Read mumuye 2 Koranti 11 Bible Online

2 Koranti 11 - mumuye bible

2 Koranti 11

¹N zɔ̃ɔrɔ nɔɔ, nɔɔ mã danggn tɔkɔlɔng nɛɛ vuu shoko kɔ n palɛ ɓee. N zi tɔ, nɔɔ mã danggn katɔ.

²N kaa sũnyaa ka yuu manɛ naa ɓɔɔ Laa kaayi ɓɛɛ. N a nyaa tɔ nɛɛ, n a nɔɔ Kirisi wu gee nɔɔ. A n kasɛ nɛɛ nɔ́ɔ pálɛ̀ vuu shi kpang, kpang, tɔ̀ɔ, ka diki ɓɔɔ zang gee nɔɔ kagn, n tuu nɔɔ naa jaa soro ɓɔɔ roo varɛ gn kpang, ɓɔɔ shi kpang ka bii kpang ɓɛɛ. N a nɔɔ varɛ manɛ ɓɔɔ wukɔ gbete ɓɛɛ kati.

³N kaa vɔrɔ, zang naa shingnɛ, nɔɔ rɛ̃rɛ shi kpang, nɔɔ yaa naa ɓɔɔ nɔɔ a Kirisi yeti manɛ ɓɔɔ kankalang dɔ̃ɔ gbete, nɔɔ pàlɛ́ wu shonang ɓɛɛ. Naa ɓɔɔ sɔkɔ nwãarɛ Hawawu nɛɛ zũnang sèé ɓɛɛ.

⁴N kàá nɔɔ vɔrɔ, ka ruu ɓɔɔ, n zirɛ zang ɓɔɔ nɛɛ a tɔ ka bii manɛ, nɔɔ tantɛ wu tanang ɓɛɛ. Nɔɔ tantɛ danggn shinnang ka vuu ɓɔɔ ri kɔ̀ɔ́ nɔɔ ka yuu Yeesɔ ɓɔɔ ɓɛɛ, naa dòo náabm̀ nɛɛ Yeesɔ ɓɔɔ ruu kɔɔ nɔɔ ɓɛɛ. Nɔɔ ti tá suru ɓɔɔgn naa doo Suru Laa ɓɔɔ nɔɔ ta nɛɛ bii ɓuru kpang ɓɛɛ. A nɔɔ ti ta Ruu Tɔ̃ɔ ɓɔɔgn ka yuu Laa, naa doo náabm̀ nɛɛ ɓɔɔ ruu kɔɔ nɔɔ ɓɛɛ.

⁵N zi tɔ, n m dòo naa zang kɔ nɔɔ rɛ̃rɛ manɛ nɛɛ rikɔ zang shonang Yeesɔ ɓɔɔ bang bang, nɛɛ ri ɓa m katɔ ɓa kɔ.

⁶N zi tɔ, n zunung yee rannang kpang, a zang ɓɔɔ tɔɔ ɓi kaa tɔ̀ɔ́ nɛɛ, n zi labeenang Laa kpang, kpang. Ruu tusu nɔɔ vuu keɓe tɔ gbàrɛ́ gbàrɛ́, diki diki ka gbalang náabm̀ náabm̀.

⁷Wee n tɔɔ kpang nɛɛ, nɔ́ɔ shu m vuu ɓɔɔ kpang, ka ɓɔɔ n rang nɔɔ Ruu Tɔ̃ɔ Laa ɓee. Wee n tuu yuu kpang, tɔ̀ɔ, n risi nɔɔ, nɔɔ nwang zang bang kati ɓee. N palɛ vuu shi kpang ya?

⁸Ka ɓɔɔ bɛ̀ɛ́ n palɛ shonang ka teteng manɛ, zang ɓɔɔ ri dũng Laa, ɓɔɔ ri ka nɔng ɓɔɔgn rikɔ shu m. Nwang kaa naa ɓɔɔ n ta ri vuu nɛɛ ɓangge, tɔ̀ɔ, n yi nɔɔ naa nɛɛ mani ka bii ɓɛɛ.

⁹Ka ɓɔɔ n dòo nɛɛ nɔɔ, kɔ́pɔ̀ nɛɛ ka naa mɛɛ kpang, n kpãa zang gbete ka teteng manɛ nɛɛ wu yi m naa ka bii kpang. Manzung ɓuru ɓɔɔ ri dũng doo Laa kɔ, ɓɔɔ ri a nɛɛ tipi Makidoniya, rikɔ a m vuu piti ɓɔɔ n kasɛ ɓɛɛ. N ĩ̀i nɔɔ ka yuu, nɛɛ nɔkɔ nɔɔ yi m naa ka bii kpang. N ĩi kãntang keɓe kpang, n ti ĩ̀i nɔɔ kpang dòndòng.

¹⁰Ka ruu ɓɔɔ, ruu niizang Yeesɔ Kirisi kagn ka yeti mɛɛ, zang ɓɔɔ kagn ka tipi Akaya kpang, ɓɔɔ shíng m n vɔ̃ nyaa, n kɔ̀ɔ ruu bang bang kɔ n kɔɔrɔ ɓee takpang ɓɛɛ kpang.

¹¹N kɔɔ vuu keɓe ɓu ka ruu ɓɔɔ n kasɛ nɔɔ kpang ɓɛɛ ya? Laa zi tɔ, n kasɛ nɔɔ katɔ.

¹²N yaa vuu kɔ n palɛ ɓee kpang. Tɔ̀ɔ, n zãa zang ɓɔɔ ri ɓaa yuu ɓarɛ nɛɛ ri zang shonang Yeesɔ, vuu ɓɔɔ yi ri naa kagn, ri kɔɔ nɛɛ ri palɛ shonang doo naa ɓɔɔ ruu palɛ kɔ ɓɛɛ.

¹³Ka ruu ɓɔɔ, zang kaɓa ri ɓarɛ zang shonang Yeesɔ ɓɔɔ niizang kpang ɓɛɛ, ri ɓarɛ zang shonang ɓɔɔ sèé. Ri suu sèé ka yuu shonang ɓarɛ, ri risi yuu ɓarɛ naa zang shonang Yeesɔ Kirisi ɓɔɔ niizang ɓɛɛ.

¹⁴Niizang, wee wu vuu ɓɔɔ zang mã naa ka danggn kpang. Naa doo Sheetang risi yuu ɓiɓɛ katɔ, naa zang nyaa shonang Laa ɓɔɔ ka lapa ɓɔɔ bii ɓarɛ yakɛ ɓi katɔ ɓɛɛ.

¹⁵Ka ruu nɔngkɔ, naa zang shonang ɓiɓɛ ri risi yuu ɓarɛ naa zang shonang Laa ɓɔɔ ɓi zang tɔ̃ɔ, wee ɓi vuu ɓɔɔ kpang. Nɛɛ knti, Laa naa dang ri jĩng teetee nɛɛ vuu ɓɔɔ ri palɛ ɓɛɛ.

¹⁶N pàasɛ́ ruu keɓe tɔkn, zang ɓɔɔ wu tɔɔ kpang nɛɛ, n shoko kpang. Naa nɔɔ nɛɛ kɔɔ doo katɔ piti, nɔɔ ta m naa shoko gbã̀ágbãa, tɔ̀ɔ, n naa walɛ gbalang tɔkɔlɔng n rangkɛ yee bang bang ka yuu mɛɛ.

¹⁷Vuu kɔ n kɔɔ ɓee, wu vuu ɓɔɔ Kpanti Yeesɔ nɛ̀ɛ́ a m naa katɔ n kɔɔyi ɓɛɛ kpang. Ka yuu ruu bang bang kɔ n rangkɛ ka yuu mɛɛ ɓee, n rang yee m naa shoko.

¹⁸Wee zang dɔɔli ri rangkɛ yee bang bang ka yuu vuu koo ɓee, palɛ ditɔ jong nɔngkɔ.

¹⁹Nɔɔ nɛɛ yuu manɛ nɔɔ zũng tɔ dɔɔli, ka ruu nɔngkɔ, nɔɔ mã danggn katɔ nɛɛ zang ɓɔɔ shoko ɓɛɛ, a nɔɔ tãa tĩnang ɓarɛ ya?

²⁰Nɔɔ mã danggn katɔ nɛɛ zang piti ɓɔɔ risi nɔɔ naa jaafoo ɓɛɛ, zang ɓɔɔ shaa nɔɔ katɔ, zang ɓɔɔ ri risi nɔɔ naa shoko ɓɛɛ, nɛɛ zang ɓɔɔ ri risi nɔɔ naa vĩi, a ɓɔɔ zang ɓɔɔ ri dãlɛ nɔɔ ɓɛɛ.

²¹Yusɛ̃ɛ tuu m katɔ, ka ruu ɓɔɔ, ruu kaa vɔrɔ dɔɔli, a ruu palɛ nɔɔ rɛɛ vuu keɓe kpang. N rang yee kaa naa zang shoko. Zang ɓɔɔ nɛɛ tɔɔ wu rangkɛ yee bang bang katɔ ka yuu vuu ɓɔɔ, n ràngkɛ̀ m dòo nɔngkɔ.

²²Ri zang Yahudi ya? N m dòo nɔngkɔ. Ri zang Isirela ya? N m dòo nɔngkɔ. Ri zang zɔ̃ng Ibirayi ya? N m dòo nɔngkɔ.

²³Ri zang ɓɔɔ palɛ Yeesɔ Kirisi shonang ya? N palɛ Yeesɔ shonang, n ɓa ri katɔ. N rang yee naa zang shoko. N palɛ shonang tɔ gbãng gbãng, n ɓa ri katɔ. Zang mã m ka sãa doo dɔɔli ɓa ri katɔ, zang nyɔ m tɔ nɛɛ gbãa dɔɔli, ɓa ɓɔɔ ɓarɛ katɔ. A zang yàarɛ́ m nung vɔrɔ gbete diki diki.

²⁴Zang Yahudi ri nyɔ m tɔ nɛɛ gbãa, naa bmati tu kopi tu mandɛ̃ɛti, doo maani.

²⁵Zang Rooma ri nyɔ m tɔ nɛɛ gbãa doo taati. Zang ti luku m nɛɛ tari doo gbete. Laana ɔ̃ɔ tɔ nɛɛ ruu doo taati. Diki ɓɔɔgn ɓɔɔ laana ɔ̃ɔyi, ruu yi naa laa ka mii, mii tuu ruu daa nɛɛ ruu, nɔng laagɛ̃ gbete nɛɛ nɔng zĩi gbete.

²⁶Ka rakɛnang mɛɛ, ɓɔɔ n daarɛ dɔɔli ɓɛɛ, n dang jĩng tɔ ka mii ɓɔɔ kpaa ɓɛɛ, a ɓɔɔ ka naa zang ɓɔɔ ri ta zang vuu nɛɛ ɓangge ɓɛɛ. N dang jĩng tɔ ka naa zang ɓɔɔ ri zang Yahudi kɔ doori ɓɛɛ. A ɓɔɔ ka naa zang ɓɔɔ ri zang Yahudi kpang ɓɛɛ. N dang jĩng ka gari bang, ɓɔɔ ka jĩngti, ɓɔɔ ka mii waapo, a ɓɔɔ ka naa zang ɓɔɔ ri suu sèé nɛɛ ri doo zang ɓɔɔ ri dũng Laa kɔ.

²⁷N lee tɔ, ka nɔng ɓɔɔ n palɛ shonang gbãng gbãng ɓɛɛ. Diki mɛɛ dɔɔli n roo hingro kpang. Lee ɓɔɔ n shaa vuu kpang, n ti ɓoo mii kpang. Diki mɛɛ dɔɔli vuu shaanang daa nyaa mɛɛ kpang. Sɔ̀ɔrɔ́ ti si m, a fɔ̃ɔrɔ ɓɔɔ n hãa ka bii kpang.

²⁸Ruu kɔɔ ruu vuu ɓɔɔ takpang. Diki diki n rɛ̃rɛ m ruu zang ɓɔɔ ri dũng Laa ɓɔɔ ri ka nɔng piti ɓɛɛ.

²⁹Ɓu wi shing gn gbãng gbãng ka vuu Suru Laa kpang, a bii mɛɛ vɔ kpang wiya? Ɓu wi shing zang ɓɔɔ, nɛɛ zang palɛ vuu shi kpang, a yeti lasɛ m dɔɔli kpang wiya?

³⁰Naa n tɔɔ, n rangkɛ yee bang bang, n rangkɛ ka yuu vuu ɓɔɔ tusu zang nɛɛ n lakɛ naa ka bii kpang ka vuu Suru Laa ɓɛɛ.

³¹Laa ɓɔɔ wukɔ Laa, wukɔ ti Daa Kpanti Yeesɔ Kirisi ɓɔɔ zang piti dɔɔ wu dòndòng ɓɛɛ, zi tɔ, n suu sèé kpang.

³²Ɓɔɔ bɛ̀ɛ́ n ka Damasiku, Gɔmna ɓɔɔ kpanti Areta yi ɓɛɛ, shing zang nɛɛ, zang gã nyaa gãa ɓɔɔ zang shɛ̃ɛ nɛɛ mani ka yeti gari ɓɛɛ, nɛɛ tɔ̀ɔ zang ri yi m.

³³A zang shooro m kaa nɛɛ yeti sàáng nɛɛ hangka ɓɔɔ zang yaa ka bìí gbang tapɔng ɓɔɔ zang kìirì gari nyaa nɛɛ mani ɓɛɛ, a n wɔ kaa nɔngkɔ nɛɛ naa ɓiɓɛ.