Read mumuye 2 Koranti 2 Bible Online

2 Koranti 2 - mumuye bible

2 Koranti 2

¹N mang m tɔ ka yeti mɛɛ nɛɛ, n leng jĩng tɔ̀ɔ́ nɔɔ, n lasɛ nɔɔ yeti tɔkn kpang.

²Ka ruu ɓɔɔ, n nɛɛ lasɛ nɔɔ yeti tɔ, wi yaa kati ɓɔɔ shing m yeti mɛɛ wu valɛ wiya? Yaa ɓi doo zang ɓɔɔ n lasɛ ri yeti keɓe kɔ.

³Ka ruu nɔngkɔ, n bèe nɔɔ labeenang kaɓa. N kasɛ kpang n a ka bii manɛ, yeti wu lasɛ m nɛɛ nɔɔ ɓɔɔ nɔkɔ nɛ̀ɛ́ shing m, n tãa tĩnang ɓɛɛ kpang. Ka ruu ɓɔɔ, n zi tɔ ka yeti mɛɛ, n nɛɛ tãa tĩnang tɔ, nɔɔ piti nɔɔ tãa tĩnang tɔ jong.

⁴Ɓɔɔ n bèe nɔɔ labeenang kaɓa, vuu kpãa m ka yeti dɔɔli, a yeti mɛɛ ti lasɛ katɔ gbãng gbãng. N kaa nɛɛ miiri. N kasɛ kpang, n lasɛ nɔɔ yeti kpang. N kasɛ katɔ kɔ jong, nɔɔ zi naa ɓɔɔ n kasɛ nɔɔ gbãng gbãng nandon ɓɛɛ.

⁵A naa zang ɓɔɔ kagn, lasɛ rɛɛ zang ɓɔɔ yeti ka teteng manɛ, lasɛ ɓi nkɔ yeti kpang. Lasɛ ɓi nɔkɔ nandon yeti. N kɔɔ vuu keɓe ka ruu ɓɔɔ, n kasɛ n kpãa zang kaɓa nyaa dɔɔli kpang.

⁶Gbalang ɓɔɔ zang nimbang ka teteng manɛ ri sɔɔyi, ri dàng yɔɔ kaɓa jĩng, daa tɔ.

⁷Kãntang keɓe, nɔɔ yaa wu gbalang ta, nɔɔ mã wu danggn, tɔ̀ɔ, rɛ̃rɛnang dɔɔli wu ɓa kaka ɓiɓɛ kpang.

⁸Ka ruu nɔngkɔ, n gaa nɔɔ, nɔɔ pálɛ́ vuu ɓɔɔ wu zirɛ nɛɛ nɔɔ kasɛ wu katɔ gbãng gbãng ɓɛɛ.

⁹N bèe nɔɔ labeenang kaɓa, ka ruu ɓɔɔ, n kasɛ n gãsɛ nɔɔ ɓɛɛ, n zirɛ naa nɔɔ dũng vuu ɓɔɔ n kɔɔ nɔɔ katɔ, ka vuu piti ɓɛɛ.

¹⁰Zang piti ɓɔɔ nɔɔ yaa wu gbalang vuu shi kpang ɓɔɔ wu palɛ ɓɛɛ, n yaa wu tɔ jong. Naa vuu ɓɔɔ kagn niizang, ɓɔɔ n nɛɛ yaa zang gbalang ɓiɓɛ katɔ ɓɛɛ, n yaa zang gbalang ɓiɓɛ tɔ ka tĩng Yeesɔ Kirisi ka ruu manɛ.

¹¹Tɔ̀ɔ, wu zãa Sheetang gbalang ɓɔɔ wu vang ruu ka yuu ɓɛɛ. Ka ruu ɓɔɔ, ruu zi vuu ɓɔɔ wu mang ɓi tɔ ɓɛɛ.

¹²Ɓɔɔ n a ka Torowasa, n tɔɔ, n naa kɔɔrɔ zang Ruu Tɔ̃ɔ ka yuu Yeesɔ Kirisi. N zirɛ, Kpanti Laa puu m gbalang shonang tɔ ka nɔng.

¹³A ka ruu ɓɔɔ n ĩi manzung Titu ka nɔng kpang, vuu bìí kpãa m ka yeti dɔɔli. Ka ruu nɔngkɔ, n yaa rɛɛ zang gari kaɓa, a n daa ka gari Makidoniya.

¹⁴Ruu zãa Laa tɔ, ka ruu ɓɔɔ, sɔ̀ɔ́ ruu tĩng diki diki, a ruu ɓa Sheetang yuu tɔ, ka ruu ɓɔɔ, ruu ɓakɛ yuu tɔ nɛɛ Yeesɔ Kirisi ɓɛɛ. A ti shingnɛ, zang tãlɛ yee ɓiɓɛ nɛɛ nɔng piti piti nɛɛ bìí ɓuru, naa ɓɔɔ vuu ɓɔɔ á sɛ̃ɛ tɔ̃ɔ, tálɛ̀ nɔng ɓɛɛ.

¹⁵Ruu ɓuru kaa naa vuu ɓɔɔ a sɛ̃ɛ tɔ̃ɔ, ɓɔɔ Kirisi dɔ̀ɔ́ Laa ɓɛɛ. Ka ruu ɓɔɔ, rukɔ kɔɔrɔ zang ɓɔɔ Laa ta yuu ɓarɛ kana, nɛɛ zang ɓɔɔ ri shàarɛ́ ɓarɛ kana Ruu Tɔ̃ɔ ɓɔɔ ka yuu Yeesɔ Kirisi ɓɛɛ.

¹⁶Ka nɔng zang ɓɔɔ ri shàarɛ́ katɔ, ɓi vuu ɓɔɔ a sɛ̃ɛ ɓɔɔ nyɔ zang vɔrɔ ɓɛɛ. Ka nɔng zang ɓɔɔ Laa ta yuu ɓarɛ kana, ɓi vuu ɓɔɔ a zang suru bii ɓɛɛ. Ɓu wi zunung shonang keɓe palɛnang wiya?

¹⁷Ruu ɓuru naa zang dɔɔli ɓɔɔ, Ruu Laa nwàng ri ɓarɛ kaa gbalang ɓɔɔ ri kãa vuu shaanang nɛɛ mani ɓɛɛ kpang. Ruu palɛ shonang ɓuru nɛɛ yeti gbete. Ruu kɔɔ Ruu Laa ɓuru naa ɓɔɔ Laa tusu ruu gbalang ɓɛɛ. Naa zang nyaa shonang ɓiɓɛ, a ɓɔɔ kaa naa zang shonang Yeesɔ Kirisi.