Read mumuye 2 Koranti 13 Bible Online

2 Koranti 13 - mumuye bible

2 Koranti 13

¹Anang mɛɛ ka bii manɛ ɓɔɔ n naa leng jĩng ka nɔɔ, daa kaa nɛɛ weɓe doo taati. Zang bee ka yeti labeenang Laa tɔɔ, “Zang nɛɛ kɔɔyi nɛɛ zang ɓɔɔ palɛ vuu shi kpang, zang ziti kɔ taati ri kasɛ nyaa kagn gbongkarɛ nɛɛ nɔngkɔ”.

²N kasɛ, n tɔ̀ɔ́, n shàarɛ́ zang ɓɔɔ ka teteng manɛ ɓɔɔ ri palɛ vuu shi kpang tɔ, ka ting ɓɛɛ, nɛɛ zang nimbang nandon, nyaa. N shàarɛ̀ nɔɔ nyaa tɔ, ka ɓɔɔ bɛ̀ɛ́ n leng jĩng ka nɔɔ dòo doo ziti kɔ nwani ɓɛɛ. N shàarɛ́ nɔɔ nyaa tɔkn ka wee n tɔ̀ɔ́ nɛɛ nɔɔ kpang ɓee. Naa n a tɔkn, zang ɓɔɔ naa wɔ ka naa mɛɛ gbete kpang.

³Naa nɔɔ kasɛ nɛɛ zang tusu nɔɔ nɛɛ Yeesɔ Kirisi kɔ rang yee nɛɛ bii mɛɛ. Nɔɔ zi tɔ nɛɛ Yeesɔ palɛ nɔɔ vuu ɓi naa zang ɓɔɔ lakɛ naa ka bii kpang, kpang, tusu naa vuu palɛnang ɓiɓɛ ɓi katɔ kɔ jong ka teteng manɛ.

⁴Ka ɓɔɔ zang ɓaa wu naa ka laa, bɛ̀ɛ́ lakɛ naa ka bii kpang, a nwàng ningkãari kãntang keɓe nɛɛ naa vuu palɛnang Laa. Ka ɓɔɔ ruu ɓakɛ zɔɔ nɛɛ wu ɓɛɛ, ruu lakɛ naa doo ka bii kpang kɔ. Vuu ɓɔɔ ruu naa palɛ nɛɛ nɔɔ, ruu naa ɓakɛ yuu kaa nɛɛ Kirisi, ruu walɛ naa vuu palɛnang Laa kati, ruu palɛ nɔɔ shonang nɛɛ mani.

⁵Nɔɔ gãsɛ yuu manɛ karɛ nɔɔ zirɛ, naa nɔɔ nwang doo nwannang danggn ɓɔɔ nɔɔ shing ka bii Yeesɔ Kirisi ɓɛɛ ya? Nɔɔ gãsɛ yuu manɛ ta. Nɔɔ zi tɔ niizang Kirisi nwang ka yeti manɛ. Nɔɔ nɛɛ zi kpang, bɛ̀ɛ́ vuu ɓɔɔ nɔɔ gãsɛ yuu manɛ nɛɛ mani ɓa kaka manɛ tɔ.

⁶N shing gn nɛɛ nɔɔ naa zi ditɔ nɛɛ zang gãsɛ ruu tɔ ruu daa naa zang shonang ɓɔɔ niizang ɓɔɔ Yeesɔ ɓɛɛ tɔ.

⁷Ruu gaa Laa nɛɛ nɔɔ pálɛ̀ vuu shi kpang, kpang. Wu ka ruu ɓɔɔ tɔɔ zang zi kati nɛɛ ruu ɓa vuu gãsɛnang yuu tɔ kpang, ɓi ka ruu ɓɔɔ, tɔ̀ɔ, nɔ́ɔ palɛ vuu ɓɔɔ tɔ̃ɔ kati ɓɛɛ. Naa dòo ka wee zang zí ruu naa vuu gãsɛnang ɓa ruu yuu tɔ ɓee.

⁸Ka ruu ɓɔɔ, ruu palɛ ɓuru vuu ɓɔɔ yi Ruu Tɔ̃ɔ Laa naa kaa bii, wu daa nɛɛ tĩng ɓɛɛ kɔ shɛ̃ɛning. Ruu pálɛ̀ vuu ɓɔɔ lasɛ gbalang Ruu Tɔ̃ɔ Laa ɓuru kpang.

⁹Ruu tãa ɓuru tĩnang, ruu nɛɛ lakɛ naa ka bii kpang, a kaka manɛ ɓi kagn ɓɛɛ. Ruu gaa ɓuru Laa, nɔ́ɔ nwang nyaa kiiri, ka vuu piti.

¹⁰Ka ruu nɔngkɔ, n bèé nɔɔ laa keɓe ka wee n gn nɛɛ nɔɔ nɔng gbete kpang ɓee. Tɔ̀ɔ, n nɛɛ a tɔ ka nɔng manɛ, n palɛ nɔɔ vuu kaa tɔ̀ɔ́ nɛɛ gnvɔ, nɛɛ naa vuu palɛnang ɓɔɔ Laa a m ɓɛɛ kpang. Laa a m naa nɛɛ n yi nɔɔ naa ka bii nɔɔ bangkɛ, nɛɛ n ningsi nɔɔ katɔ kpang.

¹¹Manzung ɓɔɔ ri dũng doo Laa kɔ ɓɛɛ, n di nyaa labeenang keɓe nɛɛ, “Laa wu nwang nɛɛ nɔɔ.” Nɔɔ palɛ vuu ɓɔɔ shingnɛ nɔɔ nwang nyaa kiiri ɓɛɛ, nɔ́ɔ ɓaa shoo ka vuu ɓɔɔ n kɔɔ nɔɔ ɓɛɛ, nyaa manɛ wu daa zɔɔ gbete, a nɔ́ɔ ti nwang ka nyaa zɔɔ. Laa ɓɔɔ kàsɛ̀ ruu zang katɔ, a ti shingnɛ zang ri nwáng ka nyaa zɔɔ, naa nwang ditɔ nɛɛ nɔɔ.

¹²Nɔɔ jee zɔɔ nyaa tɔ̃ɔ tɔ̃ɔ.

¹³Zang ɓɔɔ ri dũng Laa ka nihn nandon, ri jee nɔɔ nyaa.

¹⁴Tɔ̃ɔ Kpanti Yeesɔ Kirisi, nɛɛ kasɛnang ɓɔɔ Laa kasɛ zang nɛɛ mani, nɛɛ nwannang ɓɔɔ zang nwang ka nyaa zɔɔ nɛɛ Suru Laa, wu nwang nɛɛ nɔɔ nandon.