Read mumuye 1 Koranti 8 Bible Online

1 Koranti 8 - mumuye bible

1 Koranti 8

¹N kaaɓi, n rang yee ka yuu vuu shaanang ɓɔɔ zang bang vaka nɛɛ mani ɓɛɛ. Nɔɔ tɔɔ, ruu nandon ruu zi vuu ɓɔɔ niizang tɔ. Niizang, ruu nandon ruu zi vuu tɔ. A zɔ̃ng vuu zinang kaɓa shing zang, zang wu tuu yuu ɓiɓɛ. Ɓi zɔɔ kasɛnang kɔ yi zang naa ka bii dɔɔli.

²Naa zang ɓɔɔ tuu yuu ɓiɓɛ nɛɛ wu zi vuu tɔ, zi vuu ɓɔɔ wu nɛ̀ɛ́ zi ɓɛɛ gn kpang.

³A zang ɓɔɔ kasɛ Laa, Laa zi wukɔ nɛɛ wu zang ɓiɓɛ.

⁴Ka ruu vuu shaanang ɓɔɔ zang bang vaka nɛɛ mani ɓɛɛ. Ruu zi tɔ nɛɛ, suru ɓi kagn bii vaka kpang. Ruu ti zi tɔ nɛɛ Laa ɓi gbete kɔ nwani.

⁵Naa vuu doo kagn ka lapa, nɛɛ tipi gaagaa ɓɔɔ zang bang ri naa Laa ɓɛɛ. Ɓɔɔ zang ri risi ri naa kpanti ɓarɛ ɓɛɛ.

⁶Ruu zi ɓuru tɔ, Laa ɓi gbete. Wukɔ Daa, wukɔ mãa vuu piti, wukɔ ti mãa ruu nɛɛ, tɔ̀ɔ, ruu a wu bannang. Kpanti ti gbete kɔ nwani, wukɔ Yeesɔ Kirisi. Laa mãa vuu piti nɛɛ bìí ɓiɓɛ kɔ. Rùu ti nwang ningkãari ka ruu ɓiɓɛ kɔ.

⁷A kaa tɔ̀ɔ́ zang piti ri zi tɔ nɛɛ vaka ɓi vuu ɓɔɔ kpang, kpang. Zang ɓɔɔ kagn ɓɔɔ bii ĩi ri tɔ nɛɛ vaka. Kãntang ri zi ɓarɛ nɛɛ vuu shaanang kaɓa ɓi ɓɔɔ vaka. Ka ruu nɔngkɔ, naa ri shaa zɔ̃ng vuu shaanang kaɓa ri rɛ̃rɛ ɓarɛ nɛɛ vuu shaanang kaɓa shing ri, ri nwang zang shi kpang.

⁸Ruu zi tɔ, naa ruu shaa zɔ̃ng vuu shaanang ɓɔɔ naa weɓe, naa ruu shaa doo kpang, vuu shaanang kaɓa, shing ruu, ruu nwang zang tɔ̃ɔ ka tĩng Laa kpang. Naa ruu shaa kpang, palɛ vuu ɓɔɔ kpang. Naa ruu shaayi naa risi ruu, ruu nwang zang tɔ̃ɔ kpang.

⁹Nɔɔ zi manɛ tɔ nɛɛ, Laa yaa ruu gbalang tɔ, ruu shaa zɔ̃ng vuu shaanang ɓu nandon. Nɔɔ palɛ waasɛ̃ nɔɔ nɛ̀ɛ́ shing zang ɓɔɔ danggn shinnang ɓarɛ zũng gn kpang ri nɛɛ palɛ vuu shi kpang.

¹⁰Naa zang ɓɔɔ kɔɔ ɓi nɛɛ zɔ̃ng vuu shaanang kaɓa shing ri, ri nwáng zang shi kpang, ri zì mɔɔ zang ɓɔɔ mɔɔ zì ɓaa tɔ, mɔɔ nwang ka gãa vaka mɔɔ shaa vuu shaanang ɓɔɔ zang nwãa ka ruu vaka bannang. Shing wu katɔ wu naa shaa vuu shaanang vaka jong.

¹¹Ka ruu nɔngkɔ, naa mɔɔ shaa vuu shaanang kaɓa, mɔɔ shing zang kaɓa yaa gbalang tɔ, nɛɛ vuu ɓɔɔ mɔɔ zi ɓɛɛ. Naa mɔɔ palɛ vuu ɓɔɔ shing ɓaazung ɓɔɔ Kirisi vɔ ka ruu ɓiɓɛ jong ning gbalang, wukɔ tɔ̃ɔ ya?

¹²Naa nɔɔ palɛ nɔngkɔ, nɔɔ pàlɛ̀ ɓaazung manɛ vuu shi kpang tɔ. Ka ɓɔɔ nɔɔ shing ri, ri palɛ vuu ɓɔɔ ri zi ɓarɛ nɛɛ shing ri, ri nwang zang shi kpang ɓɛɛ. Nɔɔ ti pàlɛ̀ Yeesɔ Kirisi nɛɛ yuu ɓiɓɛ vuu shi kpang tɔ jong.

¹³Ka ruu nɔngkɔ, naa n zirɛ vuu shaanang ɓɔɔ n shaayi shing manzung katɔ wu palɛ vuu shi kpang, n shaa vuu shaanang kaɓa takpang dòndòng. N nɛ̀ɛ́ shing manzung wu ning gbalang.