Read mumuye 2 Koranti 4 Bible Online

2 Koranti 4 - mumuye bible

2 Koranti 4

¹Gn ɓuru kɔng Laa, a á ruu shonang keɓe nɛɛ ruu palɛ. Ka ruu nɔngkɔ, ruu yaa gn naa kpang.

²Rùu dɔ̃ vuu ɓɔɔ zang waasɛ katɔ, nɛɛ vuu yusɛ̃ɛ tɔ piti nɛɛ kaa. Ruu palɛ vuu tɔ̀ɔ́ nɛɛ sèé kpang. Ruu ti risi Ruu Laa tɔ̀ɔ́ wu raa sèé kpang. Ruu kɔɔ rúu ɓɔɔ niizang ka dalɛ, ka tĩng Laa. Ruu kasɛ nɛɛ zang ɓu wu zi ka yeti ɓiɓɛ nɛɛ ruu ɓuru zang tɔ̃ɔ.

³Naa zang ɓɔɔ kagn, rúu kɔ ruu kɔɔrɔ ɓee, kpãa ri nyaa zinang katɔ. Zang keɓe, ɓi zang ɓɔɔ ri shaarɛ katɔ ɓɛɛ kɔ shɛ̃ɛning.

⁴Ri shing danggn kpang ka ruu ɓɔɔ Sheetang ɓɔɔ wukɔ kpanti koo keɓe, zãa yeti ɓarɛ vuu zinang katɔ ɓɛɛ. Zãa ri zinang nɔng ɓɔɔ yakɛ ka bii ɓarɛ katɔ. Nɔng yakɛnang ɓɔɔ a nɛɛ Ruu Tɔ̃ɔ ɓɔɔ ka yuu bannang Yeesɔ Kirisi, ɓɔɔ wu doo Laa kɔ gbãng gbãng ɓɛɛ.

⁵Ka ruu ɓɔɔ, ruu kɔɔ nɔɔ ruu ka yuu ɓuru kpang ɓɛɛ. Ruu kɔɔ nɔɔ ka yuu Yeesɔ Kirisi, nɛɛ wukɔ Kpanti, a ruu ɓuru kaa zang shonang manɛ ka ruu Yeesɔ.

⁶Laa ɓɔɔ kɔɔyi nɛɛ, “Nɔng yakɛ ta ka nɔng ɓɔɔ tɔ̀ɔ katɔ ɓɛɛ,” ɓi doo wukɔ shing nɔng yakɛnang ɓiɓɛ, yakɛ yeti ɓuru. A shingnɛ ruu zi bannang Laa ka waa nyaating Yeesɔ Kirisi.

⁷Ka ruu ɓɔɔ, a ruu vuu ɓɔɔ bang keɓe, rùu ɓɔɔ ruu nwang ɓuru naa ɓari tapɔng. Tɔ̀ɔ, zang zi kati nɛɛ naa vuu palɛnang bang keɓe, ɓi ɓɔɔ Laa, wu ɓɔɔ ɓuru kpang.

⁸Zang dǎng ruu jĩng diki diki, a ruu yaa vuu ɓɔɔ ruu palɛ ɓɛɛ ka takpang. Lee ɓɔɔ rɛ̃rɛnang ɓuru vãarɛ katɔ, a ruu yaa gn naa kaa takpang.

⁹Zang ɓɔɔ ri shing jĩng nɛɛ ruu kpang, ri dɔɔli, a Laa yaa ruu kpang. Lee ɓɔɔ zang nyɔ ruu, ruu roo ka tipi, a ruu vɔ kaa takpang.

¹⁰Diki diki ruu mãlɛ́ yuu ɓuru katɔ ka naa vɔrɔ, naa ɓɔɔ Yeesɔ Kirisi vɔ ɓɛɛ. Wee ruu nwang ningkãari ɓee, zang zi kaa wukɔ nɛɛ Yeesɔ ɓi doo ningkãari kɔ.

¹¹Ka nwannang ɓuru nandon, ruu mãlɛ́ yuu ɓuru ka naa vɔrɔ ka ruu Yeesɔ, tɔ̀ɔ, zang zi kati ka bii ɓuru ɓɔɔ vɔ katɔ keɓe, nɛɛ Yeesɔ ɓi doo ningkãari.

¹²Nwàng ɓi kaa naa ɓɔɔ ruu màlɛ̀ yuu ɓuru tɔ ka naa vɔrɔ, ka ruu nɔngkɔ, nɔɔ wàlɛ̀ suru bii tɔ ɓɛɛ.

¹³Wee Suru ɓɔɔ shing zang, zang shing danggn a zang bee vuu keɓe nɛɛ, “N shing danggn tɔ, ka ruu nɔngkɔ, n rang yee.” Wukɔ ti kagn yeti ɓuru. Ka ruu nɔngkɔ, ruu rang yee jong.

¹⁴Ruu zi tɔ, Laa ɓɔɔ wisi Kpanti Yeesɔ paa nɛɛ saa naa wisi ruu paa ditɔ jong naa ɓɔɔ wu wisi Yeesɔ ɓɛɛ. Wu tuu ruu nɛɛ nɔɔ dɔ̃ɔ gbete, wu daa nɛɛ ruu ka ting Yeesɔ.

¹⁵Vuu keɓe nandon, zang palɛ ka ruu manɛ kɔ. Tɔ̀ɔ, Laa nɛɛ pàlɛ̀ zang dɔɔli tɔ̃ɔ tɔ, nɛɛ ta yuu ɓarɛ tɔ, ri a Laa bannang kati, ri ti zãa wu.

¹⁶Ka ruu nɔngkɔ, ruu yaa gn naa kpang. Naa wee bii biling ɓuru pũng katɔ ɓee, bii suru ɓuru ri ɓi shɔɔ diki diki.

¹⁷Jĩng dannang kɔ ruu dang ɓee, bee kpang. Daa doo vuu ɓɔɔ a ɓɛɛ kpang. Jĩng dannang keɓe, atɛ vuu ɓɔɔ bang katɔ, ɓɔɔ nwang ɓi dòndòng. Vuu ɓɔɔ zang gãsɛ nɛɛ mani ɓi kagn kpang.

¹⁸Ka ruu ɓɔɔ, ruu shing jĩng ɓuru ka vuu ɓɔɔ zang zì nɛɛ jĩng ɓɛɛ kpang. Ruu shing jĩng ɓuru ka vuu ɓɔɔ zang zi nɛɛ jĩng kpang ɓɛɛ. Vuu ɓɔɔ zang zì nɛɛ jĩng, nwang ɓi sasak kpang, ɓi vuu ɓɔɔ zang zi nɛɛ jĩng kpang kɔ nwang dòndòng.