Read mumuye 2 Koranti 12 Bible Online

2 Koranti 12 - mumuye bible

2 Koranti 12

¹Yee rangkɛnang bang bang nwang zang vuu tɔ̃ɔ ɓi kpang, n ti rangkɛ katɔ nɔngkɔ. Kãntang keɓe, n rang ruu kaa yuu naa ɓɔɔ Kpanti Yeesɔ nwang nyaa ka n, a nwàngsɛ̀ m vuu ɓɔɔ wu kasɛ nɛɛ zang palɛ ɓɛɛ.

²Sáa ɓa tɔ kopi tu dɛ̃ɛti lɛ̀ɛ́kɔ, yɔɔ ɓɔɔ dũng Laa kagn, n zi wu nung katɔ, Laa tuu wu daa nɛɛ wu ka lapa ɓɔɔ bee katɔ kpala kpala ɓɛɛ. Naa Laa túu wu ka bii keɓe dàá lapa nɛɛ wu ya, naa ti ka bii shɔnzang kpang ya? N zi kpang. Ɓi Laa kɔ zi gbete.

³N pàasɛ́ ruu keɓe tɔkn, n zi tɔ yɔɔ kaɓa, zang tuu wu zang daa nɛɛ wu ka gãa Laa ka lapa, naa bɛ̀ɛ́ ningkãari ya, naa vɔ katɔ ya? N zi kpang, ɓi Laa kɔ gbete zirɛ. A yɔɔ keɓe tãalɛ vuu ɓɔɔ nyaa shɔnzang zunung kɔɔnang kpang, a zang ti kasɛ kpang nɛɛ zang ɓɔɔ wu rang yee ka yuu vuu bìí kpang.

⁵Ka ruu nɔngkɔ, n rang yee bang bang ka yuu yɔɔ keɓe kɔ. N rang yee bang bang ka yuu mɛɛ kpang, n rangkɛ ka yuu vuu ɓɔɔ ri tusu zang nɛɛ n lakɛ naa ka bii ka vuu Suru Laa kpang ɓɛɛ kɔ shɛ̃ɛning.

⁶Naa n kasɛ nɛɛ n rangkɛ yee bang bang ka yuu mɛɛ, n palɛ vuu shoko kpang, ka ruu ɓɔɔ, n kɔɔrɔ m ruu ɓɔɔ niizang ɓɛɛ. A n kɔɔrɔ ruu bang bang kaa tɔ̀ɔ́ yuu mɛɛ kpang, ka ruu ɓɔɔ, n kasɛ zang ɓɔɔ wu rɛ̃rɛ nɛɛ n ɓa naa wee n ɓee katɔ kpang. N kasɛ zang rɛ̃rɛ ka yuu vuu ɓɔɔ zang zirɛ n palɛ nɛɛ vuu ɓɔɔ zang tãayi n kɔɔ ɓɛɛ.

⁷Tɔ̀ɔ, zang zãa m yuu tuunang ka lapa dɔɔli, ka ruu vuu ɓɔɔ zang zirɛ zang mã naa ka danggn ɓɔɔ n zili ɓɛɛ. Laa nɛɛ yuu ɓiɓɛ shing nɔng ɓɔɔ ka bii mɛɛ, kɔng m naa zang ɓaa m nɛɛ kɔkɔ. Kɔnang keɓe, nwang naa zang nyaa shonang Sheetang ɓɔɔ zang dɔ̃ wu nɛɛ, wu naa dang m jĩng, wu zãa m yuu tuunang ɓɛɛ.

⁸N gàa Laa tɔ, daa doo taati ka yuu kɔnang keɓe, n tɔɔ wu masɛ m jong.

⁹A kasɛ m nyaa tɔɔ, “Tɔ̃ɔ ɓɔɔ n pàlɛ́ mɔɔ wukɔ yi mɔɔ naa ka bii, ka ruu ɓɔɔ, naa vuu palɛnang mɛɛ palɛ shonang gbãng gbãng ka ɓɔɔ mɔɔ lakɛ naa ka bii ka vuu Suru Laa kpang ɓɛɛ.” N tãa kaa tĩnang gbãng gbãng, n tuu yuu mɛɛ ka yuu naa ɓɔɔ n lakɛ náa ka bii ka vuu Suru Laa kpang ɓɛɛ, tɔ̀ɔ, n tãa naa vuu palɛnang Yeesɔ Kirisi ɓɔɔ yiti m ɓɛɛ kati.

¹⁰Ka ruu nɔngkɔ, n tãa tĩnang ka ɓɔɔ n lakɛ naa ka bii kpang, nɛɛ dãanang ɓɔɔ zang dãa m, nɛɛ vuu ɓɔɔ kpãa m ka yeti, nɛɛ jĩng ɓɔɔ zang dang m, nɛɛ vuu ɓɔɔ kpãarɛ m ka zɔ̃ng zɔ̃ng ɓɛɛ ka ruu Yeesɔ Kirisi. Ka ruu ɓɔɔ, kaka nɛɛ tɔ̀ɔ́ ka bii mɛɛ kpang, n tãa kaka ka laa kaɓa kɔ jong.

¹¹N palɛ vuu tɔ naa shoko. Nɔkɔ shing m n palɛ nɔngkɔ. Nɔkɔ nɛ̀ɛ́ kɔɔ ruu tɔ̃ɔ ka yuu mɛɛ. Naa n doo vuu ɓɔɔ kpang piti, zang shonang Yeesɔ manɛ ɓɔɔ bang bang kaɓa, ri ɓa m kpang.

¹²Laa palɛ vuu bang bang ɓɔɔ zang zirɛ zang mã naa ka danggn nɛɛ bii mɛɛ, ka ɓɔɔ n mã danggn, n palɛ shonang mɛɛ ka teteng manɛ ɓɛɛ. Vuu kaɓa kɔ tusu zang nɛɛ n zang shonang Yeesɔ ɓɔɔ niizang.

¹³N pàlɛ̀ zang ɓɔɔ ri dũng Laa ɓu vi, a n pàlɛ̀ nɔɔ manɛ kpang viya? Ɓi ka ɓɔɔ n kpãa nɔɔ nɛɛ nɔɔ a m vuu kpang kɔ shɛ̃ɛning. N gaa nɔɔ nɔ́ɔ kɔsɔ m vuu shi kpang kɔ n palɛ ɓee katɔ.

¹⁴Daa kaa doo taati ɓɔɔ n kpalɛ bii anang, n naa leng nɔɔ ɓɛɛ. N naa kpã̀a nɔɔ nyaa kpang. N kasɛ m nɔkɔ nɛɛ yuu manɛ, wu vuu manɛ kpang. Ɓi zang ɓɔɔ ri yi jaa kɔ ri kpàlɛ́ wujɛ vuu jong, wu jaa kɔ kpalɛ ri kpang.

¹⁵N tãa tĩnang katɔ, n ningsi vuu ɓɔɔ ka naa mɛɛ, nɛɛ yuu mɛɛ piti, ka ruu manɛ, tɔ̀ɔ, n yi nɔɔ naa ka bii. Nɔɔ kàsɛ́ m tɔkɔlɔng, ka ruu ɓɔɔ, n kasɛ nɔɔ dɔɔli ɓɛɛ ya?

¹⁶Nɔɔ kàsɛ́ katɔ, nɛɛ n kpãa nɔɔ nyaa dɔɔli ka ruu vuu kpang. Zang ɓɔɔ kɔɔ ɓi nɛɛ, n pàlɛ̀ nɔɔ zũnang, n zúu nɔɔ jĩng nɛɛ sèé,

¹⁷n shaa nɔɔ katɔ nɛɛ bii zang nyaa shonang ɓɔɔ n shongko ri ka bii manɛ ɓɛɛ ya?

¹⁸N gàa Titu nɛɛ wu daayi, a n shong manzung ɓuru ɓɔɔ dũng doo Laa kɔ ɓɛɛ nɛɛ, wu daa nɛɛ wu. Titu shaa nɔɔ katɔ ya? Ruu nɛɛ Titu ruu palɛ vuu ɓuru yeti gbete, a gbalang ɓuru ti gbete kpang ya?

¹⁹Nɔɔ rɛ̃rɛ manɛ ɓu nɛɛ, ruu tɔɔ ruu ta yuu ɓuru ka tĩng manɛ ya? Manzung ɓuru, ɓɔɔ ruu kasɛ nɔɔ dɔɔli ɓɛɛ, ruu ráng nɔɔ yee ka tĩng Laa, wee ruu ɓakɛ yuu tɔ nɛɛ Kirisi ɓee. A vuu piti ɓɔɔ ruu palɛ ɓɛɛ, ruu palɛ nɛɛ tɔɔ ruu yi nɔɔ naa ka bii.

²⁰N kaa vɔrɔ naa n daa shɛ̃ɛ nɔng manɛ, n daa ĩi nɔɔ náabm̀, wu naa ɓɔɔ n kasɛ n ĩi nɔɔ ɓɛɛ kpang, a nɔɔ ti naa zirɛ n náabm̀, wu naa ɓɔɔ nɔɔ kasɛ ɓɛɛ kpang. N kaa vɔrɔ n daa ĩi nɔɔ, nɔɔ haarɛ nyaa, nɔɔ kaa sũnyaa, gnvɔ ka yeti manɛ dɔɔli. Nɔɔ ti kasɛ yuu manɛ kɔ shɛ̃ɛning, nɔɔ dãlɛ zɔɔ, nɔɔ rangkɛ zang, nɔɔ tuu yuu manɛ dɔɔli. A nɔɔ ti vɔ̃ɔtɔ nɔng.

²¹N kaa vɔrɔ naa n paasɛ anang tɔkn ka bii manɛ, Laa naa shingnɛ, yusɛ̃ɛ wu tuu m ka ruu manɛ. N naa káa ka ruu zang dɔɔli ɓɔɔ ri palɛ vuu shi kpang tɔ, a ri kɔ̃sɔ yeti kpang ɓɛɛ. Ri kɔ̃sɔ yeti vuu sãnsãnrãng, nɛɛ dũndũng, nɛɛ vuu yusɛ̃ɛ ɓɔɔ ri palɛ ɓɛɛ kpang.