Read mumuye 1 Koranti 9 Bible Online

1 Koranti 9 - mumuye bible

1 Koranti 9

¹N zi m tɔ nɛɛ vuu ɓɔɔ zang zãa m katɔ kagn kpang. N m zang shonang Yeesɔ Kirisi. N ti zi Yeesɔ Kirisi ɓɔɔ wukɔ Kpanti ɓuru tɔ nɛɛ jĩng mɛɛ. Nɔɔ manɛ zang ɓɔɔ n atɛ ri nɛɛ ri naa dũng Kpanti Yeesɔ Kirisi ɓɛɛ, ka ruu shonang ɓɔɔ n pàlɛ̀ wu ɓɛɛ.

²Naa zang ɓɔɔ ri kasɛ doo kpang nɛɛ n zang shonang Yeesɔ Kirisi kpang. Nɔɔ zi manɛ tɔ nɛɛ n m zang shonang Yeesɔ Kirisi, ka ruu ɓɔɔ, zang zi ka nɔkɔ nɛɛ n zang shonang Kirisi ɓɛɛ.

³Naa zang ri rang ruu shi kpang ka yuu mɛɛ, n kɔɔ ri m nɛɛ,

⁴Daa naa ɓɔɔ zang a ruu vuu shaanang nɛɛ vuu ɓoonang ka ruu shonang ɓɔɔ ruu palɛ ɓɛɛ kpang ya?

⁵Vuu ɓɔɔ zãyi naa ruu gee zang soro ɓɔɔ dũng Laa ɓɛɛ kagn ya? Jaa soro bìí wu ti daarɛ nɔng ɓɔɔ ruu daarɛ nɛɛ ruu, naa ɓɔɔ Bituru nɛɛ zang shonang Yeesɔ Kirisi ɓɔɔ nimbang nɛɛ rɛɛ jaa nàá Kpanti Yeesɔ Kirisi ri palɛ ɓɛɛ.

⁶Nɔɔ kɔɔ manɛ nɛɛ ɓi nkɔ nɛɛ Baranaba ruu palɛ shonang nɛɛ naa ɓuru tɔ̀ɔ ruu walɛ vuu shaanang ɓɔɔ ruu shaa ɓɛɛ ya?

⁷Sɔɔja ɓɔɔ kagn ta sĩiri, wu ti kãa vuu shaanang nɛɛ yuu ɓiɓɛ ya? Zang ɓɔɔ kagn lang jaa shaa vuu ɓɔɔ wu lang ɓɛɛ kpang ya? Jagãng napo ri ɓoo mii napo kpang ya?

⁸N kɔ̀ɔ́ ruu keɓe, wu naa ɓɔɔ shɔnzang rang yee waati kpang. Labeenang nyaa dannang ɓɔɔ Musa beeyi kɔɔ doo nɔngkɔ.

⁹Zang bèe nɔngkɔ, ka yeti labeenang nyaa dannang Musa nɛɛ, “Mɔɔ nɛɛ palɛ shonang nɛɛ napo ka jaa ɓaaɓɛ, mɔɔ mã wu nyaa ɓiɓɛ katɔ kpang.” Laa kɔɔ ruu keɓe ka yuu napo kɔ shɛ̃ɛning ya?

¹⁰Kpang, Laa kɔɔ ruu keɓe, ka yuu ɓuru ɓɔɔ ruu shɔnzang ɓɛɛ. Ka ruu ɓɔɔ, zang ɓɔɔ lang jaa, nɛɛ zang ɓɔɔ waa zee, ri shíng jĩng katɔ nɛɛ zang a ri ɓɔɔ ɓarɛ jong ɓɛɛ.

¹¹Naa ɓɔɔ zang vang jĩng vuu ka jaa, ruu kɔ̀ɔrɔ̀ nɔɔ ruu tɔ̃ɔ Laa tɔ. Ti nwǎng nɔɔ vuu Suru Laa kana ka yeti manɛ. Daa naa ɓɔɔ nɔɔ a ruu vuu naa manɛ ɓɔɔ koo keɓe kpang ya?

¹²Naa zang ɓɔɔ ri shing danggn nɛɛ, nɔɔ a ri vuu naa manɛ katɔ, daa naa ɓɔɔ nɔɔ alɛ ruu vuu, ɓa ɓɔɔ ɓarɛ katɔ kpang ya? Ruu zi tɔ nɔngkɔ, a ruu tɔɔ gngn nɛɛ, ruu gaa nɔɔ nɛɛ nɔɔ a ruu vuu naa manɛ kpang. Ruu kasɛ tɔ ruu dang jĩng kɔ jong, ka ɓɔɔ ruu, nɛ̀ɛ́ nɔ̀ɔ́ gbalang Ruu Tɔ̃ɔ ɓɔɔ ka yuu Yeesɔ Kirisi kɔɔnang ɓɛɛ.

¹³Nɔɔ zi tɔ nɛɛ, zang ɓɔɔ ri palɛ shonang ka yeti Gãa Laa, ri walɛ vuu shaanang ka yeti vuu ɓɔɔ zang ri alɛ ka Gãa Laa ɓɛɛ. Zang ɓɔɔ ri ti palɛ shonang ka nɔng ɓɔɔ zang dɔɔ Laa vuu kagn, ri walɛ vuu ɓɔɔ zang ri dɔɔ Laa ɓɛɛ jong.

¹⁴Zang ɓɔɔ ri kɔɔrɔ zang Ruu Tɔ̃ɔ Laa, ri ɓarɛ doo nɔngkɔ. Kpanti Yeesɔ kɔɔ doo nɔngkɔ nɛɛ, zang ri a ri vuu nwannang koo keɓe katɔ, ka ruu shonang ɓarɛ.

¹⁵Naa doo nɔngkɔ piti, n tɔɔ gngn nɛɛ, zang ɓɔɔ wu a m vuu ɓɔɔ kpang. Wee n bée laa keɓe, n bee wu nɛɛ nɔɔ a m vuu ɓɔɔ kpang. N vɔ katɔ gbã̀ágbãa, ka ɓɔɔ zang ɓɔɔ nɛɛ zãa m vuu ɓɔɔ n dɔɔ bii kagn ɓɛɛ.

¹⁶Naa n kɔɔrɔ zang Ruu Tɔ̃ɔ Laa doori, vuu ɓɔɔ naa n tuu yuu kagn ɓɛɛ kpang. Ɓi Laa kɔɔ m nɛɛ n kɔɔrɔ zang Ruu Tɔ̃ɔ ɓiɓɛ. Jĩng dannang kagn yuu mɛɛ, n nɛɛ kɔɔrɔ zang Ruu Tɔ̃ɔ Laa kaɓa kpàng ɓɛɛ.

¹⁷Naa nkɔ nɛɛ rɛ̃rɛ nɛɛ yeti mɛɛ nɛɛ, n kɔ̀ɔrɔ́ zang Ruu Tɔ̃ɔ Laa, n nɛɛ shing jĩng katɔ nɛɛ zang a m vuu ɓɔɔ. Á ɓi nkɔ rɛ̃rɛ nɛɛ n palɛ shonang keɓe kpang, ɓi Laa yaa m shonang keɓe ka naa, a dang m nyaa nɛɛ n pàlɛ̀ wu.

¹⁸N walɛ ɓu viya? Wee n kɔɔrɔ zang Ruu Tɔ̃ɔ Laa waati ɓee, ɓi vuu ɓɔɔ n walɛ ɓɛɛ kɔ. Ka ruu nɔngkɔ, n gaa zang wu nɛɛ zang a m vuu ɓɔɔ kagn kpang.

¹⁹N m jaafoo zang ɓɔɔ kpang. N m ti ɓɔ̀ɔ́ zang ɓɔɔ kpang. Naa n doo jaafoo zang ɓɔɔ kpang n risi yuu mɛɛ tɔ naa jaafòó zang piti, tɔ̀ɔ, n atɛ zang dɔɔli ri naa dũng Kpanti Yeesɔ Kirisi.

²⁰N nɛɛ nwàng nɛɛ zang Yahudi n palɛ vuu naa zang Yahudi, tɔ̀ɔ, n atɛ ri, ri naa dũng Yeesɔ Kirisi. Naa nyaa dannang ɓɔɔ Laa a Musa yi m doo kpang, naa n nwang nɛɛ zang ɓɔɔ nyaa dannang keɓe yi ri katɔ, n pálɛ̀ bii naa zang ɓɔɔ nyaa dannang yi wu doo katɔ kɔ ɓɛɛ. Tɔ̀ɔ, n gɔ̃ ri jong ri naa dũng Yeesɔ Kirisi.

²¹Naa n nɛ̀ɛ zang ɓɔɔ ri dũ̀ng nyaa dannang Musa kpang, n palɛ vuu naa ɓɔɔ ri palɛ ɓɛɛ. Tɔ̀ɔ, n atɛ ri jong ri naa dũng Yeesɔ Kirisi. N tɔɔ kpang nɛɛ, n dũ̀ng nyaa dannang Laa kpang, kpang. N dũng m nyaa dannang Yeesɔ Kirisi.

²²Naa n nwàng nɛɛ zang ɓɔɔ ri shing danggn gn gbãng gbãng ka vuu ɓɔɔ ri shing danggn kagn ɓɛɛ kpang, n risi yuu mɛɛ naa ri. Tɔ̀ɔ, n atɛ ri, ri naa dũng Yeesɔ Kirisi. Naa zang nwang doo naa viya, n kasɛ tɔ n risi yuu mɛɛ naa ri. Tɔ̀ɔ, n palɛ vuu ɓɔɔ n zunung katɔ nandon, n gɔ̃ zang ɓɔɔ nɛɛ teteng ɓarɛ ri a ka bii Laa, tɔ̀ɔ, Laa wu ta yuu ɓarɛ kati.

²³N palɛ vuu keɓe piti ka ruu, Ruu Tɔ̃ɔ Laa. Tɔ̀ɔ, n naa walɛ tɔ̃ɔ ɓɔɔ a ka bii zang ka ruu Ruu Tɔ̃ɔ Laa kaa jong.

²⁴Naa zang gɛ̃ɛ zang nɛɛ ri yurɛ, zang dɔɔli ri yuku, a zang a ɓi kaa zang gbete, ɓɔɔ à tĩng shɔɔnang kɔ vuu. Nɔɔ yuku nabm, tɔ̀ɔ, zang wu a nɔɔ vuu.

²⁵Zang ɓɔɔ nɛɛ tɔɔ wu yurɛ, kpɛ̃ɛrɛ yuu ɓiɓɛ doo yunang waasɛ̃. Wu zãa yuu ɓiɓɛ vuu dɔɔli. Ri pálɛ̀ nɔngkɔ nɛɛ, tɔ̀ɔ, zang a ri vuu ɓɔɔ naa lasɛ katɔ ɓɛɛ. Ruu palɛ ɓuru nɔngkɔ, tɔ̀ɔ, zang a ruu vuu ɓɔɔ lasɛ kpang dòndòng ɓɛɛ.

²⁶Ka ruu nɔngkɔ, n yuu m kaara, tɔ̀ɔ, n daa shɛ̃ɛ nɔng ɓɔɔ zang di nyaa yunang kagn ɓɛɛ. N nwang m naa zang ɓɔɔ gaa nyaa, wu nɛɛ zang ɓɔɔ kpang ɓɛɛ kpang.

²⁷N kasɛ tɔ n dang jĩng ka zɔ̃ng zɔ̃ng, tɔ̀ɔ, n yiti yuu mɛɛ kati. Tɔ̀ɔ, ɓɔɔ n kɔɔrɔ zang Ruu Tɔ̃ɔ Laa, Laa nɛ̀ɛ́ naa bɛ̃ɛ m.