Read mumuye 2 Koranti 1 Bible Online

2 Koranti 1 - mumuye bible

2 Koranti 1

¹Labeenang keɓe a nɛɛ bii mɛɛ nkɔ Bulu, ɓɔɔ Laa kasɛ m katɔ, a n nwang zang shonang Yeesɔ Kirisi ɓɛɛ. A ɓɔɔ manzung ɓuru Timoti, ɓɔɔ dũng doo Laa kɔ ɓɛɛ. Ruu bèé zang ɓɔɔ ri dũng Laa ɓɔɔ ri ka Koranti, nɛɛ zang Laa nandon ɓɔɔ ri ka tipi Akaya nandon ɓɛɛ.

²N gaa Daa ɓuru Laa, nɛɛ Kpanti Yeesɔ Kirisi nɛɛ ri a nɔɔ tĩnang tãanang, ri ti shingnɛ yeti manɛ wu valɛ katɔ.

³Ruu zãa Laa ɓɔɔ wukɔ Daa wukɔ ti Làá Kpanti ɓuru Yeesɔ Kirisi ɓɛɛ. Dáa ɓɔɔ gn zang kɔng wu dɔɔli ɓɛɛ. Wukɔ Laa ɓɔɔ mã zang danggn ka zɔ̃ng zɔ̃ng ɓɛɛ.

⁴Mã́ ruu danggn ka ɓɔɔ ruu dang jĩng ɓɛɛ, tɔ̀ɔ, ruu zunung naa ɓɔɔ ruu mã zang ɓɔɔ ri dang jĩng ka zɔ̃ng zɔ̃ng danggn kaa jong ɓɛɛ. Zɔ̃ng danggn ɓɔɔ Laa mã ruu ɓɛɛ.

⁵Kirisi dang jĩng tɔ, a ruu ti dang jĩng tɔ jong naa ɓɔɔ wu dang ɓɛɛ. A naa ɓɔɔ Laa mã Kirisi danggn, Laa ti mã ruu danggn doo nɔngkɔ nɛɛ bii Yeesɔ Kirisi.

⁶Naa ruu dàng jĩng, jĩng dannang ɓuru keɓe, wukɔ mã nɔɔ danggn, wu ti ta yuu manɛ. Laa nɛɛ mã ruu danggn tɔ, mã nɔɔ danggn tɔ jong, tɔ̀ɔ, nɔ́ɔ zunung ɓɔɔ nɔɔ mã danggn kaa jong ka zɔ̃ng jĩng dannang kɔ ruu dang ɓee.

⁷Ka ruu nɔngkɔ, ruu yaa gn ɓɔɔ ruu shing ka bii manɛ kpang. Ka ruu ɓɔɔ, ruu zi tɔ nɛɛ naa wee nɔɔ dang jĩng tɔ naa ɓɔɔ ruu dang ɓee, Laa mã nɔɔ danggn kana naa ɓɔɔ wu mã ruu ɓɛɛ.

⁸Rɛɛ manzung ɓuru, ruu kasɛ nɛɛ danggn jĩng ɓɔɔ ruu dang ka tipi Asiya wu ning nɔɔ kpang. Jĩng dannang kaɓa, bang dɔɔli, bɛ̀ɛ́ ruu yaa gn naa tɔ nɛɛ ruu nwàng tɔ̀ɔ́ ningkãari kpang.

⁹Ruu tɔɔ ɓuru naa zang dɔng rùu, ruu tɔ, zang nyɔ ruu vɔrɔ. A ɓeekpang vuu keɓe palɛ nɔngkɔ, tɔ̀ɔ, wu tusu ruu nɛɛ rúu di yuu ka bii ɓuru kpang, ruu di yuu ka bii Laa ɓɔɔ wisi zang paa nɛɛ saa ɓɛɛ.

¹⁰Ta yuu ɓuru ka jĩng dannang ɓɔɔ bang dɔɔli, ɓɔɔ nɛ̀ɛ́ nyɔ ruu vɔrɔ kaɓa, naa ta yuu ɓuru ditɔ. Ruu shing gn ɓuru tɔ, ka bii ɓiɓɛ nɛɛ, naa ta yuu ɓuru ɓi kaa nɔngkɔ sasak.

¹¹Nɔɔ nɛɛ yi ruu naa katɔ ka bii, nɔ́ɔ gàa Ruu Laa ɓɛɛ. Tɔ̀ɔ, Laa wu ta gaanang ɓɔɔ zang dɔɔli ri gaa wu ka yuu ɓuru kati. Wu shingnɛ, ruu tãa tĩnang kati. Tɔ̀ɔ, zang dɔɔli ri mɛɛ nyaa kaa lapa, ri zãa wu kati ka ruu ɓuru.

¹²Vuu ɓɔɔ shingnɛ ruu tuu yuu ɓuru kagn gbete, rɛ̃rɛnang ɓuru kɔɔ ruu nɛɛ, nwannang ɓuru ka koo keɓe, nɛɛ vuu ɓɔɔ rùu palɛ nɛɛ nɔɔ, rùu palɛ niizang nɛɛ yeti gbete, naa ɓɔɔ Laa kasɛ ɓɛɛ. Ruu palɛ wu ka doo zũnang yuu ɓuru kpang, ruu palɛ nɛɛ naa vuu palɛnang tɔ̃ɔ ɓɔɔ Laa pàlɛ́ ruu ɓɛɛ.

¹³Ruu bèé nɔɔ ɓuru vuu ɓɔɔ nɔɔ gãrɛ, nɔɔ zi katɔ ɓɛɛ kɔ shɛ̃ɛning. N shing gn nɛɛ nɔɔ naa zi ditɔ nandon kpãngkpãng.

¹⁴Vuu ɓɔɔ nɔɔ zi kãntang keɓe gn nandon kpang. Tɔ̀ɔ, ka diki ɓɔɔ Kpanti ɓuru Yeesɔ a kagn, nɔ́ɔ naa tuu yuu ka ruu ɓuru naa ɓɔɔ ruu naa tuu ka ruu manɛ ɓɛɛ.

¹⁵N zi tɔ nɔngkɔ kɔ, n mang ka yeti mɛɛ nɛɛ n gaayu n leng nɔɔ, tɔ̀ɔ, nɔ́ɔ tãa tĩnang kaa dakn ziti.

¹⁶Bɛɛ n mangnɛ nɛɛ, n leng nɔɔ ka gbalang ɓɔɔ n daa Makidoniya ɓɛɛ, n nɛɛ ti gbãayu kaa tɔ, n ti sɔɔ nɔng manɛ. Tɔ̀ɔ, nɔ́ɔ yi m naa kaa bii, nɛɛ vuu ɓɔɔ n daa Yahudi nɛɛ mani ɓɛɛ.

¹⁷Ɓɔɔ n mangnɛ, n tɔɔ, n a ka bii manɛ ɓɛɛ, nɔɔ kɔ̀ɔ́ nɛɛ rɛ̃rɛnang mɛɛ daa gn gbete kpang ya? Nɔɔ zi manɛ ɓu nɛɛ n mang vuu ka yeti mɛɛ naa ɓɔɔ zang koo ri palɛ ɓɛɛ ya? Tɔ̀ɔ, n kasɛ nyaa kaa nɛɛ “Nn” a ɓɔɔ kaa nɛɛ, “Kpang” ka làa gbete ya?

¹⁸Nɔɔ zi tɔ nɛɛ Laa suu sèé ɓi kpang. Doo nɔngkɔ, ruu ɓɔɔ ruu kɔ̀ɔ nɔɔ, ɓi ruu ɓɔɔ zang kɔɔ nɛɛ, “Nn” zang ti kɔ̃sɔ nyaa nɛɛ, “Kpang” ka làa gbete kpang.

¹⁹Ka ruu ɓɔɔ, Yeesɔ Kirisi Jaa Laa, ɓɔɔ Siila nɛɛ Timoti, a ɓɔɔ nkɔ, ruu kɔɔ ruu ɓiɓɛ ka teteng manɛ ɓɛɛ, ɓi zang ɓɔɔ kasɛ nyaa nɛɛ “Nn” a ɓɔɔ nɛɛ “Kpang, kpang.” Yeesɔ kɔɔ ɓi ruu ɓɔɔ niizang kɔ diki diki, ta nyaa ziti ɓi jong kpang.

²⁰Ka ruu ɓɔɔ, nyaa ɓɔɔ Laa a zang nandon, Laa palɛ katɔ nɛɛ bii ɓiɓɛ kɔ. Ka ruu nɔngkɔ, ruu nɛɛ kɔɔ tɔ nɛɛ, “Wu nwang nɔngkɔ,” nɛɛ bii Yeesɔ Kirisi. Ruu a Laa ɓuru bannang.

²¹Ɓi Laa nɛɛ yuu ɓiɓɛ shing ruu, ruu zi gbãng gbãng nɛɛ ruu wàlɛ̀ suru bii ɓɔɔ waa nyaa kpang tɔ nɛɛ nɔɔ, nɛɛ bii Yeesɔ Kirisi ɓɛɛ. Wukɔ nɛɛ yuu ɓiɓɛ shɛ̃ɛrɛ ruu, a kusu ruu dang gbete.

²²Shing vuu ka bii ɓuru, tɔ̀ɔ, zang ri zi kaa gn nɛɛ rùu ɓɔɔ ɓiɓɛ. A á ruu Suru ɓiɓɛ tɔ ka yeti, tɔ̀ɔ, ruu zi kaa gn nɛɛ naa á ruu vuu ɓɔɔ wu shing ruu katɔ ɓɛɛ ditɔ nandon.

²³Laa kɔ kɔ̀ɔ rúu tɔ̃ɔ ka yuu mɛɛ, N à Koranti takpang, ka ruu ɓɔɔ, n kasɛ n tɔɔ, n kpãa nɔɔ takpang ɓɛɛ.

²⁴Wu ka ruu ɓɔɔ ruu nɛɛ, rukɔ rúu tusu nɔɔ vuu ɓɔɔ nɔɔ shing danggn kagn ɓɛɛ kpang. Ruu zi tɔ, nɔɔ shii tɔ gbãng gbãng, ka danggn ɓɔɔ nɔɔ shing ɓɛɛ. Ruu palɛ shonang ɓuru nɛɛ nɔɔ, tɔ̀ɔ, nɔ́ɔ tãa tĩnang kati kɔ jong.