang.

¹⁹Nɔɔ zi kpang nɛɛ bìí manɛ nwàng ɓi naa Gãa Laa ɓɔɔ Suru Laa nwang kagn ɓɛɛ kpang ya? Laa shing Suru ɓiɓɛ ka yeti manɛ. Bii manɛ ɓi ɓɔɔ manɛ kpang, ɓi ɓɔ̀ɔ́ Laa.

²⁰Ka ruu ɓɔɔ, hoo nɔɔ nɛɛ zĩi Yeesɔ Kirisi ɓɛɛ. Ka ruu nɔngkɔ, nɔɔ a Laa bannang nɛɛ bii manɛ.